Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so a le jʉ́ɔ páʼ alāʼ á kɔ́ʼ nzá épúp, ḿbē mé ndo lekwɛ̄t, ńnáŋ á esī, nnɔ yí é tshóte nnɛ̄t mé lezēŋ tsí. Á lɛ nzī á lezīʼne á wɔ́p, ńdé ŋ́gɛ:
«Eshhʉ̄ mbɔŋ a á ŋiŋ yīi, a zhɛɛ́ á ntē yí á légɛ, yí é mvhɔ Ndém, ŋ́gɔ́ á te kuʼ ánɛ azō,
a á ndáʼ nzī á lejūʼ á mbɔŋɔ́, á ntē Lefɔ Ndém.
Eshhʉ̄ mbɔŋ a á ŋiŋ yīi, a á te ŋak,
a a shʉʼ enáŋ ánɛ atsáʼ zīi, Ndém a le laʼnēē.
Eshhʉ̄ mbɔŋ a á ŋiŋ yīi, a á tsetsɔŋɔ ndāa,
Ndém a a shʉʼ eláŋte á yí.
Eshhʉ̄ mbɔŋ a á ŋiŋ yīi, nzi leghʉ páʼ Ndém a á si ŋkɔ̄ŋɔ, e zaáŋ á yí tɛʼ.
Ndém a a shʉʼ etswíte á yí á leghʉ páʼ,
a á si ntsáa épúp.
Eshhʉ̄ mbɔŋ a á ŋiŋ yīi, a á tsá‑melaʼ,
Ndém a a shʉʼ etsá
melaʼ mí azí.
Eshhʉ̄ mbɔŋ a á ŋiŋ yīi, ntē yí é laneé,
a a fú ejʉ́ɔ á Ndém.
Eshhʉ̄ mbɔŋ a á ŋiŋ yīi, a á si mbhīɛ apwɛne,
Ndém a a shʉʼ etɔ́ŋ
á yí lɛ méŋ yí.
Eshhʉ̄ mbɔŋ a á ŋiŋ yīi, mɛ́ é si ndʉɔ́ʼɔ á yí, melaʼ mīi a á si ŋghʉ̄ɛ ajū mīi, Ndém a kɔ̄ɔŋ.
A a shʉʼ ejúʼ á mbɔŋɔ́, á ntē Lefɔ Ndém.
Epuɔ é nɔŋ nzɔ̄tɛ á wɛ́, ńnɔ̄ŋ ndʉɔ́ʼɔ á wɛ́, ńnɔ̄ŋ eshúŋɔ á ntií ntiī epoó‑anu ánɛ pɛ, melaʼ mīi pɛ é epuɔ pá, mbɔ pɛ é meshhʉ̄ mbɔŋ. Á shʉʼɛ ŋgɔ́ épúp, pɛ enáŋ mé lekāk, ŋ́gáŋte, melaʼ mīi, Ndém a lē eféŋ á mía mía ntaŋá á mbū pɛ, á athʉ́ lephū. Á épúp páʼā, ŋ́gɔ́ páʼ mɛ́ le lʉɔ́ʼ metswi‑ŋke Ndém pīi, é le té njhʉ̄ ntɔ́k, á mvhɔ pɛ épúp.


«Pɛ é si ŋgɔ́ ŋgwāŋ á esī atsetsáʼ. Ŋgwāŋ é piŋɛ nnáŋ tɛ ncʉ́ʼɛ ndáp lapé, é gaá tɛ́ nzɛ́t ŋgwāŋ ŋ̄? Mbɔ mɛ́ gɔ le zéŋ ndɔk ŋghʉ̄ azō ɔ́, mbɔ mɛ́ e maʼ á apɛ́, epuɔ menɔŋ e egē etsia, ńnēŋte. Pɛ é si ŋgɔ́ ŋkaʼ ŋgɔŋ ntsem. Tésɔŋ yīi a tshií á ndo lekwɛ̄t, a gɔ egaá tɛ́ ndʉ̄ɔne é? Mɛ́ té lɛtté á láam páʼā, ŋ́gɔ̄ ekápte mé ŋgwʉ́ŋ ɛ́. Mɛ́ lɛtteé á láam páʼā, ŋ́gɔ̄ etshí mé athʉ́, ŋ́gɛ a ekɛ̄ʼɛ epuɔ metsem pīi, pɔ́ puú ŋgɔ́ á ŋgyā. Ndeŋ ndeŋ épúp, ŋkaʼ wɛ́ e ekɛ̄ʼɛ efʉʼ metsem, á tsetsɛlɛ epuɔ menɔŋ. Púp, pɔ́ ejʉ́ɔ menu membɔŋ mīi, pɛ é si ŋghʉ̄ɛ, ŋ́gūʼte á Mɔʼɔ́ wɛ Ndém yīi, a á athʉ́ lephū.

