Luka 17
17
Miihiziize mibada.
1Azawati wahina wakwe: Nkavidahikana, vyeihiza wantu vikisheiza; miya yuja mweleka, vikiiza, akatafa! 2Ati agelwa mwe shingo nolo gima akitambikwa mwe bahali, vyamwagiza kuzinka viya vyeanduka aho, akiihiza awa wadodo ṅwiyae ywawe muṅwe du.
Ushilizanyai.
3Kiγojeshei kwa mbuli yawe! Ati mnduγu ywako akubanila, mshunde! Ati ahitula ntongonyezi zakwe, vimwushilize! 4Ati mushi muṅwe akubanila kamfungate, kangi akikutimila kamfungate akikuti: Navoteka, vimwushilize!
Tozeshai.
5Ntuṅwa zizamγamba: Zumbe, tiγenyezeze mitozesheze! 6Angwe ni Zumbe: Ati kitozesheze chenyu ni kidodo du sa kahuluzi kadashi, kangi mkiulonga unu msoso: Nofuka, ukitulize mwe bahali!, anga utamiitika. 7Ati kwenyu muntu ana mupuna mwemlimila ao du mwemlishiza, yuja akiγotoka kwe ndima, atamγamba: Fikaiza, uikale, uje!? 8Nkeamγambe: Liγanya, ndivyo nije lwa ṅwiyaγulo! Kikante, uniγoshwele ndima, mpaka nibinde kuja na kunywa! Nikibinda, nawe utadaha kuja na kunywa? 9Yuja mupuna atamlaviliza ntogolo, kuti azaγoshola alaγiliziγwevyo? 10Vivyoho hata inywi, mkiγoshola vyoshe mulaγiliziγwevyo, longai: Ti wapuna tishinawo ndima, tizaγoshola viya du vyetitala kuviγoshola!
Wakoma 10.
11Akihita Yelusalemu ṅwenye azadwisha shi za Samaliya na za Galileya gati. 12Akiingila mwe muzi, silai azakintana na waγoshi kumi, ni wakoma, waiγoloke hale. 13Waja wazainula vyanwa vyawe angwe: Mfuzi Yesu! Tife mbazi! 14Azawaolela, azawati: Hitai, mulawile wavikizi! Aho wakihita, ukoma uzauka. 15Ṅwiyae ywawe muṅwe akiona, kuti azahona, azauya akimtogola Mulungu na kanwa kikulu, 16azamkinila funi he milundi yakwe, amlavilize ntogolo. Kangi uyu ni Msamaliya. 17Yesu azamlandula, azamuti: So kumi wahonilewo? Waja kenda wa kuhi? 18Nkawaoneke watuhu wauzilewo, wamunke Mulungu ntogolo, kushima uyu mγeni du? 19Azamuti: Inuka, uhite! Mitozesheze yako izakuhonya.
Uzumbe wa Mulungu ndivyo uize.
20Azauziγwa ni Mafaliseyo: Uzumbe wa Mulungu uiza lini? Azawalandula angwe: Uzumbe wa Mulungu ukiiza nkauoniγwa na mesho. 21Wantu nkewalonge: Shunu!, ao: Shuuja! Hambu uzumbe wa Mulungu u gatigati kwenyu. 22Azawati wahina wakwe: Kuna mishi, ndiyo iize, ne ndiho mwingilwe ni luzwi lwa kuona mushi muṅwe du wa ṅwanangwa ywa muntu, miya nkezemwuwone. 23Ne ndiho nezewamili: Shuyuja! Shuyu! Miya mshehite, mshewatongele! 24Hambu sa viyaho lumuli luvyolawa mwe lwingu uko cha uko lukimulikila vyoshevye kunucha kunu mwe lwingu, ne ndivyo ṅwanangwa ywa muntu atende uja mushi wakwe. 25Miya shuti anelumiziγwa vikulu, shuti anetowiγwa hulu ni inu mbali. 26Sa mbuli ziγendilevyo mwe mishi ya Nowa, ne ndivyo ziγende mwe mishi ya ṅwanangwa ywa muntu. 27Wazaja, wazanywa, wazateγula, wazateγulwa, mpaka uja mushi, Nowa akiingila mwe chiya kibweta, mlaho wa mazi ukigwa na kuwabinda woshe. 28Vivyoho mbuli zizaγenda mwe mishi ya Loti, wazaja, wazanywa, wazaγula, wazataγa, wazahanda, wazazenga; 29miya uja mushi Loti akilawa Sodoma, moto uzalawa mwe lwingu, uzagwa na mawe ya vibiliti, uzawabinda woshe. 30Ne ndivyo mbuli ziγende uja mushi, ṅwanangwa ywa muntu ahozalawila. 31Mushi uja mweikala mwe nyumba yakwe ulanga, ati ntanu zakwe zi nyumbai, asheshindeingila kwa ziγuwa! Vivyoho mwe nkoi ashezauya na nyuma! 32Fukilai mkaza Loti! 33Ndiye alonde, ndivyo akihonye, atazakiaza; kangi ndiye akiaze atazakihonya, aone nkalamo. 34Namiti: Chiya kilo waili wegona mwe lusazi lunwe muṅwe aiahokelwa, muṅwe ataashiγwa. 35Waili webunduγa haṅwe, muṅwe atahokelwa, muṅwe ataashiγwa. 36Waili we haṅwe nkoi muṅwe atahokelwa, muṅwe ataashiγwa. 37Wazamlandula aṅgwe: Kuhi, Zumbe? Azawati: Hena vundile ne ngwilizi zihokaungananilana.
موجودہ انتخاب:
Luka 17: KISHNT05
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Kishambala © Bible Society of Tanzania, 2005.
