PITUNBEE 7
7
Ecɛnni kayoʔo
1Sraʔá farafɛɛ pe lagwɔ wɔ̀ɔ wí po: «Kayocɛnŋɛ gi ga pé yo ge yo?» 2Ecɛnni wɔ̀ɔ yo: «Na woo ní na tee ní, yè lòʔó ná ma. Nyiŋi ga na wò to Abrahamu wi dá bo wa Mɛsopotami klo ni le, sanni wí bi yà glɛn wa Aran kàʔà ni ge, Nyɛʔɛlɛ, la kpangbanma paʔama mi fɔlɔ we, à li yâ lì tyɛʔɛ wí na kpɛn.#7:2-3 ma wèle wa Hli 12:1 ni wè.
3À liʔi yo wí ma mà yo: ‹Ma nyini naʔa ma klo ni le ní ma to wi heme woo pe nulala ni le. Ma da sye klo la ni mí bi yà dyɛʔɛ má na ge.›
4Ki nyiŋi na ge, wɔ̀ɔ nyini wa Kalideyee pe klo ni le mà yâ glɛn wa Aran kàʔà ni ge. Wi to wi gâ gu kɔ ge ki kruʔu ma Nyɛʔɛlɛ à li Abrahamu troʔo we naʔa ki klo la ni yé ma klɛn ŋaŋa ni ge.#7:4 ma wèle wa Hli 11:31; 12:4 ni wè. 5Nyɛʔɛlɛ li ìn dà tra tà kan wí ma wa ki klo ni le, ali wi cyeʔe tyɛʔɛhaʔa ge. Di à li nofele là kon wí ma mà yo lí bi ba ki klo kan le wi ma, wiì nì wi kluʔu pii ní be, ki klo li po pe wolo. Àʔa hín bo pyɔ wò wi ma ki nyiŋi na ge.#7:5 ma wèle wa Hli 12:7; 13:15; 15:18; 17:8 ni wè.
6Nyɛʔɛlɛ à liʔi yo wí ma nɛ mà yo: ‹Ma kluʔu pii pé bi ba glɛn hɛɛn pèè klo ni bi bo nabonmoo. Ki klo woo pa pe ma kluʔu pii krɛʔɛ be pe ŋkloolo bì pe cɔlɔ fɔ bì da yɛʔɛ́ saa syɛn.#7:6-7 ma wèle wa Hli 15:13-14 ni wè. 7Nyɛʔɛlɛ à luu po: Klo la pé gà bo li ŋklomo ni me, mì mí bi ba ki klo woo cɔlɔ be. Ki kruʔu ma, ma kluʔu pii pé gà ba nyini wa ki klo ni le bì baa na kpɔʔɔ naʔa ki deʔe ga na ge.›#7:7 ma wèle wa Nyi 3:12 ni wè.
8Nyɛʔɛlɛ à li legeme jɛnlɛ là tyɛʔɛ Abrahamu na we, nofele wolo. Ki pomo na me, Abrahamu wi da gâ Isake he we, wɔ̀ɔ bɔ́ɔ̀ lege wlɛrɛ natanriwoʔo na ge. Isake wɔ̀ɔ bâ Jakɔbe he we mà kiì tege hanri wí ni. Jakɔbe wɔ̀ɔ bâ wò tee kɛ̂ mà kɛ syɛn he we mà kiì tege hanri pé ni.#7:8 ma wèle wa Hli 17:10-14; 21:2-4; 25:26; 29:31 - 35:18 ni wè.
9Wò tee pe dáa yejaʔa wa pe conlo Josɛfu nì we mòo pɛrɛ Ejipite klo kɛrɛfiyee pèè ma.#7:9 ma wèle wa Hli 37:11,28; 39:2,21 ni wè.
10Di Nyɛʔɛlɛ à li po wí ni, mòo syɔ wi cɔlɔʔɔ kì bɛfu ma mòo kân tɔdanra nì ticlimi nì wi dáa Ejipite klo fɔlɔ Farahon glanʔa we. Ki woo wɔ̀ɔ bâ Josɛfu tɛnŋɛ we wi klo li yugu na mà plɛn wiì klo fɔlɔ wi go ki hɛɛn pè bɛfu ní.#7:10 ma wèle wa Hli 41:39-41 ni wè.
