PITUNBEE 6
6
Haʔafɛɛ nasyɛn pe frala
1Ki wlɛrɛ da ni de, pa sɛrifɛɛ pe dáa nyɛʔɛ ná sye ge, Juwifiyee bee pe dáa Grɛki hɛnrɛ nyu de, à pe na Juwifiyee pe tɔɔ hanʔa be, bee pe dáa Ebruyee woro nyu de, mɛjɛn ki woo bee pe dáa lama wo Grɛki hɛnrɛ yofɛɛ pe kucaa pe wlɛrɛ nigbe nigbe akaba ní be, ba pe dáa diʔibi pé kan ge. 2Pitunbee kɛ̂ mà kɛ syɛn à pe sɛrifɛɛ fafaʔabaa pè bɛfu yeri mà bâ pe po: «Ki ìn yala wòó wo Nyɛʔɛlɛ li kayoro ti jarimi yaʔa me be wo kò akaba tiʔibifɛɛ. 3Na woolo, ki kala na le, ye hɛɛn nasyɛn wele ye pe fàrà wa yè nî bee pé nyɛ tɔdanra fɛɛ ge mâ po pé ma nyi Nyɛʔɛlɛ li Nyìli ní ticlimi nì me, wo ki tunŋu ga kan ge pe ma. 4Di wòó be wó bi wò kân Nyɛʔɛlɛ li nyɛrimi ma me ní li kayoro tunŋu ní ge.» 5Ki kayoʔo àʔa hɛɛn pè bɛfu glan. À pe Ecɛnni fara. Wi dá bo nyìŋì Nyɛʔɛlɛ li Nyìli ní pama ní me. Hɛɛn bee pe dá fara kpo ge pe yegee ké gee: Filipe nì, Prɔkɔri nì, Nikanori nì, Timo nì, Parimenasi nì, ní Nikola nì, Ancɔsi kàʔà woo we, ŋa wi da jé Juwifiyee pe kloʔò ni lefonŋo ge. 6À pe bâ ki hɛɛn tyɛʔɛ be pitunbee na be. Pitunbee pe gâ Nyɛʔɛlɛ nyɛri le kɔ ge, à pe pe kyɛrɛ̀ pa de ki hɛɛn na be.
7Nyɛʔɛlɛ li kayoro à ti na canmu na sye. Sɛrifɛɛ pe nò àʔa na nyɛʔɛ wa Jerusalɛmu kàʔà ni ge fafaʔa ceŋge. À sraʔá farafɛɛ fafaʔabaa na nyiní pama kayoro na de.
Ecɛnni wi colo kayoʔo
8Ecɛnni wi dá bo nyìŋì Nyɛʔɛlɛ li haʔama nì, ní li fanŋa nì ge. Wɔ̀ɔ na kakpɔʔɔlɔ ní jɛnʔɛ kpandoʔo hanri ge hɛɛn ni be. 9Di à hɛɛn pèè na can wí ni. Ki hɛɛn pe dá bo Sirɛne kàʔà Juwifiyee ní, Alɛkisandre kàʔà woo ní be pee bɛ. Ki woo pe dá bo wa Juwifiyee pe sɛrigo ga ni pé na yeri “Peklɛnpekan ge”. Pee ní Silisi klo Juwifiyee ní Asi klo woo ní be à pe jɛ na kakara wa Ecɛnni nì we.
10Di Nyɛʔɛlɛ li Nyìli à li Ecɛnni kan we ticlimi nì fɔ ki kakara fɛɛ pe ìn gban bì yo bùu ja. 11Ki nyiŋi na ge, à pe hɛɛn pèè fara ákpolo na le mà pe sariʔi na. Ki woo à pe naʔa nyu mà yo: «Wó maʔa loʔo Ecɛnni ma we màʔa nya wí na Mowisi nì Nyɛʔɛlɛ ní pe yele cɔʔɔ le.» 12Ki kakara fɛɛ à pe hɛɛn ní lagwɔɔ ní Furu sɛbɛ cɛnfɛɛ pri be mà pe wa Ecɛnni na we. À pe to wí na mòo co mà kɛri wí ni kiti konhaʔa na ge. 13Kakara fɛɛ à pe akpoflɛɛn kpe. Ki woo à pe yo: «Ki naŋa ŋa we wí na kayopere nyu na wa nyiŋi kì bɛfu na Nyɛʔɛlɛ li gokmaʔa ma ge ní li kayoro ní de. 14Mɛjɛn wo daʔa loʔó wí ma, wɔ̀ɔ yo ki Jesu ŋa, Nasarɛti kàʔà woo we, wí bi ba Nyɛʔɛlɛ li go jaabu ge bì wò kalɛʔɛ krɛʔɛ ge gee Mowisi wi dá gan wo ma ge.» 15Hɛɛn bee pe dá bo wa klɛnhaʔa kiti konhaʔa na ge à pe nyɛʔɛ kán Ecɛnni na we mà na wi yɛʔɛ̀ nyaʔa ge nɛbo nɛɛ mlɛŋɛ yɛʔɛ́ gi.
موجودہ انتخاب:
PITUNBEE 6: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire