Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወእምድኅረ ዝንቱ ሖረ እግዚእ ኢየሱስ ውስተ ገሊላ ወኢፈቀደ ይሑር ምድረ ይሁዳ እስመ የኀሥሡ አይሁድ ይቅትልዎ። ወቀርበ በዓለ መጸለቶሙ ለአይሁድ። ወይቤልዎ አኀዊሁ ለእግዚእ ኢየሱስ ፍልስ እምዝየ ወሑር ብሔረ ይሁዳ ከመ አርዳኢከኒ ይርአዩ ግብረከ ዘትገብር ወይእመኑ። እስመ አልቦ ዘይገብር ምንተኒ ጽሚተ ወይፈቅድ ክሡተ ይኩኖ ወእመሰ ዘንተ ትገብር አርኢ ርእሰከ ለዓለም። እስመ አኀዊሁኒ ኢአምኑ ቦቱ። ወይቤሎሙ እግዚእ ኢየሱስ ጊዜየሰ ዓዲ እስከ ይእዜ ኢበጽሐ ወጊዜ ዚኣክሙሰ ዘልፈ ድልው ውእቱ። ለክሙሰ ኢይክል ዓለም ጸሊኦተክሙ ወሊተሰ ይጸልአኒ እስመ አነ ስምዕ ላዕሌሁ ወእዛለፎ በከመ እከየ ምግባሩ። አንትሙሰ ዕርጉ ውስተ ዝንቱ በዓል ወአንሰ ኢየዐርግ ይእዜ ውስተ ዝንቱ በዓል እስመ ዓዲ ኢበጽሐ ጊዜየ። ወከመዝ ይቤሎሙ ወነበረ ውስተ ገሊላ። ወዐሪጎሙ አኀዊሁ ለበዓል ውእተ አሚረ ዐርገ ውእቱኒ ጽሚተ ወአኮ ገሃደ። ወአኀዙ አይሁድ ይኅሥሥዎ በበዓል ወይቤሉ አይቴ ውእቱ ዝክቱ። ወብዙኀ አንጐርጐሩ ሕዝብ በእንቲኣሁ ወቦ እለ ይቤሉ ኄር ውእቱ ወካልኣን ይቤሉ አልቦ አላ ያስሕቶሙ ለሕዝብ። ወባሕቱ ክሡተሰ አልቦ ዘተናገረ በእንቲኣሁ በእንተ ፍርሀቶሙ ለአይሁድ። ወበማእከለ መዋዕለ በዓል ዐርገ እግዚእ ኢየሱስ ምኵራበ ወአኀዘ ይምሀር። ወአንከሩ አይሁድ ምህሮቶ እንዘ ይብሉ እፎ የአምር ዝንቱ መጽሐፈ ዘኢመሀሮ መኑሂ። ወአውሥአ እግዚእ ኢየሱስ ወይቤሎሙ ትምህርትየሰ ኢኮነት እንቲኣየ አላ እንቲኣሁ ለዘፈነወኒ። ወዘሰ ይፈቅድ ይግበር ሥምረቶ ውእቱ የአምር ከመ እምኀበ እዚአብሔር ውእቱ ትምህርትየ ወአኮ ዘእምኀቤየ ዘእነግር። ወዘሰ ለርእሱ ይነግር ተድላ ርእሱ የኀሥሥ ወዘሰ ይፈቅድ ያድሉ ለዘፈነዎ ጻድቅ ውእቱ ወአልቦ ዐመፃ በኀቤሁ። አኮኑ ሙሴ ወሀበክሙ ኦሪተ ወአልቦ አሐዱሂ እምኔክሙ ዘይገብራ ለኦሪት ለምንት እንከ ተኀሥሡ ትቅትሉኒ። ወአውሥኡ ሕዝብ ወይቤልዎ ጋኔንኑ ብከ መኑ የኀሥሥ ይቅትልከ። ወአውሥአ እግዚእ ኢየሱስ ወይቤሎሙ አሐደ ግብረ ገበርኩ ወኵልክሙ አንከርክሙ። ወበእንተ ዝንቱ ወሀበክሙ ሙሴ ግዝረተ ወኢኮነት እምኀበ ሙሴ አላ እምአበው ይእቲ ወበሰንበት ትገዝርዎ ለሰብእ። ወእመሰ በሰንበት ግዝረተ ይነሥእ ብእሲ ከመ ኢይሰዐር ሕጉ ለሙሴ ለምንት እንከ ትግእዙኒ ለእመ አሕየውክዎ ለብእሲ ኵለንታሁ በሰንበት። ኢትፍትሑ በአድልዎ ለገጽ አላ ፍትሐ ጽድቅ ፍትሑ። ወቦ እለ ይቤሉ እምሰብአ ኢየሩሳሌም አኮኑ ዝንቱ ውእቱ ዘየኀሥሡ አይሁድ ይቅትልዎ። ወናሁ ገሃደ ይትናገሮሙ ወአልቦ ዘይቤልዎ ምንተኒ አእመሩኑ እንጋ መላእክት ወሊቃውንት ከመ ዝንቱ ውእቱ ክርስቶስ በአማን። ወባሕቱ ለዝንቱሰ ነአምሮ እምአይቴ ውእቱ ወክርስቶስሰ አመ ይመጽእ አልቦ ዘየአምሮ እምኀበ ይመጽእ። ወአልዐለ ቃሎ እግዚእ ኢየሱስ በምኵራብ እንዘ ይሜህር ወይቤ ኪያየኑ ተአምሩኒ ወተአምሩኑ እምኀበ አይቴ አነ ወአኮ ለልየ ዘመጻእኩ አላ ሀሎ ጻድቅ ዘፈነወኒ ዘኢተአምርዎ አንትሙ። ወአንሰ አአምሮ እስመ እምኀቤሁ አነ ወውእቱ ፈነወኒ። ወፈቀዱ የአኀዝዎ ወባሕቱ አልቦ ዘአንሥአ እዴሁ ላዕሌሁ እስመ ዓዲ ኢበጽሐ ጊዜሁ ወእምውእቶሙ ሰብእ ብዙኃን እለ አምኑ ቦቱ። ወይቤሉ አመ ይመጽእ ክርስቶስ ቦኑ ፈድፋደ ተኣምረ ዘይገብር እምዘገብረ ዝንቱ። ወሰምዑ ፈሪሳውያን ከመ አንጐርጐሩ ሕዝብ በእንቲኣሁ ወፈነዉ ሊቃነ ካህናት ወፈሪሳውያን ወዓልያኒሆሙ ከመ የአኀዝዎ። ወይቤሎሙ እግዚእ ኢየሱስ ዓዲ ኅዳጠ መዋዕለ ሀሎኩ ምስሌክሙ ወእምዝ አሐውር ኀበ አብ ዘፈነወኒ። ተኀሥሡኒ ወኢትረክቡኒ ወኀበ አነ አሐውር አንትሙ ኢትክሉ መጺአ። ወይቤሉ አይሁድ በበይናቲሆሙ አይቴኑ ሀለዎ ለዝንቱ ይሑር ዘኢንክል ረኪቦቶ ንሕነ ውስተ ብሔረ አረሚኑ የሐውር እንጋ ወይሜህሮሙ ለአረሚ። ምንትኑ ዝንቱ ነገር ዘይብለነ ተኀሥሡኒ ወኢትረክቡኒ ወኀበ አነ አሐውር አንትሙ ኢትክሉ መጺአ።

