Sgaw Karen Common Bible © Bible Society of Myanmar, 1992.

ဒီးအအံၤမ့ၢ်စီၤနိအၤအဖိခွါ, စီၤၡ့ၣ်, စီၤဃၣ်ဒီးစီၤယ့း ဖ့းသးသ့ၣ်တဖၣ်အစၢၤအသွဲၣ်န့ၣ်လီၤ. အဖိခွါသၢဂၤအံၤထီၣ်ဖိ အဖိခွါတဖၣ်ဖဲထံလုၣ်ဘၢတၢ်ဝံၤအလီၢ်ခံန့ၣ်လီၤ.
ဒီးစီၤယ့းဖ့းသးအစၢၤအသွဲၣ်တဖၣ်န့ၣ်မ့ၢ်ဝဲ စီၤကိမၢၤ, စီၤမါကူး, စီၤမၤဒဲ, စီၤယၤဝၣ်, စီၤတူၤဘလး, စီၤမ့ၤၡ့းဒီးစီၤတံရ့းန့ၣ်လီၤ. အဝဲသ့ၣ်တဖၣ်န့ၣ်မ့ၢ်ပၢ် လၢပျၢၤတဖၣ်လၢအပှၤဂီၢ်မုၢ်စိာ်အဝဲသ့ၣ်အမံၤန့ၣ်လီၤ. ဒီးစီၤကိမၢၤအစၢၤအသွဲၣ်တဖၣ်န့ၣ်မ့ၢ်ဝဲအၤၡကံနး, ရံဖသးဒီးတိကးရမၤအပှၤဂီၢ်မုၢ်တဖၣ်န့ၣ်လီၤ. ဒီးစီၤယၤဝၣ်အစၢၤအသွဲၣ်တဖၣ်န့ၣ်မ့ၢ်ဝဲအလံၡၤ, ကီၢ်စပၤနံ, ကီးကူပြူး, ဒီးကီးရိဒံးအပှၤဂီၢ်မုၢ်တဖၣ်န့ၣ်လီၤ. အဝဲသ့ၣ်တဖၣ်မ့ၢ်ပၢ်လၢပျၢၤတဖၣ်လၢပှၤဂီၢ်မုၢ်အိၣ်လၢပီၣ်လဲၣ် ကၢၢ်နံၤဒီးကီးသ့ၣ်တဖၣ်အဖီခိၣ်အဂီၢ်န့ၣ်လီၤ. ပှၤသ့ၣ်တဖၣ်အံၤမ့ၢ်ပှၤလီၤစၢၤလၢစီၤယ့းဖ့းသးဒီးအိၣ်ဝဲ ဆိးဝဲလၢအပှၤကလုာ်ဒၣ်ဝဲဒီးအထံအကီၢ်ဒၣ်ဝဲလီၤဆီဆီ, ဒီးတဖုစုာ်စုာ်န့ၣ်ကတိၤအကျိာ်ဒၣ်ဝဲန့ၣ်လီၤ.
ဒီးစီၤဃၣ်အဖိခွါန့ၣ်မ့ၢ်ဝဲစီၤကူၤၡး, စီၤအဲၤကူပတူး, စီၤဖူးဒီးစီၤကနၤဧၣ်တဖၣ်န့ၣ်လီၤ. အဝဲသ့ၣ်တဖၣ်န့ၣ်မ့ၢ်ပၢ်လၢပျၢၤတဖၣ်လၢအပှၤဂီၢ်မုၢ်စိာ်အဝဲ သ့ၣ်တဖၣ်အမံၤန့ၣ်လီၤ. ဒီးစီၤကူၤၡးအစၢၤအသွဲၣ်တဖၣ်န့ၣ်မ့ၢ်ဝဲ, စီၤစဘၤ, စီၤဃဝံၤလၤ, စီၤစၤဘတၤ, စီၤရၤဧၤမၤဒီးစီၤစၤဘတံကၤတဖၣ် လီၤ. ဒီးစီၤရၤဧၤမၤအစၢၤအသွဲၣ်တဖၣ်န့ၣ်မ့ၢ်ဝဲၡဘၤဒီးဒဒၣ်အပှၤ ဂီၢ်မုၢ်တဖၣ်န့ၣ်လီၤ. ဒီးစီၤကူၤၡးထီၣ်ဖိစီၤနံးမရိးလၢအကဲထီၣ်ပှၤလၢအမၤနၢၤ တၢ်ဖးဒိၣ်အဆိကတၢၢ်တဂၤလၢဟီၣ်ခိၣ်ချၢန့ၣ်လီၤ. အဝဲမ့ၢ်ပှၤခးတၢ်ဖိဖးဒိၣ်တဂၤလၢယွၤအတၢ်မၤစၢၤအဃိ န့ၣ်လီၤ. မၤသးဒ်န့ၣ်ဒီးပှၤဂီၢ်မုၢ်စံးဝဲဒၣ်လၢ, “မ်ယွၤ ဒုးကဲထီၣ်နၤပှၤခိးခးတၢ်ဖိဖးဒိၣ်တဂၤဒ်စီၤနံးမရိးအသိး တက့ၢ်.” န့ၣ်လီၤ. လၢအခီၣ်ထံးန့ၣ်ဝ့ၢ်ဘၤဘူၤလိၣ်, ဝ့ၢ်အ့ရ့း, ဝ့ၢ်အးကး, ဝ့ၢ်သၢဖျၢၣ်လိာ်အိၣ်တပူၤဃီလၢကီၢ်ဘၤဘူၤလိၣ်အပူၤဒီးမ့ၢ် အဝဲအဘီအမုၢ်န့ၣ်လီၤ. အဝဲဟးထီၣ်လၢကီၢ်န့ၣ်ဒီးလဲၤဝဲဆူကီၢ်အၤၡူၢ်ဒီးသူၣ်ထီၣ်ဝဲ ဝ့ၢ်တဖၣ်လၢအမ့ၢ်နံၤနဝ့, ရဃိဘိးဒီးကါလး, ဒီးရ့စ့ၣ်အိၣ်လၢဝ့ၢ်နံၤနဝ့ဒီးဝ့ၢ်ဖးဒိၣ်လၢအမ့ၢ်ဝ့ၢ်ကါ လးအဘၢၣ်စၢၤန့ၣ်လီၤ.
ပှၤတဖၣ်လၢအဟဲလီၤစၢၤလီၤသွဲၣ်လၢစီၤအဲၤကူပတူးန့ၣ်မ့ၢ် ဝဲ, ပှၤလူၤဒံဖိ, ပှၤဧနၤမံၣ်ဖိ, ပှၤလဟါဘံၣ်ဖိ, ပှၤနၤဖတူဃံၣ်ဖိ, ပှၤပသြူစံၣ်ဖိ, ပှၤကၤစလူဃံၣ်ဖိဒီးပှၤကၤပတိရံၣ်ဖိလၢပှၤ ဖလ့ၡသးဖိဟဲလီၤစၢၤလီၤသွဲၣ်ဝဲန့ၣ်လီၤ.
ဒီးစီၤကနၤဧၣ်အဖိခွါတဖၣ်, စီၤစံဒိၣ်ပှၤအဝဲၢ်ကိဒီးစီၤဃ့ၤသး, မ့ၢ်ဝဲပၢ်လၢပျၢၤတဖၣ်လၢအပှၤဂီၢ်မုၢ်စိာ်အဝဲသ့ၣ်အမံၤန့ၣ် လီၤ. စီၤကနၤဧၣ်မ့ၢ်စ့ၢ်ကီးပှၤယဘူၣ်ဖိ, ပှၤအမိၢ်ဖိဒီးပှၤကံၢ်ကၣ်ဖိ, ပှၤဃံၤဝံဖိ, ပှၤဧၤရကၤဖိ, ပှၤစံၣ်ဖိ,
ပှၤအၢ်ဝးဖိ, ပှၤစမၢ်ဖိ, ပှၤဃမါသးဖိ, တဖၣ်အပၢ်လၢပျၢၤန့ၣ် လီၤ. ပှၤကနၤဧၣ်အဒူၣ်ဖိတဖၣ်ရၤလီၤအသး တုၤလၢပှၤကနၤဧၣ်ဖိအကီၢ်ဆၢတုၤဃီၤဝဲစးထီၣ်လၢကီၢ်စံဒိၣ် အကလံၤထံးဆူဝ့ၢ်ကရၢ်လၢအအိၣ်ဘူးဒီးဝ့ၢ်ဂါစၤ, ဒီးလၢမုၢ်ထီၣ်တခီန့ၣ်ဆူဝ့ၢ်စဒိၣ်, ဝ့ၢ်ဂမိရၤ, ဝ့ၢ်အၤဒမၤဒီးဝ့ၢ်စဘိအံၣ်လၢအအိၣ်ဘူးဒီးဝ့ၢ်လါၡၤန့ၣ် လီၤ. ပှၤသ့ၣ်တဖၣ်အံၤမ့ၢ်ပှၤလီၤစၢၤလၢစီၤဃၣ်ဒီးအိၣ်ဝဲဆိးဝဲ လၢအဒူၣ်ဖိထၢဖိဒၣ်ဝဲဒီးအထံအကီၢ်ဒၣ်ဝဲအပူၤလီၤဆီဆီ န့ၣ်လီၤ. တဖုစုာ်စုာ်န့ၣ်ကတိၤဒၣ်တၢ်လၢအကျိာ်ဒၣ်ဝဲန့ၣ်လီၤ.
စီၤၡ့ၣ်လၢအမ့ၢ်စီၤယ့းဖ့းသးအဝဲၢ်အံၤမ့ၢ်ဝဲကယဲၢ်ပှၤဧ့ၤဘြံၤဖိခဲလၢာ်အပၢ်လၢပျၢၤန့ၣ်လီၤ. ဒီးစီၤၡ့ၣ်အဖိခွါတဖၣ်န့ၣ်မ့ၢ်ဝဲ, စီၤဧ့ၤလၣ်, စီၤအၤၡူၢ်, စီၤအၢ်ဖးၡး, စီၤလူးဒီးစီၤအရၣ်လီၤ. အဝဲသ့ၣ်မ့ၢ်ပၢ်လၢ ပျၢၤတဖၣ်လၢအပှၤဂီၢ်မုၢ်စိာ်အဝဲသ့ၣ်တဖၣ်အမံၤန့ၣ်လီၤ. ဒီးစီၤအရၣ်အစၢၤအသွဲၣ်တဖၣ်န့ၣ်မ့ၢ်ပှၤဂီၢ်မုၢ်လၢဧူးစး, ဃူလး, က့သ့ၢ်ဒီးမၤစးတဖၣ်လီၤ. ဒီးစီၤအၢ်ဖးၡးမ့ၢ်စီၤစ့ၤလါအပၢ်, ဒီးစီၤစ့ၤလါမ့ၢ်စီၤ ဧ့ၤဘ့ၢ်အပၢ်န့ၣ်လီၤ. ဒီးစီၤဧ့ၤဘ့ၢ်အိၣ်ဒီးအဖိခွါခံဂၤလီၤ. တဂၤအမံၤမ့ၢ်ဝဲ စီၤပ့ၤလ့းမ့ၢ်လၢ, ဖဲအကတီၢ်န့ၣ်ပှၤဂီၢ်မုၢ်လၢဟီၣ်ခိၣ်ချၢ တဖၣ်လီၤဖးလိာ်အသးအဃိန့ၣ်လီၤ. ဒီးအဂၤတဂၤအမံၤမ့ၢ်ဝဲစီၤယးကတၣ်လီၤ. ဒီးစီၤယးကတၣ်အစၢၤအသွဲၣ်တဖၣ်န့ၣ်မ့ၢ်ဝဲပှၤဂီၢ်မုၢ်လၢအၤ လမိဒး, ၡ့လဖး, ဃၤစရမၤဝ့း, ယၤရၢ်, ဟဒိၣ်ရၣ်, အူစလး, ဒံးကလး,
ဧူးဘလး, အဘံမအ့လး, ၡဘၤ, အိဖ့ၢ်, ဃဝံၤလၤ, ဒီးယိဘာ်န့ၣ်လီၤ. အဝဲသ့ၣ်ခဲလၢာ်မ့ၢ်ပှၤလီၤစၢၤလီၤသွဲၣ်လၢစီၤယးကတၣ်န့ၣ် လီၤ. ကီၢ်လၢအဝဲသ့ၣ်အိၣ်ဝဲဆိးဝဲအလီၢ်န့ၣ်စးထီၣ်အသးဖဲကီၢ်မ့ၤ ၡးဆူကီၢ်စဖၢ်လၢအမ့ၢ်မုၢ်ထီၣ်အကီၢ်လၢအပှဲၤဒီးတၢ်လူၢ်တၢ် တြီၤန့ၣ်လီၤ. အဝဲသ့ၣ်တဖၣ်န့ၢ်မ့ၢ်စီၤၡ့ၣ်အစၢၤအသွဲၣ်တဖၣ်လၢအအိၣ်ဝဲ ဆိးဝဲလၢအဒူၣ်ဖိထၢဖိဒၣ်ဝဲ, ဒီးအကီၢ်ဒၣ်ဝဲလီၤဆီဆီဒီး တဖုဘၣ်တဖုကတိၤအကျိာ်ဒၣ်ဝဲစုာ်စုာ်န့ၣ်လီၤ.
ကယဲၢ်ပှၤဂီၢ်မုၢ်ခဲလၢာ်အံၤမ့ၢ်စီၤနိအၤအစၢၤအသွဲၣ်တဖၣ်, တကလုာ်ဘၣ်တကလုာ်ဒ်အတၢ်လီၤစၢၤလီၤဆီလိာ်အသးဒၣ်ဝဲအသိးန့ၣ်လီၤ. ထံလုၣ်ဘၢတၢ်ဝံၤအလီၢ်ခံကယဲၢ်ပှၤကလုာ်ခဲ လၢာ်လၢဟီၣ်ခိၣ်ချၢန့ၣ်မ့ၢ်ပှၤလီၤစၢၤလၢစီၤနိအၤအဖိခွါ တဖၣ်န့ၣ်လီၤ.

Phulaphula i လံာ်တၢ်ကဲထီၣ်အခီၣ်ထံး 10