PITUNBEE 8
8
1Sɔli wi da yeré Ecɛnni wi kpomo na me.
Sɔli wí ma sɛrigo cɔlɔ ge
Ki wlɛʔɛ na ge, à cɔlɔkpɔʔɔ ma to sɛrigo na ga ki dá bo wa Jerusalɛmu kàʔà ni ge. Sɛrifɛɛ pè bɛfu à pe canmu mà kɛri Jude klo li klɛnmɛ ni ní Samari klo li womo nì me, fɔ mà gâ laʔa pitunbee pee nigbe na. 2Hɛɛn bee pe dá bo na Nyɛʔɛlɛ fyaʔa le ge, ki woo à pe yâ Ecɛnni le we na kpele gbanʔa ceŋge wi kùʔù na ge.
3Ki nyiŋi na ge, Sɔli wi dáa ki ca bì sɛrigo hɛɛn ton be. Wi dá bo na jin goro ni de na sɛrifɛɛ cun be nabii yoo cɛɛ yoo na pe kle na sye pé ni mà yáa pe ni kaso nî.#8:3 ma wèle wa Pit 22:4-5; 26:9-11 ni wè.
Filipe wi yâ kayotanʔa jari Samari klo ni
4Di sɛrifɛɛ bee pe dá janmu ge à pe kɛri deʔe kì bɛfu na mà yáa kayotanʔa nyu ge wa. 5Filipe wɔ̀ɔ kɛri Samari klo li kàʔà kà ni mà yáa Nyɛʔɛlɛ li wofràa wi kaʔa jari ge wa pe ma. 6Janma ma mi dá bo dere na de, pa mi da gáa Filipe wi kayoro nuru de mâ na kafonŋoo nyaʔa gee wi dáa hanri ge, à mi na nuru lademe ní ga ma wi dáa nyu ge. 7Mɛjɛn gbosuu pe dá bo na taʔara gbanʔa na nyini gbosuu fɛɛ fafaʔabaa ni. À lemloʔomoo fafaʔa ma pwɔʔɔ ní klɔyara fɛɛ fafaʔa nì. 8À lafiʔigbɔmo ma po wa ki kàʔà ni ge.
9Naŋa wà dà bo wa ki kàʔà ni ge pe dáa wi yeri Simo. Wi dá bo wa fan mà na lekara kaporo hanri de na Samari klo woo fun be naʔa nyu mà yo wiì wí nyɛ hɛnkpangbanŋa. 10Hɛɛn pè bɛfu à pe na nuru wí ma mà kpe hɛnyribee na fɔ mà yâ no hɛnkpangbanmaa na mà naʔa pin: «Ki woo ŋa we wí nyɛ Nyɛʔɛlɛ li sye ŋa pé na yeri “Syekpangbanŋa we”.» 11Pe dá bo na nuru wí ma, mɛjɛn mà kpe nyiŋi fafaʔa na wi dáa hɛɛn fun be wi lekara kaporo nì de. 12Di Filipe wi gâ Nyɛʔɛlɛ li masaʔa ki kayotanʔa jari ge pe ma, ní Jesu Krisi wi yele li woro nì de, á pe yere tí na ge, nabii ní cɛɛ ní be à pe pè kân pe pe batise. 13Simo wiì wì tala wɔ̀ɔ yere Filipe wi kayoro na de kpo. Wi gâ batise, wɔ̀ɔ na tara Filipe na we. Pɔɔ gáa jɛnʔɛ ní, ní kafongbɔʔɔlɔ nyaʔa ge gee ké na hanri ge, à ke noo fun.
14Pitunbee bee pe dá bo wa Jerusalɛmu kàʔà ni ge, pa pe gáʔà loʔo mâ yo Samari klo woo pé na leʔele Nyɛʔɛlɛ li kayoro ní de, à pe Pyɛri nì Jan troʔo we wa pe ma. 15À pe kɛri pè krugu mà yâ Nyɛʔɛlɛ nyɛri le pe kân, jango pe Nyɛʔɛlɛ li Nyìli ta le. 16Mɛjɛn li dá bo li ìn jé drigi wà na pé ni kpɛn. Ki dá bo pé ma batise dron wò fɔlɔ Jesu wi yele na le. 17Ki nyiŋi na ge, Pyɛri nì Jan nì we à pe yâ pe kyɛrɛ̀ pa de pe na. Ki woo à pe Nyɛʔɛlɛ li Nyìli ta le.
18Simo pɔɔ gáʔà nya Nyɛʔɛlɛ li Nyìli lí na kanʔa pitunbee pe kyɛrɛ̀ ti pama na me ge, wɔ̀ɔ pan pé kan gbejanra nì, 19mà yo: «Yè nà kân ki sye ní we kpo, jango, nà mi gá na kyɛrɛ̀ pa de hɛn o hɛn na, ki woo wi Nyɛʔɛlɛ li Nyìli ta le.» 20Di Pyɛri wɔ̀ɔ wí po: «Mo ní ma gbejanra nì de ye cɔʔɔ. Mɛjɛn má maʔa honri mà yo má bi gban bì Nyɛʔɛlɛ li nadanma yraʔa syɔ ge gbejanra nì. 21Ma tahaʔa wò wa ki kala la ni le. Yrafyɛn wò wa ma woʔo. Mɛjɛn ma dihon woò sinŋi Nyɛʔɛlɛ li yɛʔɛ̀ na ge. 22Ki kala na le, ma kruʔu wa ma tipeʔe ga ma ge, ma nyɛ̀rí wò fɔlɔ ma we, jango ma dihon wi honriʔi ki yaʔa má kan, nàʔa po kí biʔi ta ge. 23Mɛjɛn mí maʔa nya má ma nyi tipeʔe tihromo ní me mà po kapere kaso nî.»
24Simo wɔ̀ɔ yo: «Yèé tapoboo, ye nyɛ̀rí wò fɔlɔ ma we na kân, jango ga yé ma yo ge kà wò ga ná ta.»
25Pyɛri nì Jan nì we pe gâ wò fɔlɔ wi srɛmɛ tanli me kɔ mâ wi kayoro yo de, à pe hru na sye Jerusalɛmu kàʔà ni ge mà na kayotanʔa nyu ge Samari klo li kyɛ̀rɛ̀ fafaʔa ni.
Filipe nì Etyopi klo woo naŋa ní
26À wò fɔlɔ wi mlɛŋɛ wà ma báʔà yo Filipe ma we mà yo: «Ma jɛ̀ ma kamolo kan yaa jɛhaʔa ma ge maa sye kloʔò ga ni kí na jrɛʔɛ wa Jerusalɛmu kàʔà ni ge mâ na sye Gasa kàʔà ni ge. Ki kloʔò kí nyɛ sinbriʔi deʔe gi.» 27Wɔ̀ɔ jɛ mà kɛri mà yâ Etyopi klo woo naŋa wà nya wa. Àʔa hín bo Etyopi klo fɔlɔ wi dá bo cɛlɛ. Pe dá bo noo yeri Kandasi. Ki naŋa wɔ̀ɔ po klo lagwɔ mà po hɛnkpangbanŋa mà po ki Kandasi wi masaʔa ki yugu na ge. Ki naŋa wi da gɛrí mà yâ Nyɛʔɛlɛ kpɔʔɔ le wa Jerusalɛmu kàʔà ni ge. 28Wi gâ hru ná sye ge, wɔ̀ɔ po wa klɛnhaʔa wi syongida kɔ̀rɔ̀ ni ge na Nyɛʔɛlɛ leyoo Esayi wi sɛbɛ nyu we. 29Nyɛʔɛlɛ li Nyìli à li Filipe po we: «Ma flo wa ki syongida kɔ̀rɔ̀ ga tanla ge ma plɛ̀nʔɛ́ ni.» 30Filipe wɔ̀ɔ fɛ mà flo waʔa tanla mà yáa nuru ki naŋa ma we. Wi dá bo wí na Nyɛʔɛlɛ leyoo Esayi sɛbɛ nyu. Filipe wɔ̀ɔ wí po: «Ga má na nyu ge, má na ki kɔ̀rɔ́ cɛnni we yo?» 31Lagwɔ wɔ̀ɔ yo: «Mí biʔi po mɛlɛ buu cɛ́n ge, nà ki ìn bo, hɛn wà moo tyɛʔɛ ná na ge?» Wɔ̀ɔ Filipe fɛn we mà yo wi luʔu wa wi klɛn be wi tanla. 32Kayoʔo ga wi dá bo na nyu wa sɛbɛ ni we, kí ga. Àʔa yo:
Pe da gɛrí wí ni nɛ pa
mbyɔ nyɛ we kpohaʔa na.
Wɔ̀ɔ ní mà po nɛ pa
mbaple li în byeri
li yujoro konlofɔlɔ
wi kyɛrɛ̀ ni de pomo ma na ge.
Wi nò wi ìn ki nyɛʔɛ. # 8:32-33 ma wèle wa Esa 53:7-8 ni wè.
33 Nyiŋi ga na pe dá bo noo faʔara,
à pe jafa kiti kon wí na.
Han bi gà gban bí wi kluʔu
hɛɛn pe kayoʔo yo ge,
mɛjɛn wi nyuwyeʔe ki kón
naʔa tra na de.
34Lagwɔ wɔ̀ɔ Filipe po we: «Mí na ma nyɛri, Nyɛʔɛlɛ leyoo wí na han pin wa ki woʔo ga ni ge? Wí na wì pin dee di, wí na hɛn wà pin wì yɛ?» 35Ki tɔ na ge, Filipe wɔ̀ɔ ki hli be ki nyoŋomo kayoʔo na ge mà ná da mà kayotanʔa yo ge wi kân Jesu wi namyɛlɛ na le. 36Pa pe gáa sye kloʔò ni ge, à pe yâ no nyumu mà na. Lagwɔ wɔ̀ɔ yo: «Wele, nyumu ma. Nyaʔa bi gân pò ga ná batise ge?» 37[Filipe wɔ̀ɔ yo: «Nàʔa po má ma yere Jesu na we ma dihon wì bɛfu ní, pa ma gban bì batise.» Lagwɔ wɔ̀ɔ yo: «Mí ma yereʔe na mà yo Jesu Krisi wí nyɛ Nyɛʔɛlɛ Pyɔ.»] 38Lagwɔ wɔ̀ɔ yo syongida kɔ̀rɔ̀ ki yèré. Ki kruʔu ma, Filipe nì lagwɔ ní we pè syɛnmu à pe trigi mà yâ je wa nyumu ni me. Filipe wɔ̀ɔ wí batise wa. 39Pe gâ nyini wa nyumu ni me, wò fɔlɔ wi Nyìli à li Filipe kpe we be lagwɔ tanla we. Wi ìn Filipe nya we adi. Lagwɔ wɔ̀ɔ na sye lafiʔimi nì wi kloʔò ni ge. 40Di Filipe wɔ̀ɔ wì nya Asɔte kàʔà ni. Wɔ̀ɔ jɛ wa mà yáa kayotanʔa nyu ge kyɛ̀rɛ̀ tì bɛfu ni da wi dá bo na toro ge fɔ mà yâ no wa Sesare kàʔà na ge.
موجودہ انتخاب:
PITUNBEE 8: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire