Thai, Northern - 2017 Lanna Bible (Non-Drama NT)

หลัง​จาก​นั้น พระเยซู​ก็​เตียว​ขึ้น​ไป​ตี้​กรุง​เยรูซาเล็ม เปื้อ​ไป​ฮ่วม​งาน​ของ​จาว​ยิว ใน​กรุง​เยรูซาเล็ม​มี​สระน้ำ​อยู่​ใก้﻿ๆ ปะตู๋​ตี้​จื้อ​ว่า ปะตู๋​แกะ ภาษา​ฮีบรู​ฮ้อง​ว่า “เบธซาธา” ตี้​หั้น​มี​ศาลา​ห้า​หลัง แล้ว​ก็​มี​คน​เจ็บ​คน​ป่วย​นัก​ขนาด​ตี้​นอน​อยู่​ใน​ศาลา​ต่าง﻿ๆ นั้น​คือ คน​ต๋าบอด คน​เป๋น​ง่อย กับ​คน​เป๋น​อัมพาต ตี้​หั้น​มี​ป้อจาย​คน​นึ่ง บ่﻿สบาย​ได้​สาม​สิบ​แปด​ปี๋​แล้ว เมื่อ​พระเยซู​หัน​เขา​นอน​อยู่​ตี้​หั้น พระเยซู​ก็​ฮู้​ว่า​ป้อจาย​คน​นี้​บ่﻿สบาย​มา​เมิน พระองค์​ก็​เลย​อู้​กับ​เขา​ว่า “ใค่​อยาก​หาย​ก่อ”
ป้อจาย​คน​นี้​ก็​ตอบ​ว่า “ต้าน​ครับ เมื่อ​น้ำ​เป๋น​คลื่น ก็​บ่﻿มี​ใผ​จ้วย​เอา​เฮา​ลง​ไป​สัก​คน ต๋อน​เฮา​กั๊น​จะ​ลง คน​อื่น​ก็​ลู่​ลง​ไป​เหีย​ก่อน​กู้​เตื้อ”
พระเยซู​ก็​เลย​ตอบ​ว่า “ลุก​ขึ้น แล้ว​แบก​ตี้นอน​ของ​เจ้า​เตียว​ไป​เต๊อะ” ป้อจาย​คน​นี้​ก็​หาย​บ่า​เดี่ยว​นั้น​เลย แล้ว​แบก​ตี้นอน​เตียว​ไป
วัน​ตี้​เรื่อง​นี้​เกิด​ขึ้น​เป๋น​วัน​สะบาโต ผู้นำ​จาว​ยิว​ก็​อู้​กับ​ป้อจาย​คน​ตี้​หาย​ว่า “ตี้​ต้าน​แบก​ตี้นอน​เตียว​ไป​เตียว​มา​ใน​วัน​สะบาโต ฮู้​ก่อ มัน​ผิด​บท​บัญญัติ”
ป้อจาย​คน​นั้น​ก็​ตอบ​ว่า “คน​ตี้​ฮักษา​เฮา​บอก​หื้อ​เก็บ​ตี้นอน​เตียว​ไป​เต๊อะ”
หมู่​ผู้นำ​จาว​ยิว​ถาม​แหม​กำ​ว่า “ใผ​เป๋น​คน​อู้​จาอั้น”
แต่​ป้อจาย​คน​นั้น​บ่﻿ฮู้​ว่า​คน​ตี้​ฮักษา​เขา​จื้อ​อะหยัง ย้อน​พระเยซู​เตียว​หาย​เข้า​ไป​ใน​หมู่​คน​ตี้​อยู่​ตี้​หั้น​แล้ว
หลังจาก​นั้น พระเยซู​ก็​ปะ​เขา​แหม​เตื้อ​ใน​พระวิหาร พระองค์​ก็​อู้​กับ​เขา​ว่า “ต๋อน​นี้​ต้าน​ก็​หาย​ดี​แล้ว หื้อ​ย้าง​เยียะ​บาป​เหีย เปื้อ​บ่﻿หื้อ​ความ​ตุ๊ก​นัก​เหลือ​นี้​เกิด​ขึ้น​กับ​ต้าน​แหม”
แล้ว​ป้อจาย​คน​นั้น​ก็​ไป​บอก​หมู่​ผู้นำ​จาว​ยิว​ว่า​พระเยซู​เป๋น​คน​ฮักษา​เขา​หื้อ​หาย
จาอั้น​หมู่​ผู้นำ​จาว​ยิว​ก็​ตั้งเก๊า​ค่ำ​พระองค์ ย้อน​ว่า​พระองค์​เยียะ​สิ่ง​หมู่​นี้​ใน​วัน​สะบาโต
พระเยซู​ก็​บอก​ว่า “พระบิดา​ของ​เฮา​เยียะ​ก๋าน​อยู่​ตลอด แล้ว​เฮา​ต้อง​เยียะ​ก๋าน​ตลอด​ตวย” ย้อน​จาอี้ หมู่​ผู้นำ​จาว​ยิว​ก็​ซ้ำ​กึ๊ด​จะ​ฆ่า​พระองค์ ย้อน​พระองค์​บ่﻿ได้​ย้าง​เยียะ​ก๋าน​ใน​วัน​สะบาโต ป๋าย​บ่﻿ปอ​พระองค์​ยัง​ฮ้อง​พระเจ้า​ว่า​เป๋น​พระบิดา​ของ​ตั๋ว​เก่า​แหม ก็​เต้า​กับ​เป๋น​ก๋าน​ยก​ตั๋ว​เก่า​เต้า​กับ​พระเจ้า

พระเยซู​บอก​กับ​หมู่​ผู้นำ​จาว​ยิว​ว่า “เฮา​บอก​ความ​จริง​แก่​ต้าน​ตังหลาย​ว่า พระบุตร​เยียะ​ต๋าม​ใจ๋​ตั๋ว​เก่า​บ่﻿ได้ พระองค์​เยียะ​ได้​ก้า​สิ่ง​ตี้​หัน​พระบิดา​เยียะ​เต้าอั้น ย้อน​ว่า​อะหยัง​ตี้​พระบิดา​เยียะ พระบุตร​ก็​เยียะ​ตวย ย้อน​ว่า​พระบิดา​ฮัก​พระบุตร เลย​หื้อ​พระบุตร​หัน​กู้​สิ่ง​กู้​อย่าง​ตี้​พระบิดา​เยียะ แล้ว​พระองค์​จะ​หื้อ​พระบุตร​หัน​สิ่ง​ตี้​ยิ่งใหญ่​นัก​เหลือ​นี้​แหม เป๋น​สิ่ง​ตี้​พระบุตร​จะ​เยียะ แล้ว​หมู่​ต้าน​ก็​จะ​งืด เหมือน​กับ​ตี้​พระบิดา​เยียะ​หื้อ​คน​ต๋าย​แล้ว​เป๋น​ขึ้น​จาก​ความ​ต๋าย พระบุตร​ก็​จะ​หื้อ​จีวิต​กับ​ใผ​ก็​ได้​ตี้​พระองค์​ใค่​โผด​หื้อ​เหมือน​กั๋น พระบิดา​บ่﻿ตัดสิน​ใผ แต่​พระองค์​มอบ​สิทธิ​อำนาจ​ตึงหมด​ใน​ก๋าน​ตัดสิน​หื้อ​พระบุตร เปื้อ​หมู่​คน​ตึง​หมด​จะ​หื้อ​เกียรติ​พระบุตร​เหมือน​ตี้​หมู่​เขา​หื้อ​เกียรติ​พระบิดา คน​ตี้​บ่﻿หื้อ​เกียรติ​พระบุตร หมู่​เขา​ก็​บ่﻿หื้อ​เกียรติ​พระบิดา​ผู้​ตี้​ใจ๊​พระบุตร​มา​ตวย
“เฮา​บอก​ความ​จริง​แก่​ต้าน​ตังหลาย​ว่า คน​ตี้​ฟัง​กำ​เฮา​และ​เจื้อ​วางใจ๋​พระองค์​ผู้​ตี้​ใจ๊​เฮา​มา เขา​ก็​มี​จีวิต​นิรันดร์ กับ​จะ​บ่﻿ถูก​ตัดสิน​ลงโต้ษ ย้อน​ว่า​เขา​ได้​ป๊น​จาก​ความ​ต๋าย ไป​มี​จีวิต​นิรันดร์​แล้ว เฮา​บอก​ความ​จริง​แก่​ต้าน​ตังหลาย​ว่า เวลา​นั้น​ก็​ใก้​มา​แผว บ่าเดี่ยวนี้​ก็​มา​แผว​แล้ว​ตวย​ตี้​คน​ต๋าย​จะ​ได้​ยิน​เสียง​พระบุตร​ของ​พระเจ้า คน​ตี้​ได้​ยิน​แล้ว​เจื้อฟัง ก็​จะ​มี​จีวิต​นิรันดร์ พระบิดา​เป๋น​บ่อเกิด​ของ​จีวิต​ตึงหมด กับ​ได้​หื้อ​พระบุตร​ของ​พระองค์​เป๋น​บ่อเกิด​ของ​จีวิต​เหมือน​กั๋น พระบิดา​มอบ​สิทธิ​อำนาจ​ตี้​จะ​เป๋น​ผู้​ตัดสิน​ลงโต้ษ​หื้อ​พระบุตร​ของ​พระองค์ ย้อน​ว่า​พระบุตร​ก็​เป๋น​บุตรมนุษย์​ตวย หมู่​ต้าน​บ่﻿ต้อง​งืด​ใน​เรื่อง​นี้ ย้อน​ว่า​เวลา​ใก้​จะ​มา​แผว​แล้ว​ตี้​คน​ต๋าย​จะ​ได้ยิน​เสียง​บุตรมนุษย์ แล้ว​ปา​กั๋น​ออก​มา​จาก​อุโมงค์​ฝังศพ คน​ตี้​เยียะ​ดี​ก็​เป๋น​ขึ้น​มา​เปื้อ​ฮับ​จีวิต​นิรันดร์ คน​ตี้​เยียะ​บ่﻿ดี​ก็​จะ​เป๋น​ขึ้น​มา​เปื้อ​ถูก​ตัดสิน​ลงโต้ษ

“เฮา​จะ​เยียะ​อะหยัง​ต๋าม​ใจ๋​ตั๋ว​เก่า​บ่﻿ได้ พระเจ้า​สั่ง​จาใด เฮา​ก็​ตัดสิน​ไป​จาอั้น แล้ว​กำ​ตัดสิน​ของ​เฮา​ก็​ยุติธรรม ย้อน​ว่า​เฮา​เยียะ​ต๋าม​ความ​ต้องก๋าน​ของ​ผู้​ตี้​ใจ๊​เฮา​มา บ่﻿ใจ้​ต๋าม​ใจ๋​ของ​ตั๋ว​เก่า
“ถ้า​เฮา​เป๋น​พยาน​หื้อ​ตั๋ว​เก่า กำ​พยาน​ของ​เฮา​ก็​เจื้อถือ​บ่﻿ได้ แต่​เฮา​มี​ผู้​นึ่ง​เป๋น​พยาน​หื้อ​เฮา เฮา​ฮู้​ว่า​กำ​พยาน​ของ​พระองค์​เรื่อง​เฮา​นั้น​เป๋น​ความ​จริง
“หมู่​ต้าน​ได้​ส่ง​คน​ไป​หา​ยอห์น แล้ว​ยอห์น​ก็​ได้​อู้​กำ​พยาน​เรื่อง​เฮา​ตี้​เป๋น​ความ​จริง ตี้​เฮา​อู้​จาอี้​บ่﻿ใจ้​ว่า​เฮา​ต้อง​หื้อ​คน​มา​เป๋น​พยาน​หื้อ แต่​เปื้อ​จ้วย​หื้อ​หมู่​ต้าน​เจื้อ​เฮา แล้ว​รอด​ป๊น​บาป​โต้ษ ยอห์น​เป๋น​เหมือน​โกม​ไฟ​ตี้​ต๋าม​ส่อง​แสง หมู่​ต้าน​ปอใจ๋​ตี้​จะ​ฮับ​แสง​ของ​ยอห์น แล้ว​จื้นจม​ยินดี​กับ​แสง​นั้น​ได้​กำ​นึ่ง
