Luuka 14
14
Yeesu vaate wa muFarisi* mmoha
1eSaabadu emoha, woovolowani mpaani mwa muFarisi* oottittimiheya weera ace, ootheene yannangwehexexa. 2Ohoolowawe aakhala mulopwana mmoha oovoreiwa epuulu. 3Yeesu aahaakoha aFarisi* ni anamawera a nlamulo*: “Onootthuniheya olamiha eSaabadu, naari hoye?” 4Mene awosa yaamaala. Hiiho Yeesu aamukuxa mulopwana, anamulamiha, anamweerela oroweke. 5Vano Yeesu aahaakoha: “Mmoha a nyuwo akhalano mwaana, hoye hoye emombe, ni eyo yamorela muhimeni nihuku na eSaabadu, owo khanrowa oruula woowaakuveya?” 6Ni awo khayaawenre waakhula etthu. 7Oonaka moota heeni yaalattuliwe yaathanlaaya ihice soopacera vameesa, Yeesu aahaathalihera yoolikanyiha ela: 8“Mukina oolattulani ofestani ya othelana, muhikilaathi nipuro noottittimiheyaxa, niwoko apaale oolattuliwa mukina oottittimiheyaxa woopwahani nyuwo. 9Wakhala hiiho, yoowo oolattunleni nyuwo eeli, anaawe ni aweereleni: ‘Mwaavirihe awo.’ Vano, muyevihiweene, onootthuneya weera nyuwo mukilaathi nipuro nanaaveeli. 10Nyuwotho mwalattuliwa, mukilaathi vanipuroni nanaaveeli weera awa yoole oolattunleni, owo anaaweereleni: ‘Nthamwene, mukilaathiki vanipuroni noottittimiheyaxa.’ Vano nyuwo munoottittimiheya vamaithoni wa atthu ootheene oolattuliwa. 11Ootheene aniivuwiha, eniikhale ooyevihiwa, ni ootheene aniiyeviha, eniikhale oovuwihiwa.” 12Vano Yeesu aamweerela yoowo aamulattunle: “Nyuwo mwaarehereraka efesta, hoye hoye yooca ya oxekuwa, muhaalattule asinthamwenaanyu, axunninyu, hoye hoye asinaangolo, hata asikhwiinyu anamapuha. Mwaalattula, awotho emaaraaya anoowera woolattulani, ni hiiho mmwitthuveliwe. 13Mwaarehereraka yooca ya efesta, mwaalattule oohaawa, oorakala, ootuthunya ni oohoona. 14Nyuwo mmwikhale ooreelihiwa, niwoko awo khaanono moota woowootthuvelani. Ntthuvelonanyu nniwe moovenyererani wa oowaakhuleliwa ni Muluku.”
Yoolikanyiha ya efesta etokotoko
15Iiwaka yeeyo, mmoha a yaawo yaari vameesa vamoha ni Yeesu, aamweerela: “Ooreelihiwa yoole aneera ace yooca moomweneni wa Muluku.” 16Yeesu aamwaakhula: “Mutthu mmoha aareherera yooca ya efesta etokotoko, ni aahaalattula atthu ancipale. 17Ephiyaka ehuhu ya efesta, aamurumiha murumeiyi weera aaleele yaawo yaalattuliwe eeraka: ‘Ngweeke, niwoko sootheene soolikana.’ 18Vano awo yaapacera mmoha-mmoha odyoonttelela weera khaningwa. Oopacera aaheera: ‘Koothuma vaanaano va ematta, ni kintthuna kirowe weera koone. Dyoontte, akilevelele.’ 19Mukina aaheera: ‘Koothuma imombe muloko, ni kinoorowa weerera. Dyoontte, akilevelele.’ 20Mukinatho aaheera: ‘Kithenle vaanaano va, tivawo nkingwera orowawo.’ 21Murumeiyi aahokolowa ni aahaaleela apwiyaawe. Vano mwaneene a empa aanyoonyiwa ni aamulamulela murumeiyaawe eeraka: ‘Orowe woowaakuveya mmiseweni ni mmiseweni sikhaaneene, ni waaruuhe wenno oohaawa, oorakala, oohoona ni ootuthunya.’ 22Murumeiyi aaheera: ‘Yeeyo Apwiya mulamulenlaanyu, yoopakiwa, ni noohalatho nipuro.’ 23Vano Apwiya yaamweerela murumeiyi: ‘Orowe mphironi ni mmiphitoni, ni waanyesererihe atthu ovolowa weera empaaka esareye. 24Miyo kinooleelani weera khaawo a yaawo oolattuliwa anaalawihe yooca ya efestaaka.’”
Omutthara Yeesu
25Atthu ancipale yeera emuhoolaka Yeesu. Vano, aarukunuwelaka atthu ancipale, Owo aaweerela: 26“Akhala mukina ongwa wa Miyo ni owo ahaathanya atithawe, amayawe, amwaarawe ni anamwanaawe, axunneiye ni axirokoriye, aani mpakatho okumaawe, khangwera okhala oohuseraaka. 27Ni yoole ohinkuxa muttandaawe ni ohinkitthara, khangwera okhala oohuseraaka. 28Noone ha, mmoha a nyuwo ontthuna oteka exiri yoorakama. Vano, onookilaathi toko weera uupuwele musurukhu mihayi ontthuneya. Eyo enootthuneya osuwela weera ookhalano musurukhu woowaatta woomalihera exiri ele. 29Vano, apacera mathipelo ahiweraka omaliha, ootheene eneera yoone exiri yoohimalihiwa, anoomutheiya yeeraka: 30‘Mulopwana ola aapacera oteka, mene khawenre omaliha.’ 31Hoye hoye noone ha, mwene ontthuna owana ekhotto ni mwene mukina. Vano, onookilaathi toko uupuwelaka nnene weera owo ni anakhotto macira macireene muloko anoowera ongwina mwene mukina ni anakhotto macira macireene miloko miili. 32Ahiweraka, mwene ole onrowa waalamulela atthu angwera ovaanela mwene mukina areene nlelo ottai, weera emvekele wiiwanana wa murettele. 33Mooteene yoowo, akhalaru a nyuwo ohinghiya sootheene orinaawe, khangwera okhala oohuseraaka. 34Maakha ti ooreera. Yoosivatho yamala, mmweeleeletho moota heeni? 35Khantthuneya wa etthaya, naari wa etthaadyira. Anooriheliwa vaate. Yoole orino maaru oowiiwa, iiweke!
موجودہ انتخاب:
Luuka 14: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.
