Koonzime - 1998 Edition (Drama NT)

Nzyɛ̌m dína apǎ kuho kʉ́ e sí, mʉr á be e díe ó, “Lwǐb” nyá, á boo be ó tɨ̂. Lwǐb, bé e Nzyɛ̌m ó b'á be. Lwǐb á be ó Nzyɛ̌m. Nó ó Lwǐb, bé e Nzyɛ̌m, bé á boo duho ó, lɨ́ enyɛ̌l e kʉ́ e sí. Nzyɛ̌m á sâ sá yɨ́yɛ̂h ó e Lwǐb. Abe e yʉ́ʉ́ sɔ̂ʼ yé á syɛ́ɛ, Lwǐb abe. Twiʼ, yé á be ó ɨ́ Lwǐb. Twiʼ yaá, yé ó b'á be njʉl wé á pan myɛ́n ɨ́ bʉr wɨ́. Njʉl waá, wé lɨ́ epǎn myɛ́n ɨ́ súm édúrʉ́ʉ́ á go yɨ́; edúrʉ́ʉ́ l'anʉa wê.
Nzyɛ̌m nzě ntɨh mʉ̂r, díé lé Yʉánɛs. Nye á nze ó, lɨ́ enzě boʼlo ɨ́ lɔ̌b njʉl waá. Nye á nze ó, bʉr bɨ́bɛ̂h, bé dyɛ̂ʼwaa e Nzyɛ̌m ɨ́ lɔ̌b mboʼlá wé waá. Ntʉ nyé mʉr tɨ̂ʼ á be njʉl. Nye á jaa nze ó, njɨ lɨ́ enzě boʼlo ɨ́ lɔ̌b njʉl waá. Njʉl waá wé omér ó b'á pan mpǎŋ myɛ́n. Wé lɨ́ epǎn myɛ́n ɨ́ sí yɨ̂, lɨ́ ekʉn bʉ̂r bɨ́bɛ̂h nzɨ̌ twiʼ.
Lwǐb á be ó ɨ́ sí yɨ̂. Nye ó mʉ̌r Nzyɛ̌m á lómo lɨ́ ebono kʉ́ e sí nyá. Nó ó, bʉr ó sí yɨ̂ʼ bɨ́ɛ, bé á bé adweʼe nyê. Nye á nze ó ɨ́ sí yé, ánta nye. Sâ gwár, bʉr bé, anʉa nyê. Damá jóʼo nó, bím bʉ̂r o b'á nʉa nye, dyɛ̂ʼwɔɔ ntémé e né bá, bé ó nyé á dwe nkul etyélɔɔ bwán mé Nzyɛ̌m. Bé á bé atyélɔɔ bwán mé Nzyɛ̌m ɨ́ nkǒ páʼ métié, nkʉ̂ ɨ́ lɔ̌b bígwɨ́má ményʉ́l mɔ́ɔ́, nkʉ̂ ɨ́ lɔ̌b gwɨ́má mʉ̂r. Bé á byɛ̂l ó byɛ́lɨ́ɨ nó, ɨ́ gwɨ́má mé Nzyɛ̌m.
Lwǐb á be ó sí byɛ̂l mʉ̂r. Nye á si tiʼe páʼ gá nyɨ́ná. Mɨná bé á be ó sí bee gá mentyɛnwa mé, mentyɛnwa mé étíʼé é Mwân mé Nzyɛ̌m. Nye á si duho kwá Sɔ́ŋ wé lwɨ́ŋlá e mpam mé Nzyɛ̌m, le otyeetye. Yʉánɛs á si boʼlo dumo e né. Nye á túno ó: “Mʉr mé á lɨ̂lɛɛ bɨ̌n ó nyâ. Nye ó waá dí enze mé píhe nyá. Nye lɨ́ elaa mê, ebě, me dína apǎ byɛ̂l, nye á boo be ó tɨ̂.”
Mɨná gá óbɛ̂h, bé á be ó sí bi émbɨa lé ndu e mpam nyé ɨ́ buo buo. Nzyɛ̌m á tyêl mɨná gá metié ndu e l'egbâ mémpéné ó, cɨɨ ɨ́ nzɨ̌ mé Moyɨ̂z. Nó ó, mpam nyé le otyeetye bíɛ, byé á nze ɨ́ mɨná gá ó, cɨɨ ɨ́ nzɨ̌ mé Yésʉs-Krîst. Abe e mʉr ngwár dí sí pǎ beě Nzyɛ̌m Sɔ́ŋ. Etíʼé é Mwân é kpɛ̌l lé, lé omér, laá dí ntémé Nzyɛ̌m lɨ́ ó b'á lɛ̂ʼle mɨná gá Nzyɛ̌m.


