Markus 15
15
Yesus i tingoo gubernur Pilatus
(Mat. 27:1-2, 11-26; Luk. 23:1-5, 13-25; Yoh. 18:28–19:16)
1Hampepulo ngkiidipi, nahintuwuramo imam-imam to i matana, totua-totua ngata to Yahudi pade hira to nataualu buku Taurat, hante humawee to Pobotuhi Agama. Laihilurami Yesus pade laikenira rau hi gubernur Pilatus. 2Nepekunemi Pilatus hi Yesus, “Magau to Yahudi-Ko?”
Nehono Yesus, “Iko motomi nanguli.”
3Lauparia, imam-imam to i matana namparai Yesus nobabei nadea ngaa ingku to nadaa.
4Nepekune muimi Pilatus hi Yesus, “Napa pade moma-Ko nehono? Epe motomi, Nadea ngaadimi to lairaikara-Ko.” 5Naupawee moma oa naria to iuli Yesus nampahonoi'i, hampena nahera muihawo Pilatus.
6Ewa kabiahaa gubernur, butu mpaena tempo eo bohe Paskah to Yahudi, nabakaha hadua to laitarungku, mantuku dota todea. 7Tempo ee mai, naria bahangkua dua tauna laitarungku habana ne'ewa hi to poparenta, pade rara pe'ewara ee mai nadea tauna laipatehira. Hadua lako hi hira to ne'ewa hi to poparenta ee mai hangana Barabas. 8Lauparia narataramo todea nerapi hi Pilatus bona nabakaha hadua tauna to i tarungku, ewa kabiahaa to laibabeina.
9Naupawee, Pilatus nampahonoira hante nepekune, “Madota komi ane Magau to Yahudi ei kubakaha?” 10Laincanina amimi Pilatus ane imam-imam to i matana nampopewai Yesus habana hiri rarara.
11Naupawee imam-imam to i matana nampaukei todea bona raperapira hi Pilatus mampabakaha Barabas.
12Hangkanipi Pilatus nampahonoira hante nepekune, “Ane wetu, napa to kana kubabei hi tauna to iulimi Magau to Yahudi ei mai?”
13Lauparia, nongareramo hi Pilatus, iulira, “Salib-'I!”
14Iulina mui Pilatus hi hira, “Napa pade rasalib-'I? Ingku napa to nadaa laibabei-Na?”
Nahimukuki lauramo nongare, iulira, “Salib-'I!”
15Pilatus mingki mampakagoe rarara todea ee mai. Lauparia, laibakahanami Barabas ewa to iperapira. Napu ee Pilatus nantudu tantarana nampacambu Yesus pade laipopewaina hi hira bona rasalib.
Yesus laipopore
(Mat. 27:27-31; Yoh. 19:2-3)
16Napu ee tantara-tantara nangkeni Yesus nehua i rara hou po'ohaa gubernur pade laikiora humawee tantara ntanina mahiromu. 17Lailoncura waru Yesus pade laiwaruira-'I hante waru to nalei ewa waru magau. Laibabeira tali patoko lako dunumpu rui ewa tali patoko magau, pade laibolira i woo-Na. 18Napu ee mai nopamularamo nampopore-'I, iulira, “Tabe hi Iko, Magau to Yahudi!” 19Tantara-tantara ee mai nampapao woo-Na hante lua pade notailuhi-'I. Laitungkaira notungka hi Hia ewa to nebila, bo patujura nepopore. 20aNapurapa nampopore-'I, lailoncurami waru to laipakekara-'I pade laiwaruira nculi-'I hante waru-Na moto.
Yesus laisalib
(Mat. 27:32-44; Luk. 23:26, 33-43; Yoh. 19:17-24)
20bNapu ee laikenirami Yesus rau hawaliku ngata bona rasalib.
21Bulara nomako, laipotomura hadua tauna lako Kirene to ikahangai Simon, tuamara Aleksander pade Rufus. Simon ee mai madota rau i Yerusalem. Tantara eera nampahuru Simon mopahaa salib Yesus, 22rau i Bulu Golgota. Golgota ee batuana: Pobolia Banga Woo. 23Laiwaikara Yesus anggur to laigalo hante leti mur, naupawee moma-'I nadota nanginu. 24Napu ee mai laisalibrami Yesus pade waru-Na laibagira hante nocabu lot mampakatantu bagiara lako waru Yesus.
25Tempo posalibra Yesus nambela tinti hahio hampepulo. 26I wongko woo-Na laiparikara dopi to laitulihi napa habana hampena laisalib-'I. Iwei monina, “Magaura to Yahudi.”
27Naria mui rodua to perampaki laisalib dohe-Na, hadua mali pangkana-Na pade hadua mali pangkai-Na. [28#Yes. 53:12Pobabeira lauria, nopaganai to laitulihi rara Buku to Nagaha, to nanguli iwei, “Hia mei rapahibali hante tauna to nadaa ingkura.”]
29Tau-tauna to noliu i hee, notalibi nampopore-'I pade iulira iwei, “Iuli-Mu wei, Mupakaropodi Hou Alatala pade Mupatuna nculi rarana tolu eo. 30Pehompomo-Ko lako kau salib etu pade pakahalamami woto-Mu!”
31Wee mui imam-imam to i matana hingkani-ngkani hante to nataualu buku Taurat nampopore-'I, iulira iwei, “Tau ntanina laipakahalama-Na, woto-Na moto moma namala laipakahalama-Na! 32Palelemi Magau to Pepakahalama, Magau to Israel ee, mehompo lako salib ee mai welau ei, bona mamala tahilo pade taparahaya-'Idi.”
Tauna to rodua to laisalib dohe-Na, netuku muirahawo nampopore-'I.
Yesus namate
(Mat. 27:45-56; Luk. 23:44-49; Yoh. 19:28-30)
33Nopamula lako tinti hampulu rongu mpoeo lia duu tinti tolu ngkinuwia, humangkulili ngata ee mai nawali nalimau. 34#Mzm. 22:2Tinti tolu ngkinuwia ee mai nongaremi Yesus, iuli-Na, “Eloi, Eloi, lama Sabakhtani?” Batuana: Alatala-Ku, Alatala-Ku, napa pade laipalahi-Mu-'A?
35Nangepe lauria, bahangkua dua to nokangkore i hee nanguli, “Hilo, nangkio Elia-'I.” 36Lauparia nokumenomi hadua rau nangala bunga to ewa tamomo pade lailomena i rara ue anggur to naonco, pade laijujukana hi Yesus nampake doa bona mamala Nainu, pade iulina, “Tapopea olu, bona tahilo baka marata mpuu'i Elia mampopehompo-'I.”
37Napu ee nongaremi Yesus pade nalalimi inoha-Na.
38Tempo ee mai powide rara Hou Alatala nahia ntongo lako lolona duu nauna. 39Kapitee tantara to nokangkore i tingoo salib Yesus, nampahilo bewa Yesus namate, iulina, “Nakono mpuu, Hia ei Ana Alatala!”
40Naria muirahawo bahangkua dua bangkele to nampahilo humawee to nadupa lauria lako ka'awaana. Dohera bangkele ee mai nariara Maria Magdalena, Salome pade Maria tinara Yoses hante Yakobus to nangura. 41Bangkele-bangkele eera mai to nantuku pade nantulungi Yesus hinungkai lako Galilea. Naria muira i hee bangkele-bangkele to ntanina, to narata i Yerusalem nodohe hante Yesus.
Yesus laitana
(Mat. 27:57-61; Luk. 23:50-56; Yoh. 19:38-42)
42Tempo ee mai ngkinuwia mparomi pade tempo ee mui nambela eo kahadiaara to Yahudi mantarima eo Pentuua. 43Etu pade Yusuf to Arimatea netibia rau nampotomuka Pilatus namperapi wataloka Yesus. Yusuf ee mai hadua lako to Pobotuhi Agama Yahudi to laibila. Hia hadua tauna to nampopea karata tempona Alatala moparenta halaku Magau. 44Nangepe ane namatemi Yesus, nahera'i Pilatus. Lauparia laikiona kapitee tantara pade laipekunena ane nakono namatemi Yesus. 45Hangka laiepena lako kapitee tantara ee mai ane namate mpuumi Yesus, laipopewainami wataloka Yesus hi Yusuf.
46Napu ee mai raumi Yusuf nangoli kae bula pade popanaunami wataloka Yesus lako salib pade laibunguna hante kae bula ee mai, pade wataloka Yesus ee mai laidulena i rara dayo to laipaa amimi i rara watu. Napu ee laiduliana hangu watu bohe laipopowuntana dayo ee mai. 47Tempo ee mai Maria Magdalena hante Maria tina Yoses nampanaa rima Yesus laitana.
موجودہ انتخاب:
Markus 15: MYL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
