 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

سَاعِ مَنْ يِمْࢡٜ وٛطْࢡٜ وٛنْࢡٜ تٛنْ نغٜشِّ عِيسَى حَالَ يِمْࢡٜ غَلِيلِ ࢡٜ ݠِلَاتُ مبَرْنٛ ندٜ ࢡٜطٛنّٛ لِيعَنٛ اَللَّه کِرْسٜتٜىٰطِ؞ عِيسَى جَابِ ࢡٜ‏: «عٛنْ تَمِّ غَلِيلِعٜنْ مَنْ لَاتِنٛ حَکّٜعٜنْ ࢡُرِ غَلِيلِعٜنْ وٛطْࢡٜ نغَمْ سَرُّ مَنْ حٜࢡِ ࢡٜ نَ؟ عَاعَ، مِطٛنْ وِعَ عٛنْ، تٛ عٛنٛنْ بٛو عٛنْ تُوبَايْ، عٛنْ کَلْکِرَنْ عٛنْ ڢُو بَنَ نٛنْ‏! مَلَّ يِمْࢡٜ سَݠّٛ عٜ نجٛوٜىٰتَتٛ ࢡٜمَحْدِ سُودُ عَيْنِرْدُ يِبِّ دٛوْ مُوطُمْعٜنْ حَا سِلٛوَمْ، مبَرِ ࢡٜ، عٛنْ تَمِّ ࢡٜ عَيْبُࢡٜ ࢡُرِ يِمْࢡٜ عُرُسَلِيمَ وٛطْࢡٜ ڢُو نَ؟ عَاعَ مِطٛنْ وِعَ عٛنْ، تٛ عٛنْ تُوبَايْ، عٛنْ کَلْکِرَنْ عٛنْ ڢُو بَنَ نٛنْ‏!»

عِيسَى وٛلْوَنِ ࢡٜبَلْنْدٛلْ نغٛعٛلْ‏: «غٛطّٛ ڢٜىٰرٜ وٛودِ عِبِّ کِ عٛجُبِ ندٜرْ نغٜسَ مَاکٛ، عٛوَرِ تٜࢡُغٛ عِبّٜ، عَمَّا عٛحٜࢡَايْ؞ ندٜنْ عٛوِعِ عَيْنٛووٛ نغٜسَ‏: ندَا دُوࢡِ تَتِ مِطٛنْ تٜڢَ عِبّٜ حَا عِبِّ کِعِ، عَمَّا مِحٜࢡَايْ؞ ڢٜعُّ کِ، نغَمْ طُمٜ کِ طٛنْ عُسْتَ سٜمْبٜ لٜسْدِ مٜىٰرٜ؟» عَيْنٛووٛ نغٜسَ وِعِمٛ‏: «جَاغٛرْطٛ، عَشُّ کِ ڢَحِنْ حِتَاندٜ ندٜعٜ، مِوَسَنْ سٜرَ مَاکِ، مِرُڢَنْ کٛونَلْ؞ تٜىٰمَ حِتَاندٜ وَرَنْدٜ کِ رِمَنْ، تٛ نَا نٛنْ، عَڢٜعَّ کِ؞»

عِيسَى طٛنّٛ عٜکِّتِنَ ندٜرْ سُودُ دٜوَلْ يَحُودُعٜنْ وٛطْندُ ࢩَنْدٜ سِوْتٛرْدٜ ؞ وٛودِنٛ دٜبّٛ حَا تٛنْ، مَرْطٛ غِنَّوٛلْ بَاکِنْ دُوࢡِ سَݠّٛ عٜ جٛوٜىٰتَتِ، غِنَّوٛلْ جِيجِمٛ، عٛطٛنْ تُرِ، عٛوَاوَتَا دَرَاغٛ؞ ندٜ عِيسَى يِعِمٛ، عٛعٜوْنِمٛ، عٛوِعِ‏: «دٜبّٛ، عَيَمْطِتِنَامَ دِغَ جِيجَ مَ؞» عٛجٛعِّنِ جُوطٜ مَاکٛ دٛوْ حٛورٜ دٜبّٛ، طٛنْ نِي دٜبّٛ دَرْتِ، تٜدِّنِ اَللَّه؞ عَمَّا عَرْدِيطٛ سُودُ دٜوَلْ يَحُودُعٜنْ ࢡٜرْنِ نغَمْ جَمْطِتِنْکِ غٛطّٛ ࢩَنْدٜ سِوْتٛرْدٜ، عٛوِعِ مٛوࢡْرٜ‏: «ࢩَلْطٜ جٛوٜىٰغٛ ڢُو طٛنْ نغَمْ حُووُغٛ، نغَرٜ ࢩَلْطٜ مَنْ نغَمْ نجَمْطِتٛنْ، عَمَّا نَا ࢩَنْدٜ سِوْتٛرْدٜ‏!» جَوْمِرَاوٛ جَابِمٛ‏: «نَاڢِکِعٜنْ‏! کٛو مٛيْ مٛوطٛنْ يٛوڢَتَا نغَارِ مُمْ مَلَّ وَمْندٜ مُمْ دِغَ ࢩَامْنِرْدٜ ࢩَنْدٜ سِوْتٛرْدٜ، نغَمْ عٛيَرْنٛيَ طُمْ نَ؟ دٜبّٛ مٛ دَࢩْغٛلْ إِبْرَاهِيمَ، مٛ سَيْطَانُ حَࢡِّ دُوࢡِ سَݠّٛ عٜ جٛوٜىٰتَتِ، طُمْ حَانَايْ عٛيٛوڢٜ دِغَ کَࢡّٛرْغٛلْ نغٛعٛلْ ࢩَنْدٜ سِوْتٛرْدٜ نَ؟» ندٜ عٛوٛلْوِ بَنَ نِي، کٛنّٜعٜنْ مَاکٛ ڢُو شٜمْتِ، عَمَّا مٛوࢡْرٜ ڢُو سٜيِ نغَمْ کُوجٜ تٜدُّطٜ طٜ عٛوَطِ؞


عِيسَى وِعِ ڢَحِنْ‏: «بٜى طُمٜ لَامُ اَللَّه نَنْدِ؟ بٜى طُمٜ نَنْدِنَنْمِ نغُ؟ نغُ نَنْدِ بٜى غَوٜلْ شِتَّ، نغٜلْ غٛطّٛ حٛوعِ، عَاوِ ندٜرْ جَرْنٜ مُوطُمْ، نغٜلْ ڢُطِ، نغٜلْ لَاتِ لٜکِّ، حَا شٛلِّ مبَطِ شَࢡّٜ مُوطُمْعٜنْ دٛوْ لِشٜ مَاکِ؞»


عِيسَى وِعِ ڢَحِنْ‏: «بٜى طُمٜ نَنْدِنَنْمِ لَامُ اَللَّه؟ نغُ نَنْدِ بٜى عُڢْنِرْطُمْ طُمْ دٜبّٛ حٛوعِ، وَاتِ ندٜرْ کُرٛورِ طُوطْندِ، حَا کُرٛورِ مَنْ ڢُو عُوڢِ؞»


