Markus 13
13
Hou Alatala rapakaropo
(Mat. 24:1-2; Luk. 21:5-6)
1Pehuwu Yesus lako karawaa Hou Alatala, hadua ana guru-Na nangulika-'I, “Guru, hilo! Mowokona karohona watu-watu mairia pade karambana bagia-bagia Hou Alatala mairia!” 2Nehono Yesus hi hia, “Laihilomu bagia-bagia Hou Alatala to nabohe bo naroho mairia. Moma maria hangua watu i Hou Alatala mairia to rapalele momeuncu hante watu ntanina. Humaweena mei rapakaropo.”
Kahehaa to madupa kapoma Yesus marata nculi
(Mat. 24:3-14; Luk. 21:7-19)
3Napu ee raumi Yesus i Bulu Zaitun. Bula Yesus noncuna nantingohi Hou Alatala, Petrus, Yakobus, Yohanes hante Andreas narata nampekune bongo-'I iwei, 4“Ulikamo kami, bulauma Hou Alatala rapakaropo pade napa tandana ane humawee ee mai temponami madupa?”
5Nehono Yesus hi hira, “Maingahawo bona nemo maria tauna to mampakahalatara komi. 6Apa madea tauna marata mampake hanga-Ku pade manguli, ‘Akumi Magau to Pepakahalama to laitipa Alatala.’ Pade madea tauna to rapakahalatarara. 7Ane miepe mei to pohiwali pade kareba-kareba nangkambelai pohiwalia, nemo komi maeka, apa humawee ee mai kana madupa. Naupawee, ee mai poma'i kahudua dunia. 8Habana ngata-ngata mei mome'ewa pade kamagaua mome'ewa hante kamagaua. I rima-rima, maria mei linu pade oro mpai. Naupawee humawee lauria pamula kapepaadipi, ewa kapepa hadua bangkele nantodokaha nangote anana.
9Naupawee, komi ei kana mainga mpuu komi, apa komi mei rapopewai hi to pobotuhi agama, pade raduahi i hou-hou pepuea, pade rakeni komi i tingoora to poparenta pade magau-magau, habana komi to pantuku-Ku. Eemi loga belomi moparata kareba nangkambelai Aku hi hira. 10Naupawee Kareba Belo kana raparata olu hi humawee ngata i humangkulili dunia. 11Ane rahokora komi pade rakenira rau rapareha, nemo komi maeka nangkambelai napa to kana miuli. Ulimi napa to Nakewoka komi Inoha to Nagaha tempo ee. Apa napa to miuli momami mehuwu lako pampekirimi moto, naupawee marata lako Inoha to Nagaha.
12Pade maria to po'ompi mangkeni ompina rau rapatehi, to tuama mangkeni anana rau rapatehi, iwee mui ngana me'ewaramo hi totuara pade mangkeni totuara rau rapatehi. 13Humawee tauna mei mampodaa komi, habana komi to pantuku-Ku. Naupawee hema to batena moto peparahayana duu kahuduana, hia mei rapakahalama.”
Yesus nanguli kahehaa to marata i eo ngkapurina mei
(Mat. 24:15-28; Luk. 21:20-24)
14 #
Dan. 9:27; 11:31; 12:11 Kapolaana Yesus nanguli, “Maria mei ‘to Pepatehi to neliu kahekena’ mokangkore i pokangkorea to moma mahipato napokangkorei. (Hema-hema to nobaha kana napekiri belo napa batuana.) Ane mihilo to ewa ee madupa, tau-tauna to i Yudea kana malai rau i buluna. 15Tauna to bulara i lolo houra dungku mehompo pade metibo, nemorapa leba mehua i rara houra mangala rewa-rewara. 16Pade to bulara i pampa, weturamo manculi mangala warura i hou.
17Metoweiramo bangkele to bulara notiana pade to tina to bulara nopahuhu anara tempo ee mai. 18Pohambayamo komi, bona humawee lauria moma'i madupa tempo lengi. 19#Dan. 12:1Habana tempo ee mai, maria mei kahehaa to neliu mpuu kapepana, to poma naria nadupa hinungkai dunia laipajadi Alatala pade to momami mei maria madupa. 20Pade ane ke moma'i laipakaboko-Na Alatala tempo kahehaa ee mai, humawee to natuwu, moma maria to mahalama. Naupawee habana towe-Na hi tau-tauna to laipelihi-Na, tempo kahehaa ee mai laipakaboko-Na.
21Tempo ee mai ane maria tauna manguli, ‘Hilo, ei-'I Magau to Pepakahalama,’ ba manguli, ‘Ria-'I,’ nemo miparahaya. 22Apa maratara mei to pokalowo mangaku ane hirami Magau to Pepakahalama to laitipa Alatala, pade marata muira mei nabi to moma nakono mobabei tanda-tanda to nabohe pade to nepakahera hante patuju mopahalatara humawee tauna. Ane mamala hante tauna to ipelihi Alatala mui rapakahalatarara. 23Aji, kana mainga komi! Apa kapomana humawee lauria madupa, iulika-Ku amimo komi.”
Tanda karata nculi Ana Manuhia
(Mat. 24:29-35; Luk. 21:25-33)
24 #
Yes. 13:10; Yl. 2:10; 3:15 “Tempo ee, mahudupi eo kahehaa bohe ee mai,
‘Eo mei mawali malimaumi,
pade wula momami mabaa.
25 #
Yes. 34:4
Betue-betue marona lako langi,
pade baraka-baraka to naria i langi molengka.’
26Tempo ee mei, tauna mampahilo Ana Manuhia marata rara gawu hante humawee baraka-Na bo baa-Na to neliu mpuu pewantana, 27pade tempo ee mai Hia mantudu malaeka-malaeka-Na mopahiromu tauna to ipelihi-Na lako rima-rima i humangkulili dunia.
28Alami patudu lako porapa nangkambelai kau ara. Ane mohulu pade motawe nguradimi raana, mincanimi ane parami marata tempo eo ngkara. 29Wee moto mui komi, ane mihilo humawee to iuli-Ku lauria madupa, mincanimi ane karata-Ku karongkanina namohumi, mamala rauli i tingoo womo-'Amo. 30Mpuu-mpuu Ku'ulika komi, tau-tauna to natuwu tempo ei pomara mamate kapomana humawee lauria madupa. 31Langi bo dunia mei maria kahuduana, naupawee lolita-Ku moma'i maria kahuduana.
Patudu bona mainga
(Mat. 24:36-44)
32Naupawee nangkambelai eo bo tempo karata nculi Ana Manuhia ee mai, moma hema haduaa to nangincani. Malaeka-malaeka i huruga moma incanira, Ana Alatala mui moma incani-Na. Wuwu Tuama aga to nangincani.”
33“Mainga pade pakaroho rarami! Apa moma incanimi bulauma tempona karata nculi Ana Manuhia. 34Nahibali ewa hadua tauna to nampalahi houna, pade nampawaira batuana hore-hore bago to rapobagora, pade nantudu to nampodoo womo bona mainga. 35Aji, kana mainga komi, apa moma incanimi bulauma tumpu hou ee manculi, ba lau mangkawengiadi, ba ntongo bengidi, ba maliu ntongo bengidi, ba hampepulo ngkiidi, 36bona ane ngkali marata'i mei, moma komi narata bulami maleta. 37Napa to iuli-Ku hi komi, Ku'ulika moto mui hi humawee tauna, bona mainga moto oa komi!”
موجودہ انتخاب:
Markus 13: MYL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
