:Jororn' 9
9
:Yusu' 'puh-dih: 'yu :due' :or 'wluh-dih:-a 'dor-a'
1Eh :korn 'we-eh :due', :yeh :Yusu'-a na :gwie bo, :yee' or 'ye 'yu :due' :or 'wluh-dih:-a 'dor-a'. 2:Yeh or-a'a: bo :na-nyor⧾ 'ye-a 'yu :dao' :ke, :yee' on dhele: :Yusu'-: dih, on 'dae:, Nyor⧾ deh :torne-nyor:, :or :korn deh⧾-zon:⧾ no-eh, 'de 'yu :daa, or 'wluh-dih: 'dor-a' :eh? Or-a' 'jeh 'yor-eh :e? :Ae' or 'de-: 'dekorn: or :baa' :oo'-: ke?
3'De or 'da, Eh :se or-a' deh⧾-zon:⧾, 'de mor eh :se or 'de-: 'dekorn: or :baa'-: an-a' :ne :ke. Eh :no-eh:-', 'de Nyorsoa-a' 'kpih 'ye 'ye-eh: 'do or 'bhun. 4:Dha glu 'see-a goor-dih, :a :korn :a 'ye nyor :or dbo-a 'on, or-a' :koan no. Glu-a mu :gor. :Yee' nyor :se-' :koan: :no-eh 'beh-dih: i. 5:Yee' :ka eh mu-a 'dlu-' :tehn, 'de 'an mu-a dha yao 'zorn :ne, 'mor-: no dha 'bluhba ken-a' zorn-pli.
6:Yeh :Yusu' gweh-a deh :daa, eh-a' :za-a' 'i, :yee' or po 'o :dhehmeh 'do 'bluhbor, 'de or zian-dih-eh 'bluh. 'De or 'duo: 'bluh :dao', or tli-uh 'o 'yu :dao' 'yli ken. 7:Yeh :Yusu' no :ao', :yee' or zela-or-: :gwluhuh', or 'dae:, Mu, :on 'ye 'yi dih :dle, 'do :Silo'a-pehnu worn 'i. (:Silo'a :bleh-dih: 'i, Nyor :dbo-eh:.) :Yee' 'yu :dao', or mu-', 'de or :dle 'yi dih. :Yee' or 'ye-: dih, 'de or mu 'gbu bo.
8:Yeh nyor⧾ :on :ne or 'ti-a :dha :due'-: 'dekorn: nyor⧾ :yuh 'ye-or ti or zlor-a :dee'-: on 'ye-or, :yee' an wlu-' 'de an-a' 'jeh 'nyne-', on 'da, Eh :se 'yu :daa, :or 'dor-a, 'de :or zlor-a :dee' :e?
9:Yee' :noo' 'da, Or-: 'o.
'De :noo' 'da, 'Kei:, eh :se or :mor. On goor-dih:-'.
Jorwor: or-a' 'jeh 'yor-eh :wlu-', or 'dae:, 'Mor-: 'o.
10:Yeh or 'da :ao', :yee' on dhele-or-: dih, on 'dae:, :Yee' :kaa :an-a' 'yli no 'i kan-dih-eh: 'da :eh?
11'De or 'dae: 'de on bo, 'Yu an 'da-dih-a :Yusu', or-: po 'bluh :dhehmeh bo, 'de or tli-uh 'o 'do 'on 'yli ken. :Yeh or tli-uh-a 'o, :yee' or dbo 'on 'weh 'do :Silo'a-pehnu worn 'i, 'on 'ye 'yi dih :dle. :Yee' 'on mu 'de 'weh, 'de 'on :dle 'yi dih. :Yee' 'an 'ye-: dih.
12'De on 'da, Dha 'yu-a' 'jeh :dao', or :ne :eh?
'De or 'da, 'On se 'o yubo:.
