PITUNBEE 5
5
Ananyasi nì wi cɔ Safira nì pe kùʔù kayoʔo
1Di naŋa wà dà bo wa pe dá bo noo yeri Ananyasi na wi cɔ yeri we Safira. Ki naŋa wɔ̀ɔ bâ wiì nì wi cɔ nì pe tra tà pɛrɛ, mà kà fara wa ki pɛrɛ ni de pe woʔo. 2Wi cɔ wɔ̀ɔ cɛnʔɛ ni. Naŋa wɔ̀ɔ ti tɔ kpe de mà kɛri tí ni mà yâ ti le wa pitunbee pe kyɛrɛ̀ ni de. 3Pyɛri wɔ̀ɔ wí po: «Ananyasi, nyaʔa mà po má ma Sotanri yaʔa wɔ́ɔ ma dihon nyi we ma na ge, á ma naʔa ca má bi Nyɛʔɛlɛ li Nyìli fanla le mâ kà fara wa tra ti pɛrɛ ni de? 4Nyiŋi ga na ki dá bo mɛ ìn je ti pɛrɛ́ ge, ti ìn dà glɛn mà mo kan yo? Pa ma gâ ti pɛrɛ kɔ ge, ti gbejanra ti ìn glɛn ma nadanma miì kan yo? Nyaʔa ma po má ma ki kala la li nyoʔo le ge wa ma dihon ni we? Mɛ ìn flɛn hɛɛn ma, di má ma flɛn Nyɛʔɛlɛ liì ma.»
5Ananyasi wi gâ ki kayoro loʔo de kɔ ge, wɔ̀ɔ to mà ku. Hɛɛn bee pe dáa ki kayoro nuru de, fyara à ti pé co gbanʔa ceŋge. 6Najɛɛ à pe pan mà bâ kpasyoro tòn wí na mòo kpe mà yɔ́ɔ̀ le.
7Ki gâ mo cɛnri mâ lɛri pii tanri nyoʔo kɔ ge, wi cɔ wɔ̀ɔ pan mà bâ je wa. Wi ìn ki cɛn ga ki dá hanri ge. 8Pyɛri wɔ̀ɔ wi yugu mà yo: «Ye dí tra pɛrɛ ki pɛrɛ da tiì na yo? Maʔa yo ná ma.» Wɔ̀ɔ yo: «Ee, ti pɛrɛ tiì di.» 9Pyɛri wɔ̀ɔ wí po: «Nyaʔa ma po wa yé ma yo mâ flinʔi na mâ yo yé bi wò fɔlɔ wi Nyìli po bi li welé ge? Wele, hɛɛn bee pe yâ ma pɔlɔ le we, pé nyɛ be goyɛʔɛ na ge. Pé bi gɛri mo ní we kpo.»
10Ki nyidege na ge wɔ̀ɔ to be Pyɛri wi cyeʔe tanla ge mà ku. Najɛɛ à pe bâ je mòo nya kuu, à poo kpe mà yɔ́ɔ̀ le be wi pɔlɔ tanla we. 11Fyara à ti sɛrigo kì bɛfu co gbanʔa ceŋge ní bee ní pe dá ki woʔo ga loʔo ge.
Kafonŋoo pitunbee pe kyɛrɛ̀ ni de
12Jɛnʔɛlɛ ní kakpɔʔɔlɔ fafaʔagaa ní ke dáa hanri hɛɛn ni be pitunbee pe kyɛrɛ̀ ni de. Sɛrifɛɛ pè bɛfu pe dáa pè kpoʔolo lademe ní wa Salomo jasaʔa ni ge. 13Hɛɛn pe tɔɔ wɛ ìn horo bì wì wlele pé ni, di pe dáa pe sonni ceŋge. 14Hɛnfafaʔabaa be pe dáa kyɛʔɛ̀ pa wò fɔlɔ na we, nabii ní, ní cɛɛ ní be, à pe na nyɛʔɛ na hari wa sɛrifɛɛ na be na sye, 15fɔ pitunbee pe kahranʔa ke kala na le, hɛɛn à pe na pan yabaa ní be mà báa pe sinŋi asyɛnrɛ na de ní fruru nì de wa kloro na de, jango Pyɛri, nòo gá baa doro ge, wi nyinyimi mi ja gmo wà na pé ni. 16Hɛnfafaʔa dàá jrɛʔɛ kpo kyɛ̀rɛ̀ da ni tí nyɛ wa Jerusalɛmu kàʔà tanla ge mà na pan yabaa ní, ní hɛɛn bee ní gbosuu pé na pe cɔlɔ ge. Pè bɛfu à pe na pori.
