Markus 14
14
Liwo mampatehi Yesus
(Mat. 26:1-5; Luk. 22:1-2; Yoh. 11:45-53)
1Roeopi rapamulami eo bohe Paskah to Yahudi pade eo bohe Roti to Moma Lairagii. Imam-imam to i matana hante to nataualu buku Taurat nampali dala bewa akalara bona mamalara mampahoko Yesus pade mampatehi-'I. 2Naupawee iulira mui, “Nemo tempo eo bohe Paskah to Yahudi, bona nemo mei maria pogehoa i lentongora todea.”
Hadua bangkele notuahi woo Yesus hante lana wongi
(Mat. 26:6-13; Yoh. 12:1-8)
3Tempo Yesus i ngata Betania, bula-Na nangkoni i hou Simon to ilodo nohaki kusta, naratami hadua bangkele nangkeni butolo to laibabei lako watu pualam, to laikahini hante lana wongi narwastu to nahuli olina. Bangkele ee mai nopihe tambolo butolo ee pade lana ee laituana i woo Yesus.
4Naria tauna to nahodo nampanaa'i, pade noneulikaramo hore hira, iulira, “Napa pade laipadaana motodi lana ee mai? 5Kakonona lana ee mai mamala rapobalu melabi lako tolu atu doi halaka,#14:5 Tolu atu doi halaka nahibali hante tomo to pobago hampae tempo Yesus natuwu i dunia. doina rapopewai hi to nakahiahi.” Pade laipakahodorami bangkele ee mai.
6Naupawee Yesus nangulikara, “Palele'imi. Napa pade laipakahuhami rarana? Hia ei nobabei gau to nabelo hi Aku. 7Apa to nakahiahi maria moto oara dohemi pade naria oa logami mampatulungira, ane mipodota. Naupawee Aku moma-'A maria oa dohemi. 8Bangkele ei nobabei gau to nabelo nantuku pakuleana pade notuahi woo-Ku hante lana wongi, bona mopahadia woto-Ku ratana. 9Mpuu-mpuu Ku'ulika komi, i rima-rima Kareba Belo rakarebai i humangkulili dunia, napa to laibabei bangkele ei mai, rapojarita mui mei bona mampalinga'i.”
Yudas nampobalu Yesus
(Mat. 26:14-16; Luk. 22:3-6)
10Lauparia Yudas Iskariot, hadua lako hampulu rodua ana guru Yesus, rau hi imam-imam to i matana hante patuju mampobalu Yesus hi hira. 11Nagoe mpuura nangepe'i pade notiparamo mampawaika'i doi. Napu ee mai Yudas nampali loga belo mampopewai Yesus hi hira.
Yesus nangkoni hante ana-ana guru-Na nampalinga eo bohe Paskah to Yahudi
(Mat. 26:17-25; Luk. 22:7-14, 21-23; Yoh. 13:21-30)
12Eo to pamulana lako eo bohe Roti to Moma Lairagii, tempo to Yahudi nohamale bimba Paskah, ana-ana guru Yesus nepekune, “Rima mei to kikaraui bona kipahadia pangkoni eo bohe Paskah hi Iko?” 13Napu ee Yesus nantudu rodua ana guru-Na, iuli-Na, “Koimo komi i ngata Yerusalem. I ria mei mipotomu hadua balailo to nangkeni pobolia ue. Tukumi tauna ee 14pade ulika tumpu hou to napehuai iwei, ‘Peboha Guru, i rima-'I mei mangkoni Paskah hante ana-ana guru-Na?’ 15Tumpu hou etu mei mantudoka komi kamara pangkonia to nabohe i lolona, to nagana purami parewana. I ritumi mipahadiakata pangkoni eo bohe Paskah.”
16Neongko mpuuramo rodua ana guru Yesus ee mai rau i Yerusalem. Karatara i ria, humaweena lairatara ewa to iuli Yesus hi hira. Lauparia pahadiarami pangkoni eo bohe Paskah.
17Ngkawengiapi, naratami Yesus hante hampulu rodua ana guru-Na i hou to laipahadiakara ee mai. 18#Mzm. 41:10Bulara noncuna nangkoni, Yesus nanguli, “Mpuu-mpuu Ku'ulika komi, hadua lako hi komi to nangkoni dohe-Ku ei mei mampopewai-'A hi hira to nampobali-'A.”
19Lauparia najuumi rarara, pade hadua bo haduara nepekune hi Hia, “Ba akudi mei to iuli-Mu etu Pue?”
20Yesus nanguli, “Tauna ee hadua lako hi komi to hampulu rodua ei, hia ee to hingkani-ngkani hante Aku nolome roti rara mangko. 21Nakono ami Ana Manuhia kana mamate ewa to naria amimi laitulihi rara Buku to Nagaha nangkambelai Hia, naupawee mahilakami tauna to mampopewai Ana Manuhia ee. Nabelo laupi hi tauna ee mai ane moma'i laiote i rara dunia.”
Yesus nampawaira ana guru-Na roti pade ue anggur
(Mat. 26:26-30; Luk. 22:14-20; 1Kor. 11:23-25)
22Tempo Yesus nangkoni hante ana-ana guru-Na, iala-Na roti pade nosukuru hi Alatala. Laitubi-tubi-Na roti ee pade laiwaika-Na hi ana-ana guru-Na pade iuli-Na, “Alami roti ei, eimi woto-Ku.” 23Napu ee laiala-Na panginua to laikahini ue anggur pade nosukuru hi Alatala. Laiwaika-Nara ue anggur ee pade humawee ana guru-Na nanginu lako panginua ee. 24Yesus nangulikara, “Eimi raa-Ku, to rabubu mampakaroho potipa Alatala hante manuhia. 25Mpuu-mpuu Ku'ulika komi, momami mei Kuinu ue anggur duuna marata tempona Tuama-Ku moparenta halaku Magau i dunia to nabou. Tempo eedimi mei pade Kuinudi anggur to nabou.”
26Napurapa noulia nampaune Alatala, rauramo i Bulu Zaitun.
Yesus nanguli ane Petrus mei mampehapuka-'I
(Mat. 26:31-35; Luk. 22:31-34; Yoh. 13:36-38)
27 #
Za. 13:7
Napu ee Yesus nangulikara ana guru-Na, “Humaweemi mei molengka peparahayami. Apa nangkambelai to iuli-Ku lauria, naria amimi laitulihi rara Buku to Nagaha iwei,
‘Kupatehi mei to poewu,
pade bimba-bimba to laiewuna magaro.’
28Naupawee ane matuwu nculi-'Apa, Kupoilodokamo komi rau i Galilea.”
29Nangepe lauria, Petrus nangulika Yesus, “Naupa humaweera ei molengka peparahayara, aku moma.”
30Lauparia Yesus nangulika'i, “Mpuu-mpuu Ku'ulikako, welau ei, ngkawengia bulei, kapomana manu motuturua karongkanina, tolu ngkanimoko mampehapuka-'A.”
31Laipahimukukina Petrus nanguli, “Naupa kana mamate'a hingkani-ngkani hante Iko, moma-Ko kupehapuka.” Humawee ana guru to ntanina mui nanguli iwee.
Yesus nohambaya i Getsemani
(Mat. 26:36-46; Luk. 22:39-46)
32Napu ee Yesus hante ana-ana guru-Na rau i hangu tampa to laikahangai Getsemani. Karatara i hee iulika-Nara ana guru-Na, “Poncunamo komi i hei, Aku rau mohambaya.”
33Laikeni-Na Petrus, Yakobus hante Yohanes nampodohe-'I, pade nahuha mpuu iepe-Na bo najuu rara-Na. 34Laiulika-Nara, “Najuu mpuu rara-Ku, ewa to mamate-'Amo. I heimo komi olu pade mainga komi.”
35Lauparia nomako-'I bahangkua lempa lako hee pade notingkodu narapa tana nohambaya, bona ane Napodota Alatala kahehaa ee mai moma'i Nakolo. 36Iuli-Na, “Papa, Tuama-Ku, moma naria to moma namala laibabei-Mu. Alami kahehaa ei lako hi Aku. Naupawee moma dota-Ku to mawali, aga dota-Mu.”
37Napu ee, nanculimi hi ana guru-Na to tolu dua ee, lairata-Nara bulara naleta. Iuli-Na hi Petrus, “Simon, napa pade naleta motoko? Momako namala nainga naupa hajaa aga? 38Maingahawo pade mohambaya, bona nemo komi manawu i rara pehori. Nakono ane rarami mingki mobabei to nabelo naupawee wotomi nalente.”
39Napu ee rauki mui-'I nohambaya, nahibali moto to iuli-Na. 40Panculiki-Na mui hi ana-ana guru-Na, lairata-Na naletaki motorada, apa naroo mpuumi matara, pade momami incanira napa to rahonoikara-'I.
41Katolu ngkanina-'I nanculiki hi ana-ana guru-Na, iulika-Nara, “Paleta pade pondodo oamo komi. Naganami, naratami tempona. Hilo, Ana Manuhia rapopewai i rara mpalera tauna to nadoha. 42Pematamo, etumi tumai tauna to mampopewai-'A. Kitamo rau mampotomu'i.”
Yesus laihoko
(Mat. 26:47-56; Luk. 22:47-53; Yoh. 18:1-11)
43Bula-Na nojaritadipi Yesus hante ana-ana guru-Na, naratami Yudas, hadua lako hampulu rodua ana guru-Na. Yudas narata hante todea to nangkeni tono lampa pade pato. Hira ee mai laitudu imam-imam to i matana, to nataualu buku Taurat pade totua-totua ngata to Yahudi. 44Laikewokana amiramo Yudas todea ee mai tanda iwei, “Hema to kueki, Hiami to mihoko, pade keni belo-'I.”
45Karata Yudas hante tauna to nadea ee mai i Getsemani, Yudas nampamohuki Yesus pade nanguli, “Rabi,” napu ee laiekinami. 46Lauparia tau-tauna to narata dohe Yudas ee mai nampahoko Yesus.
