If you would like a copy of this version please contact info@davaraudiobibles.org

Vagla Bible © 2017, Ghana Institute of Linguistics, Literacy and Bible Translation (GILLBT). In cooperation with Wycliffe Bible Translators, Inc. (Text) Vagla Old Testament Audio Bible ℗ 2024, Davar Partners International. (Audio)

Vagla Old Testament

A saŋa naa, di Abraham jaa zɛŋ werge maa. Kɔraawiizi faa kissuu nɛnnɛ u wiɛɛlaa maa biini. A hɔl bɛl Abraham ŋɔ nɛr la n na binni u diahina ni u kuna maa ni, di kaa ɛɛ u balaa maa nabɔma be, “Kpa i nonii du n naapɔga baambaaŋ, ka hɛɛhzi Kɔraawiizi La N Na Di Kora Chiŋ la ni hɛri maa fɔŋŋa la lugɔ hàá gil n biibaal Aizik kpa Keenan hina naa miŋ soge ba biini naa biihaaŋ bɛl maa. Ka la n himmaa hɛri n nɛra be, di ga nyiŋŋi haaŋ wa tɛu.”
Denii a balii pɛɛzuu, “Di n wa laŋŋɔ di a haaŋ waa sɛɛwɛ ú hiŋiŋ ba hɛri naa geu? Amɔ, n kpogli Aizik ú ga du i nɛra bee?”
Abraham ŋɔ, “Akai, a dazi di gilɛɛ wa kpogluu di ra la de ŋmɛnɛ maa. Kɔraawiizi La N Na Di Kora Chiŋ la fɔŋŋa la lizimbuu lii n mɛɛ dia ani n hɛri, di hɛɛhzi ŋɔ nua lugɔ u daŋ kpa hɛri naa di tɛɛ n naanna. U daŋ gil u mɛlika tɔ i see di hiinii, í wer na haaŋ wa tɛɛ n biibaal. Di a biihambie waa wa sɛɛwɛ lugɔ u hiŋii ba, guŋwaa, i lii a hɛɛhzaa biinii. Ama, a dazi i ŋmɛnɛ maa wa kpogli n biibaal naa di ra la de.” Denii a balii kpa u nonii du Abraham naapɔga baambaaŋ, ka hɛɛhzi lugɔ u daŋ hiŋ Abraham nua la.
Denii u ɛɛ sirya, di lau u dɔɔri nyugmazi fi, di kpa kunnanaa irizi maa chugaa, di vol guŋŋ di ga hel Aram Naharam, di la bol la Nahɔ n faa soge la. A balii faa gil a nyugmazi giŋŋi di dugli kɔlɔŋ bɛl, a bol nua, di duana saŋaa, a bol haana jaa lii bá dɔɔ nii. Denii u suŋŋi wiizi di ŋɔ, “Kɔraawiizi la n dɔɔri Abraham n na hum, hiiniŋ n volaa naa lii hɛɛhrɔɔ tɛŋ, di gil nua la hiŋ ŋɔwɛɛ tɛɛ n dɔɔri la su u maga. Minuu chigɛ kɔlɔŋ naa kɛrii, bɔr la bol naa biihambizi n niŋ ba wa dɔɔ nii. N daŋ suŋŋi bɛl nii, di u wa sɛɛwɔ lugɔ u daŋ tɛŋ, di kaa ŋɔ u daŋ tɛɛ n nyugmazi ge a nyɔɔ, amɔ, waabuu niŋ ɛɛ suŋguru la hiŋ lizɛɛ ú ɛɛ Aizik haaŋ. Di guŋ wa ɛɛwɔ, n daŋ zum lugɔ i hiŋ nua la hiŋ ŋɔwɛɛ tɛɛ n dɔɔri labuu.”
Uŋ haa ra suŋŋi wiizi la, di toloori bɛl banna yir Ribɛka chigɔ u vii di ba. U mɛɛ sɔnnɛ faa Bɛtuɛl n ɛɛ Abraham niwee Nahɔ ni u haaŋ Milka biihaaŋ. Ribɛka faa ɛɛ toloorii werge. U faa haa waa baal zummɛ. Denii u tuu a bule ga dɔɔ nii di bir ba.
A balii chɔ chem u ni, di ŋɔ, “Jaande maa, tɛŋ nii ń nyɔɔ.”
Denii a toloori ŋɔ, “N nabɔma, a niirɛ keŋ.”
Uŋ wa nyɔɔwɛ tuŋ, u kaa ŋɔ, “N daŋ dɔɔ nii tɛɛ i nyugmazi naa gba á nyɔɔ guŋŋ di wa piŋ.” Denii u fug a nii du bol sela libee biini, ka kaa chɔ manaŋ tuu a bule ú kaa ga dɔɔ aŋhina wa jaa. U faa dɔɔ a niirɛ tɛɛa guŋŋ a nyɔɔ di wa piŋ. Unna ɛɛ gunla, a balii faa ra binnuu tiiih di ra fɛ lugɔ aŋhinabe, Kɔraawiizi gillɔɔ u volaa lii hɛɛhrɔɔ.
