Yoa 11

Kĩkw'ũ kya Lasalo

1 # Lk 10.38-39 Mũndũ ũmwe watwĩe Mbethani weetawa Lasalo aĩ mũwau. Mbethani nĩyo ndũa ĩla Meli na Matha mwĩĩtu-a-inyia matwĩe. 2#Yoa 12.3 Meli ũsu nĩwe ũla wetĩkĩsye maũũ ma Yesũ mauta me mũuke mũseo, na amanyasya na nzw'ĩĩ syake; mwana-a-inyia Lasalo nĩwe waĩ mũwau. 3Kwoou eĩtu asu masyaanĩw'e nĩmatũmanie kũla kwĩ Yesũ maĩtye atĩĩ, “Mwĩai, mũnyanyau nĩ mũwau.”

4Yĩla Yesũ weewie ũvoo ũsu nĩwaisye atĩĩ, “Mũminũkĩlyo wa ũwau ũsu ti kĩkw'ũ; wĩthĩiwe nĩ kana Ngai atonye kũkathwa, na o ta ũu kwĩsĩla ũwaunĩ ũsu, o nake Mwana wa Ngai akathwe.”

5Yesũ nĩwendete Matha, Meli na Lasalo mwana-a-inyia woo.

6Yesũ amina kũkwata ũvoo kana Lasalo nĩ mũwau, nĩwaendeeie na kwĩkala kũu waĩ vandũ va mĩthenya ĩngĩ ĩlĩ. 7Nĩvo ĩndĩ wameie amanyĩw'a make atĩĩ, “Kwa tũsyokei Yutia ĩngĩ.”

8Amanyĩw'a make mamũkũlya, “Mũmanyĩsya, oyu andũ ma kũu manendaa ũkũkimanga na mavia, nokw'o ũkwenda kũsyoka ĩngĩ?”

9Yesũ amakũlya atĩĩ, “Mũthenya nũndũ ũtethĩawa na masaa ĩkũmi na elĩ ma kyeni? Mũndũ ũla ũendaa kwĩ mũthenya, ndatulaw'a nũndũ ethĩawa ene nthĩ. 10Ĩndĩ mũndũ ũla ũendaa na ũtukũ, nũtulaw'a nũndũ kũyĩthĩawa kyeni.” 11Yesũ amina kũneena ũu asyokie amea atĩĩ, “Mũnyanyae waitũ Lasalo nũkomete, ĩndĩ nĩendete kũu ngamũamũkye.”

12Amanyĩw'a mamũsũngĩa, “Mwĩai, ethĩwa nũkomete, nũkũamũka.”

13Yesũ awetaa kana Lasalo nĩ mũkw'ũ, ĩndĩ mo amanyĩw'a moonaa ta ũkũweta o kũkoma kũla andũ makomaa. 14Kwoou Yesũ amatavya ateũvithany'a amea atĩĩ, “Lasalo nĩ mũkw'ũ, 15ĩndĩ kwondũ wenyu nĩ na ũtanu nũndũ ndinaĩ kw'o, nĩ kana mũtonye kũndĩkĩĩa. Kwoou tũthi vala ũĩ.”

16Tomasi ũla weetawa ĩvatha nĩweeie amanyĩw'a ala angĩ atĩĩ, “O naitũ nĩtũendany'e nake, nĩ kana tũkakw'e vamwe nake.”

Yesũ nĩwe Ũthayũũkyo na nĩwe Thayũ

17Yĩla Yesũ wavikie Mbethani, nĩweethĩie Lasalo athikiwe ta mĩthenya ĩna mĩthelu. 18Mbethani yaĩ ta kĩlomita ilĩ na kĩndũ kuma Yelũsalemu. 19Kwoou andũ aingĩ kuma kĩsionĩ kĩu nĩmookĩte kũkiakisya Matha na Meli nũndũ wa kĩkw'ũ kya mwana-a-inyia.

20Yĩla Matha weewie kana Yesũ nĩwũkĩte, nĩwaumaalile amũthaũa, ĩndĩ Meli atiwa ailyĩ nyũmba. 21Matha nĩweeie Yesũ atĩĩ, “Mwĩai, kethĩwa ũnaĩ kũũ mwana-a-ia ndethĩwa anakwie! 22Ĩndĩ o nayu nĩnĩsĩ kana Ngai nũkũũnenga o kĩla ũũmwĩtya.”

23Yesũ amwĩa atĩĩ, “Mwana-a-inyia waku nũkũthayũũka.”

24Matha nake amwĩa, “Ĩĩ, nĩnĩsĩ akathayũũka mũthenyanĩ wa mũminũkĩlyo.”

25Yesũ amwĩa atĩĩ, “Nyie ninyie ũthayũũkyo na ninyie thayũ. Mũndũ ũla ũndĩkĩĩaa akeethĩwa thayũ o na ethĩwa nũkũkw'a, 26na ũla wĩ thayũ na ũndĩkĩĩaa, ndakakw'a o na ĩndĩĩ. We nũkũĩkĩĩa ũu?”

27Matha amwĩa atĩĩ, “Ĩĩ Mwĩai; nĩngũĩkĩĩa kana nue Klĩsto, Mwana wa Ngai ũla wookie kũũ nthĩ.”

Yesũ Ayĩĩa

28Matha amina kũweta ũu, nĩwaendie eeta Meli mwĩĩtu-a-inyia na kĩwe amwĩa atĩĩ, “Mũmanyĩsya e vaya na nũkũkwĩta.” 29Meli eew'a ũu nĩwookĩlile mĩtũkĩ athi vala ve Yesũ. 30Yesũ ndaĩ analika mũsyĩ ũsu; aĩ o vala Matha wakomanĩie nake. 31Yĩla andũ ala maĩ na Meli nyũmba maimũkiakisya moonie ookĩla na mĩtũkĩ aumaala, nĩmamũaatĩĩie mayona ta ũendete mbũanĩ akaĩĩe vo.

32Meli nĩwavikie vala ve Yesũ, na amwona oou atulya ndu mbee wake na amwĩa atĩĩ, “Mwĩai, kethĩwa ũnaĩ kũũ mwana-a-ia ndethĩwa anakwie!”

33Yĩla Yesũ woonie Meli ayĩĩa, na andũ ala mookanĩtye nake o namo mayĩĩa, nĩwakwatiwe nĩ kĩmako kingĩ na kĩũũyũ ngoonĩ. 34Nĩwamakũlilye atĩĩ, “Mũmũthikĩte va?” Namo mamwĩa, “Mwĩai, ũka ũkavone.”

35Yesũ nĩwaĩie. 36Nĩvo ĩndĩ andũ asu maisye, “Kwa sisyai ũndũ ũnamwendete Lasalo!”

37Ĩndĩ amwe moo makũlya atĩĩ, “Mũndũ ũũ ũnasalukilye metho ma kĩla kĩlalinda, ndanaĩ atangĩĩa Lasalo ndakakw'e?”

Kũsyũkw'a kwa Lasalo

38O ĩngĩ Yesũ e na kĩmako kingĩ nĩwaendie mbũanĩ, nayo yaĩ ngunga yakunĩkĩtwe na ĩvia. 39Nĩwaisye atĩĩ, “Vetangai ĩvia yĩĩ.”

Matha, mwĩĩtu-a-inyia wa mũndũ ũsu waĩ mũkw'ũ, amwĩa Yesũ atĩĩ, “Mwĩai, yu no nginya ethĩwe ainyunga; e na mĩthenya ĩna kuma akw'a!”

