TAUNET 42
42
Kobendi Misri werik tamanu che bo Jakobo koalei bek
1Kigas anyun Jakobo kole mitei bek Misri, ak kolenji Jakobo werikyik, Amu nee si ogeeregei kityo? 2Ak kilenji, Ogeero, koagas kele mitei bek Misri: ochortege olindo oalwech bek eng’ olindo: si kobiit kesopche, si ma kibegu. 3Kichortagei anyun werik tamanu che tupche ak Josep koba Misri, koal bek. 4Ago kima iyokto Jakobo Benjamin ng’etab kametab Josep, koboto tupchosiekyik; amu kile, Si manyor kiy ne ya. 5Ak kibwa anyun werikab Israel koboto che kibwanei koalisiei: amu kimitei rubet emetab Kanan. 6Ak ki bounindet Josep ne bo emet: inendet ne kialdochin bek bik tugul che bo emet: ak kibwa anyun tupchosiekab Josep, ak kong’uruk eng’ tainnyi kotokyi metowekwak ng’ony. 7Ak kigeer Josep tupchoisiekyik ak konyit, ak kiyaigei koigei chi ne maingen icheget, ak kong’alalji icheget eng’ koromnatet; ak kiteebe kolenji, Obunu ano? Ak kiwolji kolenji, Kibunu emetab Kanan, kibwane keale amitwogik. 8Ak kinai Josep tupchosiekyik, ago kima nai ichek inendet. 9Ak kiibwat Josep karuotitaosiek che kiga koruotyi agobo ichek, ak kilenji, O segeik; kobwa ogeer nyerotietab emet. 10Ak kilenji, Achicha, kiptaiyandennyu, ago kagibwane otwogiguk keale amitwogik. 11Ki werikab chito agenge achek tugul; ki bik che bo iman, ma ki segeik achek otwogiguk. 12Ak kilenji ichek, Achicha, ago kobwa ogeer nyerotietab emet. 13Ak kilenji, Kitupche achek otwogiguk, ko ki taman ak aeng’, ki werikab chito agenge ne bo Kanan; keero, mitei ne ming’in agot eng’ betuni koboto kwandanyo, ak kigobetito age. 14Ak kilenji Josep ichek, Noto anyun ne kamwawok alenjok, O segeik. 15Kimuchi ketiemenak ng’olyondoni: ko u ye sobei Parao, ko momuchi obe eng’ oli, ngo manyo yu ng’etab komet ne ming’in. 16Oyokte age eng’ okwek, komut ng’etab komet, ak keratak kot kenai ng’alekwok ngo mi imanit eng’ okwek: ak ngo ma u noto, ko ko u ye sobei Parao, ko kaga o segeik. 17Ak kiger tugul kib agenge betusiek somok.
18Ak eng’ betutab somok kolenji Josep ichek, Oyai ko u ni, si osopche; amu aiywei Kamuktaindet: 19ngo o bikab iman, kerati agenge eng’ okwek, eng’ got ne kogigerjok; si obe okwek, oib amitwogik amu rubet ne mi gorikwok. 20Ak omutwa ng’etab komet ne ming’in; si kotook ng’alekwok ngo bo iman, si mobegu. Ak kiyai ko u noto. 21Ak king’alaljigei ichegei kole, Kagonamech kiruoget iman agobo tupchennyo, amu kigigeer nyalildab muguleldanyi, ye kiigaigaech, ak kima kicham kegasyi; kanyonjech anyun nyalili amu noto. 22Ak kiwolji Reuben, kolenji, Kima amwawok, alenjok, Amoyachi kiy ne ya lakwet; ak kima ocham ogas? Ogeer anyun-o, kiyaachei korotikyik. 23Ak kima nai kole kasei Josep ng’alekwak; amu kimi weegindet ne kiiweechi ng’alekyik. 24Ak kiweeigei kotuktochi batai, ak korir; ak kiweleljigei icheget kogeny kong’alalji, ak kiinem Simeon eng’ kwenunywa, korat inendet eng’ tainywa. 25King’at Josep anyun kinyiit lolotinwekwak bek, ak keweekyi chi tugul fedaisiekyik kinde kinnyi, ak kogochi amitwogik che bo oret: ak kigiyachi ko u noto.
26Ak kiratyi bechato chuaget sigirokwak, ak koba. 27Ak kingotiach age lolennyi eng’ gotab toek, kole kogochi sigiriennyi amitwogik che konorotin, kogeer fedaisiekyik ko mi kutitab lolet. 28Ak kilenji werik che tupcho, Kageweech fedaisiekyuk; ogeero, mitei iman lolennyu, ak kiarogenso, kogeeregei kobotandos, kolen, Nee ni kayaiywech Kamuktaindet? 29Kiit anyun ichek oldab Jakobo kwandanywa eng’ emetab Kanan, ak kitetyi inendet tuguk tugul che kibiityi eng’ oret, kolenji, 30King’alalwech chito, ne kiptaiyatab emet, eng’ koromnatet, amu kilen ki segeik che kisegei emet. 31Ak kigilenji, Ki bik che bo iman; ma ki segeik. 32Kitupche achek ko ki taman ak aeng’, ki werikab kwandanyo; mami age, ak mi ne ming’in koboto kwandanyo eng’ emetab Kanan. 33Ak kilenjech chichoto, kiptaiyat ne bo emonoto, Anaenok ni, ngo o bik che bo iman; obagakwa ng’etab komet age, ak obe oipchi bek bikwok che mitei ga: 34ak omutwa werit ne otupche ne ming’in: si anai anyun ale, ma o segeik, ago kaga o bik che bo iman: ak agonok werit ne otupche kogeny, ak oyai mung’aret eng’ emet.
35Ak kingoabuch lolotinwekwak, ogeero, kimi fedaisiek che bo chi tugul lolennyi ko ratotin: ak ye kingogeer ichek koboto kwandanywa fedaisiekwak che ratotin, koarogenso. 36Ak kilenji Jakobo kwandanywa, Kiobetena lagokyuk, mami Josep, ak mami Simeon, ak omache omutena Benjamin agine: kabwanja tuguchu tugul. 37Ak kilenji Reuben kwandanyi, Tun ibar werikyuk aeng’ ngo mamutun inendet kogeny: kona kotebe eunekyuk, ak amutun inendet kogeny. 38Ak kile, Mochortoige koboto werinnyu; amu kigome ng’etab kamet, ak inegei kityo ne ng’etunot: ak ngot konyor kiy ne ya eng’ oret ne obendi, ogona arirat agoi tun amei.
موجودہ انتخاب:
TAUNET 42: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020