Un di kanyitti guŋŋ a nyugmazi wa nyɔɔ tuŋ, u kpa saliŋ nonibisig la yoola n kpolle du u miizi, di kpa saliŋ gbittizi anɛɛ ge du u nonee. Denii u pɛɛzuu, “Gaafura, anɛɛ biere hinnɛi? I mɛɛ dɔɔ dia ya chɔɔ hɔɔ ra piziaa?”
A toloori ŋɔ, “Milka ni Nahɔ biibaal Bɛtuɛl biere miŋ. Wibii maa, yaa dɔɔ sela diweere werge, di kaa dɔɔ dia yá tɛi i chɔɔ.”
A baal n wa nuu guŋ, u giŋŋi hɛri di ra jaami Kɔraawiizi, di ra ŋɔ, “Kɔraawiizi la n dɔɔri Abraham n na hum la dɔɔ jaannɛ werge maa. U wia dɔɔ wibiire dikuu uŋ hiŋ nua la uŋ ŋɔwɛɛ tɛɛ n dɔɔri wia. Kɔraawiizi kpoglimbuu ba n dɔɔri lulla be.”
Denii a toloori faa chɔ la dia, di ga bagli gunla maa n ɛɛwɛ la tɛɛ ba diahina. Ribɛka ge faa dɔɔ u niubambie bɛllɛ, ba ra yiruu Laban. U lii manaŋ di la baal la n du a bule la be. Laban faa na nonibisig ni gbittizii u niuhambie ni, di kaa nuu gunla ge uŋ baglɛɛ la. Awia, u la bɔr la a baal ni u nyugmazi n chigɛ la. Uŋ ga heluu, u ŋɔ u be, “Kɔraawiizi nɔŋŋiibuu, di kissii werge maa. Awia, a ba yaa dia. Ɛrɛɛ wiarɛ i chi bosseei? N kossi diarɛ ń tɛi, di kaa dɔɔ bɔr ń tɛɛ i nyugmazi gba.”
Awia, a baal la a dia, Laban pur u nyugmazi bunni maa dau ka tɛɛa diwee, di kaa tɛɛ Abraham balii hiŋ ni u nɛra nii, ba sanzi ba naazi. Baŋ wa ɛɛ guŋ tuŋ di duaniŋ diwee dii hello. Baŋ wa ŋɔ ba di, Abraham balii la ŋɔ, “Màá di, di maa wii la wia miŋ ballɛ ŋɔwɛɛ.”
Denii Laban ŋɔ, “Ŋɔ yaa be wii la wia hiŋ ballɛ.”
A baal ŋɔ, “Abraham baliirɛ miŋ. Kɔraawiizi hiinuubuu werge maa, di gil u ɛɛ dɔɔŋ. U tɛubuu peeza ni nauna, saliŋ ni saliŋhuŋŋu, yoŋhaana ni baala, nyugmazi ni kauzi. N dɔɔri Abraham haaŋ Saara faa wa zɛŋŋɔɔ werge maa ka haa lul biibaal tɛu. U kpa u daama maa tɛu. N dɔɔri Abraham gillɔɔ n hɛɛhzi lugɔ n daŋ hiŋ u nua. Kenne u ŋɔ, ‘Gilɛɛ waa nyiŋŋi haaŋ di ra tɛɛ n biibaal Aizik di ra lii Keenan hɛri biihaana biini. Ka la n mɛɛ nɛra be di ga nyiŋŋi haaŋ lii n lulla biini wa tɛu.’
Uŋ wa ŋɔ guŋ tuŋ, n pɛɛzuu, ‘Ka di n wa laŋŋɔ, a haaŋ waa sɛɛwɛ ú hiŋiŋ ba geu?’
Denii u ŋɔ, ‘Kɔraawiizi la minna hiŋ la daŋ gil u mɛlika tɔ i see, di hiinii í ga na a haaŋ n nɛra be, n lulla biini, di lii n mɛɛ dia wa tɛu. Ama, di i wa la n nɛra be ba ga kpollii waa, nua la hiŋ ŋɔwɛɛ di hɛɛhzi la wàá dii.’
Awia, miŋ wa hel bule naa wibaŋa naa ni, n suŋŋi wiizii, di ŋɔ, ‘Kɔraawiizi la n dɔɔri Abraham n na hum, di a parii, hiiniŋ n volaa naa lii hɛɛhrɔɔ tɛŋ. Minuu chigɛ bule naa zɛɛ, di toloori maa wa ballɔ ú wa dɔɔ nii, n daŋ suŋŋuu nii di nyɔɔ. Di u wa sɛɛwɔɔ ŋɔ u daŋ tɛŋ di kaa tɛɛ n nyugmazi naa gba, amɔ, n Dɔɔri Kɔraawiizi, gil u ɛɛ unla hiŋ lizɛɛ ŋɔ u ɛɛ Aizik haaŋ.’
Miŋ haa ra suŋŋi a keŋ wiizi, di Ribɛka chigɔ u vii di ra ba. Uŋ wa tuuwe dɔɔ u nii wa tuŋ, n ŋɔ u be, ‘Jaande maa, tɛŋ nii ń nyɔɔ.’
Denii u kuli u vii manaŋ, ka ŋɔ dí n lɛɛ nyɔɔ, ka ú dɔɔ tɛɛ n nyugmazi ge gba a nyɔɔ. Miŋ kaa wa pɛɛzuu nɛr la biihaaŋ n ɛɛu, u kaa ŋɔ, ‘N mɛɛrɛ Bɛtuɛl la n ɛɛ Nahɔ biibaal ni u haaŋ Milka biihaaŋ.’ Uŋ wa ŋɔ guŋ tuŋ, n kpa nonibisig ni gbittizi duu.
Miŋ wa ɛɛ guŋ tuŋ, n giŋŋi hɛri di jaami Kɔraawiizi la n dɔɔri Abraham n na hum la, di chɔluu werge maa, dikuu gunla uŋ tɔ n see n wa na haaŋ n dɔɔri Abraham nɛra biini tɛɛ u biibaal wia. Awia, di ii daŋ huuhzi biini di hiini n dɔɔri Abraham, ii ŋɔ n be, di ii wàá sɛɛ ge, ii ŋɔ, n zum gunla min niŋ ɛɛ.”
Denii Laban ni Bɛtuɛl maa kpau di ŋɔ, “Kɔraawiizii ba i ni bɔnnaa, wibii maa. Awia, ɛrɛɛ ya ge kaa ŋɔi? Ribɛkaa keŋ. Kpau di ra la, di ga gil ú ɛɛ i dɔɔri biibaal la haaŋ, gunla Kɔraawiizi n baglɛɛ la.”
Abraham balii la n nuu gunla baŋ ŋɔwɛɛ la, u giŋŋi jaami Kɔraawiizi werge maa. Denii a balii lizi saliŋ ni saliŋhuŋŋa bɔmbɔga ani wɛjɛnanaa tɛɛ Ribɛka, di kaa lizi kuna la yoola n kpolle werge maa tɛɛ u maa ni u kpɛɛma la.
Baŋ wa di diwee tuŋ, a balii ni u dɔŋahina la maa chɔɔ de. Hɔɔŋ waa pizi chɔɔzimpikke ni, Abraham balii la izi, di ŋɔ, “Ií taŋ ŋmɛnɛɛ n bir la n dɔɔri be.” Ka Ribɛka maa ni u kpɛɛma la ŋɔ, “Gil Ribɛka du yaa be hɔpizaa fi mɔɔ ka jaa ra la.”
Ka a balii bir ŋɔ, “Ií gilɛɛ laŋŋiŋ. Kɔraawiizi gillɔɔ wiimaa kuari. Awia, ií taŋ ŋmɛnɛɛ ń bir la n dɔɔri be.”
Ba ŋɔ, “Guŋwaa, gil ya yir Ribɛka di pɛɛzuu zum wii la n du u bampirii.” Awia, ba yiruu di pɛɛzuu, “I daŋ hiŋ baal naa kaaliaa?”
U sɛɛ, di ŋɔ, “Ɛɛh, n daŋ hiŋuu la.”
Awia, ba ta ba niuhambie Ribɛka ŋmɛnɛɛ, di gil ba balii hiŋuu, ba ni Abraham balii la maa jaa lii di ra kaali. Kenne ba kissuu ka tau ŋmɛnɛɛ,
“Yaa niuhambie,
Kɔ́raawiizi gil i dee
wazi werge maa, bá wazi,
ba wàá wer kur baa.
Di gil i naanna kpegli
ba dɔma bolzenaa maa.”
Denii Ribɛka ni u balaa tinni ba nyugmazi, ba ni Abraham balii la maa jaa lii di ra kaali.
A guŋ saŋa, di Aizik lii Bɛɛ Lahai Rɔi di ba, dikuubɛɛwiai, u faa du Nɛgɛvuu. A hɔl bɛl, u lii di ra gaagi laŋgara, di ra lɔ nfɛrɛ. Uŋ wa lalli u nyuu ŋɔ u binni, di nyugmazii gaa ba. Ribɛka ge n wa ŋɔ u binni, di Aizikii. U lii u nyugma nyuu tuu, ka pɛɛzi Abraham balii la, “Anɛɛ n na chem yaa ni naanɛi?” U ŋɔ, “N dɔɔrii.” Ribɛka n wa nuu guŋ, u lau u saata di tɔ u siwee. Denii a balii jaa bagli gunla maa uŋ ɛɛwɛ di tɛɛ Aizik. Aizik jaa lau Ribɛka zuu u maa tanti dia, u jaa birgi u haaŋ. U bɔra sɔɔni, u bampirii jaa tig u maa siu la wia.

Phulaphula i Luglaa 24