Ɨkàanə̀ ghù shwuə̀

Tsaʼnə ŋwùə̀ moʼo moʼo à lə̀ pənə ndèrə̀ a ndâ ze la, Yěsû a furə̀ àze nkoʼò ndèrə̀ e pə àtwuə̀ Mbarə̀ Olìvə̀. Njyə̂ ɨ̀ lə̀ laanə̀, a kẅirə̀ a Ndâ Mɨ̀shwàʼà Nẅùə̀ a ngẅùʼə ngẅùʼə, pànə̀ pɨ̀noʼnə tô nkamnə̀ e, a tyiʼə̀ nnwuunə̀ a ɨ̀shyə̂ mmə nnèrə̀ a ghobə nɨ ànwùə̀ Nẅùə̀. Pɨ̀nèrə̀ mbòomə pobə pɨ̀Farìsî lə̀ lòo a mə̀ngyə̌ ɨ̀tse nɨ pobə lə̀ kônə atwurə àfànə̀ ntô ambo Yěsû, ntə̂ e a tɨ̀tɨ̀rə̀ pə̀ənə̀, nshwəŋə̀ ambo Yěsû lo, “Ɨ̀nèrə̀, pɨ kô a mə̀ngyə̌ wə̀ a pə ngɨ̀rə̀ àfànə̀. Mbòomə Mǔsî à lə̀ nèrə̀ lo, pɨ tumpə̀ mbuurə̀ mə̀ngyə̌ zə̀ nɨ mɨ̀ghòorə nzhwuutə̀. Wə̀ kùmə̀ nshwəŋə̀ àzô lo àkə mbə̀ʼə ànwùə̀ zə̀?” Pobə lə̀ shwəŋə̀ a zə̀ a pə nɨ lòo ntàʼà àlàŋə a nɨ chyâ ɨ̀sàʼa aŋunə Yěsû. La Yěsû à lə̀ ŋuʼnə̀ e a ɨ̀shyə̂ mbìʼnə̀ a nɨ ŋwàʼnə̀ aŋunə àtɨ̀tsaʼa nɨ shwuə̀ àpô e. Tsaʼnə pobə lə̀ təəmə̀nə alyiʼə ghu mbirə̀ mmə mbyiitə̀ e nɨ mɨ̀nwùə̀, à lə̀ pə̀ʼkə̀ nshwəŋə̀ ambo pobə lo, “Ŋwùə̀ wɨghə nɨ à pirə̀nə e ànwùə̀ tɨ̀pòŋə̀ tɨ ghɨ̀rə̀ â pìʼnə̀ ntumə̀ e nɨ nɨ̀ghòorə.” A shwəŋə̀ a lenə la, nchi ŋŋuʼnə̀ a ɨ̀shyə̂ mmə ŋŋwàʼnə̀ aŋunə àtɨ̀tsaʼa.
Tsaʼnə pobə lə̀ zuʼnə a lenə la, pobə lə̀ pìʼnə̀ aŋunə pɨ̀lɨ̀ŋmə̂ a nɨ lèrə̀ moʼo moʼo, Yěsû a tyiʼə̀ ngoŋə̀ alyiʼə ghu pobə mə̀ngyə̌ wa a təəmə̀ a mbyə̀ ze. Yěsû à lə̀ pə̀ʼkə̀ ntyiʼə̀ mbyiitə̀ a mə̀ngyə̌ wa lo, “Pànə̀ pa ɨghə? Ka ŋònə̀ ɨ̀tse a shwəŋə̀ e lo wə̀ kwɨghə̀?”
Mə̀ngyə̌ ghu a kẅùə̀ lo, “Ka ŋònə̀ ɨ̀tse a Ndòʼnə̀mbyə̂.”
Yěsû a tyiʼə̀ nshwəŋə̀ lo, “Ka ǹkɨ shwəŋə̀ mə̀ lo wə̀ kwɨghə̀. Lèrə̀ o, la kò wə̀ gha nchi ngɨ̀rə̀ ànwùə̀ tɨ̀pòŋə̀.”

Yěsû a chi nshwəŋə̀ ambo pobə lo, “Mɨ̀ŋə̀ la nkàʼà àtwuə̀ ɨ̀shyə̂ ghə. Ŋònə̀ nɨ à zùŋə̀nə mə̀, ka à pə ghǎ chi yìinə̀ e amwuə ndzùmə, la à ghǎ pə nɨ nkàʼà nɨ̀chyə̂mbyə̂.”
