Luka 15
15
Lushimo lwa ngoto iaγileyo.
1Wangelu na wahuza woshe wazamtimila, wamteγeleze. 2Mafaliseyo na watabaluwangwa wazaṅuna angwe: 3Uyu ahokela wahuza, aja nkande nawo. Azawalonga ulu lushimo angwe: 4Kwenyu kuna muntu mwena ngoto gana akiaza ṅwenga, asheashe ziya milongo kenda na kenda tundui, akihita kwa londa ija iaγileyo, mpaka akiiona? 5Akiiona aiika mwe maeγa yakwe na nyemi; 6akibula kaya aitanga wambuyae na weyae, awoikala nawo, awati: Tamilwai haṅwe na imi! Hambu nizaona ngoto yangu iaγileyo. 7Namiti: Vivyoho kwa mbuli ya mhuza muṅwe mwehitula ntongonyezi zakwe kutagwa nyemi mwe lwingu yekula kuzinka nyemi yegwa kwa mbuli ya watanda milongo kenda na kenda washiwoagiziγwa ni kuhitula ntongonyezi zawe.
Mvyele mweaza shilingi.
8Hambu kuna mvyele mwena shilingi kumi akiaza shilingi ṅwenga, ndiye ashekoleze taa na kuhaγila nyumba akilondeza na utanda, mpaka akiiona? 9Akibinda kuiona aitanga wambuyae na weyae, awoikala nawo, awati: Tamilwai haṅwe na imi! Hambu nizaona shilingi yangu iaγileyo. 10Namiti: Vivyoho nyemi itagwa kwa walau wa Mulungu kwa mbuli ya mhuza muṅwe mwehitula ntongonyezi zakwe.
Ṅwana aaγileye.
11Azalonga: Ne kwina muntu mwena wana waili. 12Yuja mdodo azamlonga ishe angwe: Tate, ninka fungu ja mali jenitaia! Yuja azawapangila kitende. 13Mishi miγeke ikizinka, yuja mdodo azashunganya vyakwe vyoshe, azahita mwe shi ye hale, kuja ne abanileko mali yakwe na kuija kimumpa. 14Yuja akiibinda yoshe, kuzagwa sala ndala mwe ija shi, yohe azaandiila kushowa vya ja. 15Azahita, azatongelatongela ṅwenyezi ywa ija shi, yuja azamtuma kwe maγisa yakwe, alishe nguluwe. 16Azakunda kumemeza ifu jakwe na yaja magoko, nguluwe ziyoja, miya nkakuna ayamunkileye. 17Azakiuyiya ṅwenye angwe: Wandima wa tate wana nkande, ni nyingi, kangi ni wangi ivyoho! Lushe imi nafa sala kunu! 18Niinuke, nihite kwa tate, nimγambe: Nizakola masa mwe lwingu na kwako. 19Nkaviniagiza, nikiitangwa ṅwanawo vivyoho, leka, niγaluke viya ni mndima ywako! 20Azainuka azahita kwa ishe. Ake hale, ishe azamwona, azabulwa ni utungu naye, azamγulukila, azamkinila mwe shingo, azafyosana naye milomo. 21Miya yuja ṅwana azamuti: Tate, nizakola masa mwe lwingu na kwako, nkaviniagiza, nikiitangwa ṅwanawo vivyoho. 22Miya ishe azalonga wapuna wakwe angwe: Fikaileta shuke zezinka zoshe utana, mumzwike! Kangi mumgele mpete mwe chala chakwe na vilatu mwe milundi yakwe! 23Vikibinda letei ndama yegimbala, mwikome, tije, titamilwe! 24Hambu uyu ṅwanangu ne aifile, miya ateuya moyo, ne aiaγile, miya aleoneka. Wazaandiila kuja nyemi. 25Miya ṅwanae mkulu ne ai nkoi; akiiza, akibula hehi na kaya azaiva ngoma na mawila. 26Azaitanga mubwanga muṅwe, azamwuza, ati viya ni vyai. 27Yuja azamuti: Nduγuyo azaiza, isho azakoma ija ndama yegimbala, kwa kuti azamwinkwa, ni mgima. 28Azakwelwa ni maya, nkakundile kuingila; miya ishe azalawa, azamhembeleza. 29Miya yuja azamlandula ishe angwe: Olela! Mavuli yeinga aha nakuγoshweia ndima, nkakuna mlaγilizo wako, nizinkanewo nawo, kangi nkwaninkile kabuzi, nikija nyemi na wambuyangu. 30Miya uyu ṅwanawo abindileye mali yako na wandele wahuza akiiza, uzamkomela ija ndama yegimbala. 31Ishe azamuti: Ṅwanangu, iwe mishi yoshe u haṅwe na imi, kangi vyangu vyoshe ni vyako. 32Vyakuagiza kuja nyemi na kutamilwa, hambu uyu nduγuyo ne aifile, miya ateuya moyo, ne aiaγile, miya ateoneka.
موجودہ انتخاب:
Luka 15: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