11À funŋu ma bâ do Ejipite klo lì bɛfu na mà plɛn Kana klo nì le. Ki cɔlɔʔɔ ki dá bo kpangbanŋa. Wò tee pe ìn da akaba taʔa.#7:11 ma wèle wa Hli 42:1-2 ni wè. 12Jakɔbe wi gáʔà loʔo mâ yo akaba pà nyɛ wa Ejipite klo ni le, wɔ̀ɔ wò tee tun be wa. Àʔa po pe krɛgblɛlɛ liì li wa. 13Syɛnwolo na le, Josɛfu wɔ̀ɔ yâ wì tyɛʔɛ wi lɛɛ na be. Farahon wɔ̀ɔ bâ Josɛfu wi heme woo cɛn be.#7:13 ma wèle wa Hli 45:1,16 ni wè.
14Josɛfu wɔ̀ɔ hɛɛn pèè tun mà yo pe ya wi to Jakɔbe yeri we wa ní wi heme woo pè bɛfu ní. Wi woo pe dá bo hɛɛn too tanri ní kprɔʔɔ ní hɛɛn kɔgunnu.#7:14 ma wèle wa Hli 45:9-10; 17:18; 46:27 ni wè. 15Jakɔbe wɔ̀ɔ kɛri Ejipite klo ni le. Wiì nì wò tee ní be à pe gâ gu wa.#7:15 ma wèle wa Hli 46:1-7; 49:33 ni wè. 16À pe na pé kpin na sye pé ni Sisyɛmu kàʔà ni ge mà yáa pe ni fanʔa ga ni Abrahamu wi dá syɔ gbejanra nì Amori pii ma be wa Sisyɛmu kàʔà ni ge.#7:16 ma wèle wa Hli 23:3-16; 33:19; 50:7-13; Jos 24:32 ni wè.
17Nyɛʔɛlɛ li dá nofele la kon Abrahamu ma we, pa li tonnyiŋi ki da gáa nori ge, Israyɛli hɛɛn à pe na nyɛʔɛ ceŋge wa Ejipite klo ni le,#7:17-18 ma wèle wa Nyi 1:7-8 ni wè. 18fɔ à klo fɔlɔ wà ma bâ glɛn Ejipite klo na le wì yɛ mà po wi ìn Josɛfu cɛn we.
19Ki woo wi dá ticlimi kon wò woo na be mà wò tee cɔlɔ be, fɔ mà bâ pe ciʔili mà yo pe da pe pinyɛrɛ wa de, jango tò gá go nyuwyeʔe na. 20Ki nyiŋi kiì gi pe dá Mowisi he we. Wɔ̀ɔ po kmaa Nyɛʔɛlɛ li yɛʔɛ̀ na ge. À poo jo wa wi to go nî ge mà ta yere tanri. 21Nyiŋi ga na pe gɔ́ɔ̀ wa ge, Farahon wi picɛ wɔ̀ɔ yɔ́ɔ̀ kpe mà yáa wi jo mòo krɛʔɛ nɛɛ wi pitaʔa gi.#7:21 ma wèle wa Nyi 2:3-10 ni wè.
22Pe dá Mowisi ploʔo we Ejipite klo woo pe ticlimi mì bɛfu ní. Sye dá bo wi kayoro ni de ní wi kahranʔa kè bɛfu ní.