47Tempo ee mai, hadua lako tauna to naria i hee nowutu tono lampana pade nantime batua Imam Bohe hampena naputu talingana.
48Yesus nangulikara todea, “Iulimi komi Aku ei mai to powao, hampena narata komi nampahoko-'A hante tono lampa pade pato? 49Butu eona-'A noncuna dohemi i karawaa Hou Alatala nopatudu, moma-'A laihokomi. Naupawee kana rapaganai to laitulihi rara Buku to Nagaha.”
50Napu ee humawee ana guru-Na nalai nampalahi-'I.
51Tempo ee naria hadua kabilaha to nantuku Yesus, wuwu nampake hantau kae aga laipokaramuana. Todea ee mai nampehimukui mampahoko'i, 52naupawee lailoncuna kae pokaramuana pade netibo mpoleno.
Yesus i tingoo to Pobotuhi Agama
(Mat. 26:57-68; Luk. 22:54-55, 63-71; Yoh. 18:12-14, 19-24)
53Napu ee hira to nampahoko Yesus nangkeni-'I rau hou Imam Bohe. Humawee imam-imam to i matana, totua-totua ngata to Yahudi pade to nataualu buku Taurat nahiromu i hee. 54Petrus nantuku Yesus lako ka'awaana duuna narata karawaa hou Imam Bohe. I ria'i noncuna naneru dohera to pojaga hou Imam Bohe.
55Imam-imam to i matana pade humawee to Pobotuhi Agama Yahudi ee mai nampehimukui nampali tauna to mahadia mawali habi to mokalowo nangkambelai Yesus, bona mamala-'I rahuku mate. Naupawee moma naria lairatara hala-Na. 56Nadea tauna nohabi hante kalowora nangkambelai Yesus, naupawee napa to iulira moma nahibali.
57Kahuduana bahangkua dua tauna nokangkore pade nanguli kalowora iwei, 58“Kami nangepe Tauna ei nanguli, ‘Aku mei mampakaropo Hou Alatala to laibabei mpale manuhia pade rarana tolu eo Kupatuna nculi to ntanina to moma laibabei mpale manuhia.’ ” 59Naupawee napa to iulira moma nahibali.
60Nangepe lauria, nokangkoremi Imam Bohe i tingoora to nahiromu i pobotuhia ee mai, pade nepekune hi Yesus, iulina, “Moma nariadi honoia-Mu lako to lairaikara-Ko habi ei mai?”
61Naupawee, moma-'I nowotu Yesus pade moma napa honoika-Na'i. Hangkanipi Imam Bohe ee nampekuneki-'I, iulina, “Ikomi Magau to Pepakahalama Ana Alatala to Laiune?”
62Nehono Yesus, “Akumile Hia, pade komi mei mampahilo Ana Manuhia moncuna i mali pangkana Alatala to Nabaraka pade marata i lentongo gawu i langi.”
63Pangepena lauria, Imam Bohe ee mai nohia waruna moto pade iulina, “Napapi bunuta mampali habi? 64#Im. 24:16Iepemi motomi Tauna ei nampopore Alatala. Bewa popantaruimi?” Lauparia nohangu rarara nanguli, Hia kana rahuku mate.
65Napu ee nopamularamo bahangkua dua tauna to naria i hee nantailuhi-'I pade mata-Na laiwuntara hante kae. Laijagurura-'I pade laiulikara, “Ane Iko nabi, kewoka kami hema to nampajaguru-Ko.” Hante hira to pojaga hou Imam Bohe ee muihawo nampakadungkui-'I.
Petrus nampehapuka Yesus
(Mat. 26:69-75; Luk. 22:56-62; Yoh. 18:15-18, 25-27)
66Tempo ee mai Petrus i karawaa hou Imam Bohe riadipi. Naratami hadua bangkele. Hia ee mai batua Imam Bohe. 67Batua bangkele ee mai nampahilo Petrus bulana naneru. Laipenotona'i pade iulina, “Iko ei hadua to nampodohe oa Yesus to Nazaret ee.”
68Naupawee Petrus nampehapuka, iulina, “Moma incaniku pade moma'a nengkao napa to iulimu etu.”
Napu ee nehuwumi Petrus rau i womo pehuaa rau karawaa [pade notuturuami manu]. 69Batua bangkele ee nampahiloki Petrus i womo pehuaa ee, laiulikanara tauna to i hee, “Tauna ei hadua to nampodohe Yesus.” 70Naupawee, pehapukana oa Petrus.
Poma nahae, tau-tauna to nokangkore i hee nangulika Petrus, “Natantu amimi iko hadua to nampodohe Yesus, apa to Galileako.” 71Lauparia nopamulami Petrus nampakamo wotona moto pade nosumpa, iulina, “Moma'i incaniku hema tauna to laiulimi etu!”
72Tempo ee mui notuturuami manu karongkanina. Lauparia linganami Petrus to laiuli Yesus hi hia iwei, “Kapomana manu motuturua karongkanina, tolu ngkanimoko mampehapuka-'A.” Lauparia nakeomi Petrus hante juu rarana.
موجودہ انتخاب:
Markus 14: MYL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
