Luuka 16
16
Nakoso a miruku sa mweelaponi
1Yeesu aaweerela oohuseraawe: “Aakhala mulopwana oopuha. Mutthu aawehaweha sooreelasawe namapuha, aahootheriwa weera aananariha sooreelasawe. 2Vano namapuha aamwiitthana ni aamukoha: ‘Yeeyo kiniiwaaka mwaha wa weyo ekhaikhai? Okithalihere mukhalelo wa owehawehawawo, niwoko khoongwera opwaherera okhala namawehaweha.’ 3Namawehaweha aahiixeerela: ‘Apwiyaaka anookiraxela. Keereke hai? Weera kithipe – nkingwera ni miyo okuuliha muru ovekela soovahiwa. 4Koosuwela kineeraaka kipake weera kaakhumaka muteko va, atthu ekaakhele mmawannyaya.’ 5Vano aawiitthana anamakopa ootheene a apwiyaawe. Aamukoha oopacera: ‘Weyo waakopenle hai apwiyaaka?’ 6Owo amwaakhula: ‘Miphimo ncira sa makhura.’ Namawehaweha aamweerela: ‘Okuxe epaphelo ya yookopelaawo, okilaathi waakuveke ni olepe miloko mithanu.’ 7Vahoolowaya aamukoha anaaveeli: ‘Ni weyo, okompe hai?’ Owo aamwaakhula: ‘Ilata ncira sa etrigu.’ Owo aamweerela: ‘Okuxe epaphelo ya yookopelaawo ni olepe miloko mithannamiraru.’ 8Apwiya yaamuulumela nnene mwaha wa namawehaweha oolokottha niwoko na mirukusawe sa mweelaponi. Vano, anamwane a elapo ya vathi ammweetta nakoso mukina ni mukhwaawe ekhalanaka miruku sooratta waapwaha anamwane a waara. 9Tivawo Miyo kinooleelani: muvarele mihakhu sa elapo ya vathi weera mukhalane asinthamwene, moota wooweera saamalaka mihakhu iyo, mwaakhuleliwe muheemani soohimala. 10Yoole ori oororomeleya ni vakhaani ori oororomeleyatho ni vancipale. Yoole ori oolokottha ni vakhaani, ori oolokotthatho ni vancipale. 11Nyuwo mwaahikhala oororomeleya ni mihakhu sa elapo ya vathi, eniyoororomeleni taani ni mihakhu sa ekhaikhai? 12Nyuwo mwaahikhala oororomeleya ni itthu sa akina, eniyoovaheeni taani itthu siri sawinyu? 13Khawowo murumeiyi naari mmoha ongwera waarumeela asipwiiya eeli, niwoko mmoha onoomuthanya ni mukina onoomusivela, naari oopacera onoomurumeela ni nthiti, mene anaaveeli onoomuramusa. Nyuwo khamungwera omurumeela Muluku nitho musurukhu.” 14aFarisi*, yaasiveliwa ni musurukhu, yaahiiwa sootheene iye ni yaamutheiya Yeesu. 15Owo aaweerela: “Nyuwo ti yaale aniitaphula asineenaaya vamaithoni wa atthu, mene Muluku oosuwela mirimasanyu. Yeeyo eri yoottittimiheyaxa wa atthu, ti yoothanyeya vamaithoni wa Muluku.
Mahusiho makina
16Malamulo ni maprofeeti aakhala mpaka Yohaane. Evenyero vaavaale mpaka ohoolo, masu ooreeraxa a omwene wa Muluku anoolaleiwa, ni ootheene animweerera wiilipiha ovolowa moomweneni owo. 17Wiirimu ni vathi onoolakaseya ehinaaye omora yoolempwa ekhaani ya malamulo. 18Yoowo ommwalana ni mwaariye ni onimuthela muthiyana mukina, onooraruwa, ni mulopwana onimuthela muthiyana oohiiwa ni aiyawe, onooraruwatho.
Namapuha ni Lazaru
19Aakhala mulopwana oopuha aawara soowara sooxeera ni ikuwo soorikaxa, ni aakhala ni mihakhu mahuku ootheene. 20Aakhalatho namahaawa iitthaniwa Lazaru, oosareya ni ithuku, aakhovelela okilaathi vaate vamulako wa namapuha. 21Owo annahaawela oca seiye saamora vameesa ya namapuha. Mpaka alapwa yannawa omulata ithukusawe. 22Naaphiya nihuku na okhwawawe namahaawa, ni andyelo yaamukuxa mpaka vakakasani wa Abrahaamu. Namapuha aahookhwatho ni aavithiwa. 23oHadesi* weiwo aattaruxiwaawe, owo aaweha osulu ni aamoona Abrahaamu ottaiwene, ni Lazaru mukhwipimwawe. 24Vano aawiitthana: ‘Tiithi Abrahaamu, mukimoreleke ikharari miyo, ni munrume Lazaru anaanihe okhwipi wa ekathaawe mmaahini weera ariirihe nluminaka, niwoko kinnahaawaxa mmooroni ola.’ 25Abrahaamutho aamwaakhula: ‘Mwaana, muupuwelele weera mookuminimwanyu, nyuwo mwaahaakhela itthu sooreera, Lazarutho itthu soonanara. Wa soothesene, owo ori vaanaano oopepesiwa, ni nyuwo muri moohaawani. 26Ohiya toko yeeyo, eriyari wa nyuwo ni hiyo wookhala wiixeraxa, moota wooweera yaale antthuna ovira erwaka wa hiyo mpaka nyuwo, hoye hoye wa nyuwo mpaka va, khaangwera.’ 27Owo aamwaakhula: ‘Vano, miyo kinoodyoottelelani, tiithi: munrume Lazaru arowe vaate wa atithaka, 28niwoko kookhalanowo axunna athanu. Munrume weera owo awooperere axunnaka, weera awo ehiwetho vanipuroni nna na ohaawaxa.’ 29Abrahaamu aamwaakhula: ‘Awo aakhalano Moisesi ni maprofeeti – ewiiweleleke.’ 30Owo aaheera: ‘Hoye, tiithi Abrahaamu, mmoha a akhwiiye arowa wa yaawo, awo yaamurukunxa murima.’ 31Abrahaamu aamwaakhula: ‘Awo yaahimwiiwelela Moisesi ni maprofeeti, khaanrowatho omwiiwelela hata mmoha awaaka mookhwaani.’”
موجودہ انتخاب:
Luuka 16: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.
