Luka 16
16
Mγolokezi mubada ywa mali.
1Azalonga kwa wahina wakwe angwe: Ne kwina muntu mzuli mwena mγolokezi ywa mali, uyu azafyaliṅwa kwakwe, kuti abana mali yakwe. 2Azamwitanga, azamuti: Inu mbuli niikuiva zeze? Netitale vyoshe, ndivyo ukiγolokela! Hambu nkudaha kuγolokela mah yangu vivyoho. 3Yuja mγolokezi ywa mali azafanyanya mwe moyo wakwe kuγamba: Nitende zeze? Hambu zumbe ywangu anihoka ufuṅwa wangu; kulima sidaha, kulombeza nina shoni nako. 4Nataila, ndivyo niγoshole, kangwe, nikibushiγwa mwe ufuṅwa wangu, wanihokele mwe nyumba zawe. 5Wadeni wa zumbe ywakwe azawaitanga woshe muṅwe muṅwe; ywa bosi azamγamba: Zumbe ywangu umkopilei? 6Angwe: Ni matanaki gana ya mavuta. Yuja azamuti: Γuwa baluwa yako! Ikala, ufikegonda milongo mishano! 7Vikibinda azalonga mluhu: Iwe nawe ukopilei? Angwe: Ni maguniya gana ya mshele. Azamuti: Γuwa baluwa yako, ugonde milongo mnane! 8Zumbe azamlogola yuja mγolokezi muwiwi, kuti azaγoshola vya minyanyi; hambu wana wa inu shi wakiangilana mwe mbali yawe wenye na wenye ni wanyanyi kuzinka wana wa langaila.
Mali ya kiinushi.
9Kangi imi namiti: Kiloṅdelel wambuya wenyu na kuinkila mali ya kiinushi, kuti ni ya uhuza, kangwe muhozakosa wamihokele mwe mafikilo yena ukalami! 10Mwena utanda na viya viγeke, haia viya vingi ana utanda navyo; kangi mwena uhuza na viya viγeke, hata viya vingi ana uhuza navyo. 11Ati nkamtendile utanda na mali ya kiinushi ishiyo ya kweli, viya vya kweli ndiye aviminke, muviγolokele, ni ndai? 12Ati viya vishivyo vyenyu nkamtendile utanda navyo, viya vyenyu ndiye aviminke, muviγolokele, ni ndai? 13Mwikala hangwa nkakuna mwedaha kutumikila wazumbe waili; hambu atashuka yuja muṅwe, akundishe yuja mtuhu; ao akianga na yuja ywa bosi, atamubela yuja mtuhu. Nkamdaha kumtumikila Mulungu, kangi mali ya kiinushi.
Mafaliseyo watamilwa ni mali.
14Izi mbuli zoshe Mafaliseyo wetamilwa ni feza wazaziiva, ne wahomfyulila. 15Azawati: Inywi ni nywiyo mwekikanila wenye kwa wantu, miya Mulungu ataila myoyo yenyu; hambu vyegimbikwa ni wantu vyamubuza Mulungu useli. 16Mulomongwa na mbuli za wateγanyingwa zizabilikilwa mpaka mishi ya Yohana; kuandiila haja uzumbe wa Mulungu wabilikilwa, kangi kila, muntu aukundila kwa nguvu yakwe. 17Ati lwingu na inu shi zabanika, ntoγo izo nkaziinga sa ziya, kagonde kaṅwe ka mulomongwa kakiaγa. 18Kila mwelekana na muke akiγuwa mtuhu atenda kilanga, hata mweγuwa mvyele alekwaye ni mγoshi atenda kilanga.
Mzuli na mkiwa mweitangwa Lazalo.
19Ne kwina mzuli, azazwika shuke za langi na halili, azaja ulembo kila mushi vitana ivyo. 20Kangi ne kwina mkiwa, zina jakwe ndiye Lazalo, ailele he kifiγwe cha yuja mzuli, aigisize vilonda. 21Azakunda kuiγushiγwa ni mpuγutishi zegwa he meza ya yuja mzuli; hata makuli yazaiza kwa sona vilonda vyakwe. 22Yuja mkiwa akifa azaiγalwa ni walau kwa Abulahamu, aambatwe ndiye; yuja mzuli yohena azafa, azazikwa. 23Uko kuzimu azainula mesho yakwe, hambu aswilimiziγwa, ne ahomwona Abulahamu uko hale na Lazalo, aiambatwe ndiye. 24Ṅwenye azakema lushe angwe: Tate Abulahamu! Nifa mbazi, umtume Lazalo, kangwe agele mpembo ya chala chakwe mwe mazi, aize, ayanidodeze mwe lulimi lwangu! Hambu naisa kulumiziγwa ni unu moto. 25Angwe ni Abulahamu: Ṅwanangu, fukila, kuti uzaja vitana vyako ukiikala uko shi! Kangi uyu Lazalo ne akija vibada. Lushe uyu ahembuliziγwa, miya iwe walumiziγwa. 26Kangi kushima viya vyoshe, aha gati na gati kwetu na kwenyu kwiatile lwatu lukulu, kangwe wekunda kusheela na uko kwenyu washedahe, vivyoho we uko kwenyu washedahe kuomboka na kwetu. 27Angwe: Lushe nakuhembeleza, tate, umtume yuja mwe nyumba ya tate! 28Hambu nina wenetu washano; awaγambile uwona, kangwe wohe washezaiza na aha hantu ha kulumiziγwa. 29Angwe ni Abulahamu: Wana Mose na wateγanyingwa, newawaive! 30Angwe: Do, tate Abulahamu, miya muntu mwelawa kwa wafilewo akibula kwawe, watahitula ntongonyezi zawe. 31Azamuli: Ati Mose na wateγanyingwa nkawawaiva, hata muntu akifufuka kwa wafilewo nkewavoteke.
موجودہ انتخاب:
Luka 16: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
