Jã 14
14
Ha ƴɔl thɩmɩaakɛ Jeju mɩɩnɩ
1Na‐n do haar na‐n jẽ naˈ. Nɩ pɩɛr haar Thãgbara a pɩɛr haar mɛrɛra dakha. 2Cɔ paar bərəəm hale ɩ̃ Thɩɩ cɔ; a ga ha mãˈ ma kɔɔ mãa so nar, gɩdonɩ mɩ‐n kʋɔn ɩ̃ gbɛbɩ too paar nɛrɛra. 3Dɩ ɔbɔɔkɛ ma kɔnɩ na gbɛbɩ nar too paar na pɩ, gɛr ma biro na ɩ̃ a na gba nɩ dɩ sa ha kha gɩ do dapaakɛ mɩ hanɩ, le nɩ ha ner. 4Sɩ kãkɛ mɩ‐n jalnɩ, nɩ jɩrɛ hʋɛ.
5Dɩ Tomasɩ sʋʋraa: Kɔ̃tɩn, sa jɩnɩ ka fɩ‐n jalnaˈ, mɔ̃ sa fʋ sɩ na jɩ hʋɛ? 6Dɩ Jeju sʋʋraa: Mɛr dɔ hʋɛ a dona sobɔr na yire. Tibil bɩɛllakɛ na pɔ Thɩrɛra sɩ a na ka mɛrɛra gaaga. 7Ado nɩ kɔɔ jɩ mɛr, ga dor na kɔɔ jɩrɛ dakha ɩ̃ Thɩ. Dɩ a fʋna nɛnɛ̃kɛrakɛ gɩrɛ, nɩ jɩɩrɛ dɩ dakha nɩ yɩɩrɛ.
8Dɩ Filipi sʋʋraa: Kɔ̃tɩn, nɛ sar Thɩrɛra dɔrɔɔm gɩ daan. 9Dɩ Jeju sʋʋraa: Gɩ maanɛ kɛkɛkɛ mɩ hanɩ kha na nɛrɛ, sɩ fa jɩ mɩnakɛ paa bɛɛ Filipi? Ʋrɛɛkɛ yɛ mɩnɩ, Thɩrɛ a yɩ. Mɔ̃ fɩ yɩ ɩ̃ nɛ nar Thɩrɛ? 10Fa‐n pɛr haar, mɩ har Thɩrɛɛ bɩnɔ dɩ Thɩrɛ ha ɩ̃ bɩnɔaa? Thɩmɩaakɛra mɩ‐n mɩɩ nɩnɩ ga do ɩ̃ pa gɩ thaˈ. Thɩrɛɛkɛ hanɩ ɩ̃ bɩnɔ ɔr n dʋɔn ɔɔ thɔ̃ dɩ ga pɩ vʋ̃ʋ. 11Nɩ pɩɛr haar dɩ mɩ har Thɩrɛɛ bɩnɔ, dɩ Thɩrɛ ha ɩ̃ bɩnɔ. Dɩ agado mɛ̃ gɩ woaˈ, nɩ dɔ ɩ̃ thɩ̃ cʋʋ thɛthɛrakɛ n do nɔɔ nɩ pɛr haar mɛ̃.
12Sobɔr mɩ so nar gel, ʋrɛɛkɛ pɛ mɩnɩ haar a na cʋʋrɛ dakha thɔmaakɛra mɩ‐n cʋʋnɩ, dɩ a na cʋʋrɛrakɛ dɩ ga kɔ̃tɩ̃ na jɔ gɩrɛ, gɩdonɩ mɩ‐n kʋɔn Thɩrɛɛ pa. 13Sɩ thɩ̃ɛ wo thɩ̃ɛɛkɛ na bɩɛlnɩ Thãgbara na ɩ̃ i, ma cʋʋrɛ dɩ mɛ̃ Thɩrɛ na ˈlɛ i dʋbɩrɛ, gɩ do mɛr Bikuun dɔ nɔɔ. 14Ado na bɩɛl thɩ̃ɛ Thãgbara na ɩ̃ i, gɛrra ma‐n cʋʋ.
Mɔ̃ Thu Phuu na ɩnɩ
15Ado nɩ‐n na mɛr na‐n hɩɩnɛ ɩ̃ so. 16Sɩ mɛrɛ, ma bɩɛlɛ Thɩrɛ dɩ a na thɔna narɛ Bubul kpɩɩkɛ na tɔɔnɩ kha khorr na nɛrɛ. 17Thu Phuukɛ dɔnɩ sobɔ Thue gɩɩkɛ wɩrɛ bɔnɩ Thãgba na punoni a na ˈlaˈ gɩdonɩ wa yɩaˈ, wa jɩaˈ. Sɩ nɛrɛ, ner jɩɩrɛ gɩdonɩ a‐n toore kha na nɛrɛ, dɩ a na harrakɛ anɩ bɩnɔ. 18Ma faa nɩ dɩ na ho khilə̃biəˈ, ma bire na ɩ̃ anɩ pa. 19Kɩɛr na gbe tɩbɩla thɩɩra na yɩ mɩ bã, sɩ nɛrɛ, ner na‐n yɩ mɛr; gɩdonɩ yidaar ha mɩ, nɛrɛ dakha na hananɛ yire. 20Ga wiilera na jɩrɛ dɩ mɛrɛ, Thɩrɛɛ bɩnɔ mɩ ha, dɩ nɛrɛ ha ɩ̃ bɩnɔ dɩ ɩ̃ ha anɩ bɩnɔ. 21Ʋrɛ hananɩ ɩ̃ so da‐n cʋʋ, ɔr n naan mɩ. Dɩ ʋrɛɛkɛ n naan mɩnɩ, ɩ̃ Thɩ na‐n naarɛ, dɩ mɛrɛ dakha ma‐n naarɛ dɩ ma gbaar dɩbara a na nɩna ntɛ.
22Dɩ Juudi, ga do Judasɩɩkɛ thɛnɩ Karɩyɔtɩ dɩɩra ga, bule Jeju: Kɔ̃tɩn, anye dɔ nɔɔ dɩ fa gba afɩbara na nɩna sɛrɛ, sɩ fa gba dɩbara na nɩna tɩbɩla thɩɩra ga? 23Dɩ Jeju birsee: Ado tibil n na mɛr, a na‐n hɩɩnɛ ɩ̃ thɩmɩɩ dɩ ɩ̃ Thɩ na‐n naarɛ, dɩ sa pɔr ntɛɛ pa a na too ɔɔ bɩnɔ. 24Ʋrɛ na‐n naan mɩnaˈ, aa‐n hɩɩn ɩ̃ thɩmɩaˈ. Thɩmɩɩrɩkɛ nɩ nɩnɩ, ga do ɩ̃ pa gɩ thaˈ, sɩ Thɩrɛɛkɛ thɔna mɩnɩ ɔɔ pa gɩ the.
25Mɩ mɩɩ nɛr thɩ̃ɛsɔɔkɛ bɔɔkɛ mɩ toona nɩnɩ kha. 26Sɩ Bubulikɛ dɔnɩ Thu Phuu, kɛ Thɩrɛ na thɔnɩ ɩ̃ irə, ɔr na dɩrɛ nɩ thɩ̃ɛ fɛʋ a cʋʋna nɩ nɩ jɩna thɩ̃ɛ fɛʋʋkɛ mɩ kɔɔ so narnɩ.
27Ha ɩɩ mɩ faa nar. Ɩ̃ thɛthɛɛ ha ie mɩ ha nɩ. Ma ha nɩ ha ɩɩ mɔ̃kɛ thɩɩda n ˈlaanaˈ. Na‐n do haar na‐n jẽ naˈ, dɩ na‐n do maar na‐n fʋ nɩ woaˈ.
28Nɩ nɩɛrɛ mɔ̃kɛ mɩ so narnɩ ayɩ: Mɩ‐n kʋɔn, sɩ ma bire na ɩ̃ nar. Ado nɩ‐n kɔɔ na mɛr, na‐n kɔɔ kãkarɛ gɩrɛraakɛ mɩ‐n kɔnɩ Thɩrɛɛ pa, gɩdonɩ Thɩrɛ kɔ̃tɩnɛ a jɔ mɩ. 29Mɩ kɔɔ maanɛ gɩrɛ dɩ ma‐n so nar ga thɩ̃sɔɔkɛ sɩ ga dã paˈ, dɩ mɛ̃ ɔbɔɔkɛ ga‐n danɩ na pɛrɛ haar. 30Ma mɩɩ ˈlo jɔɔ na nɛrɛ bã, gɩdonɩ thɩɩkɛɛ fãgadaar n ɩnɛ, sɩ a na puno maˈ. 31Sɩ dɔ tɩbɩla fɛʋ thɩɩra n jɩ mɩ‐n nar Thɩrɛ, dɩ mɔ̃ Thɩrɛ so marnɩ, mɛ̃ mɩ‐n do ɩ̃ thɔ̃. Nɩ ɩrɛ sɩ the kɩɛrra sɩ jal.
موجودہ انتخاب:
Jã 14: LOBIRI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Burkino Faso 1985.
