TAUNET 41
41
Koweechi Josep karuotitaosiekab Parao, kot katiach ak kieet
1Ak ye kingogesgei kenyisiek aeng’u, koruotyi Parao, ogeer, kitonone inendet ye negite ainet. 2Ak ogeero, kitogosune tuga tisabu ainet, che kororon ak ko neriotin mising’; ak kiagete morong’iot. 3Ak ogeero, kitogosune ainet tuga tisabu kosubu chugai, che ma kororon ak ko sogitiotin; ak kitononso eng’ ye mi tuga chun alage eng’ ngegut. 4Ak kiam tuga che yaachen che sogitiotin tuga chun tisab che miachen che neriotin. Kosiir anyun Parao eng’ yoto. 5Kiinuuch kogeny ak kiiruotyi ne bo aeng’: ogeero, kimong’une mopchot agenge ne bo baiywat itik tisabu che ruriotin ak ko kororon. 6Ye kingobata choto komong’ itik tisabu che bo baiywat, che meiyotin, che kiimel usonet ne bunu kong’asis. 7Ak kilugui itichoto bo bechato meiyotin chun tisab ruriotin ak ko neriotin. Ak kisiir Parao ak kigeer kole kaga karuotitoet. 8Ak kingoeech karon, koiimgei eng’ muguleldanyi; ak kiiyokto keguur sirik tugul che ng’omen che bo Misri, che ng’orsei, ak bik tugul che ng’omen che kimitei: ak kitetyi Parao ichek karuotitoennyi; ago kima biit chi ne kiimuch koguiyechi Parao karuotitaosiekyik.
9Ak kimwachi anyun ne o eng’ ribikab tuguk che kieei, Parao, kolenji, Kabwat rani lelutikyuk: 10yu kiga nerekyi Parao otwogikyik, kogera, ane ak ne o eng’ che ribei kwang’set, kogerjech gotab kiptaiyatab ribik: 11ak kigiruotyi karuotitoet achek tuwai eng’ kemout agenge; ak kigiruotyi chi tugul ko u weeksetab karuotitoennyi. 12Ak kimi kobotech neranet age, Hebranindet, otwogindetab kiptaiyatab ribik; ak kigimwachi, ak kiiboruech karuotitaosiekyok; kiiweech ko u karuotitoetab chi age tugul. 13Ak kiyaak ko u noto kiiborwech; kiiweekya boisiennyu, ak kigisonginin nin age.
14Kiiyokto anyun Parao eng’ yoto keguur Josep, ak kigimoong’ inendet eng’ keringet, kechogune: ak kiinen tamnet, ak kowal ngoroikyik, ak kwo ole mi Parao. 15Ak kilenji Parao Josep, Koaruotyi karuotitoet, ma biit chi ne koimuch koweech: ak koagas agobo inye kele, ngigas karuotitoet imuchi iweech. 16Ak kiwolji Josep Parao kolenji, Mabota ane: igochin Kamuktaindet Parao wolunet ne bo kalyet. 17King’alalji anyun Parao Josep, kolenji, Keero, koatononi eng’ ngegutab ainet eng’ karuotitoennyu: 18ak keero, kotogosune ainet tuga tisabu, che neriotin mising’, ak ko kororon; ak koagete morong’iot: 19ak keero, kotogos tuga alage tisabu kosubu chugai, che nyalulyotin ak ko yaachen ak ko sogitiotin, che kitom ageere eng’ emetab Misri komugul che yaachen che u choto: 20ak kiam tuchato sogitiotin ak ko yaachen tuga chun ka bo tai tisab neriotin: 21ak ye kingo kagoam, koma kotook kele kagoam; amu kota ko yaachen ko u eng’ tai. Asiiru anyun. 22Ak koageer eng’ karuotitoennyu, keero, komong’une itik tisabu mopchot agenge, che ruriotin ak ko miachen: 23keero, kimong’ itik tisabu che resiotin ak ko meiyotin, che kiimel usonet ne bunu kong’asis che koisubu choto: 24ak kolugui itichoto meiyotin itik chun tisab miachen: ak kiamwachi bichoto ng’orsei; ak ma biit ne koimuch koborua.
25Ak kilenji Josep Parao, Agenge karuotitoetab Parao: kagoborji Kamuktaindet Parao kit ne machei si koyai ko negit. 26Tuchato tisab che miachen ko kenyisiek tisab; ak itichoto tisab miachen ko kenyisiek tisab: agenge karuotitaonito. 27Ak tuchato tisab sogitiotin ak ko yaachen che koisubu chun ko kenyisiek tisab, ak kogeny itichoto tisab che ma ruriotin che kiimel usonet ne bunu kong’asis; koegu kenyisiek tisab che bo rubet. 28Noto ko kit ne kaamwachi Parao: kagoborji Kamuktaindet Parao kit ne machei si koyai ko negit. 29Keero, bwanei kenyisiek tisabu che bo ruratet ne o eng’ emet komugul ne bo Misri: 30ak ye ibata choto koit kenyisiek tisabu che bo rubet; ak keutie ruratet eng’ emetab Misri; ak tun iwong’u emet tugul rubet; 31ak ma ko naoksei ruratonoto eng’ emet amu rubonato isubu, amu egu rubet ne ng’wan mising’. 32Kogiborji anyun Parao karuotitaonito konyil aeng’ amu kigochobok noto eng’ Kamuktaindet, ak chogune Kamuktaindet kiito kosulda.
