Markus 12
12
Porapa nangkambelai to pobago-to pobago i pampa anggur
(Mat. 21:33-46; Luk. 20:9-19)
1Napu ee nopamulami Yesus nojarita hi imam-imam to i matana, to nataualu buku Taurat bo totua-totua ngata to Yahudi hante porapa, iuli-Na, “Naria hadua tumpu pampa notuda anggur i pampana pade laiwala ntikuna. Laikaena lowu popiea anggur pade laipatunana hangu hou langko rapake mampodoo pampa ee mai. Napu ee, pampa ee mai laipopehewana hi bahangkua dua to pobago, pade rau'imi i ngata ntanina.
2Temponapi wua anggur ee mai rapupu, laituduna hadua batuana rau hi hira to pobago ee mai bona mantarima bagiana lako pampa anggur ee mai. 3Naupawee to pobago pampa anggur eera mai nampahoko batua ee pade laikadungkuira. Napu ee laitudura'i nanculi hante pale ngkaloa. 4Napu ee laituduna mui hadua batua to ntanina rau hi hira to pobago ee mai. Naupawee batua ee laikadungkuira hampe woona nabaka pade laipakaeara mpuu'i. 5Napu ee laitudukina mui hadua batua to ntanina rau hi hira. Naupawee, batua ee mui laipatehira. Pade nadearadapa batua ntanina to laipoweera, nariara to laikadungkui pade naria muira to laipatehi.
6Alaana naboli hadua ana ntoweanadimi. Kahuduana laituduna anana ee rau hi hira, iulina, ‘Ane anaku to kutudu rau, tantu rapokaekara'i.’ 7Naupawee to pobago eera noneulika, ‘Hilo, etumi tumai ana tumpu pampa to mangkami pampa ei mei. Agina tapatehi lau'imi bona pampa ei mai ta'ala kitami.’ 8Lauparia laihokorami ana tumpu pampa ee mai pade laipatehira. Napu ee laikenira'i rau hawaliku pampa ee mai.
9Ane wee napa mei to nababei tumpu pampa anggur ee hi to pobago pampana eera? Kana marata'i mei pade napatehi purara to pobago pampana ee mai, pade pampa anggurna ee napopehewa hi to ntanina. 10#Mzm. 118:22-23Apa poma'i naria laibahami rara Buku to Nagaha,
‘Watu to laitadira tuka hou
watu ee laumi to nawali koro watu pondasi.
11Ee mai laibabei Pue,
nahera pade nagoe mpuuta nampahilo humawee lauria.’ ”
12Napu ee imam-imam to i matana, to nataualu buku Taurat bo totua-totua ngata to Yahudi nampehimukui mampahoko Yesus, apa laincanira ane hira to laipatuju-Na rara porapa ee mai. Naupawee naekara hi todea to nahiromu, alaana nanculiramo.
Nangkambelai pobayari paja hi Magau Bohe Roma
(Mat. 22:15-22; Luk. 20:20-26)
13Napu ee imam-imam to i matana, to nataualu buku Taurat bo totua-totua ngata to Yahudi nantudu bahangkua dua to Farisi pade to nopahamika hi Magau Herodes rau hi Yesus bona mopanawu Yesus hante hangaa pepekunea. 14Naratarapa hi Yesus, nepekuneramo, “Guru, laincani kami ane Iko ei to nanoro, moma hema to laipokaeka-Mu apa moma-Ko nampelihi tauna, pade nanoro-Ko nopatudu nangkambelai dota Alatala. Aji, bewa popantarui-Mu, mamaladihawo mobayari paja hi Magau Bohe Roma ba momadi? Kana kibayaridi paja hi Magau Bohe Roma#12:14 Magau Bohe Roma rara baha Yunanina laiuli ‘Kaisar.’ Tempo ee hia noparenta i Israel pade humangkulili tahi Mediterania. ba momadi?”
15Naupawee laincanina Yesus kabelo wongkora ee mai, etu pade iulika-Nara, “Napa pade laipehimukuimi mopanawu-'A? Keni tumai hampeka doi halaka bona Kuhilo.”
16Laikenira mpuumi hampeka doi halaka hi Yesus pade laipekune-Nara, “Gambara pade hanga hema to laitulihi i rara doi ei mai?”
Nehonora, “Gambara pade hanga Magau Bohe Roma.”
17Yesus nangulikara, “Ane wetu, popewaimi hi Magau Bohe napa to kana mipopewai hi Magau Bohe, pade hi Alatala napa to kana mipopewai hi Alatala.” Nahera mpuura nangepe to iuli Yesus lauria.
Pepekunea to Saduki nangkambelai katuwu nculi
(Mat. 22:23-33; Luk. 20:27-40)
18Napu ee bahangkua dua to Saduki narata hi Yesus. Pampahara to Saduki moma naria katuwu nculi tauna to namate. Nepekunera hi Yesus iwei, 19#Ul. 25:5-6“Guru, Musa notulihi parenta hi kita iwei, ane maria hadua balailo nobangkele pade pomara noana namate'imi, ompina balailo kana mampobangkele erana ee mai bona maria moto muli ompina to namate ee. 20Naria pitu dua to no'ompi. To ulumbua nampobangkele hadua bangkele pade namate moma'i noana. 21Alaana ompina karoduana nampobangkele erana ee mai, to karoduana ee mai namate mui pade moma muira noana. Wee moto mui hante ompina katoluna, 22duuna kapapituna nampobangkele'i, moma pura naria mulira duura namate. Kahuduana, namate purarapa, namate muimihawo bangkele ee mai. 23Tempo eo katuwu nculi to mate, ane matuwu nculirapa lako kamateara, hema mei lako hira to no'ompi papitu ee to mawali balailona bangkele ee mai? Apa papitura no'ompi humaweera nampobangkele'i.”
24Yesus nangulikara, “Nahala pampahami, apa moma komi nengkao Buku to Nagaha bo baraka Alatala! 25Apa ane tauna matuwu nculi lako kamatea, hira mei matuwu ewa malaeka i huruga, momaramo moncamoko ba rapoponcamoko. 26#Kel. 3:6Pade nangkambelai tauna to namate to laipakatuwu nculi Alatala, apa poma'i laibahami rara buku to laitulihi Musa nangkambelai dunumpu rui to nabaa naupawee moma'i napapu, Alatala nololita hi Musa iwei, ‘Akumi Alatala Abraham, Alatala Ishak, pade Alatala Yakub?’ Batuana, naupa Abraham, Ishak pade Yakub nahaeramo namate, batena motora natuwu dohe Alatala. 27Apa laincanita ane Alatala ee mai moma-'I Alatalara to mate, naupawee Alatalara to natuwu. Aji, komi to Saduki mpuu-mpuu nahalataramo komi.”
Parenta to koropokona
(Mat. 22:34-40; Luk. 10:25-28)
28Naria hadua to nataualu buku Taurat nangepe Yesus pade to Saduki nonebili. Laincanina ane natopa pehono Yesus hi tauna eera mai. Aji, narata'i hi Yesus pade nepekune iwei, “Parenta uma to koropokona?”
29 #
Ul. 6:4-5
Nehono Yesus, “Parenta to koropokona, ‘Epe komi to Israel, Pue eemi Alatalata. Pue ee mai moma naria ntani-Na. 30Potowemi Pue Alatalamu hante kaponu raramu pade hante humawee tuwumu pade hante humawee pampekirimu, pade hante humawee rohomu.’ 31#Im. 19:18Pade parenta karongaana, ‘Potowemi hingka manuhiamu ewa pampotowemu wotomu moto.’ Moma naria parenta ntanina to neliu lako parenta to rongaa ei mai.”
32Napu ee, to nataualu buku Taurat ee mai nangulika Yesus, “Natopa mpuu Guru, nakono to iuli-Mu ane Pue ee mai hadua aga, moma naria ntanina. 33Iwee ami, nampotowe Alatala hante kaponu rarata, hante humawee noto rarata, hante humawee rohota, pade nampotowe hingka manuhia ewa pampotoweta wotota moto, ee mai neliupi pobununa lako humawee kurban to laitunu pade kurban to ntanina.”
34Laihilo-Na Yesus, bewa kanoto rara tauna ee mai nampahonoi-'I, pade iulika-Na'i, “Momamoko na'awa lako poparentaa Alatala!” Lako hee mai, momaramo hema nabia nepekune hangu hangaa hi Yesus.
Katekaia Yesus hante Magau Daud
(Mat. 22:41-46; Luk. 20:41-44)
35Tempo Yesus nopatudu i karawaa Hou Alatala, Hia nanguli iwei, “Bewa pade hira to nataualu buku Taurat nanguli ane Magau to Pepakahalama ee muli Magau Daud? 36#Mzm. 110:1Bo Magau Daud moto, to naponu hante Inoha to Nagaha, nanguli iwei,
‘Nololitami Pue Alatala hi Pueku:
Poncunamo-Ko mali pangkana-Ku,
duuna bali-bali-Mu Kupopotingkodu i tingoo-Mu.’
37Aji, Magau Daud moto nanguli ane Magau to Pepakahalama ee mai Puena, bewa mui pade rauli mulina-'I?” Humawee todea nagoe nangepe Yesus nopatudu.
Yesus nepatudu bona mainga hi hira to nataualu buku Taurat
(Mat. 23:5-7; Luk. 20:45-47)
38I rara popatudu-Na Yesus nanguli iwei, “Kana mainga komi hi to nataualu buku Taurat, to ipokonora nomako-mako nampake waru to nalanga pade laibila i pasar. 39Pokonora noncuna i poncunaa tauna to laibila i rara hou pepuea pade i rara pohuhaa. 40Hira namparampaki houra bangkele to nabalu, pade hambayara laipakalanga-langara bona nemo rancani ingkura to nadaa. Hira ei mei kana mantarima pehuku to nantomo mpuu.”
Kalete bangkele to nabalu to nakahiahi
(Luk. 21:1-4)
41Tempo Yesus noncuna i tingoo peti pokaletea, laipenoto-Na belo bewa todea nopahua doi i rara peti ee mai. Nadea to nahugi nopahua doi to nadea i rara peti ee mai. 42Lauparia naratami hadua bangkele to nabalu to nakahiahi, nopahua rompeka doi see rara peti ee mai.
43Yesus nangkiora ana guru-Na pade iulika-Nara, “Ku'ulika komi, kakonona nadeapi doi to laipopewai bangkele to nabalu to nakahiahi ei mai lako humawee tauna to nopahua doi i rara peti pokaletea ee mai. 44Apa humawee tauna newai hodi aga lako kahugiara, naupawee bangkele to nakahiahi ei mai nampopewai humawee napa to naria hi hia, humawee to iratana rara popaeloana.”
موجودہ انتخاب:
Markus 12: MYL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
