JOHANE 8

1ela Jesu ukajoka cha Mghondi ghwa Mizeituni. 2Nakesho yaro ko kio ukacha sena Hekalunyi; na wandu wose wikamkwanyikia chia rose, nao ukasea kidombo ukawifundisha. 3Nao walimu wa Sharia na Mafarisayo wikamredia muka orewadiloghe ukilaka, nawo wimeria kummbika kimusi aghadi wikaghamba, 4“Mwalimu, muka uhu orewadiloghe ukibonya wulaki. 5Idana andenyi ya Sharia edu, Musa oredilaghirieghe kuwibwagha kwa kuwilasa na magho waka wifwane huwu. Oho kwaghamba wada?”#Wal. 20.10; Wuk. 22.22-24 6Wereghighorieghe agho kwa kumdegha wipate ra kumshitakia. Ela Jesu ukaghomeka andoenyi ukaandika na chala chake. 7Hata iji wachuria kumkotia, Jesu ukawuka ukawizera, “Uo usewadie kaung'a aghadi konyu ndekaie wa imbiri kumlasa na magho.” 8Ukaghomeka sena, ukaandika na chala chake andoenyi. 9Wiendasikira malagho agho, wikazoya kufuma umu umu wikizoya na waghosi; Jesu ukasigharika uekeri chiaimweri na uja muka uko kimusi. 10Nao Jesu ukawuka na kumzera uja muka, “Awandu wiao? Ungi ndekutanyire?” 11Muka ukatumbulia, “Ndekuwadie ungi Bwana.” Jesu ukamzera, “Hata nani sikutanyagha; ghenda, ela kusebonye kaung'a sena.”]

Jesu mwengere ghwa wurumwengu

12Jesu ukawizera Mafarisayo sena, “Ini nuo mwengere ghwa wurumwengu, uo uninughagha ini na jingi ndechaaghenda na kira anduangi, ela uchakaia na mwengere ghwa irangi.”#Mat. 5.14; Joh. 9.5 13Mafarisayo wikamzera, “Oho kwakushuhudia kumoni, kwa huwo wushuhuda ghwako si ghwa loli anduangi.”#Joh. 5.31 14Jesu ukawitumbulia, “Hata ngera nakushuhudia nimoni, sena wushuhuda ghwapo ni ghwa loli, angu nakumanya andu nifumie, na andu nighendagha. Inyo ndemwichi andu nifumie hata andu nighendagha anduangi. 15Inyo mwadatanya kidamu, ela ini simtanyagha mndungi anduangi. 16Ela hata ngera natanya, sena kutanya kwapo ni kwa hachi, angu siko niekeri anduangi, ela nekwanye andwamweri na uja Aba orenidumieghe. 17Yaandikilo Sharienyi konyu angu wushuhuda ghwa wandu wawi ni ghwa loli. 18Nakushuhudia nimoni, na Aba unidumie wanishuhudia wokoni.” 19Nao wikamkotia, “Ndeyo oko hao?” Jesu ukawitumbulia, “Inyo ndemuniichi, hata na Aba ndemumwichi. Ngera modenimanya, kumangu na Aba mwamwichi.”

20Jesu oreghorieghe malagho agho, iji orekoghe ukifundisha Hekalunyi andenyi ya chumba cha isanduku ja mafunyo. Hata mndungi nderedimieghe kummbwada, angu ngelo yake ndeerevikieghe anduangi.

Ndemdimagha kughenda andu nighendagha ini

21Nao Jesu ukawizera sena, “Nichaghenda noko nenyo mchanilola, ela mchafwa kaung'enyi konyu. Andu nighendagha, inyo ndemdimagha kucha anduangi.” 22Niko vilongozi va Wayahudi wikaghamba, “E ughoragha wei, ‘Andu nighendagha inyo ndemdimagha kucha,’ huwo-lee, uchakubwagha moni anguwada?” 23Jesu ukawitumbulia, “Inyo moko wandu wa ndoenyi, ela ini neko wa aighu; inyo moko wandu wa wurumwengu ughu, ela ini siko wa wurumwengu ughu anduangi. 24Huwo niko namzera angu mchafwa kaung'enyi konyu. Nenyo mchafwa kaung'enyi konyu ngera mserumiriagha angu ‘Ini Nuo Moni.’” 25Nao wikamzera, “Kwani oho nani?” Jesu ukawitumbulia, “Ni ijo jeni nameria kumghoria kiimbiri. 26Neko na mengi gheghora na kutanya aighu yenyu; ela uo orenidumieghe ni mloli, nani nadaghoria wurumwengu agho gheni nighisikire kwake.”

27Ela awo ndeweretambukiloghe wei wawuyawighoria gha uja Aba. 28Niko ukawizera, “Iji mwamjosa Mwana wa Mdamu, aho niko mchaamanya angu ‘Ini Nuo Moni;’ nenyo mchamanya angu sibonyagha ilagho jingi kwa nguma rapo ini moni, ela nadaghora agho gheni nerefundishiroghe ni Aba. 29Uo orenidumieghe oko chiaimweri nani, hata ndenisighie niekeri anduangi, angu nadabonya matuku ghose agho ghimriragha Uo.” 30Nao ukighora agho, wandu wengi wikamrumiria.

