Nawuri: Ɩbwaarɛ Katɔwɛ Kyula Pʋpwɛ New Testament

Ɩbwaarɛ Katɔwɛ Kyula Pʋpwɛ

Lɩɩ npiili asɛ, pɔyɩ kɛ Ɩbwaarɛ ɔ tʋʋ dulinyaa mʋ, ɔmʋ nɩɩ ɔ gyɛ Ɩbwaarɛ kɔnɔ tɔ Asɩn mʋ bʋ tɔ. Nɩɩ Ɩbwaarɛ Kɔnɔ tɔ Asɩn mʋ maa Ɩbwaarɛ ɩ bʋ tɔ, nɩɩ Kɔnɔ tɔ Asɩn maŋa ɩ gyɛ Ɩbwaarɛ. Lɩɩ koo npiili asɛ mʋ, Kɔnɔ tɔ Asɩn mʋ maa Ɩbwaarɛ ɩ bʋ tɔ.
Kɔnɔ tɔ Asɩn mʋ sʋ nɩɩ ɔ bɔla tʋʋ kʋtɔ kʋmaa. Sɛhn man bʋ tɔ nɩɩ man gyɛ mʋ kɔnɔ tɔ Asɩn mʋ sʋ nɩɩ ɔ bɔla sʋ tʋʋ kɩmʋ. Ɩbwaarɛ Kɔnɔ tɔ Asɩn mʋ tɔ nɩɩ nkpa ɩ bʋ, nɩɩ nkpa maŋa ɩɩ ŋmaŋɛ tɔ ɩɩ sa asa kpini. Kaŋmaŋɛ mʋ ɩɩ ŋmaŋɛ kitentenbiri tɔ, nɩɩ kitentenbiri mʋ man taalɛ dunla kaŋmaŋɛ mʋ kakaakʋ.
Ɔnyɩn kʋ kyɩna ɔ bʋ tɔ, nɩɩ Ɩbwaarɛ sun mʋ, bɛɛ tɩɩ mʋ yɛ Gyɔn. Gyɔn ba nɩn ɔ ba tɔwɛ kesintin asɩn lɩɩ kaŋmaŋɛ mʋ sʋ sa asa, kɛ ɔkʋmaa nɩmʋ ɔ nyɛ nu kɛ ɔ kɔɔlɛ gyii. Man gyɛ Gyɔn gbaa‐gbaa ɩ gyɛ kaŋmaŋɛ mʋ, mɛɛ mʋ ba nɩn kɛ ɔ ba tɔwɛ asɩn lɩɩ kaŋmaŋɛ mʋ sʋ. Kesintin kaŋmaŋɛ mʋ nɩɩ kɩɩ ŋmaŋɛ sa asa kpini mʋ, kɩɩ ba dulinyaa tɔ.
Dulinya nɩmʋ tɔ nɩɩ Ɩbwaarɛ kɔnɔ tɔ Asɩn mʋ wʋla ɔ bʋ. Nɩɩ mʋ sʋ nɩɩ Ɩbwaarɛ bɔla tʋʋ dulinyaa mʋ, nkɛɛ dulinyaa asa ba man bɩɩ mʋ. Ɔ ba mʋ gbaa‐gbaa mʋ ɔsʋwʋlɛ sʋ, amaa mʋ gbaa‐gbaa asa ba man kɔɔlɛ mʋ. Amaa asa mʋ nɩɩ ba kɔɔlɛ mʋ, nɩɩ ba kɔɔlɛ mʋ gyii mʋ kpini mʋ, ɔ sa bamʋ ɔkpa yɛ ba be biliŋi Ɩbwaarɛ mu‐bii ana. Ba man biliŋi mu‐bii ana bɔla nyɩmɩsa kakʋʋgɛ sʋ, abɛɛ nyɩmɩsa kɔkɔlɔ biti sʋ, abɛɛ ɔnyɩn kebiti sʋ. Amaa Ɩbwaarɛ gbaa‐gbaa ɩɩ yɛgɛ nɩɩ ba be biliŋi mu‐bii ana.
Nɩɩ Ɔmʋ nɩɩ ɔ gyɛ Ɩbwaarɛ Kɔnɔ tɔ Asɩn mʋ ba biliŋi nyɩmɩsa, nɩɩ ɔ ba kyɩna anɛ asɛ kasɛ sʋ. An wu mʋ bʋnyaa kparɛ, mʋ nɩɩ ɩ kaapʋ fɛɛ, mʋ ɩ gyɛ Ɩbwaarɛ Mu‐Bii kʋlʋn kpen mʋ. Nɩɩ kabwaala yɛ kesintin kɩ bɔla mʋ.
Mʋ asɩn nɩɩ Gyɔn daa ɛɛ tɔwɛ ɛɛ kaapʋ tɔ, nɩɩ ɔ lɛɛ kɔnɔ kenken yɛ, “Ɔnɩmʋ asɩn nɩɩ n wʋla tɔwɛ fanɛ, nɩɩ n tɔwɛ yɛ, ‘Ɔmʋ nɩɩ ɔ bʋ mɛ kamaa tɔ ɛɛ ba mʋ kyɔ mɛ, nɩɩ ɔ wʋla ɔ bʋ tɔ pɔyɩ nɩɩ ba kʋʋgɛ mɛ mʋ.’ ” Lɩɩ mʋ kabwaala mʋ nɩɩ kɩ bɔla mʋ tɔ gaa sʋ mʋ, anɛ kpini an nyɛ kusee kʋkyɔ‐kʋkyɔ. Ɩbwaarɛ bɔla Mosesi sʋ taa nbara mʋ sa. Amaa kabwaala yɛ kesintin bɩrɛ bɔla Yesu Krisito sʋ nɩn ba. Nɩɩ ɔkʋ man pɩɩta wu Ɩbwaarɛ kakaakʋ, amɔɔ mu‐bii kʋlʋn mʋ nɩɩ ngbaa mʋ ɔ gyɛ Ɩbwaarɛ, nɩɩ ɔ bʋ Ɩbwaarɛ asɛ mʋ, ɩ lɛɛ Ɩbwaarɛ kedubi kaapʋ.