Pɨ̀Farìsî pa shwəŋə̀ ambo ze lo, “Wə̀ wə̀ nshwəŋə̀ la ànwùə̀ mbə̀ʼə ɨ̀pɨ̀ŋmə̀ o. Njiilo ànwùə̀ nɨ wə̀ wə̀ nshwəŋə̀ la ka a pə e nkǔŋə nkuŋə.”
Yěsû a kẅùə̀ ambo pobə lo, “Ǹtə mbəla mmə shwəŋə̀ ànwùə̀ mbə̀ʼə ɨ̀pɨ̀ŋmə̀ mə̀, yi ànwùə̀ nɨ ngwa nshwəŋə̀ la a nkǔŋə nkuŋə ntiinə ǹzhyə̂nə alyiʼə nɨ ǹfurə̀nə, nkɨ nzhyə̂ alyiʼə nɨ ngwə̀ ndèrə̀. La ka nɨ̀ zhyə̂ a wɨghə alyiʼə nɨ ǹfurə̀nə; ka kɨ zhyə̂ a wɨghə alyiʼə nɨ ngwə̀ ndèrə̀. Nɨ̀ saʼà ɨ̀sàʼa pə tsaʼnə nɨ̀ zəənə̀nə a ngàŋə̀ a pə, la ka m̀mə nsaʼà mə̀ ɨ̀sàʼa ŋònə̀ ɨ̀tse. La mbɨ saʼà ɨ̀sàʼa amwuə ndwuumə̀ nɨ ɨ təəmə̀nə ntiinə ka mbə mə mɨ̀ŋə̀ nɨ mɨ̀ŋə̀; a pəə Tǎ nɨ à lə̀ twuumə̀nə mə̀. Pɨ ŋwàʼnə̀ amwuə àŋwàʼnə̀ a mbòomə àzɨghə lo pànə̀ pɨpaa lə̀ shwəŋə̀ a taʼà ànwùə̀, yi ànwùə̀ ghu a nkǔŋə nkuŋə. Ngwə̀ nshwəŋə̀ a nkǔŋə nkuŋə mbə̀ʼə ɨ̀pɨ̀ŋmə̀ mə̀; Tǎ nɨ à lə̀ twuumə̀nə mə̀ a kɨ mmə nshwəŋə̀ tyìʼə̀ a lenə.”
Pobə tyiʼə̀ mbyiitə̀ ambo ze lo, “Tǎ ɨwɨghə à ɨghə?”
Yěsû kẅùə̀ lo, “Ka nɨ̀ zhyə̂ a wɨghə a gha kə̀ a Tǎ ɨwəə. Nɨ̀ tə mbəla nzhyə̂ mə̀ yi nɨ̀ kɨ nzhyə̂ a Tǎ ɨwəə.”
À lə̀ mə nshwəŋə̀ mɨ̀nwùə̀ mə la nkwùə̀ nɨ à lə̀ mənə nnèrə̀ mɨ̀nwùə̀ amwuə Ndâ Mɨ̀shwàʼà Nẅùə̀, a nɨ̀paatə̀ alyiʼə nɨ pɨ lə̀ nùŋə̀nə mɨ̀nkwùumə̀ mɨ nkabə̀ ghu la, la ka ŋwùə̀ a lə̀ kô e a ye ntiinə ka nkwùə̀ a nɨ kô e ɨ̀ lə̀ kùʼù e.

Yěsû a chi nshwəŋə̀ ambo pobə lo, “Ngwə̀ ndèrə̀ mə̀, nɨ̀ ghǎ kwɨghə̀ amwuə tɨ̀pòŋə̀ ɨwɨghə. Mbə̀ʼə nɨ̀ lèrə̀ a wɨghə alyiʼə nɨ ngwə̀ ndèrə̀ apə̀.”
Pɨ̀Jew shwəŋə̀ lo, “Mbə̀ʼə a zhwuutə̀ mbɨ̀ŋmə̀ e, ntiinə à wə̀ shwəŋə̀ lo mbə̀ʼə pə̀ənə̀ lèrə̀ wəənə̀ alyiʼə nɨ à wə̀ ndèrə̀ apə̀?”
Yěsû a làŋə̀ nɨ mbyə̀ nshwəŋə̀ lo, “Nɨ̀ furə̀ la a ɨ̀shyə̂ la ǹfurə̀ mə̀ la àtɨ̀ghə. Pɨghə la pànə̀ pɨ àtwuə̀ ɨ̀shyə̂ la ka mbə mə̀ ŋwùə̀ àtwuə̀ ɨ̀shyə̂. Ntə shwəŋə̀ ambo pɨghə lo, nɨ̀ ghǎ kwɨghə̀ nɨ ɨ̀nwùə̀ tɨ̀pòŋə̀ ɨ̀pɨghə. A nkǔŋə nkuŋə lo nɨ̀ ghǎ kwɨghə̀ amwuə ɨ̀nwùə̀ tɨ̀pòŋə̀ ɨ̀pɨghə mbə̀ʼə nɨ̀ waʼà wɨghə tɨ pyiimə̀ lo ǹchyə̂ mbə ẅùə̀ wa nɨ m̀bənə.”
