Yoa 10

Mũĩthi Mũseo

1Yesũ nĩwameie atĩĩ, “Nĩmũtavya ũla w'o, mũndũ ũla ũtalikĩlaa mũomonĩ wa vala malondu mekalaa, ĩndĩ ũlikĩlaa vandũ vangĩ, ũsu nĩ kĩng'ei na mũvutani. 2Ĩndĩ ũla ũlikĩlaa mũomonĩ nĩwe mũĩthi wa malondu. 3Mũsikalĩ wa mũomonĩ nũmũvingũĩaa na malondu nĩmew'aa wasya wake. Nũmetaa ala make kwa masyĩtwa na kũmaumaalya. 4Amina kumaalya malondu ala make onthe, nũmatongoeasya namo maimũatĩĩa, nũndũ nĩmesĩ wasya wake. 5Mayĩtĩkĩla kũatĩĩa mũeni; vandũ va ũu, mekaa kũsemba makamũtia, nũndũ mayĩsĩ wasya wa aeni.”

6Yesũ atũmĩie ngelekany'o ĩsu, ĩndĩ mayaaelewa nĩ kĩla waneenaa ĩũlũ wakyo.

Yesũ nĩwe Mũĩthi Mũseo

7Kwoou Yesũ nĩwamatavisye ĩngĩ amea atĩĩ, “Nĩmũtavya w'o, nyie ninyie mũomo wa malondu. 8Ala angĩ onthe mookie mbee wakwa nĩ ing'ei na avutani, ĩndĩ namo malondu mayaamethukĩĩsya. 9Nyie ninyie mũomo. Mũndũ o na wĩva ũla wĩlikĩla vala nĩĩ akasũvĩĩka; akalikaa na kumaala na kwona kyaũya. 10Kĩng'ei kyũkaa nĩ kana kyũye, na kĩyũaa o vamwe na kwananga; nyie nookie nĩ kana mũtonye kwĩthĩwa na thayũ, na mũyĩthĩwa naw'o kwa wusũu.

11“Nyie ninyie mũĩthi ũla mũseo. Mũĩthi ũla mũseo nĩwĩyumasya akw'e kwondũ wa malondu. 12Mũndũ wa kũandĩkwa ũte mũĩthi na ũte mwene wa malondu, akilasya oona nzũi yũkĩte akasemba akatia malondu. Nĩvo ĩndĩ nzũi ĩsu ĩvithũkĩaa malondu asu na kũmanyaĩĩkya. 13Mũndũ ũsu asembaa akakĩa nũndũ nĩ mũndũ wa kũandĩkwa, na ndasũanĩaa ũvoo wa malondu. 14Nyie ninyie mũĩthi ũla mũseo; nĩnĩsĩ malondu makwa namo nĩmambĩsĩ, 15#Mat 11.27; Lk 10.22 o ũndũ Asa ũmbĩsĩ nakwa nĩnĩmwĩsĩ. Nyie nĩnĩyumĩtye nĩkw'e kwondũ wa malondu. 16Nĩna malondu angĩ makwa mate ndĩthyanĩ ĩno. Asu o namo no nginya nĩmaete, na makeew'aa wasya wakwa. Kwoou vakeethĩwa ndĩthya ĩmwe yĩna mũĩthi ũmwe.

17“Kĩla kĩtumĩte Asa ambenda nĩ kana nĩnĩyumĩtye kũnengane thayũ wakwa nĩ kana nĩwosa ĩngĩ. 18Vai mũndũ ũkũmbena thayũ wakwa, ninyie ngũũnengane kwa ngenda yakwa. Nĩna ũtonyi wa kũnengane thayũ wakwa na o ta ũu nĩ na ũtonyi wa kũwosa ĩngĩ. Ũkũmũ ũsu naũnengiwe nĩ Ĩthe wakwa.”

19Ndeto isu nĩsyatumie vethĩwa na ũtilĩkangano ĩngĩ katĩ wa Ayuti. 20Aingĩ moo maasya, “E na maimũ, na e na ndũũka! Mwĩmwĩthukĩĩsya wakĩ?” 21Ĩndĩ angĩ namo maasya atĩĩ, “Ũneeni wa mũthemba ũũ ti wa mũndũ wĩ na maimũ! Ĩimũ nĩyĩtonya kũsalukya metho ma kĩlalinda?”