Nɩɩ Gyiwu abi alʋnpʋ mʋ nɩɩ ba bʋ Gyerusalem mʋ ba sun Ɩbwaarɛ aseepu yɛ Lewi abi Gyɔn asɛ ba naa taasɛ mʋ yɛ, “Fʋ ɩ gyɛ anɩmʋ?” Nɩɩ Gyɔn man kina kɩtɔwɛ, amaa ɔ tɔwɛ bugi tɔ yɛ, “Man gyɛ mɛ ɩ gyɛ Krisito, Ɔmʋ nɩɩ Ɩbwaarɛ wʋla lɛɛ mʋ.”
Nɩɩ ba taasɛ mʋ yɛ, “Kanɩn bɩrɛ, anɩmʋ ɩ gyɛ fʋ? Fʋ ɩ gyɛ Ɩbwaarɛ ɔtɔwɛpʋ Eligya mʋ?”
Nɩɩ ɔ yɛ, “Ayee! Man gyɛ mɛ ɩ gyɛ Eligya.”
Nɩɩ ba bɩla taasɛ mʋ yɛ, “Fʋ ɩ gyɛ Ɩbwaarɛ ɔtɔwɛpʋ mʋ nɩɩ an kɩɩ mʋ ɔkpa mʋ?”
Nɩɩ ɔ lɛɛ kɔnɔ yɛ, “Ayee.”
Ɩmʋ kamaa mʋ ba bɩla taasɛ yɛ, “Anɩmʋ bɩrɛ ɩ gyɛ fʋ? Lɛɛ kɔnɔ sa anɛ, kɛ a nyɛ asɩn kʋ naa tɔwɛ bamʋ nɩɩ ba sun anɛ mʋ. Ɔsa mɔɔ bɩrɛ gbaa ɩ gyɛ fʋ?”
Nɩɩ Gyɔn lɛɛ kɔnɔ yɛ, “Mɛ ɩ gyɛ ɔbʋlɛ mʋ nɩɩ kii kuusi ofuli sʋ yɛ, ‘Fan kyiigi ɔkpa mʋ sa Ɔnyɩrɩpɛ mʋ.’ Falɛ nɩɩ Ɩbwaarɛ ɔtɔwɛpʋ Isaya kyʋrɔɔ yɩla Ɩbwaarɛ asɩn mʋ tɔ mʋ.”
Nɩɩ Farasii abi akʋ ba sun nbɔɔ Gyɔn asɛ, ba naa taasɛ mʋ yɛ, “Fʋ maa man gyɛ Krisito mʋ, abɛɛ Eligya, abɛɛ Ɩbwaarɛ ɔtɔwɛpʋ mʋ, mɩnɛ ɩ waa sʋ nɩɩ fii gyee asa Ɩbwaarɛ kekyugyee?”
Gyɔn lɛɛ bamʋ kɔnɔ yɛ, “N sʋ nkyu nɩn n gyee asa Ɩbwaarɛ kekyugyee. Amaa ɔkʋ yɩlɛ fanɛ tɔ nɩɩ fan man nyi mʋ. Mʋ ɩ gyɛ ɔmʋ nɩɩ ɔ bʋ mɛ kamaa tɔ ɛɛ ba mʋ. Amaa n man dagaa gbaa n saŋɛ mʋ asɩbɩta ɩfɛ.”
Asɩn nɩmʋ kpini ɩ waa Betani kadɛ tɔ nɩn. Betani bʋ Gyɔdan ɔbʋn benbe kyɔwɛ ɔlɩɩkpa, katɩn mʋ nɩɩ Gyɔn ii gyee asa Ɩbwaarɛ kekyugyee mʋ.

Ɩmʋ lɩɩkaakɛ Gyɔn maa wu Yesu maa naa ɛɛ ba mʋ asɛ mʋ, ɔ tɔwɛ yɛ, “Fan kɩɩ, ɔnɩmʋ ɩ gyɛ Ɩbwaarɛ kabʋlʋpʋ, mʋ nɩɩ ee biti ɔ taa mʋ n‐yɩɩ lɛɛ saraga kɛ asa kpini ba nyɛ alibi kɩtaakɛɛ mʋ. Ɔnɩmʋ ɩ gyɛ ɔmʋ nɩɩ n wʋla n tɔwɛ mʋ asɩn yɛ, ‘Ɔnyɩn kʋ bʋ mɛ kamaa ɛɛ ba, nɩɩ ɔ kyɔ mɛ, lɩɩ fɛɛ ɔ wʋla ɔ bʋ tɔ pɔyɩ nɩɩ ba kʋʋgɛ mɛ.’ Mɛ gbaa‐gbaa mɛ bɩrɛ n man n daa n nyi mʋ, amaa kʋtɔ mʋ sʋ nɩɩ Ɩbwaarɛ sun mɛ yɛ n ba gyee asa Ɩbwaarɛ kekyugyee mʋ, kɛ n ba nyɛ lɛɛ mʋ ifuli kaapʋ Ɩsɩrayɩ abi mʋ.”
Nɩɩ Gyɔn gyii ɩmʋ kesintin tɔwɛ yɛ, “N wu Kayaayu Kyɩrɛkyɩrɛ mʋ kɩ maa kpɩlɩgɛ lɩɩ sʋsʋ fɛɛ kuwura‐lɔpɔ nɩɩ kɩ ba kyɩna sii mʋ sʋ. Naafɔɔ ngbaa mɛ n man n wʋla n nyi mʋ, amaa Ɩbwaarɛ mʋ nɩɩ o sun mɛ yɛ n ba gyee asa Ɩbwaarɛ kekyugyee mʋ, ɩ tɔwɛ mɛ yɛ, ‘Ɔmʋ nɩɩ fʋ kan wu mɛ Kayaayu kɩ maa kpɩlɩgɛ lɩɩ sʋsʋ ba kyɩna sii mʋ sʋ mʋ, mʋ ɩ gyɛ ɔmʋ nɩɩ ee biti ɔ taa mɛ Kayaayu mʋ gyee asa.’ N wu ɩnɩmʋ kpini nɩɩ n gyii ɩmʋ kesintin yɛ ɔnɩmʋ ɩ gyɛ Ɩbwaarɛ Mu‐Bii mʋ.”

Lɩɩkaakɛ mʋ, Gyɔn maa mʋ abɩɩlapʋ anyɔ ba bɩla ba yɩlɛ tʋtɔ. Maa wu Yesu maa naa ɛɛ kyʋn mʋ, ɔ tɔwɛ yɛ, “Fan kɩɩ, Ɩbwaarɛ Kabʋlʋpʋ mʋ ndee!”
Gyɔn abɩɩlapʋ anyɔ mʋ ba maa nu maa tɔwɛ kanɩn mʋ, nɩɩ ba buu Yesu. Yesu maa biliŋi kɩɩ mʋ, o wu ba maa buu mʋ, nɩɩ ɔ taasɛ bamʋ yɛ, “Mɩnɛ nɩɩ fen biti?”
Nɩɩ ba lɛɛ kɔnɔ yɛ, “Rabi, fɩnɛ nɩɩ fʋ tɛ?” (Rabi kasɛ ɩ gyɛ yɛ Ɔkaapʋpʋ).
Yesu tɔwɛ bamʋ yɛ, “Fan ba kɩɩ katɩn mʋ nɩɩ n tɛ.”
Ɩmʋ sʋ ba buu mʋ naa wu katɩn mʋ nɩɩ ɔ tɛ. Saŋa maŋa tɔ gyɛ kalaatɩpwɛ sʋ kerefi ana tɔ. Nɩɩ ba kyɩna mʋ asɛ kakɛ maŋa.
Asa anyɔ mʋ nɩɩ ba nu asɩn mʋ nɩɩ Gyɔn tɔwɛ, nɩɩ ba buu Yesu mʋ, bamʋ tɔ ɔkʋ ɩ gyɛ Simon Pita mu‐supu Andiruwu. Kʋtɔ mʋ nɩɩ Andiruwu gyankpaa waa ɩ gyɛ yɛ, o biti mʋ‐daa Simon nɩɩ ɔ tɔwɛ mʋ yɛ, “An wu Mesaya mʋ.” Mesaya mʋ kasɛ ɩ gyɛ yɛ, Ɔmʋ nɩɩ Ɩbwaarɛ wʋla lɛɛ yɛ ɔ ba mɔlɩgɛ asa. Nɩɩ Andiruwu taa mʋ‐daa Simon kpee Yesu asɛ.
Yesu kɩɩ mʋ, nɩɩ ɔ tɔwɛ mʋ yɛ, “N nyi fɛɛ fʋ ɩ gyɛ Simon, Gyɔn mu‐bii‐nyɩnsa mʋ. Amaa bee biti ba tɩɩ fʋ yɛ Kefasi” (Giriki katɔwɛ tɔ ɩ gyɛ yɛ Pita, nɩɩ kɩmʋ kasɛ ɩ gyɛ yɛ kɩfʋlɛ.)

Ɩmʋ lɩɩkaakɛ mʋ, Yesu waa nfɛɛrɛ fɛɛ ee biti o kpee Galile ɔsʋwʋlɛ sʋ. O wu Filipu, nɩɩ ɔ tɔwɛ mʋ yɛ, “Ba buu mɛ!”
Filipi lɩɩ Betisayida kadɛ tɔ nɩn tʋtɔ nɩɩ Andiruwu maa Pita gbaa ba lɩɩ. Nɩɩ Filipu wu Nataneli nɩɩ ɔ tɔwɛ mʋ yɛ, “An wu ɔmʋ nɩɩ Mosesi wʋla kyʋrɔɔ mʋ asɩn waa Nbara ɩwʋlɛ tɔ, nɩɩ Ɩbwaarɛ atɔwɛpʋ gbaa ba kyʋrɔɔ mʋ asɩn yɩla mʋ. Mʋ ɩ gyɛ Yesu, Gyosefu nɩɩ ɔ lɩɩ Nasareti kadɛ tɔ mʋ mu‐bii.”
Nɩɩ Nataneli taasɛ mʋ yɛ, “Amɔɔ, kʋtɔ danbɩrasa kʋ ɩ taalɛ lɩɩ Nasareti kadɛ tɔ?”
Tʋtɔ nɩɩ Filipu tɔwɛ mʋ yɛ, “Ba kɩɩ.”
Yesu maa wu Nataneli maa naa ɛɛ ba mʋ asɛ mʋ, ɔ tɔwɛ yɛ, “Kesintin tɔ, Ɩsɩrayɩ ɔnyɩn gbaa‐gbaa ndee, nɩɩ antɩŋɛsa kʋ man bʋ mʋ tɔ.”
Nɩɩ Nataneli taasɛ Yesu yɛ, “Nɛnɛ nɩɩ fʋ waa fii nyi mɛ?” Yesu lɛɛ mʋ kɔnɔ yɛ, “N wu fʋ saŋa mʋ nɩɩ fʋ bʋ figi onyin tɔ, pɔyɩ nɩɩ Filipu tɩɩ fʋ mʋ.”
Nɩɩ Nataneli tɔwɛ Yesu yɛ, “Ɔkaapʋpʋ, fʋ ɩ gyɛ Ɩbwaarɛ Mu‐Bii mʋ! Nɩɩ fʋ ɩ bɩla fʋ gyɛ Ɩsɩrayɩ abi Owura mʋ.”
Tʋtɔ nɩɩ Yesu tɔwɛ mʋ yɛ, “N maa tɔwɛ fʋ yɛ, n wu fʋ fʋ maa bʋ figi onyin tɔ sʋ nɩɩ fʋ kɔɔlɛ gyii? Fii biti fʋ ba wu atɔ damantɛ mʋ nɩɩ ɩ kyɔ ɩnɩmʋ gbaa.” Nɩɩ Yesu bwii kyaga sʋ yɛ, “N tɔwɛ fanɛ kesintin yɛ, fanɛ kpini fen biti fan wu sʋsʋ maa bugi tɔ, kɛ Ɩbwaarɛ nbɔɔ ba ba bee dii bɛɛ kpɩlɩgɛ mɛ, Daadimaadi Obii‐nyɩnsa sʋ.”

Phulaphula i Gyn 1