40Yesũ amũsũngĩa amwĩa, “Nyie nakwĩa kana ethĩwa nũkũĩkĩĩa nũkwona ũnene wa Ngai.” 41Nĩmavetangie ĩvia yĩu. Nĩvo ĩndĩ Yesũ wasyaisye ĩũlũ ĩtunĩ na asya atĩĩ, “Asa nĩngũũtũngĩa mũvea nũndũ nĩwambĩthukĩĩsya. 42Nĩnĩsĩ kana nũmbĩthukĩĩasya kĩla ĩvinda, ĩndĩ nasya ũu nũndũ wa andũ aa maũngyĩ vaa, nĩ kana maĩkĩĩe kana nue ũndũmĩte.”

43Yesũ amina kũvoya nĩwaneenie na wasya mũnene asya atĩĩ, “Lasalo, umaala!” 44Mũndũ ũsu waĩ mũkw'ũ nĩwaumaalile alingĩlĩtwe ngũa ya mathiko moko na maũũ na ũthyũ wake ũkovwa na kĩtambaa. Yesũ nĩwameie atĩĩ, “Mũthasyei na mũyĩekana nake athi.”

Atongoi ma Ayuti Maimũsamĩa Yesũ Mamũae

(Mat 26.1-5; Mk 14.1-2; Lk 22.1-2)

45Andũ aingĩ ala mookĩte kũmũkiakisya Meli, moona ũndũ Yesũ weeka, nĩmamũĩkĩĩie. 46Ĩndĩ amwe moo mathi kũla kwĩ Avalisi, na mamatavya ũndũ ũsu Yesũ weekie. 47Kwoou Avalisi na athembi anene moombany'a nzama makũlany'a atĩĩ, “Twĩĩka ata? Mũndũ ũũ nũkwĩka syama mbingĩ mũno! 48Twamũeka aendee ũu, andũ onthe nĩmeũmũĩkĩĩa, namo atongoi ma Alomi mayũka manange Ĩkalũ yitũ vamwe na nthĩ yaitũ.”

49Ũmwe woo weetawa Kaiava, nake nĩwe waĩ Mũthembi ũla Mũnene mwakanĩ ũsu nĩwameie atĩĩ, “Inyw'ĩ mũyĩsĩ kĩndũ! 50Nũndũ mũteũmanya kana nĩ ũtethyo kwenyu mũndũ ũmwe akw'e kwondũ wa andũ, kũte nthĩ yonthe ĩyanangwa?” 51Kaiava ndaaneena ũu kwa ngenda yake, ĩndĩ ta Mũthembi ũla Mũnene mwakanĩ ũsu athanaa kana Yesũ akakw'a kwondũ wa mbaĩ ya Ayuti, 52na ti kwondũ woo oka, ĩndĩ kwondũ wa syana sya Ngai ila inyaĩĩkĩe kũndũ na kũndũ, nĩ kana asyũmbany'e vamwe.

53Kwoou kuma mũthenya ũsu, atongoi asu ma Ayuti nĩmambĩĩie kũmũsamĩa Yesũ mamũae. 54Nũndũ wa kĩtumi kĩu Yesũ nĩwaekie kũthi eyumĩlĩtye andũnĩ kũu Yutia. Vandũ va ũu nĩwaumie kũu athi ndũanĩ yĩtawa Evalaimu ĩla yĩ vakuvĩ na weũ, na ekala kũu na amanyĩw'a make.

55Ĩvinda ya mboka ya Ayuti ya Vasaka nĩyathengeeie, na andũ aingĩ kuma motũinĩ mathi Yelũsalemu mboka ĩsu ĩtanavika makethesye. 56Andũ asu nĩmamanthaa Yesũ kũu, na maũngamangĩte kũu Ĩkalũnĩ nĩmakũlanasya ũmwe kwa ũla ũngĩ atĩĩ, “We wĩona ata, Yesũ nũkũka mbokanĩ?” 57Athembi anene na Avalisi nĩmanenganĩte mwĩao makasya mũndũ ũla wĩthĩwa esĩ vala Yesũ ũĩ, nĩathi akamatavye nĩ kana makamũkwate.

موجودہ انتخاب:

Yoa 11: KAMBA

سرخی

شئیر

کاپی