عِيسَى سَالِ بٜرْنِيجِ عٜ غُرٜ، عٛعٜکِّتِنِ ندٜ عٛطٛنْ يَحَ عُرُسَلِيمَ؞ غٛطّٛ وِعِمٛ‏: «جَوْمِرَاوٛ، يِمْࢡٜ سٜطَّ تَنْ کِسَتَ نَ؟» عٛجَابِ‏: «تِيطٜ نَسْتِرْغٛ دَمُّغَلْ ݠَاطْنغَلْ؞ مِطٛنْ وِعَ عٛنْ‏: طُوطْࢡٜ نغِطِ نَسْتُغٛ، عَمَّا ࢡٜمبَاوَتَا؞
«تٛ جَوْمُ سَارٜ عُمَّکٜ، مَࢡِّ دَمُّغَلْ، عٛنٛنْ بٛو عٛنْ لُتِّ حَا يَاسِ، عٛنْ ݠُطَّنْ تَݠُّغٛ دَمُّغَلْ، عٛنْ مبِعَنْ‏: جَاغٛرْطٛ، مَࢡِّتَنَنْ مِنْ‏! عٛجَابٛتٛ عٛنْ‏: مِعَنْدَا تٛيْ عِوْطٛنْ؞ ندٜنْ عٛنْ ݠُطَّنْ وِعُغٛ‏: مِنْ ࢩَامِ، مِنْ نجَرِ يٜىٰسٛ مَاطَ، عَعٜکِّتِنِ دٛوْ لَابِ عَمِنْ‏! عَمَّا عٛجَابٛتٛ عٛنْ‏: ندِلّٜ، مِعَنْدَا تٛيْ عِوْطٛنْ، عٛنٛنْ وَطٛوࢡٜ حَلّٜىٰندٜ‏! عٛنْ مبٛيَنْ، عٛنْ کِرْࢨِنْدِرَنْ ࢩِيعٜ حَا تٛنْ، يَاکٜ عٛنْ نغِعَتَ إِبْرَاهِيمَ، إِسْحَاقَ عٜ يَعْقُوبُ بٜى اَلنَّبِعٜنْ ڢُو ندٜرْ لَامُ اَللَّه عٜ عٛنٛنْ بٛو عٛنْ نغُدِنَامَ يَاسِ؞ يِمْࢡٜ نغَرَنْ دِغَ ڢُونَانغٜ عٜ حِيرْنَانغٜ، وٛيْلَ عٜ ڢٛمْبِنَ، ࢡٜنجٛوطٛتٛ ندٜرْ لَامُ اَللَّه نغَمْ ࢡٜࢩَامَ؞ ندٜنْ کَدِ يِمْࢡٜ عَارْتُࢡٜ شَکِّتِتّٛ عٜ سَکِّتِيࢡٜ بٛو عَارْتٛتٛ؞»


وَکَّتِ مَنْ ندٜنْ، ڢَرِسَعٜنْ وٛطْࢡٜ نغَرِ، مبِعِ عِيسَى‏: «دِلُّ دِغَ طٛ، نغَمْ حِرُدُسْ يِطِ مبَرُغٛ مَ‏!» عِيسَى وِعِ ࢡٜ‏: «نجٜحٜ، مبِعٜ دٛلْدٛلْندٜ مَنْ، ندَا‏: مِطٛنْ رِيوَ رُوحُوجِ شٛࢡْطِ، مِطٛنْ يَمْطِتِنَ ࢩَوْࢡٜ، حَنْدٜ عٜ جَنغٛ، ࢩَنْدٜ تَتَࢡْرٜ بٛو طُمْ تِمّٛودٜ کُوغَلْ عَمْ؞ عَمَّا سٜيْ مِتٛکِّتَ لَاوٛلْ عَمْ حَنْدٜ، جَنغٛ عٜ ڢَࢡِّجَنغٛ، نغَمْ حَانَايْ اَلنَّبِيجٛ مَايَ يَاسِ عُرُسَلِيمَ؞
«عُرُسَلِيمَ‏! عُرُسَلِيمَ‏! عَمبَرِ اَلنَّبِعٜنْ، عَڢِطِ نٜلَاࢡٜ ࢡٜ اَللَّه نٜلِ حَا مَ بٜى کَاعٜ؞ ندٜ طُوطُّمْ مِيِطِنٛ مٛوࢡْتُغٛ يِمْࢡٜ مَ، بَنَ نٛ غٜرْتٛغَلْ مٛوࢡْتِرْتَ ࢡِکّٛيْ مُمْ لٜسْ بِلٜىٰجِ مُمْ، عَمَّا عٛنْ شَلِ؞ ندَا، سُودُ مٛوطٛنْ لَاتٛتٛ وُدِنَاندُ؞ عَمَّا مِطٛنْ وِعَ عٛنْ‏: عٛنْ نغِعَتَا يَمْ ࢡَاوٛطٛنْ حَا سَاعِ عٛنْ مبِعَتَ‏: بَرْکَ لَاتَنٛ غَرَنْطٛ بٜى عِنْدٜ جَوْمِرَاوٛ‏!»

Phulaphula i لُکَ 13