Jã 15
15
Jeju dʋɔn dɩvɛ̃ thɩr kɩra bɔ
1Mɛr dʋɔn dɩvɛ̃ thɩr kɩra bɔ, sɩ ɩ̃ Thɩ dʋɔn dɩvɛ̃ thɩr hɩ̃daar. 2Jɛ̃ɛ fɛʋ bɩɛlbɩɛlɩkɛ thaarɛ marnɩ sɩ ga‐n se bəˈ, a na kuur ger na faa. Sɩ jɛ̃ɛ fɛʋ bɩɛlbɩɛlɩkɛ n sɛnɩ be, a na khabɩ gɛr gɩ jɩɩ se be ga‐n pɛr. 3Ado nɛr gɩ, nɩ ˈlire phur dɩɩ do thɩmɩɩrɩkɛ mɩ kɔɔ mɩɩ nɩnɩ dɔ nɔɔ. 4Dɔ nɩ too ɩ̃ bɩnɔ ɩ̃ too anɩ bɩnɔ. Mɔ̃kɛ jɔ̃ɔ na punoni dɩbara a na se be, saagado dɩvɛ̃ thɩr kɩra a ɓana gaaga, mɛna gɩ ha dakha na nɛrɛ ado na too ɩ̃ bɩnɔaˈ.
5Mɛr dʋɔn dɩvɛ̃ thɩr kɩra, sɩ dɩ nɛr dʋɔn jɛ̃ɛ. Ʋrɛɛkɛ tɔɔnɩ ɩ̃ bɩnɔ dɩ ɩ̃ too ɔɔ bɩnɔ, ɔr na sɩɛn be jɔɔ, gɩdonɩ ado ma halaˈ na puno thɩ̃ bɩɛllakɛ a na cʋʋ kpɩɩrakaˈ. 6Ado tibil na too ɩ̃ bɩnɔaˈ, jɩɛra wa dʋnaa jɛ̃ khaa a khɩ; jɛ̃ khɩna wɩ‐n khɩɩ, a dʋna dɔɔ a faa dɩɩ hɩ̃. 7Ado nɩ too ɩ̃ bɩnɔ dɩ ɩ̃ thɩmɩɩsɔ too anɩ bɩnɔ, nɩ bɩɛlnɛ Thãgbara thɩ̃ɛ wo thɩ̃ɛɛkɛ nɩ‐n ƴaalnɩ, a na ha nɛr. 8Gɩrɛ n cʋɛnɩ ɩ̃ Thɩɩ i dɩ ga‐n dʋbɩrɔ dʋɔn: Na‐n se be jɔɔjɔɔ dɩ mɛ̃ na do ɩ̃ kpãkpãadara.
9Mɔ̃kɛ Thɩrɛ na mɩnɩ, mɛ̃ dakha mɩ na nɩ. Nɩ tɔɔ ɩ̃ thɛthɛɛ naʋrara. 10Ado na hɩɩn ɩ̃ jɔfʋ na toore ɩ̃ naʋra, mɔ̃kɛ mɩ hɩɩnnɩ ɩ̃ Thɩɩ jɔfʋ a too ɔɔ naʋra. 11Mɩ mɩɩ nɛr thaa, daʋʋkɛ dɔnɩ ɩ̃da n puno gɩ ha nar, sɩ dɩ anɩ daʋra n jɩɩ bɔr gɩ ka.
12Nɩ hɩnɛ, gɩrɛ dɔnɩ ɩ̃ jɔfʋ dʋɔn: Na‐n na kha bɩɛlbɩɛl mɔ̃kɛ mɩ na nɩnɩ.#Jã 13:34; 15:17; 1 Jã 3:23; 2 Jã 5 13Dɩ fa faa afɩ yi afɩ kuunsɔra, naʋ na hale a kɔ̃tɩ̃ jɔ naʋ ca ole bã. 14Nɛr dʋɔn ɩ̃ kuunsɔ ado nɩ‐n cʋʋrɛ gɩrɛ mɩ so narnɩ. 15Ma we nɩ thɔ̃dara bã, gɩdonɩ thɔ̃daar na‐n jɩ gɩrɛ ɔɔ kɔ̃tɩ̃ n cʋʋnaˈ. Sɩ ɩ̃ kuunsɔ ma‐n we nɩ, gɩdonɩ mɩ kɔɔ cʋʋ nɛr dɩ nɩ jɩ thɩ̃ɛ fɛʋʋkɛ mɩ nɩnɩ ɩ̃ Thɩɩ pa. 16Ga do nɛr kɔɔ phire maˈ, sɩ mɛrɛɛ thɛthɛ kɔɔ phire ni a pɛ thɔmana, dɩ mɛ̃ na jal a na se be, dɩ anɩ birə na toore ƴɛrr, dɩ mɛ̃ thɩ̃ɛ wo thɩ̃ɛɛkɛ na bɩɛlnɩ Thɩrɛra na ɩ̃ i a na ha nɛr. 17Gɩrɛ mɩ‐n bonɩ ma‐n ɩɩ nar dʋɔn, na‐n na kha bɩɛlbɩɛl.
Tɩbɩla thɩɩra n laarɛ Jeju na ɔɔ kpãkpãadara
18Ado tɩbɩla thɩɩra na laar nɩ, nɩ jɛ gɩ do mɛr wɩ kɔɔ laar ɓo sa pɩɩrɔ nɩ. 19Ado thɩɩda nɩ kɔɔ dora, thɩɩ na kɔɔ nar gɩrɛ dɔnɩ ɔɔda. Sɩ gɩdonɩ na do thɩɩkɛɛda ga, sɩɩ do mɛr phire ni tɩbɩlaa thɩ̃thɩɩn, gɛr dɔ nɔɔ dɩ tɩbɩla thɩɩra na‐n laar nɩ. 20Na‐n jɛna thɩmɩɩrɩkɛ mɩ kɔɔ mɩɩ nɩnɩ ayɩ: Thɔ̃daar na hale a na kɔ̃tɩ̃ na jɔ ɔɔ kɔ̃tãˈ. Ado wɩ kɔɔ kpoo marɛ, wa kpoo narɛ dakha. Ado wɩ kɔɔ hɩɩnɛ ɩ̃ so, wa hɩɩnɛ anɩda dakha.#Mat 10:24; Lu 6:40; Jã 13:16 21Sɩ ɩ̃ i dɔ nɔɔ dɩ wa‐n cʋʋ nar thɩ̃ɛsɔɔkɛra fɛʋ gɩrɛ, gɩdonɩ wa jɩ ʋrɛ thɔna mɩnaˈ. 22Ado ma kɔɔ ɩ̃aˈ, dɩ ado ma kɔɔ mɩɩ wɩ thɩ̃aˈ, ga dor wa kɔɔ hana sopugoəˈ. Sɩ nɛnɛ̃ wa puno na bana awɩ sopugo bã. 23Ʋrɛ n laarɛ mɩnɩ, mɛ̃ a‐n laar ɩ̃ Thɩ dakha. 24Ado ma kɔɔ cʋʋ thɔmaakɛ tibil bɩɛl na kɔɔ cʋʋnɩ kpɩɩrakɛ awɩ thɩ̃thɩɩnaa ga, ga dor wa kɔɔ hana sopugoəˈ. Sɩ nɛnɛ̃ wɩ yɩ gɛr, sɩ wa‐n laar mɩnakɛ, mɛrɛ na ɩ̃ Thɩ. 25Dɩ dɔ gɩrɛra kheranɩ awɩ jɔfʋ sɛbɛra n dã oti, gɩ sor: “Wɩ kɔɔ laar mɛr, sɩ kɩrʋ na halaˈ.”#Khɩ 35:19; 69:4
26Sɩ ɔbɔɔkɛ Bubulikɛ ma thɔnɩ dɩ na the Thɩrɛɛ pa na ɩ̃, kɛ dɔnɩ sobɔ Thueekɛ thɛnɩ Thɩrɛɛ para, ɔr na‐n mɩa sobɔ so jɩɩr a na‐n pɛ mar. 27Sɩ nɛrɛ dakha, na‐n mɩɩrɛ sobɔ so jɩɩr na‐n pɛ mar, gɩdonɩ nɩ kɔɔ har kha na mɛrɛ kɛkɛkɛ fʋ paar.
موجودہ انتخاب:
Jã 15: LOBIRI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Burkino Faso 1985.
