JOHANE 9

Jesu kum'boisa mundu orevaloghe kitungure

1Nao iji Jesu orekoghe ukiida, ukammbona mundu orevaloghe kitungure. 2Wanughi wake wikamkotia, “Mwalimu, nani orebonyereghe kaung'a hata mundu uhu ukavalwa kitungure, ni uo moni, angu ni wavi wake?” 3Jesu ukawitumbulia, “Mundu uhu nderebonyereghe kaung'a, hata wavi wake anduangi; ela odevalwa kitungure eri kazi ra Mlungu ripate kufunukuka andenyi kwake. 4Ni suti dibonye kazi rake Uo orenidumieghe ndoe iko dime, angu kio chichacha, mndungi usechaadima kubonya kazi anduangi. 5Iji ini niko wurumwengunyi, neko mwengere ghwa wurumwengu.”#Mat. 5.14; Joh. 8.12 6Nao umeria kughora agho, ukachuya mada andonyi, ukabonya kizozo na agho mada, ukamshinga uja mundu icho kizozo mesonyi kwake; 7ukamzera, “Ghenda ndiwa ya Siloamu, kuoghe wushu” (kutambua kwaro irina ijo ni “Udumilo.”) Nao ukaghenda ukaogha, ukawuya ukiwona.

8Nao wambao na waja weremmbonieghe imbiri uko mkiwa, mlombi, wikaghamba, “Welee, uhu mundu suo moni orekoghe ukisea kidombo na kulomba?” 9Wamu wikaghamba, “Nuo moni;” ela wazima wikaghamba, “Suo ungi ela ni mundu mzima ufwanane nao.” Uja mundu moni ukaghamba, “Ni ini moni.” 10Wikamkotia, “Kwapatire wada kuwona?” 11Ukawitumbulia, “Umundu uwangwagha Jesu orebonyereghe kizozo ukanishinga meso ukanizera, ‘Ghenda Siloamu kuoghe wushu.’ Ngaghenda ngaogha, ngapata kuwona.” 12Wikamkotia, “Oko hao?” Nao ukawitumbulia, “Simanyire.”

Mwandu ghwa Mafarisayo na kitungure

13Nao wikamghenja uja mundu utambulo meso kwa Mafarisayo. 14Ituku uo kitungure oreshingiloghe kizozo cha meso na kuboiswa, jerekoghe ituku ja Sabato. 15Mafarisayo wikamkotia sena, “Kwapatire wada kuwona?” Ukawitumbulia, “Odenishinga kizozo cha meso, ngaogha, na idana nawona.” 16Mafarisayo wamu wikaghamba, “Mundu uhu nderefumieghe kwa Mlungu kungi, angu useiwadagha sharia ya Sabato.” Ela wazima wikaghamba, “Mkaung'a udima wada kubonya awa weke mwakilimbiti?” Nao kukakaia na mawaghanyiko aghadi kwawo. 17Wikamkotia uja mundu sena, “Oho kughora wada aighu yake angu ukutambuye meso?” Ukawitumbulia, “Uo ni mlodi.”

18Wayahudi ndewererumirieghe wei uja mundu odedua kitungure ima ukachapata kuwona kwake, hata wikawiwanga wavi wake uja orekoghe kitungure. 19Nao wikawikotia, “Welee, uhu ni mwana onyu uhu mghoragha odevalwa kitungure? Wapatire wada kuwona?” 20Nao wavi wake wikatumbulia, “Isi damanya angu uhu ni mwana odu orevaloghe kitungure; 21ela seji upatire kuwona ndedimanyire; hata na mundu um'boisire ndedimwichi anduangi. Mkotienyi mmbeni, ni mundu wa henga, uchamtumbulia moni.” 22Wavi wake wereghorieghe agho kwa kuwiobua vilongozi va Wayahudi, angu ivo vilongozi werepataneghe wei, mndungi ukamghora Jesu kukaia Kristo, uwingo sunagoginyi. 23Niko wereghoragha, “Uo ni mundu wa henga, mkotienyi moni.”

24Nao wikammbanga indo ja kawi uo mundu orevaloghe kitungure wikamzera, “Mneke Mlungu wubaa, isi daichi angu mundu uhu ni mkaung'a.” 25Uja mundu ukatumbulia, “Ngera uo ni mkaung'a ini simanyire, ela naamanya ilagho jimweri, nerekoghe kitungure, na idana nawuyawona.” 26Wikamkotia, “Wakubonyere wada? Watambue wada meso ghako?” 27Ukawitumbulia, “Nameria kumghoria, nenyo ndemsikiragha. Kwaki mkunde kusikira sena? Nenyo mookunda kuwuya wanughi wake?” 28Nao wikamsholia wikighamba, “Oho nuo mnughi wake, ela isi de wanughi wa Musa. 29Isi daichi angu Mlungu oreghorieghe na Musa, ela mundu uhu ndediichi andu ufumagha anduangi.” 30Nao uja mundu ukaghamba, “Iji si ishiniko inyo kughamba ndemumwichi andu ufumie, nao moni wanitambue meso ghapo! 31Isi daichi angu Mlungu ndewisikiragha wakaung'a, ela uo usikirwagha ni uja umtasagha Mlungu, na kulubonya lukundo lwake. 32Na jingi ndeisikirikie kufuma wurumwengu ghwaumbwa wei mndungi wamtambuye meso mundu uvalo kitungure. 33Ngera mundu uhu userefumieghe kwa Mlungu, kumangu nderedimagha kubonya ilagho jingi anduangi.” 34Wikatumbulia, “Wele kuadifundisha isi, na oho koovailwa kaung'enyi tiki?” Nao wikammbinga noko.

Kufwa meso gha kiroho

35Nao Jesu ukasikira angu weremmbingieghe, hata iji wammbona ukamkotia, “Welee, oho kwarumiria kwake Mwana wa Mdamu?” 36Uja mundu ukamzera, “Uo mundu nani Bwana, nipate kumrumiria?” 37Jesu ukamzera, “Kwameria kummbona, nao nuo moni mdedanyagha.” 38Uja mundu ukaghamba, “Narumiria Bwana!” Nao ukamtasa.

39Nao Jesu ukaghamba, “Ini nerechieghe wurumwengunyi kutanya, awa wisewonagha wipate kuwona, na awa wiwonagha wiwuye vitungure.” 40Mafarisayo wamu werekoghe kaavui wikasikira agho malagho wikamkotia, “Welee, na isi wori deeka vitungure?” 41Jesu ukawizera, “Ngera modeeka vitungure, kumangu ndemsikiragha kutanywa kungi; ela idana angu mwaghamba, ‘Dawuyawona,’ huwo muadua na kutanywa konyu.”

موجودہ انتخاب:

JOHANE 9: TAITA

سرخی

شئیر

کاپی