Dhundari NLCI (NT) NonDrama

Dhundari NLCI (NT) Drama

फेर ईसु एक नावड़ा म जा चढ़यो अर झील क पेलाड़ी खुदका नगर मं आग्यो। लोगबाग एक लकवा का बेमार न्अ खाट मं पटकर उं कन्अ ल्याया। ईसु ज्दया वांका बस्वास न्अ देख्यो तो उं लकवा का बेमार न्अ खियो, “बेटा, हिम्मत रखाण! थारा पाप छमा होगा।” ज्दया एकात धरम सखाबाळा आमा-सामा बतळाबा लाग्या क, “यो मनख खुदका बचना सुं परमेसर को नरादर करर्यो छ।”
वांका ये बच्यार जाणर ईसु खियो, “थांका मन मं बरा-बच्यार क्युं आर्या छ? साऊटो सीधो कांई छ? या खेबो क ‘थारा पाप छमा होया’ या यो खेबो ‘क ऊबो होर चाल द्अ’ जिसुं थे जाण सको क धरती प पाप छमा करबा की सक्‍ती मनख का छोरा कन्अ छ।” ईसु लकवा का बेमार न्अ खियो, “ऊबो हो खुदका बछावणा उठा'र घरा चलजा।”
वो लकवा को बेमार ऊबो होयो अर घरा चलग्यो। ज्दया उं जळा का मनख या देख्या तो वे ड़रपग्या अर परमेसर की महमा करबा लागग्या ज्यो मनखा न्अ अस्यान की सक्‍ती दियो छ।


ईसु ज्दया उण्डअ सुं जार्यो छो तो उन्अ चुंगी का दफतर मं एक मनख बेठ्‍यो दिख्यो। उंको नांऊ मत्ती छो। ईसु उन्अ खियो, “म्हारअ पाछ्अ आजा।” तो मत्ती ऊबो होयो अर उंक्अ पाछ्अ होग्यो। अस्यान होयो क ईसु मत्ती क घरा घणासारा चुंगी लेबाळा अर पापी मनखा की लार खुदका चेला समेत रोटी खार्यो छो तो फरीसी उन्अ देख्या। वे ईसु का चेला न्अ बुज्बा लागग्या क, “थांको गरूजी चुंगी लेबाळा अर पापी मनखा की लार रोटी क्युं खार्यो छ?” या सुणर ईसु वान्अ खियो, “चोखा भला न्अ नई पण रोगला न्अ बेद की जुरत होव्अ छ। ई बजेसुं थे जार सीखो क सास्तर मं ईको मतबल कांई छ, ‘म बली कोन्अ चाऊ पण दीया चाऊ छु।’ मं धर्मया न्अ नई, पण पाप्या न्अ बलाब्अ आयो छु।”


फेर बतिस्मा देबाळा यूहन्‍ना का चेला ईसु कन्अ आया अर उन्अ बुज्या, “मे अर फरीसी घणा बरत करां पण थारा चेला बरत क्युं कोन्अ करअ?”
फेर ईसु वान्अ बतायो, “लाड़ा का साथी बायला, ज्दया ताणी लाड़ो वांकी लार रेव्अ, कळेस कर सक्अ छ कांई? पण वे दन बी आवला ज्दया लाड़ो वासुं न्यारो होवलो अर फेर उं बगत वे दुखी होवला अर बरत करअला।
“बना सकड्‍या नया लत्ता की तरकी कोई बी पराणा लत्ता क कोन्अ लगाव्अ क्युं क वा तरकी उं लत्ता न्अ सावटो फाड़ देव्अली अर उंको ठेखलो सावटो चोड़ो हो जावलो। नया दाखरस न्अ पराणी मसक मं कोन्अ भर्यो जाव्अ नतरक्अ पराणी मसक फाट जाव्अली अर दाखरस ढ़ुळ जावलो अर वे दोनी खतम हो जावला। ई बजेसुं लोगबाग नया दाखरस न्अ नुई मसक मेई भरअ छ जिसुं दाखरस अर मसक दोनी चोखी रेव्अ छ।”