ወበደኃሪት ዕለት ዘበዓል ዐባይ ቆመ እግዚእ ኢየሱስ ወከልሐ ወይቤ ዘጸምአ ይምጻእ ኀቤየ ወይስተይ። ወዘሂ የአምን ብየ በከመ ይቤ መጽሐፍ «አፍላገ ማየ ሕይወት ይውኅዝ እምከርሡ።» ወዘንተ ይቤ በእንተ መንፈስ ቅዱስ ዘሀለዎሙ ይንሥኡ እለ የአምኑ ቦቱ እስመ ዓዲ ኢመጽአ መንፈስ ቅዱስ በእንተ ዘኢተሰብሐ ዓዲሁ እግዚእ ኢየሱስ ክርስቶስ።

ወብዙኃን እምሕዝብ ሰሚዖሙ ዘንተ ነገረ ይቤሉ አማን ነቢይ ውእቱ ዝንቱ። ወቦ እለ ይቤሉ ክርስቶስ ውእቱ ወመንፈቆሙ ይቤሉ ቦኑ እምገሊላ ይመጽእ ክርስቶስ። አኮኑ ይብል መጽሐፍ «ከመ እምነ ዘርዐ ዳዊት ወእምነ ቤተ ልሔም ሀገሩ ለዳዊት ይመጽእ ክርስቶስ።» ወተናፈቁ ሕዝብ በበይናቲሆሙ በእንቲኣሁ። ወቦ እለ ፈቀዱ የአኀዝዎ ወባሕቱ አልቦ ዘአንሥአ እዴሁ ላዕሌሁ። ወተሠውጡ ወዓልያኒሆሙ ኀበ ሊቃነ ካህናት ወፈሪሳውያን ወይቤልዎሙ እሙንቱ እፎኑመ ዘኢያምጻእክምዎ። ወአውሥኡ ወዓልያኒሆሙ ወይቤልዎሙ ግሙራ ኢተናገረ ሰብእ ዘከመ ተናገረ ውእቱ ብእሲ። ወአውሥኡ ፈሪሳውያን ወይቤልዎሙ ትጌግዩኑ አንትሙኒ። ቦኑ እመላእክት ወእምፈሪሳውያን እለ አምኑ ቦቱ። ዘእንበለ እሉ ጊጉያን ሕዝብ እለ ኢየአምሩ ኦሪተ ወእሙንቱሰ ርጉማን። ወይቤሎሙ ኒቆዲሞስ ዘሖረ ኀቤሁ ለእግዚእ ኢየሱስ ቀዲሙ ሌሊተ አሐዱ እምኔሆሙ። ኦሪትክሙኑ ትኴንኖ ለሰብእ ዘእንበለ ይሕትትዎ ቅድመ ወያእምሩ ግብሮ ዘገብረ። ወአውሥእዎ ወይቤልዎ አንተሂ እምገሊላኑ ትብል አንተ ኅሥሥ መጽሐፈ ትርአይ ከመ እምገሊላ ኢይትነሣእ ነቢይ። ወገብኡ ኵሉ ለለአሐዱ ውስተ ቤቶሙ።

Phulaphula i ወንጌል ዘዮሐንስ 7