Yesũ Ailewa nĩ Ayuti

22Yelũsalemu kwaĩ mboka ya kũlilikana kũthew'a kwa Ĩkalũ. Ĩvindanĩ yĩu yaĩ ya mbua, 23na Yesũ nĩwatembeangaa Ĩkalũnĩ valandanĩ weetawa valanda wa Solomoni. 24Ayuti nĩmamũmbĩlĩĩile mamũkũlya atĩĩ, “Wĩtwĩkalya tũteũkũelewa nginya ĩndĩĩ? Ethĩwa nue Klĩsto no ũtũtavya ũteũtũvitha.”

25Yesũ amasũngĩa amea atĩĩ, “Nĩnĩnamũtavisye na mwalea kũndĩkĩĩa. Mawĩa ala ndethasya na ũkũmũ wa Ĩthe wakwa nĩmakũsĩĩa ĩũlũ wakwa. 26Ĩndĩ inyw'ĩ mũiĩkĩĩa nũndũ mũi malondu makwa. 27Malondu makwa nĩmew'aa wasya wakwa; nĩnĩmesĩ namo nĩmangatĩĩaa. 28Nĩnĩmanengae thayũ ũtathela na kwoou maikakw'a. O ta ũu vai mũndũ ũtonya kũmavulya kuma vala nĩĩ. 29Ĩthe wakwa ũla wanengie mo nĩ mũnene kwĩ kĩla kĩndũ, na vai mũndũ ũtonya kũmavulya kuma vala ũĩ. 30Nyie na Asa twĩ kĩndũ kĩmwe.”

31Ayuti nĩmoosie mavia ĩngĩ mamũkimange Yesũ. 32Yesũ nĩwameie atĩĩ, “Nĩnamwony'a maũndũ maingĩ maseo ala Asa ũndũmĩte nĩke; nĩ wĩva katĩ wa asu mũenda kũngimanga nũndũ wa w'o?”

33 # Ali 24.16 Namo mamũsũngĩa mamwĩa, “Tũikwenda ũkũkimanga nũndũ wa ũndũ mũseo wĩkĩte, ĩndĩ nũndũ wa kũmũuma Ngai! We wĩ o mũndũ na wĩenda kwĩtw'ĩkĩthya Ngai.”

34 # Sav 82.6 Yesũ amea atĩĩ, “Mĩaonĩ yenyu nĩkũandĩkĩtwe kana Ngai aisye, ‘Inyw'ĩ mwĩ ngai.’ 35Nĩtwĩsĩ kana kĩla Maandĩko Matheu mawetete nĩ kya w'o tene na tene, na Ngai nĩweetie andũ asu ngai, namo nĩ andũ ala manengiwe ũtũmani wake. 36Mũtonya ata ĩndĩ kwasya kana nyie ũla Asa ũnyuvĩte na akandũma kũũ nthĩ, nĩngũuma Ngai atĩ nũndũ nasya, ‘Nyie nĩ Mwana wa Ngai?’ 37Ethĩwa mawĩa ala ngũtethya ti ma Asa, mũikandĩkĩĩe, 38ĩndĩ ethĩwa nĩtethya mawĩa make, ĩkĩĩai mawĩa asu makwa o na ethĩwa nyie mũiũndĩkĩĩa, nĩ kana mũtonye kũmanya na kũelewa kana Asa e nthĩnĩ wakwa, nakwa nĩ nthĩnĩ wake.”

39O ĩngĩ nĩmatatie kũmũkwata Yesũ, ĩndĩ eevonokany'a athi.

40 # Yoa 1.28 Nĩvo ĩndĩ Yesũ wainganĩisye Ũsĩ wa Yolotani athi vala Yoana wavatisĩaa navu mbeenĩ. Ailyĩ kũu 41andũ aingĩ nĩmaendaa vala ũĩ na kwasya atĩĩ, “O na kau Yoana ndaaĩka kyama o na kĩmwe, maũndũ onthe ala waneenie ĩũlũ wa mũndũ ũũ nĩ ma w'o.” 42Andũ aingĩ ma kũu nĩmamũĩkĩĩie Yesũ.

موجودہ انتخاب:

Yoa 10: KAMBA

سرخی

شئیر

کاپی