ईसु ज्दया वा मनखा न्अ ये बाता बताई रयो छो ज्दयाई यहूदी धरम-सभा को अधिकारी उंक्अ सांकड्अ आयो अर उंक्अ साम्अ गोढ़ा टेकर अरदास कर खियो, “अबार-अबार म्हारी छोरी मरगी। अर तु चालर उंक्अ उपरअ हाथ मेल देव्अ तो वा पाछी जीवती हो जाव्अली।” उं बात प ईसु उबो होयो अर चेला समेत उंकी लार चलग्यो। उण्डअ एक अस्यान की बेरबानी छी जिक्अ बारा बरस सुं लोई बेबा की बिमारी छी। वा पाछ्अ सुं ईसु क सांकड्अ आई अर उंका लत्ता की कोर क हाथ लगाली। वा मन मं बच्यार करी छी क “म उंका लत्ता क चन्योक बी हाथ अड़ाल्यूली तो नीका हो जाऊली।” ईसु उंकाड़ी मुड़र खियो, “बेटी हिम्मत रांख। थारो बस्वास थन्अ नीका कर दियो।” अर वा बेरबानी उं घड़ी नीका होगी। ज्दया ईसु अधिकारी क घरा पुच्यो तो वो बनसरी बजाबाळा अर मनखा न्अ रोवणा पिटणा करतो देख्यो तो खियो, “हट जावो, छोरी मरी कोन्अ पण सुती छ” जिसुं वे उंकी हांसी करबा लागग्या। ज्दया उं जळा न्अ बारअ नखाळ दिया तो ईसु घर क माईन्अ गियो। ईसु उं छोरी को हाथ पकड़र उठायो अर वा उठ'र ऊबी होगी। ईको समचार देस मं सबळी ठार फेलग्यो।

ईसु ज्दया उण्डअ सुं जाबा लाग्यो तो दो आन्धा मनख उंक्अ पाछ्अ आया अर वे हाक्‍का पाड़रया छा, “ओ दाऊद का छोरा, म्हाक्अ उपरअ दीया कर।” ईसु ज्दया घर क माईन्अ पुच्यो तो वे आन्धा उंक्अ सांकड्अ आया। ज्दया ईसु वान्अ खियो, “थान्अ बस्वास छ कांई क म थान्अ फेर आंख्या दे सकुं छु?” वे बोल्या, “हां परबु।”
ई बात प ईसु वांकी आंख्या क हाथ लगार खियो, “थांक्अ बेई वस्यान ई होव्अ जस्यान को थांको बस्वास छ।” अर आन्धा न्अ आंख्या मलगी। फेर ईसु वान्अ चतार खियो, “ईका बारा मं कोई न्अ तोल कोन्अ पड़णी चायजे।” पण वे उण्डअ सुं जार ई समचार न्अ च्यारूमेर फेला दिया।

ज्दया वे दोनी उण्डअ सुं जारया छा तो एकात मनख ईसु क सांकड्अ एक गुंगा न्अ लेर आया। गुंगा मं दुष्टात्मा बड़ मेली छी अर जिसुं वो कांई बी कोन्अ बोल सक्अ छो। ज्दया उं दुष्टात्मा न्अ नखाळ दिया तो वो गुंगो, ज्यो पेली कांई बी कोन्अ बोल सक्अ छो, बोलबा लागग्यो। ज्दया उं जळा का मनख अचम्बा मं होर खिया, “इजरायल मं अस्यान की बाता पेल्या कद्‍या बी कोन्अ देख्या।” पण फरीसी बोलरया छा, “वो दुष्टात्मा न्अ सेतान की सायता सुं बारे नखाळ्अ छ।”

ईसु यहूदया का परातना करबा का घरा मं परबचन सखातो, परमेसर का राज का चोखा समचार को परचार करतो, मनखा की चड़-पिड़ा आंतरअ करतो उण्डअ का सबळा गांवा अर नगरा मं फरतो रियो। ईसु ज्दया जळा न्अ देख्अ छो तो दीया सुं भरयाव्अ छो क्युं क वे मनख बेसहारा अर दुखी बना गुवाळा की लळ्डया की नाई छा। ज्दया ईसु खुदका चेला न्अ खियो, “लावणी बेई तियार खेत तो घणासारा पण मजुर कम छ। ई बजेसुं साक का मालिक सुं परातना करो क वो खुदकी साक की लावणी करबा बेई मजुर खन्दाव्अ।”

Phulaphula i मत्ती 9