Yʉánɛs á si yala le opara, le oLevît ɨ́ jɔʼ óYúden ó Yerʉ́zalɛm, bé á lómo bé kwá nyé ó, bé tô dî e né ó: «Gua, go nzé ɛ́?»
Yʉánɛs á si yala e bé ɨ́ sʉ́lʉ́lʉ́, asol. Nye ó: «Mé abe Mʉ̂r Nzyɛ̌m á lœm múló mé jwɨ́ɨ nyá.»
Nó ó bʉ̂r baá, bé á baʼa dî e né ó: «Á gua, go nzé ɛ́? Nzê go ó dí Elie ɛ̌?»
Nye ó: «Heʼé, mé abě Elie.»
Bé ntɔ̂ʼ dî ó: «Nzê go ó ngwíha milɔ̌b, waá Moyɨ̂z á cɛma ɨ́ lɔ̌b wé nyá ɛ́?»
Nye ó: «Yaá! Mé abe nyê.»
Nó ó bé á ka dî e né ó: «Á gua, go nzé ɛ́? Bɨ̌h bé ótó lɛ́ɛ bʉ̂r o lómó bɨ́h bá ó, go nzé ɛ́?»
Nó ó Yʉánɛs á nze yala e bé ó: «Me ó
“mʉr dí etúno ɨ́ lʉá,
waá dí elɛ́ɛ ó:
Tyélɨ́ɨ́ gá menzɨ̌ mé Dâ ɨ́ lîm nyá.”»
(Yé ó mpʉ ngwíha milɔ̌b Ésayie á lɛ́ɛ yɨ́.)
Ɨ́ bʉr o mílʉ́mlʉ́ baá, yé á be ó, le oFarizyɛ̂n. Nó ó bé á nze dî e né ó: «Yé bé gó abe Mʉ̂r Nzyɛ̌m á lœm múló mé jwɨ́ɨ nyá, abě Elie, abe ntémé ngwíha milɔ̌b waá nó, á gǒ dudǔ bʉ̂r ɨ́ yé ɛ́?»
Yʉánɛs, nye e bé ó: «Mě du bɨ́n ó e medíbé. Yé e nyʉ́ʉ́ mʉ̂r wâʼ páʼ nyɨ́n, bɨ́n dí agʉ́a nyá. Nye ó waá dí enze mé píhe nyá. Mé abě tyé mʉ̂r dí ó, me tíyɨɨ mikǒl mí ósípah myé nyá.»
Sâ nɨ̌ yɨ́yɛ̂h, yé á syɛ́ɛ ó, Bétanî, ɨ́ gúú pɨ̌n díbé Yɔrdên kɔ́m nkɛ́ɛ́, gúmó Yʉánɛs á dudu bʉr yɨ́.

Ɨ́ mɛ́n tɨ̂, Yʉánɛs kǎ bee ó, Yésʉs lɨ́ enze kwá nyé. Yʉánɛs nzě lɛ́ɛ ó: «Beyɨɨ gá Mâ Nteme mé Nzyɛ̌m dí edwih mísyóm mí sí mímyɛ̂h nyá! Lɔ̌b wé ó mé á lɨlɛ́ɛ bɨ̌n, ó: “Mʉr, nye lɨ́ ebɔma mé píhe. Mʉr waá ó dí elaa mê, ebě, mɛm apǎ byɛ̂l, nyɨɛ á boo be ó tɨ̂.” Mɛm mʉr tɨ̂ʼ á bé anyɛɛ́ gʉ́a nyê. Me á nze du bʉr e medíbé ó, ebě, me nkʉ̂ gʉ́a tɨ́ě kúl bʉ̂r o b'Ɨ́zraɛ̂l, ó bé gʉ́ŋaa nye.»
Yʉánɛs á boʼlo ntémé ó: «Me á si bee Sísǐm mé Nzyɛ̌m lɨ́ eduho ɨ́ jʉ́o kʉ́ mpʉ épɨbaa, nzě sulo ɨ́ báaa, nzě di nyé ɨ́ nyʉ̂l. Me á be ntémé ó, apǎ nyɛɛ́ gʉ́a nyê. Nó ó, Nzyɛ̌m, mʉr á lómo me ó, me ntáa nzě du bʉ̂r e medíbé nyá, á tɨ́e me ó: “Mʉr gó óbeě Sísǐm wâm sulo, nzě berwo kʉ́ nye nyá, mʉr waá, nye ó ngá du bʉ̂r e Sísǐm mé Nzyɛ̌m.” Me á si bana bee nó. Nó ó mé dí eboʼlo ó, mʉr nyâ, nye ó kwahaá Mwân mé Nzyɛ̌m yɨ́.»