Pobə pyiitə̀ ambo ze lo “Ghò la ɨ̀wə̌?”
Yěsû a kẅùə̀ ambo pobə lo, “Ǹtə mbìʼnə̀ la nshwəŋə̀ a wɨghə. Ngwə̀ nɨ mɨ̀nwùə̀ mɨ̀noʼnə a nɨ shwəŋə̀ mbə̀ʼə wɨghə nkɨ mbə nɨ mɨ̀nwùə̀ mɨ̀noʼnə a nɨ lòo nchyâ ɨ̀sàʼa aŋunə pɨghə. La ŋònə̀ wa nɨ à lə̀ twuumə̀nə mə̀ à chyə̂ nɨ nkǔŋə nkuŋə. Lenə la, ànwùə̀ nɨ ndə̀ zuʼnə ambo ze a zhyə̀ nɨ ngwə̀ nshwəŋə̀ ambo àtwuə̀ ɨ̀shyə̂.”
Ka pobə lə̀ zhyə̂ a ghobə lo Yěsû à lə̀ shwəŋə̀ ambo pobə la mbə̀ʼə Tǎ Nẅùə̀. Lenəla, Yěsû a shwəŋə̀ ambo pobə lo, “Nkwùə̀ nɨ nɨ̀ ghǎ ŋaŋə̀ a Moonə̀ Ŋwùə̀ àtɨ̀ghə la nkwùə̀ nɨ nɨ̀ ghǎ zhyə̂ lo ǹchyə̂ mbə ẅùə̀ nɨ m̀bənə, kɨ zhyə̂ lo ka ǹgɨ̀rə̀ mə̀ ànwùə̀ àtse nɨ mɨ̀tɨ̀ŋnə̀ ɨ̀mâ, la mmə nshwəŋə̀ tyìʼə̀ ànwùə̀ nɨ Tǎ à lə̀ tiitə̀nə mə̀. Lenə la, ŋònə̀ nɨ à lə̀ twuumə̀nə mə̀ à wə̀ pəə ze, ka a myàʼtə̀ e a gha mɨ̀ŋə̀ nɨ mɨ̀ŋə̀ ntiinə ngwa ngɨ̀rə̀ pə ànwùə̀ nɨ à kòŋə̀nə.”
Tsaʼnə Yěsû à lə̀ shwəŋə̀nə lə la, pànə̀ pɨ̀noʼnə nùŋə̀ ntɨŋmə̀ aŋunə ze.

Lenə la Yěsû a lə̀ shwəŋə̀ ambo pɨ̀Jew nɨ pɨ nùŋə̀nə ntɨŋmə̀ aŋunə ze lo, “Nɨ̀ tə mbəla mmə ngɨ̀rə̀ mɨ̀nwùə̀ nɨ ngwə̀ shwəŋə̀, yi pɨghə la ɨ̀zùŋə̀ ndzùmə̀ pa nkǔŋə nkuŋə. Zèrə zə̀ a pɨ ghɨ̀rə̀ nɨ̀ zhyə̂ a nkǔŋə nkuŋə, nkǔŋə nkuŋə ghu â ghɨ̀rə̀ nɨ̀ furə̀ amwuə ɨ̀pùʼu.”
Pobə kẅùə̀ ambo ze lo, “Pəə̌ ɨ̀poonə̀ pɨ Abràhamə̀, pəə pirə̀ wəə tə pə ɨ̀pùʼù ambo ŋwùə̀. Wə̀ tyiʼə̀ ndàŋə̀ ɨla nshwəŋə̀ lo ‘Pəə ghǎ furə̀ furə̀nə amwuə ndâ àpùʼù?’”
