Yoa 9

Yesũ Aivosya Mũndũ Wasyaĩtwe e Kĩlalinda

1Yesũ avĩtĩte nĩwoonie mũndũ ũmwe waĩ kĩlalinda kuma kũsyawa kwake. 2Amanyĩw'a nĩmamũkũlilye Yesũ atĩĩ, “Mũmanyĩsya, nĩ ĩvĩtyo yaũ yĩla yatumie mũndũ ũũ asyawa e kĩlalinda? Yaĩ ĩvĩtyo yake kana nĩ ya asyai make?”

3Yesũ amea atĩĩ, “Ũndũ ũũ ndwaaĩkĩka nũndũ wa kwĩthĩwa mũndũ ũũ aĩ na ĩvĩtyo kana asyai make, ĩndĩ asyaiwe e kĩlalinda nĩ kana vinya wa Ngai woneke ũitethya wĩa nthĩnĩ wake. 4No nginya tũkatethya wĩa wa ũla ũndũmĩte kwĩ mũthenya; ũtukũ nĩwũkĩte yĩla vate mũndũ ũtonya kũtethya wĩa. 5#Mat 5.14; Yoa 8.12 Ĩvinda yĩla nĩ kũũ nthĩ, nyie nĩ kyeni kya nthĩ.”

6Yesũ amina kwasya ũu, nĩwatw'ĩlile mata nthĩ na alua kataka namo; nĩwavakie metho ma mũndũ ũsu kataka kau 7na amwĩa atĩĩ, “Enda ũkathambĩe ũthyũ waku ndianĩ ĩla yĩtawa Siloamu.” Ũalyũlo wayo nĩ “Mũtũme.” Kwoou mũndũ ũsu nĩwaendie, athamba ũthyũ na ooka ayona nthĩ.

8Nĩvo ĩndĩ atũi make na andũ onthe ala mamwonaa navu mbeenĩ akĩvoya syĩndũ makũlilye atĩĩ, “Mũndũ ũũ ti ũla ũnekalaa nthĩ akavoyaa syĩndũ?”

9Andũ amwe masya, “Ĩĩ nĩwe.” Ĩndĩ angĩ masya, “Aiee nĩ mavw'anana.” Nĩvo ĩndĩ mũndũ ũsu wameie atĩĩ, “Ninyie mũndũ ũsu mũũweta.”

10Namo mamũkũlya, “Nayu metho maku masalukangilw'e ata?”

11Nake amasũngĩa amea, “Ũla mũndũ wĩtawa Yesũ aluile kataka, ambaka metho na ambĩa nĩthi ngathambĩe ũthyũ Siloamu. Kwoou nathi na namina kũthamba oou, nambĩĩa kwona nthĩ.”

12Andũ asu mamũkũlya atĩĩ, “Na aĩva?”

Nake amea, “Nyie ndyĩsĩ vala ũĩ.”

Avalisi Maikũlĩĩlya ĩũlũ wa Kũvow'a kwa Kĩlalinda

13Nĩvo ĩndĩ andũ asu matwaie mũndũ ũsu wavoetw'e vala ve Avalisi. 14Mũthenya ũsu Yesũ waluile kataka na kũsalukya metho ma mũndũ ũsu waĩ wa Savato. 15Kwoou Avalisi o namo makũlya mũndũ ũsu ũndũ wambĩĩie kwona nthĩ, nake amea atĩĩ, “Ambakie kataka metho na nathi nathamba, na yu nĩngwona nthĩ.”

16Avalisi amwe masya atĩĩ, “Mũndũ ũsu ndatonya kwĩthĩwa aumĩte kwa Ngai, nũndũ ndeanĩasya mwĩao wa Savato.”

Ĩndĩ angĩ makũlya, “Kũtonyeka ata mũndũ mũvĩtany'a akeka syama sya mũthemba ũũ?” Kwoou veethĩwa na ũtilĩkangano katĩ woo.

17Nĩvo ĩndĩ o ĩngĩ makũlilye mũndũ ũsu waĩ kĩlalinda atĩĩ, “Wĩasya ata ĩũlũ wa mũndũ ũsu nũndũ nũkũsalukilye metho?”

Nake amea, “Nĩ mwathani.”

18Ĩndĩ o vamwe na ũu, atongoi ma Ayuti mayaaĩkĩĩa kana mũndũ ũsu aĩ kĩlalinda na ambĩĩa kwona nthĩ, kũvika meeta asyai make 19na mamakũlya atĩĩ, “Ũũ nĩ mwana wenyu ũla mwaasya asyaiwe e kĩlalinda? Yu ambĩĩie kwona nthĩ ata?”

20Namo asyai make masũngĩa masya atĩĩ, “Ithyĩ kĩla twĩsĩ nĩ kana ũũ nĩ mwana waitũ, na kana asyaiwe e kĩlalinda, 21ĩndĩ ũndũ wambĩĩie kwona nthĩ ithyĩ tũyĩsĩ. O na tũyĩsĩ nũũ ũla ũmũsalukilye metho. Kwa mũkũlyei; we nĩ mũndũ mũima nũtonya kwĩneenea!” 22Asyai make maneenie ũu nũndũ nĩmakĩaa atongoi ma Ayuti, nĩkwĩthĩwa atongoi asu maĩ manatw'a kana mũndũ ũla ũkũĩkĩĩa kana Yesũ nĩwe Klĩsto, akalũngw'a kuma nyũmbanĩ ya Ayuti ya kũthaithĩa na kũmbanĩa. 23Kĩu nĩkyo kĩtumi asyai make maisye, “We nĩ mũndũ mũima, mũkũlyei!”

24Kwoou nĩmeetie ĩngĩ ũla mũndũ waĩ kĩlalinda mamwĩa atĩĩ, “Neena ũla w'o mbee wa Ngai! Ithyĩ nĩtwĩsĩ kana mũndũ ũla ũnakũvoisye nĩ mũvĩtany'a.”

25Mũndũ ũsu amea, “Ethĩwa nĩ mũvĩtany'a, nyie ndyĩsĩ. Ũndũ ũla nĩsĩ nyie nĩ kana nĩĩ kĩlalinda, ĩndĩ yu nĩngwona nthĩ.”

26Namo mamũkũlya, “Akwĩkie ata? Akũsalukilye metho ata?”

27Nake amasũngĩa, “Nĩnamũtavya na mwalea kwĩthukĩĩsya. Mwĩenda nĩmũtavye ĩngĩ nĩkĩ? Nĩmũkwenda kũtw'ĩka amanyĩw'a make o nenyu?”

28Namo mamũumanga na mamwĩa, “We nue mũmanyĩw'a wa mũndũ ũsu, ĩndĩ ithyĩ twĩ amanyĩw'a ma Mwose. 29Nĩtwĩsĩ kana Ngai nĩwaneenie na Mwose, ĩndĩ mũndũ ũsu, o na tũyĩsĩ vala wumĩte.”

30Mũndũ ũsu amea atĩĩ, “Asi! Ũndũ ũsu kote wa ũseng'yo! Inyw'ĩ mũyĩsĩ vala wumĩte, na nũnzalukilye metho! 31Nĩtwĩsĩ kana Ngai ndethukĩĩasya avĩtany'a; ethukĩĩasya andũ ala mamũkĩaa na mekaa kwenda kwake. 32Kuma nthĩ yoombwa vayaaĩw'ĩka mũndũ waasalukya metho ma mũndũ ũsyaĩtwe e kĩlalinda. 33Kethĩwa mũndũ ũsu ndaumĩte kwa Ngai, ndethĩwa atonya kwĩka ũndũ.”

34Namo mamũkũlya atĩĩ, “We na wasyaĩwe naĩnĩ na weanĩa vo, wĩ wa kũtũmanyĩsya?” Kwoou mamũlũngya kuma nyũmbanĩ ya Ayuti ya kũthaithĩa na kũmbanĩa.

Mũndũ Kwĩthĩwa e Kĩlalinda Kĩ-veva

35Yĩla Yesũ weewie kana Avalisi nĩmalũngilye mũndũ ũsu, nĩwaendie amũmantha na amũkũlya atĩĩ, “Nũkũmũĩkĩĩa Mwana wa Mũndũ?”

36Nake amwĩa, “Mwĩai ndavye nĩwe ũũ, na nĩngũmũĩkĩĩa.”

37Yesũ amwĩa, “Nũmwonie na nĩwe ũũ ũkũneena naku.”

38Mũndũ ũsu amwĩa atĩĩ, “Mwĩai nĩngũĩkĩĩa.” Na atulya ndu vau mbee wake.

39Yesũ amwĩa, “Nookie kũũ nthĩ kũsilĩla nĩ kana ala matonaa nthĩ mambĩĩe kwona, na ala monaa nthĩ matw'ĩke ilalinda.”

40Avalisi amwe maĩ vau vakuvĩ nake nĩmeewie akĩneena ũu na mamũkũlya atĩĩ, “Wĩenda kwasya o naitũ twĩ ilalinda?”

41Yesũ amasũngĩa, “Kethĩwa mwĩ ilalinda mũyĩthĩwa mwĩ na ĩvĩtyo, ĩndĩ nũndũ mwĩasya, ‘Ithyĩ nĩtwonaa nthĩ,’ ũu wĩonany'a kana ĩvĩtyo yenyu mwĩ o nayo.”

موجودہ انتخاب:

Yoa 9: KAMBA

سرخی

شئیر

کاپی