℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

有一個法利賽人，名安到 尼哥德慕 ，係 猶太 人个領袖。 佢在暗晡時來見耶穌，講：「先生，𠊎等知你係對上帝該位來个教師。你所行个神蹟，若毋係有上帝同在，無人能行。」
耶穌應講：「𠊎實在㧯你講，人若係無重生 ，就看毋到上帝个國實現。」
尼哥德慕 問講：「人只有緊來緊老，樣會重生呢？佢能倒轉母胎再𫱔出來係麼？」
耶穌應講：「𠊎實在㧯你講，人若毋係對水㧯聖靈來重生，就無可能成做上帝國个子民。 人个肉身係對爺𡟓𫱔个，佢个靈性係對聖靈𫱔个。 毋好因為𠊎講『你等一定愛重生 』感覺奇怪。 風 照自家个意思吹，你聽到它个聲，總係毋知它對㖠位來，愛去㖠位。每一個對聖靈𫱔个，也係恁樣。」
尼哥德慕 問佢講：「樣會有恁樣个事呢？」
耶穌應講：「你係 以色列 个教師，連這兜事也毋會明白嗎？ 𠊎實在㧯你講，𠊎等講論𠊎等所知个，𠊎等見證𠊎等所看到个；總係你等偏偏毋肯領受𠊎等个見證。 𠊎㧯你等講這世間个事，你等都毋信；𠊎若係㧯你等講天頂个事，你等樣會信哪？ 除了對天頂降下來个人子，從來毋識有人上過天。 就像 摩西 在曠野擎起銅蛇，人子也一定愛被人擎起來， 使所有信佢个人得到永遠个生命。
「因為上帝痛惜世間人，所以將佢獨一个孻仔 賜給佢等，愛使一切信佢个人毋會滅亡，反轉得到永遠个生命。
「因為上帝差佢个孻仔到世間來，毋係愛定世間人个罪，係愛通過佢來拯救世間人。 信孻仔个人毋會受定罪；毋信个人已經受定罪，因為佢毋信上帝獨一个孻仔 。 光來到世界，世間人因為自家个壞行為，毋愛光，反轉愛烏暗；佢等受定罪个原因就在這位。 做壞事个，全部恨光，毋愛接近光，因為驚佢个壞行為顯明出來。 總係，照真理做事个，就接近光，愛俾光顯明佢所做个一切係照上帝个旨意做个。」

這事以後，耶穌㧯學生到 猶太 地區去。佢在該位㧯佢等住一站時間，又行洗禮。 約翰 在離開 撒冷 無幾遠个 哀嫩 也行洗禮，因為該位水盡多；大家接等去領洗禮。 (該時 約翰 還吂被人關起來。)
約翰 个幾個學生㧯一個 猶太 人為潔淨禮開始辯論。 佢等去見 約翰 ，對佢講：「先生，你看，以前㧯你在 約旦 河東片、你為佢做見證个，這下也行洗禮，大家全部去就佢囉！」
約翰 講：「若毋係天賜下个，人就無法度得到麼介。 𠊎識講過：『𠊎毋係基督；𠊎不過係奉差派做佢个先鋒。』這話你等可以為𠊎做證。 討新娘个係新郎；新郎个朋友企在塍頭，一聽到新郎个聲就歡喜快樂。像恁樣，𠊎已經得到完全个喜樂。 佢一定會一日一日興旺，總係𠊎會一日一日衰微。」

從天頂來个，超過萬有。從地上來个，係屬於地，佢所講个也係地上个事；總係從天頂來个，超過萬有。 佢為所看到㧯所聽到个做證，總係無人接受佢个見證。 該接受厥見證个，就係證明上帝係信實个。 上帝所差派个，傳上帝个話，因為上帝豐豐富富將聖靈賜給佢。 阿爸惜佢个孻仔，已經將萬有交在厥手中。 信孻仔个，就有永遠个生命；毋信從孻仔个，毋會有生命，會繼續留在上帝个憤怒之下。

Phulaphula i 約翰 3