JOHANE 10

Mfwano ghwa Mlisha wa Ng'ondi

1Nao Jesu ukaghamba, “Namghoria loli, ngera mundu usengiagha cha iranunyi ja ng'ondi kwa kuidiria mnyangonyi, ela uajokeria andu kuzima, uo ni kitoi na kiting'a. 2Ela uo ungiagha kwa kuidiria mnyangonyi, nuo mlisha wa ng'ondi. 3Mlindiri mnyango wadamrughuya; na ng'ondi radasikira lwaka lwake ukiriwanga kwa marina ghawo, nao wadarighenja shighadi. 4Iji wameria kurifunya shighadi wadakiria imbiri kwawo, naro ng'ondi radamnugha angu raluichi lwaka lwake. 5Ng'ondi iro, nderidimagha kumnugha mghenyi, ela richamkimbia, kwa kukaia nderilumanyagha lwaka lwa waghenyi anduangi.” 6Jesu oretumieghe mfwano ughu, ela awo ndeweretambukiloghe ni agho orekoghe ukighora anduangi.

Jesu Mlisha mucha

7Nao Jesu ukaghora sena, “Namghoria loli, ini nuo mnyango ghwa ng'ondi. 8Awo wose werechieghe imbiri kwapo ni vitoi na viting'a, na ng'ondi ndererewisikireghe anduangi. 9Ini nuo mnyango, uo ungiagha kwa kuidiria kwapo, uchakia; nao uchangia, na kufuma, na kuwona malisho. 10Kitoi chadacha kwa kuiwa, kubwagha na kunona; ini nerechieghe wipate kukaia na irangi ja kala na kala, sena wijipate kwa wungi.

11“Ini nuo Mlisha mucha. Mlisha mucha wadafunya irangi jake kwa wundu ghwa ng'ondi. 12Mundu wa mafungu, nao si mlisha ungi, na ng'ondi riseko mali yake, iji wawona kikwau chikicha wadakimbia na kurisigha ng'ondi. Na kikwau chadariwada ng'ondi na kurisaghisa. 13Wakimbia angu ni mundu wa mafungu, hata ndetalagha maza ra ng'ondi anduangi. 14Ini nuo Mlisha mucha. Iro rapo nariichi, naro wori raniichi ini, 15sa iji Aba uniichi ini, nani namwichi Aba; nani najifunya irangi japo kwa wundu ghwa ng'ondi.#Mat. 11.27; Lk. 10.22 16Sena nawadie ng'ondi rimu riseko ra iranu iji. Naro reni yanifwana kuriruda, naro richalusikira lwaka lwapo; nao kuchakaia chagha chimweri na mlisha umweri.

17“Uja Aba wanikunda kwa kukaia najifunya irangi japo nipate kujiwusa sena. 18Ndekuwadie mndungi unisokagha irangi japo, ela niajifunya kwa kukunda kwapo ini moni. Neko nandighi rejifunya, sena neko nandighi rejiwusa. Huwo niko nerelaghiriloghe ni Aba.”

19Nao kukakaia na mawaghinyiko sena aghadi ya Wayahudi kwa wundu ghwa malagho agho. 20Wengi wawo wikaghamba, “Oko na pepo, sena oko na isu, kwaki mumsikiragha?” 21Wazima wikaghamba, “Madedo agha si gha mundu uko na pepo kungi, welee, pepo yadima kutambua meso gha vitungure?”

Jesu kuleghwa ni Wayahudi

22Korekoghe na Ndima ya Kuwika Hekalu Wakfu aho Jerusalemu, ngelo ya kwari. 23Jesu orekoghe ukisela Hekalunyi andenyi ya lukumbi lwa Solomoni. 24Nao Wayahudi wikammaria chia rose wikamzera, “Kudikambira chongo hata lii? Ngera koko Kristo kudighorie worinyi.” 25Jesu ukawitumbulia, “Namerie kumghoria nenyo ndemrumiriagha anduangi. Iro kazi niribonyagha kwa irina ja Aba, niro reni rinishuhudiagha ini. 26Ela inyo ndemrumiriagha kwa kukaia ndemko ng'ondi rapo anduangi. 27Ng'ondi rapo radasikira lwaka lwapo, nani nariichi, naro raninugha. 28Nani narineka irangi ja kala na kala, hata na jingi nderichaatota, sena ndekuwadie mndungi uchaanisoka mkonunyi kwapo anduangi. 29Uo Aba uninekie ni m'baa kuchumba wose, hata ndekuwadie mndungi udimagha kurifunya mkonunyi kwa Aba anduangi. 30Ini na Aba ni umweri.”

31Nao Wayahudi wikashoa magho sena, wipate kumlasa. 32Jesu ukawizera, “Nammbonyere kazi nyingi riboie kufuma kwa Aba; kwa iro, ni iao munilasiragha na magho?” 33Wayahudi wikamtumbulia, “Ndedikulasagha na magho kwa wundu ghwa kazi ndicha, ela ni kwa wundu ghwa masholio ghako oho mdamu kukubonya sa Mlungu.”#Wal. 24.16 34Jesu ukawitumbulia, “Welee, ndeiandikilo Sharienyi konyu, ‘Ini naghambie inyo mo milungu?’#Zab. 82.6 35Ikakaia orewiwangieghe milungu awo werenekeloghe malagho gha Mlungu (na maandiko ndeghidimagha kuchikanywa anduangi), 36welee, uja oreelesheroghe ni Aba, na kudumwa wurumwengunyi, inyo mwamzera, ‘Kwaawuyasholia,’ angu nighorie ‘Ini ne Mwana wa Mlungu?’ 37Ngera niseribonyagha iro kazi ra Aba msakenirumiria; 38ela ikakaia naribonya, hata ngera mwalegha kunirumiria, kumangu mwarirumiria iro kazi reni, mpate kumanya angu Aba oko andenyi kwapo, na ini andenyi kwake.” 39Nao wikatima kummbwada sena, ela ukafufunuka mikonunyi kwawo.

40Nao Jesu ukaghenda sena kimonu cha moda ghwa Jordani, andu Johane orekoghe ukibaputiza imbiri, ukakaia aho.#Joh. 1.28 41Na wandu wengi wikamchea wikighamba, “Johane nderebonyereghe alama ingi, ela malagho ghose oreghighorieghe Johane aighu ya mundu uhu ni gha loli.” 42Nao ahoeni wengi wikarumiria kwake.

موجودہ انتخاب:

JOHANE 10: TAITA

سرخی

شئیر

کاپی