33Ara ingocheng’ Parao chitab ruchinet ak ko ng’om, si konde koboi emetab Misri. 34Ingoyai Parao nito, ak ingonde ribik korib emet, si kobas kebeberta agenge eng’ mut eng’ emetab Misri eng’ kenyisiechoto tisab bo ruratet. 35Ak ingoyum amitwogik tugul che bo kenyisiechoto tisab miachen, che magoit, ak kogonor bek eng’ bounatetab Parao koek amitwogikab nganasok, ak ingorib. 36Ak koek amitwogichoto basanik che kibasyin emet eng’ kenyisiechoto tisab bo rubet, che tun biitu eng’ emetab Misri; si mame emet eng’ rubet.
37Ak kimieit ng’olyondonoto eng’ Parao ak eng’ otwogikyik tugul. 38Ak kilenji Parao otwogikyik, Kimuktoi ano kenyoru chito ne u chichi ne tinyei Tamirmirietab Kamuktaindet? 39Ak kilenji Parao Josep, Amu kagoborun Kamuktaindet choto tugul, mami anyun age ne tinyei ruchinet ak ng’omnatet ko u inye; 40inye ne kebou gonnyu ak ko u ng’olyondeng’ung’ ko kebou bikyuk tugul; kobate eng’ ng’echeretab laitornatet, ko ane ne o eng’ inye eng’ noto. 41Kilenji anyun Parao Josep, Keero, kandein ibou emet komugul ne bo Misri. 42Ak kiinemune Parao eunnyin peteinnyi ne bo ng’okset, ak konde eutab Josep, ak kolelesonji inendet eng’ ngoroik che kororon che bo katanit, ak konde sirimdo ne bo tahabu katatinnyi. 43Ak kiigochi Parao Josep kolany karinnyi ne bo aeng’ ne kitinyei, ak kiboldos bik eng’ tainnyi kolen, Ogutuny; ak kiinde inendet koboi emet komugul ne bo Misri. 44Ak kilenji Parao Josep, A Parao, ak maimuchi chi koiito eunnyi anan keldanyi eng’ emet komugul ne bo Misri ama ichamji. 45Ak kiguure Parao Josep Sapenatpanea; ak kiigochi kotun Asenat cheptab Potipera tisiindet ne bo On. Ak kiwendot Josep kobunot emetab Misri.
46Ak ki bo Josep kenyisiek sosom ye kitononi eng’ taitab Parao, laitoriatab Misri. Ak kiwa Josep eng’ ole mi Parao, ak kibunot emet komugul ne bo Misri. 47Ak kirurio bek mising’ eng’ emet eng’ kenyisiechoto tisab bo biyendo. 48Ak kiiyum amitwogik tugul che bo kenyisiechoto tisab che kimi emetab Misri, ak kigonore amitwogichoto nganasok; kigonor anyun amitwogikab mbarenik che kigayiem nganaset age tugul, kogonore nganasochato. 49Kiiyum Josep bek che chang’ mising’, che te ng’aniekab nyanjet, kot kometo koitet; amu kima kota koiitoksei.
50Ak kigisikyi Josep werik aeng’ kotom koit kenyitab rubet, che kisikyi Asenat, cheptab Potipera, tisiindetab On. 51Ak kiguure Josep kainetab ne o Manase: kole, Amu kagona Kamuktaindet autie bichiindo tugul ne bo boisionikyuk, ak got tugul ne bo baba. 52Ak kiguure ne bo aeng’ Epraim: kole, Amu kagona Kamuktaindet iyotet eng’ emet ne kianyorune nyalilda. 53Ak kiigesgei anyun kenyisiechoto tisabu bo ruratet eng’ emetab Misri. 54Ak kitoi anyun kobwa kenyisiek tisabu che bo rubet ko u ye kiga mwa Josep: ak kibiit anyun rubet eng’ emotinwek tugul; ago kimi amitwogik emet komugul ne bo Misri. 55Ak ye kingoam rubet emetab Misri komugul korirji bik Parao kosom amitwogik; ak kilenji Parao bik tugul che bo Misri, Oba oldab Josep; ak oyai kit age tugul ne kamwawok. 56Ak kiyom rubonato ng’ony komugul: koyat anyun Josep chogenik tugul, ak koaldochi Misrik; ak kieet rubonato mising’ eng’ emetab Misri. 57Kibwa anyun emotinwek tugul oldab Josep eng’ Misri kobwa koal bek; amu kieet rubonato eng’ ng’ony komugul.
موجودہ انتخاب:
TAUNET 41: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020