“แต่​เฮา​มี​กำ​พยาน​ตี้​ยิ่งใหญ่​นัก​เหลือ​กำ​พยาน​ของ​ยอห์น ย้อน​ว่า​ก๋าน​ตี้​พระบิดา​มอบ​หื้อ​เฮา​เยียะ​จ๋น​แล้ว คือ​กำ​สั่ง​สอน​กับ​หมายสำคัญ​ตี้​เฮา​ก่ำลัง​เยียะ​อยู่ ก๋าน​นี้​เป๋น​พยาน​หื้อ​เฮา​ว่า​พระบิดา​เป๋น​ผู้​ตี้​ใจ๊​เฮา​มา พระบิดา​ผู้​ตี้​ใจ๊​เฮา​มา​ก็​เป๋น​พยาน​หื้อ​เฮา​ตวย หมู่​ต้าน​บ่﻿เกย​ได้​ยิน​เสียง บ่﻿เกย​หัน​ฮูปฮ่าง​ของ​พระองค์ กำ​อู้​ของ​พระองค์​ก็​บ่﻿อยู่​ใน​ใจ๋​ของ​หมู่​ต้าน ย้อน​ว่า​หมู่​ต้าน​บ่﻿เจื้อ​วางใจ๋​ผู้​ตี้​พระบิดา​ส่ง​มา หมู่​ต้าน​ตั้งใจ๋​ฮ่ำเฮียน​พระคัมภีร์ ย้อน​กึ๊ด​ว่า​หมู่​ต้าน​จะ​ปะ​ตาง​ตี้​จะ​ได้ฮับ​จีวิต​นิรันดร์​ใน​นั้น พระคัมภีร์​นี้​ละ​มี​กำ​เขียน​เถิง​เฮา แต่​หมู่​ต้าน​ก็​บ่﻿ยอม​มา​หา​เฮา​เปื้อ​ฮับ​จีวิต​นิรันดร์
“เฮา​บ่﻿สนใจ๋​กำ​ยกย่อง​ของ​คน ย้อน​เฮา​ฮู้จัก​หมู่​ต้าน​กับ​ฮู้​ว่า​ใน​ใจ๋​หมู่​ต้าน​บ่﻿ได้​ฮัก​พระเจ้า​แต๊﻿ๆ เฮา​มา​ใน​นาม​ของ​พระบิดา หมู่​ต้าน​ก็​บ่﻿ยอม​ฮับ​เฮา แต่​ถ้า​มี​คน​มา​อู้​ใน​นาม​ตั๋ว​เก่า หมู่​ต้าน​ก็​จะ​ยอม​ฮับ​เขา​เหีย หมู่​ต้าน​จะ​เจื้อ​เฮา​ได้​จาใด ย้อน​หมู่​ต้าน​ซอบ​ยกย่อง​กั๋น แต่​บ่﻿สนใจ๋​เซาะ​หา​กำ​ยกย่อง​ตี้​มา​จาก​พระเจ้า​องค์​เดียว บ่﻿ต้อง​กึ๊ด​ว่า​เฮา​จะ​ฟ้อง​หมู่​ต้าน​ต่อหน้า​พระบิดา หมู่​ต้าน​หวัง​จะ​รอด​ป๊น​บาป​โต้ษ​โดย​เจื้อ​ฟัง​บท​บัญญัติ​ของ​โมเสส แต่​โมเสส​คน​เนียะ จะ​เป๋น​คน​ฟ้อง​หมู่​ต้าน ถ้า​หมู่​ต้าน​เจื้อ​โมเสส​แต๊﻿ๆ ต้าน​ก็​จะ​เจื้อ​เฮา​ตวย ย้อน​โมเสส​ได้​เขียน​เถิง​ตั๋ว​เฮา แต่​ถ้า​ต้าน​บ่﻿เจื้อ​ใน​สิ่ง​ตี้​โมเสส​เขียน​แล้ว ต้าน​จะ​เจื้อ​กำ​อู้​ของ​เฮา​ได้​จาใด”

Phulaphula i ยอห์น 5