Ɨ́ mɛ́n tɨ̂, Yʉánɛs á be ɨ́ báʼǎ nzě gúmo yaá, bé e bʉ́ʉ́ ómpʉ́n bé obá. Jɔʼ nyé á bee Yésʉs lɨ́ elaa yɨ́, nye nzě báʼǎ lɛ́ɛ ó: «Paá bee gá Mâ Nteme mé Nzyɛ̌m ɛ̌!»
Mpʉ ómpʉ́n mé Yʉánɛs, bé á jóʼo sá nyé á lɛ́ɛ yɨ́, bé ntɔ̂ʼ dû Yésʉs. Yésʉs nzě dwira. Nyé ká dwɛ̂ʼ nɛ́ɛ: bee bé lɨ́ edû nyê. Nye nzě dî e bé ó: «Bɨ̌n sáá yé ɛ́?»
Bé e né ó: «Gúmó gó dí edi yɨ́, Rabbi!»
(Díe laá, lé páʼlɔ́ɔ́ ó, “lɛ̂ʼla”.)
Yésʉs, nye e bé ó: «Ntáʼ gá bé kâ. Bɨ̌n a nzé bee.»
Nó ó ómpʉ́n baá, bé á tô, nzě beě gúmó Yésʉs á didi yɨ́. Bé ntɔ̂ʼ lɛ̌ŋ móhó waá, bé le onɔ́ɔ́. (Yé á be ó, yé mû mewala menâ mé bíí kʉ̌ʼ.)
Nyʉ́ʉ́ mpʉ́n ɨ́ sɔ́má ómpʉ́n obá bé á jôʼlo lɔ́ɔ́ mé Yʉánɛs, le edû Yésʉs bá, á be ó mɨ́ɔɔ́ mé Simon Pétrus, díé lé André. Nó ó, mʉr esôʼ André á nyɛɛ to kœb nyá, á be ó mɨ́ɔɔ́ wé, Simon. Nye e né ó: «Bɨ̌h bɨ́ kœ̌b Mesî!»
(Njɨ́blɨ́ waá, wé páʼlɔ́ɔ́ ó: “Krîst: Mʉ̌r Nzyɛ̌m á lœm múló mé jwɨ́ɨ nyá.”)
Nó ó André á nze tô e Simon gúmó Yésʉs á be yɨ́. Yésʉs nzě dwɛ̂ʼ Simon ɨ́ bʉ́ʉ́ʉ́á. Nye e né ó: «Go ó Simon, mwân mé Yʉánɛs. Go ókǎ jɨjébɔɔ ó, “Kefâs”.»
(Díe laá, lé páʼlɔ́ɔ́ ó, “ekóʼ”.)

Ɨ́ mɛ́n tɨ̂, Yésʉs nzě tíʼe ɨ́ lémé wé ó, nyě tó ó ɨ́ sí Galilê. Nye nzě beě Philippe. Nye e né ó: «Dúʼóó mê!»
(Philippe á be ó mʉr Bétsɛ́da, nkanǎ André bé e Pétrus, bé á didi yɨ́.) Píe tɨ̂, Philippe nzě tó beě Natanaɛ̂l. Nye e né ó: «Bɨ̌h bɨ́ bee mʉ̂r, waá Moyɨ̂z á boo cɛma ɨ́ lɔ̌b wé ɨ́ mekaná métié, maá ógwíha o mílɔ̌b bé á cɛma ɨ́ lɔ̌b wé má. Mʉr waá, nye ó dí Yésʉs, mwân mé Yóseb, mʉr Nazarɛ̂t.»
Natanaɛ̂l, nye e Philippe ó: «Nzê mpǎŋ sá dí ɨ́ mbɨa yɨ́, yé e nkul eduhǒ Nazarɛ̂t ɛ̌?»
Philippe, nye e né ó: «Ntaá nzě bee!»
Jɔ̌ʼ Yésʉs á bee Natanaɛ̂l lɨ́ enzě nko nyé á be yɨ́, nye ó: «Beyɨɨ gá nyɛ̂r Ɨ́zraɛ̂l ɨ́! Nyé abe e mikóo.»
Nó ó Natanaɛ̂l á nze dî e Yésʉs ó: «Gua, gǒ gʉ́á mé nó ɨ́ wáǎ pâʼ?»
Yésʉs, nye e né ó: «Me bé ó sí boó bee gó ɨ́ jɔʼ gô bé lɨ́ enzuʼ é lɨ́ figyê yɨ́. Jɔʼ yaá, Philippe dína apǎ jébe gô.» Natanaɛ̂l, nye e né ó: «Lɛ̂ʼla, gǒ tyeetye ó Mwân mé Nzyɛ̌m. Go ó dí Njwɨ́ɨ Ɨ́zraɛ̂l.» Yésʉs, nye e né ó: «Nzê gǒ dyɛ́ʼwó e me ó, mpʉ mê lɛ́ɛ́ gó ó, me bé ó sí bee gó lɨ́ enzuʼ é lɨ́ figyê yɨ́ ɛ́? Bónáa. Go óbáʼǎ bee bísá bínɨ́nɨ́ɨ́, laa yɨ́nɨ̌.»
Yésʉs, nye e né ó: «Mě lɛ́ɛ́ bɨ́n lɨ́ otyeetye ó, bɨ̌n bé óbeě jʉ́o lɨ́ ebɔ́a siesíe ɨ́ lʉ̂ Mwân mé Mʉr, beéngeles mé Nzyɛ̌m lɨ́ ebére le esulo tɨ̂.»

Phulaphula i Yʉánɛs 1