Wakitina na wazumba

31Jesu ukawizera waja Wayahudi weremrumirieghe, “Mkaghiwadia mafundisho ghapo, mchakaia wanughi wapo loli, 32nenyo mchaimanya ija loli, nayo loli icham'bonya kukaia wakitina.” 33Wikatumbulia, “Isi deko kivalwa cha Abrahamu, hata na jingi ndederekoghe wazumba wa mndungi anduangi. Kwaki kughambagha wei, ‘Mchakaia wakitina.’”#Mat. 3.9; Lk. 3.8 34Jesu ukawizera, “Namghoria loli, uo ose ubonyagha kaung'a ni mzumba wa kaung'a. 35Mzumba ndekaiagha nyumbenyi matuku ghose anduangi, ela mwana wadakaia matuku ghose. 36Na Mwana ukam'bonya kukaia wakitina, mchakaia wakitina tiki. 37Ini naichi angu moko kivalwa cha Abrahamu; ela sena mwawuyakunda kunibwagha, angu msewadagha mafundisho ghapo. 38Ini naghora agho niwonyero ni Aba, ela inyo mwadabonya agho mzerelo ni ndeyo.”

39Nao wikamzera, “Aba odu ni Abrahamu.” Jesu ukawizera, “Ngera loli modeeka wana wa Abrahamu, kumangu mwabonya seji Abrahamu orebonyereghe. 40Ini neemghoria iyo loli nereisikireghe kwa Mlungu, nenyo mualola kunibwagha. Abrahamu nderebonyereghe huwo anduangi. 41Inyo mwaawuyabonya sa ndeyo.” Nao wikamzera, “Isi ndederevaloghe kwa chia ya kulaka, deko na Aba umweri, Mlungu moni.” 42Jesu ukawizera, “Ngera loli Mlungu odeeka ndeyo, kumangu mwanikunda ini; angu nerefumieghe kwa Mlungu ngacha aha, nani serechieghe kwa nguma rapo ini moni anduangi, ela uo nuo orenidumieghe. 43Kwaki msetambukilwagha ni agho nighoragha? Ni angu msedimagha kusikira ilagho japo anduangi. 44Inyo mo wana wa ndeyo uja Mmbiwi, na bea rake niro reni mkundagha kuribonya. Uo orekoghe m'bwaghi kufuma kuzoya, hata na jingi ndekaiagha na loli, angu ndekuwadie loli ingi andenyi kwake anduangi. Iji waghora tee, wadaghora kikwake cheni: angu uo moni ni mtee, na ndee wa tee rose. 45Ela angu ini nawuyamghoria loli, niko msewuerumiria. 46Nani konyu udimagha kunishuhudia kukaia neko na kaung'a? Ngera naghora loli kwaki msenirumiriagha? 47Uo uko wa Mlungu wadasikira malagho gha Mlungu. Ela inyo ndemko wa Mlungu, niko msesikiragha.”

Jesu na Abrahamu

48Nao Wayahudi wikamzera, “Welee, dikaghamba angu oho ko Msamaria, sena koko na pepo si loli anguwada?” 49Jesu ukawitumbulia, “Ini siwadie pepo ingi, ela nam'bonyera ishima Aba, nenyo muaninonia ishima. 50Ini siwuekulolia wubaa anduangi, ela koko Umu ughulolagha, nao uchakaia mtanyi. 51Namghoria loli, uo usikiragha mafundisho ghapo ndechaafwa anduangi.” 52Wayahudi wikamzera, “Idana damanya loli angu koko na pepo. Abrahamu wafue, na walodi wafue, na oho kwadizera wei, ‘Uo usikiragha mafundisho ghapo ndechaafwa anduangi.’ 53Oho ko m'baa kuchumba aba odu Abrahamu nao wafue, na walodi wafue! Kwakubonya kumoni kukaia ani?” 54Jesu ukawizera, “Ngakukasa ini moni kukukasa kwapo ni kwa duu. Uo unikasagha ni Aba, uo mummbangagha Mlungu onyu. 55Inyo ndemumwichi, ela ini namwichi; nani ngaghamba simwichi, nichakaia mtee karakara na inyo; ela ini namwichi sena nadamsikira. 56Ndeyo onyu Abrahamu oreboiloghe angu ochaajiwona ituku japo, nao ukajiwona ukaboilwa.” 57Nao Wayahudi wikamzera, “Oho ndekuvikie irika ja miaka mirongo misanu, sena kuaghamba kwammbonie Abrahamu?” 58Jesu ukawizera, “Namghoria loli, imbiri ya Abrahamu kukaia, ‘Ini Neko.’” 59Nao wikashoa magho wimlase, ela Jesu ukakuvisa, ukafuma Hekalunyi.

موجودہ انتخاب:

JOHANE 8: TAITA

سرخی

شئیر

کاپی