23Nyiŋi ga na wi da gâ yɛʔɛ́ too syɛn kɔ we, à honriʔi kà ma tiʔi wa wi lama ni me mà yo wi ya wi woo wele be, Israyɛli pii be.#7:23-29 ma wèle wa Nyi 18:3-4 ni wè. 24Wɔ̀ɔ yâ Ejipite klo woo wà nya wí na Israyɛli pii wà cɔlɔ. Wɔ̀ɔ haʔa ki woo ŋa na Ejipite klo woo wi dá bo na jin ge mà Ejipite klo woo kmo we mòo kpo mà wi woo wi fwɔʔɔ ton ge. 25Wi dá bo naʔa nyaʔa nɛɛ wi woo pé biʔi cɛn bì yo Nyɛʔɛlɛ lí ma wiì kpe mâ na pe syo wí ni ge. Di pe ìn ki cɛn. 26Ki kpɛntoʔo na ge, wɔ̀ɔ yâ sun wi woo pèè na pé na can. Wɔ̀ɔ naʔa ca bì pe laʔa pè na pe po lafiʔimi na. Wɔ̀ɔ yo: ‹Na woolo, yé nyɛ hɛnteŋe woolo. Nyaʔa ma po wa yé na yè cɔlɔ ge?› 27Di hɛn ŋa wi dá bo na wi nibo cɔlɔ we, wɔ̀ɔ Mowisi ŋroʔo we mà yo: ‹Han ma ma krɛʔɛ wò lagwɔ mâ ma krɛʔɛ wò kiti konfɔlɔ ge? 28Mo má ma cori bi na kpo nɛ pa yaaga ni ma dí Ejipite woo kpo we pomo ma na ge yo?› 29Ki kayoro ti kala na le Mowisi wɔ̀ɔ fɛ mà kɛri mà yâ glɛn wa Majan klo ni le mà he wa pii syɛn nabiili.
30Yɛʔɛ́ too syɛn da gâ gɔ kɔ ge, à mlɛŋɛ wà bâ wì tyɛʔɛ wí na wa Sinayi angogbɔʔɔ ki sinbriʔi ni ge. Wɔ̀ɔ kwɔʔɔ nya kí na nyi tiple na.#7:30-34 ma wèle wa Nyi 3:1-10 ni wè. 31Mowisi wi gâ ki woʔo ga nya ge, àʔa wí fo. Wi gáa flo waʔa tanla mâ yo wí biʔi wele bìʔi ceʔe ge, wɔ̀ɔ wò fɔlɔ wi àkpolo loʔo le wa. 32À luu po: ‹Mì mí nyɛ ma tee pe Nyɛʔɛlɛ mà po Abrahamu nì Isake nì Jakɔbe nì pe Nyɛʔɛlɛ.› Mowisi wɔ̀ɔ na hiʔiri. Wi ìn horo bì daʔa wele. 33Wò fɔlɔ wɔ̀ɔ wí po: ‹Ma ma sabara fara de wa ma cyeʔe na ge, mɛjɛn deʔe ga má ma yere ge, kí nyɛ trakmara di. 34Kanyɛmɛ na mí ma na hɛɛn pe cɔlɔʔɔ nya ge, bee pé nyɛ wa Ejipite klo ni le. À mi pe cɛnʔɛ loʔo ge. Kiì gi mí ma trigi bí ba pe syɔ ge. Ki tɔ na ge, ta ban, mí bi ma tun wa Ejipite klo ni le.›
35Ki Mowisi teŋe ŋa pe dɔɔ cé mâ yo: ‹Han ma ma krɛʔɛ wò lagwɔ mâ ma krɛʔɛ wò kiti konfɔlɔ ge,› wiì wi ŋa Nyɛʔɛlɛ li dá dun móò krɛʔɛ wò lagwɔ móò krɛʔɛ syɔfɔlɔ mlɛŋɛ wi haʔama nì me, ŋa wi dá wì tyɛʔɛ wí na wa tiple ni le.#7:35 ma wèle wa Nyi 2:14 ni wè. 36Wiì wi ŋa wi da pé yrigi wa Ejipite klo ni le kakpɔʔɔlɔ ní jɛnʔɛlɛ ke fanŋa ni, gee wi dáa hanri wa Ejipite klo ni le ní kpraʔa nyugbɔmo nì me ge mà ni na ke hanri wa sinbriʔi ni ge fɔ mà ta yɛʔɛ́ too syɛn.#7:36 ma wèle wa Nyi 7:5; 14:21; Ton 14:33 ni wè.
