JOHANE 7
7
Jesu na waruna
1Nyuma ya agho, Jesu orekoghe ukimara-mara Galilaya, hata ndereghendieghe Judea anduangi; angu Wayahudi werekoghe wikimlola wim'bwaghe. 2Na ndima ya Wayahudi, ija Ndima ya Viwanda, erekoghe kaavui.#Wal. 23.34; Wuk. 16.13 3Niko waruna wikamzera, “Fuma aha kwende Judea, wanughi wako wipate kuriwona iro kazi kuribonyagha. 4Angu ndekuwadie mndungi ubonyagha maza kivisonyi sena ukikunda kumanyika. Idana angu kwawuyabonya maza iri, ni nicha kukuwonyere kumoni kwa wurumwengu.” 5(Angu hata waruna ndeweremrumirieghe anduangi.) 6Jesu ukawizera, “Ngelo yapo ndeivikie kande anduangi, ela ngelo enyu eko aeni matuku ghose. 7Wurumwengu ndeghudimagha kuzamilwa ni inyo, ela ghwadazamilwa ni ini angu nighughoragha kazi rake kukaia razamie. 8Inyo jokenyi kwa iyo ndima. Ini sijokagha kwa iyo ndima anduangi; angu ngelo yapo ndeivikie anduangi.” 9Nao ughora agho ukakaia ahoeni Galilaya.
Jesu andenyi ya Ndima ya Viwanda
10Ela iji waruna wameria kughenda ndimenyi, Jesu moni wori ukajoka; si worinyi anduangi, ela kwa kiviso. 11Vilongozi va Wayahudi wikakaia wikimlola ndimenyi na kughamba, “Wele oko hao?”
12Korekoghe na madedo mengi-mengi wandunyi kwa wundu ghwake; wamu wikaghamba, “Ni mundu mucha.” Na wazima wikaghamba, “Hata, ualaghasha wandu.” 13Ela mndungi ndereghorieghe malagho ghake worinyi anduangi, angu werewiobueghe vilongozi va Wayahudi.
14Ndima iendavika ghadi na ghadi, Jesu ukaghenda Hekalunyi ukazoya kufundisha. 15Wayahudi wikashinika wikighamba, “Mundu uhu wapatire wada ichi kishomo nao jingi useghenda mashomonyi?” 16Niko Jesu ukawizera, “Mafundisho nifundishagha si ghapo ghangi, ela ni ghake uo orenidumieghe. 17Mndungi ukakunda kubonya agho ughikundagha Mlungu, uchamanya ngera agho mafundisho nifundishagha gheefuma kwa Mlungu angu ngera ni gha nguma rapo reni. 18Mundu udedagha kwa nguma rake reni wadalola wubaa ghwake moni. Ela uo ulolagha wubaa ghwa uo oremdumieghe, wadakaia mloli, hata ndekuwadie mikalo ingi andenyi kwake anduangi. 19Welee, si Musa moni oremnekieghe Sharia? Hata huwo ndekuwadie ungi onyu uiwadagha Sharia anduangi. Kwaki mlolagha kunibwagha?” 20Awo wandu wikamtumbulia, “Oho koko na pepo! Nani ulolagha kukubwagha?”
21Niko Jesu ukawitumbulia, “Nerebonyereghe ilagho jimweri, na inyo mmbose mkadajishinikia. 22Musa oremnekieghe ghuja mzango ghwa kushamisha, (si kughamba wei ugho mzango ghodefuma kwa Musa, ela kwa weke wawa wenyu); nenyo mwadamshamisha mundu hata ituku ja sabato.#Kuz. 17.10; Wal. 12.3 23Idana ikakaia mundu washamishwa ituku ja Sabato, eri Sharia ya Musa isechenonwa, welee, inyo mwanibonyera machu wei nam'boisa mundu ituku ja Sabato?#Joh. 5.9 24Msaketanya kwa kuwona kwa shighadi tu, ela tanyenyi kwa hachi.”
Kewada uhu nuo Kristo
25Nao wandu wamu wa Jerusalemu wikaghamba, “Welee, uhu suo moni mundu wawuyalolwa ni vilongozi ubwagho? 26Zighanenyi hoyu wawuyadeda worinyi, nawo ndewiwueghora ilagho jingi aighu yake anduangi; kewada na wabaa wemmanya mundu uhu kukaia Kristo anguwada? 27Iji Kristo uchaacha, mndungi ndechaamanya andu ufumagha anduangi. Ela isi damwichi mundu uhu andu ufumagha.”
28Jesu ukaghora kwa lwaka lubaa iji orekoghe ukifundisha Hekalunyi, “Loli mwaniichi, na andu nifumagha mwakumanya? Ini sichee kwa nguma rapo ini moni anduangi, ela uo orenidumieghe ni mloli, na inyo ndemumwichi anduangi. 29Ela ini namwichi angu nerefumieghe kwake, nao nuo orenidumieghe.”
30Waja wandu wikakunda kummbwada, ela mndungi nderedimieghe kummbwada angu ngelo yake ndeerevikieghe anduangi. 31Elaima wengi wa awo werekoghe izungunyi wikarumiria kwake wikighamba, “Welee, iji Kristo uchaacha, uchabonya weke mwakilimbiti kuchumba awa wibonyero ni uhu mundu?”
Walindiri kudumwa wimmbwade Jesu
32Nao Mafarisayo wikasikira wandu wikihohoriana agho malagho gha Jesu, nawo chiaimweri na Wakohani wabaa wikaduma walindiri wimmbwade Jesu. 33Niko Jesu ukaghamba, “Ini neko andwamweri nenyo kwa ngelo vui, nani nichaghenda kwa uo orenidumieghe. 34Mchanilola ela ndemchaaniwona anduangi, angu andu nighendagha inyo ndemdimagha kucha anduangi.” 35Nao vilongozi va Wayahudi wikaghamba weni na weni, “Mundu uhu uchaghenda hao isi disedimagha kuvika? Welee, uchaghenda kwa Wagriki andu wamzedu wiko, upate kuwifundisha Wagriki? 36Kutambua kwaro niki ughoragha wei, ‘Mchanilola nenyo ndemchaaniwona, na andu nichaakaia ini, inyo ndemdimagha kucha anduangi?’”
Meda ya machi gha Irangi
37Nao ituku ja kutua mbai, ituku ibaa ja Ndima, Jesu ukakaia kimusi na kughora kwa lwaka lubaa, “Ngera mndungi waoma, ndeche kwapo unyo.#Wal. 23.36 38Uo unirumiriagha ini sa iji koni Maandiko ghighambagha, ‘Ngolonyi kwake ichafuma meda ya machi ghiko moyo.’”#Eze. 47.1; Zek. 14.8 39(Agho oreghighorieghe kwa wundu ghwa uo Roho wechaampata awo wirumiriagha kwake. Angu Roho nderefunyiroghe kwa kukaia Jesu nderekasiroghe kande anduangi.)
Mawaghanyiko gha wandu kwa wundu ghwa Jesu
40Wiendasikira agho malagho, wandu wamu waro wikaghamba, “Kwa loli mundu uhu ni uja Mlodi.” 41Wamu wikaghamba, “Uhu nuo Kristo.” Ela wamu wikaghamba, “Kwani Kristo uafuma Galilaya? 42Maandiko ndeghighorie angu Kristo uchafuma kwa kivalwa cha Daudi na kuvalwa Bethlehemu muzi orekaieghe Daudi?”#2 Sam. 7.12; Mik. 5.2 43Nao kukakaia mawaghanyiko aghadi ya jija izungu kwa wundu ghwa Jesu. 44Wamu werekundieghe kummbwada, ela ndekorekoghe na ungi oredimieghe kummbwada anduangi.
Kusowekelwa ni irumirio kwa vilongozi va Wayahudi
45Nao waja walindiri wikawuya kwa wakohani wabaa na Mafarisayo. Nawo wikawikotia, “Welee, kwaki msemredie?” 46Awo walindiri wikatumbulia, “Jingi mndungi ndededie sa mundu uhu anduangi.” 47Nao Mafarisayo wikaghamba, “Welee, na inyo wori mwalaghashwa? 48Jingi mwawonie m'baa ungi angu Mfarisayo ungi umrumirie mundu uhu? 49Ela izungu iji jiseichi Sharia ya Musa, jeewasirwa njowe.”
50Umu wa awo Mafarisayo orekoghe Nikodemo, uo oremghendieghe Jesu aho imbiri. Nao ukawizera wambao,#Joh. 3.1-2 51“Welee, Sharia edu yamtanyagha mndungi disemsikire na kughimanya agho ubonyere?” 52Nao wikatumbulia, “Welee, na oho wori kwaafuma Galilaya? Zighana Maandiko kuwone ngera mlodi ungi jingi wafumie Galilaya.”
Muka mlaki
[ 53Nao kula umu ukaghenda cha nyumbenyi kwake;
موجودہ انتخاب:
JOHANE 7: TAITA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 1997
All rights reserved.