Yěsû a kẅùə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, ‘Ŋònə̀ nɨ à wa ngɨ̀rə̀ ɨ̀nwùə̀ tɨ̀pòŋə̀, a àpùʼù ɨ̀nwùə̀ tɨ̀pòŋə̀.’ Lenəla ka àpùʼù â ghoŋə̀ e amwuə ndâ masàa nɨ nkuŋə̀; à ghoŋə̀ moonə̀ a ndâ pobə. Lenəla, Moonə̀ a tə mbəla nfuukə̀ a wɨghə a ndâ àpùʼù, yi nɨ̀ furə̀ nkǔŋə nkuŋə. Ǹzhyə̂ lo pɨghə la ngẅàrə̀ Abràhamə̀, la mmə ntàʼà a nɨ zhwuutə̀ mə̀ ntiinə ka ɨ̀sàanə̀ àshwəŋnə̀ mə̀ ɨ pə e amwuə pɨghə. Ǹshwəŋə̀ pə ànwùə̀ nɨ ndə̀ zəənə̀nə ambo Tǎ ɨwəə, la nɨ̀ pə ngɨ̀rə̀ pə ànwùə̀ nɨ nɨ̀ lə̀ zuʼnə ambo tǎ wɨghə.”
Pobə kẅùə̀ ambo ze lo, “Abràhamə̀ a tǎ ɨwəə.” Yěsû a shwəŋə̀ ambo pobə lo, “Nɨ̀ tə pəla mbə ɨ̀poonə̀ pɨ Abràhamə̀, yi nɨ̀ wə̀ ngɨ̀rə̀ mɨ̀nwùə̀ nɨ Abràhamə̀ à lə̀ ghɨ̀rə̀nə. La tɨ̀tsòŋə̀ wə̀ nɨ̀ wə̀ ntàʼà a nɨ zhwuutə̀ mə̀ nɨ ǹshwəŋə̀nə a wɨghə nɨ nkǔŋə nkuŋə nɨ ndə̀ zuʼnə ambo Nẅùə̀. Ka Abràhamə̀ à lə̀ ghɨ̀rə̀ e mbuurə̀ mɨ̀nwùə̀ zə̀. Nɨ̀ ghɨ̀rə̀ la mɨ̀nwùə̀ nɨ pɨ̀tǎ ɨ̀pɨghə lə̀ ghɨ̀rə̀nə.”
Pobə shwəŋə̀ ambo ze lo, “Ka pəə pə wə̀ ɨ̀poonə̀ nɨ pɨ pyə̂nə atwurə məghàbə̀. Pəə chyə̂ a nɨ tàʼà tǎ nɨ à pənə Nẅùə̀ àtwuə̀ ɨ̀pɨ̀ŋmə̀ e.”
Yěsû a shwəŋə̀ ambo pobə lo, “Nẅùə̀ à tə mbəla mbə Tǎ ɨwɨghə, yi nɨ̌ kòŋə̀ mə̀, ntiinə ndə̀ furə̀nə pə ambo Nẅùə̀ ntô mbə a nɨ̀ghə̂. Ka ndə̀ tô mə̀ pə àtwuə̀ nɨ mɨ̀ŋə̀, à lə̀ twuumə̀ ze ntwuumə̀ mə̀. A ghɨ̀rə̀ àkə ka nɨ̀ tàʼà a wɨghə zuʼù a wɨghə ànwùə̀ nɨ ǹshwəŋə̀nə? A chyə̂ ntiinə ka nɨ̀ kòŋə̀ a wɨghə lo zuʼù ànwùə̀ nɨ ǹshwəŋə̀nə. Tǎ ɨwɨghə a Satàanə̀; nɨ̀ kɨ mmə nkòŋə̀ pə a nɨ ghɨ̀rə̀ ànwùə̀ nɨ Tǎ ɨwɨghə à kòŋə̀nə. A nɨ̀pìʼnə̀, à lə̀ mə nzhwuutə̀ pə̀ənə̀ nkwùə̀ ntsàambyə̀; ka pə e nɨ ànwùə̀ àtse a nɨ ghɨ̀rə̀ pobə nkǔŋə nkuŋə ntiinə ka nkǔŋə nkuŋə a lə̀ kɨ mbə e amwuə ze. Nkwùə̀ nɨ à mənə nnyìi a chwìrə̀, a shwəŋə̀ pə tsaʼnə mbòomə e à pənə, ntiinə à pənə ngàŋə̀ pɨ̀chwìrə̀ nkɨ mbə tǎ pɨ pɨ̀chwìrə̀. Ntiinə ǹshwəŋə̀nə pə a nkǔŋə nkuŋə ambo pɨghə la, ka nɨ̀ tàʼà pyiimə̀ a wɨghə a gha. Mbə̀ʼə ŋònə̀ ɨ̀tse amwuə pɨghə a nèrə̀ ànwùə̀ tɨ̀pòŋə̀ nɨ ǹgɨ̀rə̀nə? Ntə mbəla mmə nshwəŋə̀ a nkǔŋə nkuŋə, a tyiʼə̀ ngɨ̀rə̀ àkə lo kò nɨ̀ pyiimə̀ a wɨghə ànwùə̀ nɨ ǹshwəŋə̀nə? Ŋònə̀ nɨ à pənə ŋwùə̀ Nẅùə̀ à wa ndzuʼù ɨ̀shwəŋnə̀ Nẅùə̀. Ɨ̀sùmə nɨ ɨ̀ ghɨ̀rə̀nə lo kò nɨ̀ zuʼù a wɨghə ànwùə̀ Nẅùə̀ a chyə̂ mbə lo ka nɨ̀ pə wɨghə pànə̀ pɨ Nẅùə̀.”

Pɨ̀Jew pa shwəŋə̀ ambo Yěsû lo, “Ka pəə shwəŋə̀ wəə la nkǔŋə nkuŋə lo ghǒ ŋwùə̀ Sàmariyà, àzhyə̂ a kɨ mbə a nɨ̀pùmə̀ ghò?”
Yěsû a kẅùə̀ ambo pobə lo, “Ka àzhyə̂ a pə e a nɨ̀pùmə̀ mɨ̀ŋə̀. Ngwə̀ nguʼtə̀ pə a Tǎ ɨwəə la ka nɨ̀ pə nguʼtə̀ a wɨghə a gha. Ka m̀mə ntàʼà mə̀ lo pànə̀ ghuʼtə̀ mə̀. La ŋònə̀ ɨ̀tse à wa ghu nɨ à wa ntàʼà lo pɨ̀ ghuʼtə̀ mə̀; mbə ẅùə̀ wa nɨ à ghǎ saʼà ɨ̀sàʼa wə̀ la. Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ à zùŋə̀nə àshwəŋnə̀ mə̀, ka à pə ghǎ zəənə̀ e a nɨ̀wɨghə̀.”
Pɨ̀Jew shwəŋə̀ ambo ze lo, “Pəə zhyə̂ tɨ̀tsòŋə̀ wə̀ lo àzhyə̂ a za a nɨ̀pùmə̀ ghò. Abràhamə̀ a lə̀ kwɨghə̀ pobə pɨ ngàŋə̀ ntwuumə̀ Nẅùə̀, ‘La wə̀ shwəŋə̀ àzô pə lo, ŋwùə̀ à tə ndzùŋə̀ ɨ̀shwəŋnə̀ ɨ̀pô a ghǎ nchi kwɨghə̀ e apə̀.’ Njiilo wə̀ tsàarə̀ pə tǎ ɨ̀wəə Abràhamə̀ nɨ a lə̀ kwɨghə̀nə pobə pɨ ngàŋə ntwuumə̀ Nẅùə̀? Wə̀ kwàŋə̀ lo wə̀ kɨ pə lə̀ mbə pɨ àkə?”
Yěsû a kẅùə̀ ambo pobə lo, “Ǹtə pəla mmə nguʼtə̀ mbɨ̀ŋmə̀ mə̀, yi àghuʼtə̀ ghu a àfǐfǐ. La à wa nguʼtə̀ Tǎ ɨwəə wa nɨ nɨ̀ wa nshwəŋə̀ lo a Nẅùə̀ ɨwɨghə la nguʼtə̀ mə̀ La nɨ̀ pirə̀ a wɨghə a ye tɨ zhyə̂. A zhyə̂ mɨ̀ŋə̀ nzhyə̂ e. Ǹtə mbəla nshwəŋə̀ lo ka ǹzhyə̂ mə̀ ye, yi mbɨ pə ngàŋə̀ pɨ̀chwìrə̀ tsaʼa pɨghə. La ǹkùmə̀ nzhyə̂ e, nkɨ mmə ngɨ̀rə̀ mɨ̀nwùə̀ nɨ à shwəŋə̀nə. Tǎ ɨwɨghə Abràhamə̀ à lə̀ pə ngaʼà lo a ghǎ zəənə̀ njyə̂ nɨ ngǎ tô, À lə̀ zəənə̀ nkɨ mbə nɨ nɨ̀ghaʼà.”
Pɨ̀Jew pyiitə̀ ambo ze lo, “Wə̀ pirə̀ o tɨ pyàa nguʼu mɨ̀ghumə̀ mɨntaanə̀, ndə̀ tyiʼə̀ ndzəənə̀ Abràhamə̀ ɨghə?”
Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo pɨ lə̀ kɨ pyə̂ a Abràhamə̀ la m̀bə ghu.” Lenəla pobə lə̀ lyàa mɨ̀ghòorə lo tumpə̀ a Yěsû. La a lə̀əmə̀ e, ntsurə̀ nfurə̀ amwuə ndâ Nẅùə̀ ghu.

Phulaphula i Jònə 8