37Mowisi wiì wi ŋa wi dá Israyɛli woo po be: ‹Nyɛʔɛlɛ lí gà ba li leyoo wà yrigi naʔa yè woo ni be wi po nɛ pa mì nyɛ we.›#7:37 ma wèle wa Lado 8:15,18 ni wè. 38Mowisi wiì wi wi dá bo kpoʔolomo ní me wa sinbriʔi ni ge. Wiì wi wi dá bo wa wò tee ní be mâ po mlɛŋɛ ní we ŋa wi dá bo na nyu wí ni wa Sinayi angogbɔʔɔ na ge wɔ́ɔ kayowyere ta de wo kan ge.#7:38 ma wèle wa Nyi 19:1 - 20:17; Lado 5:1-33 ni wè.
39Di wò tee pe ìn ki ta bì da wi kayoro kpɔʔɔ de. À poo ce. Àʔa po wa pe dihon na we pe hrù pe kɛri Ejipite klo ni le.
40À pe Aaron po we: ‹Ma nyɛʔɛŋɛɛ kèè hanri wo kan, gee ké bi da gunnu wò yɛ̀ʔɛ̀ ma ge. Mɛjɛn ki Mowisi ŋa wi dá wo yrigi wa Ejipite klo ni le ge, ga kí moo ta, wo ìn ki cɛn.›#7:40-41 ma wèle wa Nyi 32:1-6 ni wè.
41Ki wlɛrɛ da ni de, à pe nuple fan mà pan mà bâ sraʔá fara be ki hɛnʔɛ ma ge. À pe na leʔele pe kyɛʔɛ afanʔa ní ge. 42Nyɛʔɛlɛ à li kruʔu wa pé ma mà pe yaʔa be pe da namuru ŋoŋoo kpɔʔɔ ge nɛbo kí nyɛ wa nyoŋoʔo Nyɛʔɛlɛ li leyoo pe sɛbɛ ni we mâ yo:
‹Yèé Israyɛli klo hɛɛn be,
ye dá bo na ajobo pà kpun
ná kan sraʔá yo
ní sraʔayée pèè ní nɛ
wa sinbriʔi ni ge,
fɔ mà ta yɛʔɛ́ too syɛn yo?#7:42-43 ma wèle wa Amo 5:25-27 ni wè.
43Ye dá yè nyɛʔɛlɛ Molɔki
wi kpasyoro go kpe ge na syeʔe ni
mà plɛn yè nyɛʔɛlɛ Hronfa
wi ŋolo nì le,
ki acɛʔɛbɛ ba ye dá hanri,
jango bí da pi kpɔʔɔ ge.
Ki kala na le,
mí bi yà ye wa wa
Babilɔni kàʔà kruʔu ma ge.›
44 Kpasyoro go dá bo wa wò tee ma be sinbriʔi ni ge mà naʔa teri pé na mà yo Nyɛʔɛlɛ lí nyɛ pé ni. Pe daʔá hanri nɛ pa ga nyɛ Mowisi wi dá nya, Nyɛʔɛlɛ á luu po wiʔí hanri ki podeme na me ge.#7:44 ma wèle wa Nyi 25:9,40 ni wè.
45Ki kruʔu ma wò tee pe da gâ ki go ta ge, pee ní Josuwe nì we, à pe kɛriʔi ni mà yâ je wa hɛɛn pe tɔɔ pe klòʔo ni ge. Ki nyiŋi na Nyɛʔɛlɛ li dáa ki woo prɔ be wò tee pe yɛʔɛ̀ na ge. Wò tee à pe na ki woo pe klòʔo syo ge pé ma. Kpasyoro go àʔa yâ go wa fɔ mà bâ no Dafide wi nyiŋi na ge.#7:45 ma wèle wa Jos 3:14-17 ni wè.
46Dafide wɔ̀ɔ tɔdanra ta Nyɛʔɛlɛ ma le mà li nyɛri mà yo luu yaʔa wi korohaʔa kà hanri liì Jakɔbe wi Nyɛʔɛlɛ kan le.#7:46 ma wèle wa 2Sam 7:1-16; 1Masa 17:1-14 ni wè.
47Di Salomo à wiì ma bâ go kà fan lí kan.#7:47 ma wèle wa 1Mas 6:1-38; 2Masa 3:1-17 ni wè.
48Àʔa hín bo Nyɛgbɔfiʔi koò na kori yraʔa ga ni hɛn wi kyɛʔɛ kí ma hanri ge nɛ pa Nyɛʔɛlɛ leyoo wi daʔá yo pomo ma na ge mâ yo:
49 Wò fɔlɔ wɔ̀ɔ yo:
Namuru de tí nyɛ
na masaʔa aconʔo.
Tra à ti po na cyeʔe pahaʔa.
Nyaʔa go tyɛnlɛ li la
yé bi fan ná kan ge?
Ná kiì ban,
na fyonrihaʔa paʔa bo hanbe? # 7:49-50 ma wèle wa Esa 66:1-2 ni wè.
50 Na kyɛʔɛ kiì ban ki dá
ki wobo ba pì bɛfu hanri ge yo?»
51Ecɛnni wɔ̀ɔ pé po: «Hɛɛn yɛribɛɛnlɛ, yèé yé nyɛ nɛ pa basɛriyee nyɛ be yè dihon nì, ní yè baloʔomo ní me. Yèé yé na can Nyɛʔɛlɛ li Nyìli ní le su nɛ pa yè tee nyɛ be.#7:51 ma wèle wa Esa 63:10 ni wè.
52Nyɛʔɛlɛ leyoo ŋa yè tee pe ìn jɔlɔ ge wí nyɛ wiwii ní? Bee pe da glú ná lesinŋi wi panma jari me, yè tee à pe ki woo kpo be. Ki tɔ na ge, yèé à ye bɔ́ɔ̀ le wi bɛnfɛɛ pe kyɛrɛ̀ ni de mòo kpo. 53Yèé bee ye dá Nyɛʔɛlɛ li kayoro ta de mlɛŋɛyee ma be. Kiì nì kì bɛfu ní, à ye ti ce.»
Ecɛnni wi kùʔù kayoʔo
54Pe gáa ki kaʔa nuru ge, pe lama à mi horo pé na ceŋge, fɔ à pe na ganʔa kun ge Ecɛnni wi kala na le. 55Di wi dá bo nyìŋì Nyɛʔɛlɛ li Nyìli ní le mà nyɛʔɛ kán ge wa namuru ni de mà Nyɛʔɛlɛ li kmama kpangbanma paʔama nya me wa mà Jesu nya we kpo wi yeré be Nyɛʔɛlɛ li kaligi na ge. 56Ecɛnni wɔ̀ɔ yo: «Yè wèlé, mí ma namuru nya de ti nyɛʔɛ́. Mí na Hɛn Pyɔ nyaʔa we wi yeré be Nyɛʔɛlɛ li kaligi na ge.» 57À pe taʔara wí na gbanʔa mà pe naakpoʔo ton ge mà fɛ mà yâ do wí na teme na mòo co, 58mòo yrígi wa kàʔà ni ge mà yáa wi wa ŋglɛnrɛ ní. Sɛriyee be à pe pe kpasyoro tyɛʔɛ de najɛpii wà tanla pe dáa wi yeri Sɔli. 59Pe gáa Ecɛnni wa we ŋglɛnrɛ ní de, wɔ̀ɔ na Nyɛʔɛlɛ nyɛri le mà yo: «Na fɔlɔ Jesu, ma na nyìli kpe le.» 60Wi gâ kunbiʔi kán ge, wɔ̀ɔ taʔara gbanʔa mà yo: «Na fɔlɔ, mò gá ki kapeʔe ki fwɔʔɔ kà ton pé na.» Wi gâ ki kayoʔo yo ge kɔ ge, wɔ̀ɔ ku.
موجودہ انتخاب:
PITUNBEE 7: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire