If you would like a copy of this version please contact info@davaraudiobibles.org

Dotyali New Testament, CC-BY-SA-4.0, The Love Fellowship. Dotyali New Testament Audio Bible, CC-BY-SA-4.0, Davar Partners International, The Love Fellowship, 2022.

Dotyali New Testament

Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.

तसइ बेला बप्तिस्मा-दिन्या यूहन्ना यहुदिया जिल्लाको एक उजाड ठाउँमि बसनथ्या, रे यिसो भण्नाइ प्रचार अरन्थ्या, “आफ्ना-आफना पाप अद्द छाडिबर परमेश्वरतिर फर्क, क्याकि स्वर्गको राज्य नजिक आइरइछ।” क्याकि यिन उनइ हुन, जइका बारेमि यशैया अगमबक्ता बठेइ यिसो भणिरइथ्यो:
“उजाड ठाउँमि एक जाना जोरले बोल्ल्या डाको,
प्रभुको बाटो सिदा बना।”
यूहन्नाले उटका रौ को लत्ता लाउथ्या, रे कम्मर मणि छालाको पेटी बादन्थ्या। उन फटींङा रे बन मह खान्थ्या। यरुशलेम सहर रे जम्माइ यहुदिया जिल्ला, रे यर्दन नदिका वलतिर पलतिर सब मान्सन उजाड ठाउँमि उनरा वाँ गया, रे सबले आफ्ना पापमाणि लिया रे यर्दन नदिमी यूहन्ना बठेइ बप्तिस्मा लियो। फरिसि मान्सनको समुह रे सदुकीको समुहमी हइ भौत जाना बप्तिस्मा लिनाइ यूहन्नाका वाँ आया। तिननलाइ आउनार्या धेकिबर यूहन्नाले भण्यो, “तमन बिखालु स्यापका छाउना जसाइ छौ! आउन्लाग्या परमेश्वरको क्रोध बठेइ भाग्दाइ कइले तमनलाइ चेताउनी दियो?” तमनले आफना पाप अद्द छाडिबर परमेश्वरतिर फर्क्या हउ भण्या तसइ अनसार जीवन बिता। “हाम अब्राहामका सन्तान हउ भणि आपसमी भण्न्या जन अर। क्याकि म तमनलाइ भण्नउ, परमेश्वरले यिन ढुङा बठेइ लगइ अब्राहामकिलाइ सन्तान जन्माउन सक्दाहान।” अइलइ रुखका जडा बन्चरो पडियो। तबइकिलाइ असल फल नफलाउन्या सब रुख काटीबर आगाइनी हालिन्या हुन।
“साँच्चि, तमनले आफना पाप अद्द छाडिबर परमेश्वरतिर फर्कनाइलाइ म तमनलाइ पानिले बप्तिस्मा दिन्नाछु तर म पछा आउन्या म भण्ना महान छन, जइका जुताका ताना खोलल्या लायको म आथिन। उनले तमनलाइ पबित्र आत्मा रे आगाले बप्तिस्मा दिन्या हुन। अन्न निफण्नाइ उनले हातमि सुप्पो समाइ सक्या छ। निफुणिबर अन्न भकारीनि जमा अद्द्या हुन, तर भुसलाइ कभइ ननिम्द्या आगाइनी बाल्दिन्या हुन।”


तइ बेला येशू गालील जिल्लामि आया रे यूहन्ना बठेइ बप्तिस्मा लिनाइलाइ यर्दन नदिमी गया। यूहन्नाले उनलाइ यिसो भणबर रोक्दाइ खोज्यो, बरु मइले ब तम बठेइ बप्तिस्मा लिनु पड्डया हो, रे कि तम मेरा वाँ आउँन्या हउ? येशूले यूहन्नालाइ भण्यो, अइल इसोइ हुन दिय। क्याकि यिसेरी हामले सब धर्मकर्म पुरा अद्दु पणन्छ। तब यूहन्ना राजि भया। तइ पछा येशू बप्तिस्मा लिबर उतन्जेइ पानी बठेइ मल्तिर निकल्या, तइ बेला अग्गास उगड्यो, रे पबित्र आत्मा ढुकुरका रुपमि आफमी ओलीबर आया धेक्यो। तब परमेश्वरले स्वर्ग बठेइ यिसो भण्यो, “यिन मेरो प्यारो चेलो हुन, रे यिनसित म भौत खुशी छु।”

Phulaphula i मत्ती 3