«Ndɛ́ʼ pɛ ekwāaŋ ŋ́gɛ, meŋ kɛɛ́ eshʉʼɛ á ŋgɔŋ, á mbík mbé mīi, Ndém a le yá á mbū Mɔɔ́sɛ, mbɔɔ anu zīi, metswi‑ŋke Ndém é le léē. Ŋgáŋ, meŋ kɛɛ́ te shʉ̄ʼɛ á mbíkɛ ɛ́. Meŋ kɛɛ́ eshʉʼɛ, éghʉ mɛ́ ecūŋte njúʼ. Meŋ a shúŋ á wɛ́ á kwaʼ anuúnē. Lephū pɔ́ esī atsetsáʼ é zi mbú nnáŋ áa lɛ akɔ̄ lɛ́, méŋ azō, tsɔ méŋ agáʼ azō páʼa, a á le kúmne ánɛ mbé mīi, Ndém a le yá á mbū Mɔɔ́sɛ, té gɔ́ yīi ajūɔ tsem zīi, mbé mɛ́t é lʉ́ɛ́, á po ɔ́. Púp, ŋiŋ yīi a á fa, á méŋ agáʼ lepé wuɔ mɛ́t, ńzéŋ nzíʼne emɔ̄ʼ epuɔ á leghʉ páʼ yí, Ndém a a láʼ enéŋ esē á athū yí, á ntē Lefɔ Ndém. Ŋiŋ yīi a á piŋ nzīŋ páʼ mbé mɛ́t é si nzɛ́ttɛ, ńzéŋ nzíʼne á mbū emɔ̄ʼ epuɔ á leziŋ épúp, Ndém a a láʼ ekɔ́ʼne nzwiŋ yí, á ntē Lefɔ Ndém. Á épúp, tɛ́ meŋ shúŋɔ á wɛ́ ŋ́gɛ, ajū mīi Ndém a á si ŋkɔ̄ŋɔ ŋ́gɛ mɛ́ eghʉ̄, pɛ gɔ te ghʉ̄ tɛ ntɔ́k wɔ kɛ́ʼte‑mbé Ndém, mbɔɔ epuɔ Falísia á, ŋgáŋ, mbɔ pɛ te e fú ekó á ntē Lefɔ Ndém ɛ́.


«Pɛ lé júʼ páʼ, mɛ́ le lé á mbū wɔ maŋgānjʉʼ pímpɛ ŋ́gɛ: “Ndɛ́ʼ ŋiŋ á láʼ aleʼé nzwhí á ŋiŋ.” Ŋiŋ a néŋɛ aleʼé nzwhí á ŋiŋ, mɛ́ lɔk á yí ŋgʉ̄ɔ mé mvhɔ asāʼ. Meŋ á ke mbiŋ ndé á mbū pɛ ŋ́gɛ: ŋiŋ a záŋa á lɔ́ŋ á mbū ŋiŋ, mɛ́ lɔk á yí ŋgʉ̄ɔ mé mvhɔ asāʼ. Ŋiŋ yīi a á tɔ́ŋ mmɔʼ lɛ atsetseŋ, mɛ́ lɔk á yí ŋgʉ̄ɔ á mvhɔ wɔ sáʼ‑ŋgɔŋ. Ńtɔ́ŋ mmɔʼ lɛ te zhɛ́‑Ndém, mɛ́ gɔ á yí mmāʼ á ntē mmók, á alāʼ ŋgʉɔ̄ʼ. Ŋiŋ a nɔŋ ndɔ̄kɔ etsō epɔʼ tsí eshʉ̄ʼɛ, éyá á mbū Ndém á ajʉʼ nnɔɔ́ŋ‑epɔʼ, ŋ́kó éwú ŋkímte á légɛ, mmɔʼ ŋiŋ a á si ndāʼa á yí, á lɛ ntshī etsō epɔʼ á ajʉʼ nnɔɔ́ŋ‑epɔʼ mɛ́t néŋ, éswáŋ nnɛ̄t ŋgʉɔ njʉ́ɔ á ŋgaŋ, pɔ́ yí cuŋte aziɛ́ anu, tɛ́ á shʉʼ ŋgyá etsō epɔʼ tsí á mbū Ndém.
«Pɛ ŋiŋ é wiɛ njú, á swīŋ á wú tɛ pɛ yí é nɔ̄ŋ ŋgʉ̄ɔ mé mvhɔ asāʼ, pɛ yí é zho á mɛnzhɛ o egɔ̄ɔ ekém, ḿbɔ́k á yí á leyā á wú á mbū wɔ sáʼ‑ntsaŋ, wɔ sáʼ‑ntsaŋ é kó ŋgyá á wú á mbū wɔ píp‑atʉɛ́, wɔ píp‑atʉɛ́ é maʼ á wú á ŋgyā atʉɛ́. Meŋ shúŋɔ á wú á kwaʼ anuúnē ŋ́gɛ, o gɔ le láʼ ntó á atʉɛ́ mɛ́t, té gɔ́ yīi, o ó pú ntɔ̄ŋ njú mɛ́t ntsem ntsem ɛ́.