Pitunbee pe cɔlɔʔɔ kala
17Ki nyiŋi na ge, sraʔá farafɛɛ pe lagwɔ wɔ̀ɔ jɛ wiì nì pe tɔɔ pè bɛfu ní bee pe dá bo wí ni ge mâ po nɛ Saduseyee woo ge. Pe yejanyɛʔɛ àʔa jɛ pè ma. 18À pe bâ pitunbee co be mà yâ pe le foroba kaso nî. 19Di ki yebliʔi ni ge, à wò fɔlɔ wi mlɛŋɛ wà ma bâ kaso goyɛrɛ nyɛʔɛ de mà pe yrígi wa mà pe po: 20«Yee sye sraʔá go ni ge, ye ya yèré wa, ye da ki nyuwyefonŋo kayoro tì bɛfu nyu hɛɛn ma be.» 21Pa pe gáʔà loʔo kɔ ge, à pe yâ je wa sraʔá go ni jɛfantutuʔu na ge mà na hɛɛn ploʔo be wa.
Sraʔá farafɛɛ pe lagwɔ wi gâ ban, wiì nì hɛɛn bee ní pe dá bo wí ni ge, à pe Israyɛli kiti konfɛɛ pè bɛfu yeri mà hɛɛn pèè tun mà yo pe ya pitunbee co be wa kaso nî we pe pan pé ni. 22Ki tungɔɔ pe gâ no wa ge, pe ìn pitunbee nya be wa kaso nî we. À pe hru mà pan mà báʔà yo lagwɔɔ kan be, 23mà yo: «Wo yâ kasogo nya ge praʔa kmaʔa. Ki welefɛɛ à pe po be yerehaʔa goyɛrɛ na de. Di wo gáʔà nyɛʔɛ ge, wo ìn pe nya wa ki lama ni me.» 24Sraʔá go sorasiyee pe lagwɔ ní, ní sraʔá farafɛɛ pe lagwɔɔ ní be, pa pe gâ ki kayoro da loʔo de, à pe na pè yugu pitunbee pe namyɛʔɛ na ge, ní ki kala la nì le lí gà ba danʔa pomo ma na ge. 25À hɛn wà ma pan mà bâ pe po: «Yè wèlé, hɛɛn bee ye dí le wa kaso nî we, pé nyɛ wa yerehaʔa sraʔá go ni ge na hɛɛn ploʔo be.» 26Ki nyiŋi na ge, sraʔá go sorasiyee pe lagwɔ ní, ní wi tungɔɔ ní be à pe kɛri mà yáa ban pé ni yɛɛrɛ lafiʔimi na, mɛjɛn pe dáa fyaʔa mà yo hɛɛn pò gá pee wa be ŋglɛnrɛ ní.
27Pe gâ ban pé ni kɔ ge, à pe yâ pe yrigí wa kiti konfɛɛ pe nulala ni le. Sraʔá farafɛɛ pe lagwɔ wɔ̀ɔ pe yugu, 28mà yo: «Wo ìn dàʔa yo ye ma gbanʔa yo mâ yo yò gáa hɛɛn ploʔo be ki yele la na le ge. Wele, yé ma Jerusalɛmu kàʔà nyi ge yè ploʔomo ní me mà nì naʔa ca yé bi ki naŋa ŋa wi kpomo kala tanʔa le wòó na.»#5:28 ma wèle wa Mat 27:25 ni wè. 29Pyɛri nì pitunbee pe tɔɔ ní be à poo po: «Kí ma yala wo da Nyɛʔɛlɛ li kayoro tiì kpɔʔɔ, sanni wó bi da hɛɛn woro kpɔʔɔ ge. 30Wò tee pe Nyɛʔɛlɛ li dá Jesu nyɛ we mòo yrígi, ŋa yèé ye da gán tipraʔa na móò kpo ge.
31Nyɛʔɛlɛ à luu kpɔʔɔ mòo tɛnŋɛ li kaligi na mòo krɛʔɛ yɛklu mà nì mòo hanri Syɔfɔlɔ, jango bi Israyɛli klo woo kan be pe kruʔu wa pe kapere ma de ti yaʔa pé kan. 32Wòó wó nyɛ ki kaʔa gee ke jarifɛɛ mà plɛn Nyɛʔɛlɛ li Nyìli ní le la Nyɛʔɛlɛ lí na kanʔa bee ma pé na li kayoro kpɔʔɔ de.»
33Pe gâ ki kayoro da loʔo de, pe lama à mi gban pé na, à pe cori bì pe kpo.
34Di Farisiyee naŋa wà dà bo wa pe dáa wi yeri Gamaliyɛli. Wi dá bo na hɛɛn ploʔo be kpo Nyɛʔɛlɛ li kayoro ní de. Hɛɛn pè bɛfu pe dá bo noo kpɔʔɔ. Wɔ̀ɔ jɛ mà yere be kiti konfɛɛ pe nulala ni le mà pe po pe ki hɛɛn yrigi be wa dala na le sɔsɔ. 35Ki kruʔu ma, wɔ̀ɔ na pé po: «Yèé Israyɛli klo woo be, ye da yè kɔrɔsi ga nì yé bi hanri ki hɛɛn bee na be. 36Mɛjɛn kí ma nyiŋi kà kɔ, naŋa wà dà bo wa na wì krɛʔɛ hɛnkpangbanŋa. Pe dá bo noo yeri Tudasi. Hɛɛn bee pe da bá wí na ge pe nò àʔa hɛɛn saa syɛn nyoʔo kɔ ge. À hɛɛn pèè ma bɔ́ɔ̀ kpo. Bee pe dáa wi kpɔʔɔ ge pè bɛfu à pe craʔa pè na. Ki tanʔahaʔa àʔa bâ bo waʔafe. 37Ki kruʔu ma, Judasi ŋa Galile klo woo we wɔ̀ɔ jɛ hɛɛn pe tonlinyiŋi na ge mà hɛɛn pèè kle mà pe le wì ma. Wiì fanna à pe bɔ́ɔ̀ kpo. Bee pe dáa wi kpɔʔɔ ge pè bɛfu à pe craʔa pè na.
38Ki tɔ na ge, mí naʔa nyu ye ma: Ye làʔá ki hɛɛn bee na be ye pe yaʔa yeʔeke. Mɛjɛn nàʔa po ki ticlimi nì, ní ki tunŋu ní ge ki jɛ́ hɛɛn ma ge, paʔa ba jɔʔɔ. 39Di nàʔa po ki jɛ́ Nyɛʔɛlɛ ma ge, yòo gban bì pe cɔʔɔ. Ye da yè kɔrɔsi, jango kò gá bo yé na can Nyɛʔɛlɛ ní le.»
40À pe yere wi kayoʔo na ge, mà pitunbee yeri be mà bâ pe kmo mà pe po pò gáa nyu Jesu wi yele na le adi mà nà na pe wá.
41Ki kala na le, pitunbee pe gâ nyini wa kiti konfɛɛ pe nulala ni le, à pe na sye lafiʔimi na, mɛjɛn pe daʔá nya kí nyɛ pee ma be kpɔʔɔmo kala á pe pé faʔara ki yele la na le. 42Wlɛʔɛ kì bɛfu na pe dáa bin wa sraʔá go ni ge ní goro ní de na hɛɛn ploʔo be mà yo Jesu wí nyɛ Nyɛʔɛlɛ li wofràa. Ki woʔo ga ge pe ìn laʔa ki yomo na me.
موجودہ انتخاب:
PITUNBEE 5: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire