Luuka 15
15
Yoolikanyiha ya ekhondoolo yoothweelela
1Anamaliviha a musoko ni anamattheka ootheene yeera ethukumanaka weera emwiiwe. 2Mene aFarisi* ni anamawera a nlamulo* yaattaandawula yeeraka: “Mulopwana Ola ongwaakhela anamattheka ni onca ni yaawo.” 3Vano Yeesu aahaathalihera yoolikanyiha ela: 4“Taani a nyuwo akhalanaka ikhondoolo ncira ni emuriheyaka ekhondoolo emoha, khanghiya toko ikhondoolo sikina arowaka waasaasa ekhondoolo eriheiye mpaka ophwanya? 5Aaphwanyaka, onoothatela ni ohakalala 6ni onoorowa owaani. Woophiyani, onimwaathukumanyiha asinthamwenaawe ni asikhwaawe ni onooweerela: ‘Muhakalale ni miyo, niwoko koophwanya ekhondoolowaaka yaariheiye.’ 7Miyo kinooleelani weera mooteene yoowo onuukhale ohakalalaxa wiirimu niwoko na namattheka mmoha onrukunxa murima, opwaha wa atthu oororomeleya miloko mithannamixexe ni athannaaxexe ahintthuneya orukunxa murima.
Yoolikanyiha ya nikhoobiri nooriheya
8Hiihotho ni muthiyana akhalanaka indarama* muloko ni emuriheyaka emoha, owo onoopattiha onyaari, onookwesa empa ni onimwaasaasa nnene mpaka aphwanye. 9Aaphwanyaka, onimwaathukumanyiha asinthamwenaawe ni asikhwaawe ni onooweerela: ‘Muhakalale ni miyo, niwoko koophwanya endaramaaka* yaariheiye.’ 10Miyo kinooleelani weera mooteene yoowo wookhala ohakalala vamaithoni wa andyelo a Muluku niwoko na namattheka mmoha onrukunxa murima.”
Yoolikanyiha ya mwaana ooriheya
11Yeesu aapwaherera: “Mulopwana mmoha aakhalano anamwane eeli. 12Mukhaani aaweerela atithawe: ‘Tiithi, mukivahe yoohiyeriwa* eri yawaka.’ Hiiho awo yaakawanya sooreela wa yaale ooweeli. 13Vahoolo vakhaani, mwaana mukhaani aathukumanyiha sootheene aarinaawe, anarowa mweelaponi ya ottai. Weiwo aananariha sooreelasawe, ahipwatthaka mweettelowaawe. 14Amalihaka onanariha sootheene, yaakhala etala etokotoko mweelaponi yeele yootheene, ni owo aapacera ohaawela itthu. 15Tivawo aarongwaawe ovara muteko wa mutthu mmoha a elapo ele, aamulamulenle olipelela ikhumba mmattamwawe. 16Owo aahaawela ovoniha erukuluwaawe ni mivithe saaciwa ni ikhumba, mene khaawo aamvaha naari etthu. 17Uupuwelaka meekhaawe, aahiixeerela: ‘Atithaka aakhalano anamiteko ancipale arinaaya sooca soowaatta, ni miyo nno kihanle vakhaani okhwa ni etala. 18Miyo kinoovenya ni kinoohokoleela wa atithaka ni kinkela oweerela: ‘Tiithi, kootthekela wiirimu ni kohootthekelani nyuwo. 19Nkiphwanenle wiitthaniwa mwaninyu – mukireherereke ntoko namutekwaanyu.’ 20Vahoolowaya, aavenya ni aarowa wa atithawe. Areene nlelo ottai, atiithi yaamoona ni yaasareya ni ikharari, enamutthimakela mwanaya, enamukhubaara, enamubeeca. 21Mwaana aaweerela: ‘Tiithi, kootthekela wiirimu ni kohootthekelani nyuwo. Nkiphwanenle wiitthaniwa mwaninyu.’ 22Atiithitho yaaweerela arumeiyaaya: ‘Mwaakuveke! Ngwiihe ekuwo yooreeraxa ni mungwarihe. Mungwarihe mukathanimwawe munela ni inaawosawe isapato. 23Ngwiihe emombe exaana yooneneva ni mwiive. Nrowe nipake efesta ni nitthape. 24Vano, mwanaka ola aahookhwa ni oovenyerera; aariheya, vano oophwanyeya.’ Hiiho yaapacera ni efesta. 25Yeereiyaka yeeyo, mwaana mutokweene aari omatta. Aattamelaka vaate, aahiiwa icipo ni wiiniwa. 26Vano aamwiitthana murumeiyi mmoha ni aamukoha eheeni yeereiya. 27Owo aamwaakhula: ‘Munninyu oohokolowa, ni atithinyu ahiiva emombe exaana yooneneva, niwoko awo aamwaakhela munninyu areene ni okumi.’ 28Mwaana mutokweene aanyoonyiwa ni khaatthuna ovolowa. Vano atithawe yaavenya ni yaamunyeserera. 29Vaheera owo aawaakhula atithawe: ‘Khuu! Iyaakha sootheene seiya kinnavara muteko ntoko kireene epotthaanyu, ni nkinatoko ohiiwelela malamulowaanyu. Vano nyuwo khamunatoko okivaha hata epuri emoha weera kipake efesta ni asinthamwenaaka. 30Vano, aholokoleelaka vaate mwaninyu owo aananaringhe sooreelasanyu ni mapuuta, nyuwo moomwiivela yoowo emombe exaana yooneneva!’ 31Atiithi yaamweerela: ‘Mwanaka, weyo ori ni miyo mahuku ootheene. Sootheene kirinaaka ti sawawo. 32Ontthuneyatho weera hiyo nimutthapeleke ni nimuhakalaleleke, niwoko munneiyo ole aahookhwa ni oovenyerera; aariheya ni vano oophwanyeya.’”
موجودہ انتخاب:
Luuka 15: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.
