Markus 11
11
Yesus nehua i Yerusalem ewa hadua Magau
(Mat. 21:1-9; Luk. 19:28-38; Yoh. 12:12-15)
1Namohurapa Yesus hante ana-ana guru-Na i Yerusalem, humpii ngata Betfage pade Betania, i Bulu Zaitun, laitudu-Nara rodua ana guru-Na, 2pade iulika-Nara iwei, “Koimo komi i ngata to i tingoota mairia. Pehuami i rara ngata ee mai, mirata mei hamaa keledai pagurua to laitaka, to poma'i naria laihawi tauna. Kakami keledai etu mai pade kenimi tumai. 3Ane maria to mangulika komi, ‘Napa pade laikakami kalorona?’ honoi'i, ‘Pue namparaluu keledai pagurua ei mai. Napopanculi moto'i.’ ”
4Rau mpuuramo ana guru Yesus to rodua ee mai pade lairatarami hamaa keledai pagurua to laitaka i wiwi dala i tingoo womo hou. Lauparia laikakarami kaloro keledai ee mai.
5Naria bahangkua dua tauna i hee nampekunera, “Napa patujumi nokaka kaloro keledai pagurua etu?” 6Laihonoira ewa peboha Yesus, pade laipaliurada nangkeni keledai pagurua ee mai.
7Laikenirami keledai ee mai hi Yesus, pade lailampiira hante waru pokarolapiira. Napu ee Yesus nencawi keledai ee mai. 8Nadea tauna notale waru pokarolapiira i dala, naria mui to noboli raa-raa kau to natawea to laialara lako bone. 9#Mzm. 118:26Tau-tauna to nomako noilodo pade to netuku lako puri nongare, iulira,
“Hosana#11:9 Hosana batuana: Pakahalama kami welau. Tempo katuwua Yesus i dunia baha ei laipakera todea nampaune Yesus.!
‘Laitiroimi Hia to narata halaku huro Alatala!’
10Laitiroimi kamagaua to narata, kamagaua tuamata Magau Daud.
Hosana! Raunemi Alatala i kalangkoana!”
11Karatara i Yerusalem, nehuami Yesus i karawaa Hou Alatala. I ria-'I nampanaa-naa humaweena. Naupawee apa parami malimau, raumi Yesus i Betania hante hampulu rodua ana guru-Na.
Yesus nampakamo kau ara
(Mat. 21:18-19)
12Hampepulo kanailena, nehuwupi Yesus hante hampulu rodua ana guru-Na lako Betania, naoromi tai Yesus. 13Na'awadipi, laihilo-Nami hampuu kau ara to narudu tawena. Laimohuki-Na puu kau ara ee mai, bona Nahilo baka naria wuana Narata. Naupawee, moma naria hangua wuana lairata-Na, wule tawena aga, apa pomahawo tempo powuaana. 14Lauparia iuli-Na hi kau ara ee mai, “Nemopi mei maria tauna mangkoni wuamu duu kahae-haena!” Humawee ana guru-Na nangepe napa to iuli-Na lauria.
Yesus nampopalaira to nobalu-balu i Hou Alatala
(Mat. 21:12-13; Luk. 19:45-48; Yoh. 2:13-16)
15Naratami Yesus pade hampulu rodua ana guru-Na i Yerusalem. Yesus nehua i karawaa Hou Alatala pade laipopalai-Na humawee tauna to nobalu-balu hante to peoli i hee. Meja-mejara to pohula doi pade bangku-bangkura to pobalu tonci bangkebodo laibaliangko-Na, 16pade moma hema laipaliu-Na nangkeni balu-balura mantara karawaa Hou Alatala. 17#Yes. 56:7; Yer. 7:11Napu ee, laipatudu-Nara, iuli-Na, “Apa moma laibahami to laitulihi rara Buku to Nagaha iwei, ‘Hou-Ku kana rauli hou pohambayaa humawee ngata i humangkulili dunia’? Naupawee laipowalimi po'ohaara to perampakidi.”
18Pangepera imam-imam to i matana pade to nataualu buku Taurat napa to laibabei Yesus lauria, laipalira dala bona mamalara mampatehi Yesus, apa naekara hi Hia habana tauna to nadea namangka nangepe patudu-Na.
19Lau mangkawengiapi nehuwu muimi Yesus hante ana-ana guru-Na lako rara ngata ee.
Puu kau ara to nabangimi pade patudu Yesus nangkambelai hambaya
(Mat. 21:20-22)
20Hampepulo kanailena, poliu Yesus hante ana-ana guru-Na i kau ara to laikamo Yesus ee wei, laihilora puu kau ara ee mai nabangimi duu rata larina. 21Lauparia, linganami Petrus pangkamo Yesus kau ara ee, pade iulina hi Yesus, “Rabi, hilo kau ara to laikamo-Mu ee wei nabangimi.”
22Yesus nampahonoira, “Parahayami Alatala! 23Mpuu-mpuu Ku'ulika komi, hema-hema to mangulika bulu ei mai, ‘Kateongkomoko pade matebunca i rara tahi!’ Ane mpuu-mpuu maroho peparahayana, moma'i mokarara, napa to iulina lauria kana madupa hi hia. 24Aji, Ku'ulika komi, humawee to miperapi rara hambayami, parahayami ane laitarimamimi, pade humaweena lauria kana rawaika komi. 25Pade butu ngkanina komi mokangkore mohambaya, ampuni olu baka nariadipi daa rarami hi tauna, bona Tuamami to i huruga mui moampuni humawee kahalaami.” [ 26Ane moma komi mampa'ampuni kahalaa tauna, Tuamami to i huruga mui moma mampa'ampuni kahalaami.]
Pepekunea nangkambelai baraka Yesus
(Mat. 21:23-27; Luk. 20:1-8)
27Napu ee Yesus hante ana-ana guru-Na narata i Yerusalem. Bula Yesus nomako i karawaa Hou Alatala, naratara imam-imam to i matana, to nataualu buku Taurat pade totua-totua ngata to Yahudi hi Hia. 28Nepekunera hi Hia, “Hante baraka hema-Ko nobabei humawee etu mai? Pade hema to nampawaika-Ko baraka etu hampena laibabei-Mu humaweena?”
29Nehono Yesus hi hira, “Naria mui-Kuwo hangaa to Kupekuneka komi. Waika-'A honoiana, bona Kukewoka komi hante baraka napa-'A nobabei humawee lauria. 30Popadiu Yohanes lako Alataladi ba lako manuhiadi?”
31Noneulikaramo hore hira, iulira, “Ane tauli lako Alatala, Naulikata mei, ‘Ane iwee, napa pade moma'i laiparahayami?’ 32Ane tauli lako manuhia, mahodora mei todea, apa laiparahayara mpuu todea ane Yohanes ee mai hadua nabi.” 33Lauparia, nehonora hi Yesus, “Moma incani kami.”
Iulika-Na muirahawo Yesus, “Ane wee, moma mui-Kuwo Kukewo hi komi hante baraka hema-'A nobabei humawee lauria.”
موجودہ انتخاب:
Markus 11: MYL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