«Pɛ lé júʼ páʼ mɛ́ le lé ŋ́gɛ: “Ndɛ́ʼ ŋiŋ á láʼ aleʼé ŋghʉ̄ agā.”» Meŋ á ké mbiŋ ndé á mbū pɛ ŋ́gɛ, ŋiŋ a cʉʉ á nzwí ŋiŋ tɛ esé, á zhɛ́ á légɛ, a á ndáʼ ŋghʉ̄ agā á ntē yí, pɔ́ menzwí mɛ́t. Lezēk cú etsi ŋkɔʼɔ́ apū ete, é nɔŋ ntshónɛ á wú nnéŋɛ ánɛ mefa, o etsɔ́ʼ ŋgwáʼ tɛ éwú. Á mbɔŋ á mbū wu, á lepī amɔ̄ʼ ajʉʼ nnɛ̄t jú, ńtɔ́k á wú á lezɛ̄t mé mbe nnɛ̄t ju ntsem, mɛ́ piŋ mmāʼ á wú á ntē mmók, á alāʼ ŋgʉɔ̄ʼ. Apū ete jú, á nɔŋ ntshónɛ á wú nnéŋɛ ánɛ mefa, o ezáʼ ŋgwáʼ tɛ éwú. Á mbɔŋ á mbū wu, á lepī amɔ̄ʼ ajʉʼ nnɛ̄t jú, ńtɔ́k á wú á lezɛ̄t mé mbe nnɛ̄t ju ntsem, mɛ́ piŋ mmāʼ á wú á ntē mmók, á alāʼ ŋgʉɔ̄ʼ.


«Mɛ́ le zéŋ ndé ŋ́gɛ: “Ŋiŋ a gɔ́ éyi a a juŋ á nzwí yi, á ge ejuŋ, ńtí akɛtte á lelɔk njūŋ á yí, ŋ́gyá á mbū yí.” Meŋ á ké mbiŋ ndé á mbū pɛ ŋ́gɛ, ŋiŋ a juŋɔ á nzwí yí, té gɔ́ yīi menzwí mɛ́t a á ghʉ agā, mbɔ a lɔkɔ ntshónɛ á yí nnéŋɛ ánɛ agā. Ŋiŋ a piŋɛ ndɔ́ á menzwí yīi, ndō yi a á juŋ á yí, mbɔ a á ghʉ agā.

«Pɛ lé zéŋ njúʼ páʼ, mɛ́ le lé á mbū wɔ maŋgānjʉʼ pímpɛ ŋ́gɛ: “Ndɛ́ʼ ŋiŋ á láʼ ŋkā meka, ńdɔkɔ ndátɛ. Ŋiŋ a pɔŋteé á yí á leghʉ á mbū Ndém, ajū mīi, a á mvéŋ tɛ ŋkā á yí á leghʉ.” Meŋ á ké mbiŋ ndé á mbū pɛ ŋ́gɛ: ndɛ́ʼ ŋiŋ, á zi mbú ŋkā anu. Ndɛ́ʼ ŋiŋ á lɔk lephū ŋkā anu, melaʼ mīi á ajʉʼ zīi, Ndém a naáŋ éwú esáʼa lefɔ tsí. Ndɛ́ʼ ŋiŋ á lɔk esī atsetsáʼ ŋkā anu, melaʼ mīi á ajʉʼ zīi, Ndém a tshíte mekhu mí éwú. Ndɛ́ʼ ŋiŋ á lɔk Yelósalɛm ŋkā anu, melaʼ mīi a á si ŋgɔ́ á tésɔŋ mía mía efɔ. Te lɔ̄ɔk athū nnɛ̄t jú ŋkā anu, melaʼ mīi o gɔ le kūʼ á wú á leghʉ, tɛ tsɔ taʼ lenɔŋ ntsɔʼ cú, é sɛt nnɛ̄t efók kɛ́ eséŋ ɛ́. O nɔŋ eshúŋnɛ, o gē egɛ ŋŋ, á gɔ́ yīi o lɔkɔ mvéŋɛ á leghʉ. Ŋ́gē egɛ ŋgáŋ, á gɔ́ yīi o lɔkɔ ndʉ̄ʼɛ á leghʉ. Anu ndɛʼɛ zīi, o piŋɛ ntswīʼnɛ éwú lā, á cʉ́ʼɛ efhɔ́ɔ áa mbū Sɛ́ta.


«Pɛ lé júʼ páʼ mɛ́ le lé ŋ́gɛ: “Ŋiŋ a píkɛ lezēk ŋiŋ, mɛ́ zéŋ mbík etsí. Ńtsɔ́ʼ lesɔŋ ŋiŋ, mɛ́ zéŋ ntsɔ́ʼ etsí.” Meŋ á ké mbiŋ ndé á mbū pɛ ŋ́gɛ: ndɛ́ʼ ŋiŋ á pʉʼ anu á mbū ŋiŋ yīi, a á ghʉ anu tepɔŋ ánɛ yí. A cʉ́ʼɛ épúp, mbɔ ŋiŋ a témɛ apū á letuúŋ wu, á ŋkɔʼɔ́ apū ete, o ezéŋ mbēkne mmɔʼ ŋkɔʼɔ́, ŋ́gyá ŋ́gɛ, a epú emakne ntém. Ŋiŋ a nɔŋ ndɔ̄kɔ á wú, ŋgʉ̄ɔ mé mvhɔ ŋgaŋ asāʼ, á eswiīŋ wu, étswí nzhó efwɔ̄k ju, o pú ncʉ́ʼ, á pú mmākne ézi ntē éwú, ńtswí. Ŋiŋ a lɔkɔ mbʉʼ ŋgɔ̄ á wú ŋ́gɛ, o ekʉ̄ɛ apiʼ zí, ńdɔk nzīŋ á taʼ kílo, o tswíʼ ndɔ̄k nzīŋ mekílo mémpīa. Ŋiŋ a lɔ́ɔ á wú azō, o eyá á yí. Ŋiŋ a nɔŋ ŋgɔ̄ á fuū wu azō, ndɛ́ʼ o etém nzem ŋgʉ̄ɔ.

«Pɛ lé júʼ páʼ mɛ́ le lé ŋ́gɛ: “Kɔŋ á ŋiŋ ntsem, ḿbiŋ mbā á ŋgaŋ mbo wu.” Meŋ á ké mbiŋ ndé á mbū pɛ ŋ́gɛ: pɛ ekɔ̄ŋ megaŋ mbo pɛ́, éswíŋte á Ndém á athū epuɔ pīi, é lʉɔ́ʼɔ á wɛ́. Pɛ eghʉ̄ épúp, tɛ́ ndɔk ntswī á kwaʼ anuúnē á légɛ, pɛ é si ŋgɔ́ ewɔŋkhʉ̄ Mɔʼɔ́ wɛ yīi, a á athʉ́ lephū. A ghʉʉ̄, nu yi á kyá ánɛ epuɔ tepɔŋ, mbɔɔ ánɛ epuɔ membɔŋ. Ŋ́ghʉ̄, mbeŋ é lú ánɛ epuɔ pīi, é kuʼteé lepé tsí, mbɔɔ ánɛ epuɔ pīi é té kúʼte. O lɛ ŋkɔ̄ŋ áa ndaʼ ŋiŋ yīi, a zeéŋ ŋkɔŋ á wú, mbɔ Ndém a a yá ntaŋá á mbū wu, ánɛ akɔ̄ zīi o ó tswhi ŋghʉ̄ ʉ̄? Tɔ́ŋ ŋ́gɛ wɔ tswí‑ncup alāʼ, é zeéŋ nnɔŋ ŋghʉ̄ɛ azɔ́p áa épúp. O lɛɛ nnɔ̄ŋ ntsāʼtɛ áa ndaʼ méŋ mɔ́ wu, mbɔ o ó tswhi ŋghʉ̄ akɔ̄ eswhī í? Tɔ́ŋ ŋ́gɛ wɔ te zhɛ́‑Ndém, é zeéŋ nnɔŋ ŋghʉ̄ɛ azɔ́p áa épúp. Pɛ púu ŋkúʼte menu muɔ mɛ́t ntsem, mbɔ pɛ e gɔ́ té alɔ́ʼ, ńdeŋ ndeŋ páʼ Mɔʼɔ́ wɛ yīi, a á athʉ́ lephū, a á té alɔ́ʼ. »

Phulaphula i Matío 5