:Falasi'i-nyor⧾-a zi-dih 'yu :or 'puh-a, zabe ken dih
13:Yee' on :ya 'de 'yu :dao' :or 'dor-a :dee', 'de :Falasi'i-nyor⧾ bo. 14'Do Nyorsoa-a' :gwlee-we-eh 'di :oo', :Yusu' :no-dih: 'bluh, 'de or kan-dih: 'yu :dao', :or 'dor-a, or-a' 'yli 'i. 15'De :Falasi'i-nyor⧾ dhele-or dih :ke, on 'dae:, :Kaa :on no dih 'ye-a' :eh?
:Yeh on dhele-or dih, :yee' or 'da, :Yusu' tli 'o 'bluh 'do 'on 'yli ken. :Yeh or tli-uh-a 'o, 'de 'on :dle-a 'yi dih, :yee' 'an 'ye-: dih.
16:Yee' :Falasi'i-nyor⧾-a' nyor⧾ :noo' 'da, 'Yu :or no-a deh :daa, or :se 'de Nyorsoa bo 'wluh. Deh no-eh, or :se 'o Nyorsoa-a' :gwlee-we-eh-a' 'tele' dih dhe.
:Yee' :noo' 'da, :Kaa nyor :or 'dhu-a deh⧾-zon:⧾ :no-nyor-', or 'beh-dih: or 'ye deh :kolu' :eh :ne :ao', eh-a' no-a' no :eh? :Yee' :Falasi'i-nyor⧾ :gble-eh:-' 'weh 'de on 'nyne-'.
17'De on dhele: 'yu :or 'dor-a :dee' dih :neheh', on 'dae:, :Mor 'o :or :korn 'yli or kan-dih: 'i. :Yee' :kaa :on 'da or-a' dhih :eh?
'De or 'da, Nyorsoa-a' wele-eh: :po-nyor: 'o.
18Jorwor: :Jueh'-nyor⧾-a' nyor⧾ :na-dih-nyor⧾ :se-eh' dhih 'jeh-' po :chio'lo:, :ka 'yu :daa, or 'dor-a :dee', 'de or 'ye-a dih :naa. Eh-: :korn dhih, 'de on dbo or 'de-: 'dekorn: or :baa'-: wlu bo. 19:Yeh or 'de-: 'dekorn: or :baa'-: on yi-a 'de, :yee' on dhele-uh-: dih, on 'dae:, A-a' 'yu :oo', :or :dhe dih :e, a no-a or 'wluh-dih: 'dor-a'? :Kaa eh no, 'de or 'ye dih :naa :eh?
20'De on 'da, :A yubo-eh', :a-a' 'yu :oo'. 'De :a yubo-eh', :ka or 'wluh-dih:-a 'dor-a'. 21Jorwor: :ka or no-a dih 'ye-a'-: 'dekorn: nyor :or kan-dih:-a or-a' 'yli 'i-: :a se-or yubo:. A dhele-or dih. Or :se 'yu-yu:. Or 'beh-dih: eh-a' bo dih zela-eh 'weh. 22Deh :korn-a dhih on 'da :ao', an ple :Jueh'-nyor⧾-a' nyor⧾ :na-dih-nyor⧾-a' 'yli 'weh. Deh no-eh, :Jueh'-nyor⧾-a' nyor⧾ :na-dih-nyor⧾ za-eh' 'weh 'de an-a' 'jeh 'nyne-', 'de on 'worn-dih-eh ken dih, :eh :mor nyor :or mu-eh 'i 'worn-dih: :ka :Yusu' no-a Nyorsoa-a' 'taan'-yu, :yee' an mu-or 'zorn :po, or 'ye 'de an-a' 'di :gweh-dih-sla 'zorn 'wluh. 23Eh-: :korn dhih, or 'de-: 'dekorn: or :baa'-: on 'da, Or :se 'yu-yu:. A dhele-or dih.
24:Yee' on 'da 'yu :or 'dor-a :dee' 'weh :neheh' :dele' ka, on 'da, :Za dhih-a' 'yor-eh 'do Nyorsoa ybei'. :A :mor :mloror', :a yubo-eh', 'yu :daa :or 'puh-dih:-a :on, or-: deh⧾-zon:⧾ :no-nyor: 'o.
25'De or 'da, :Mor or 'dhu deh⧾-zon:⧾ :no-nyor-', 'on se-eh yubo:. Deh :due' 'on yubo:-a, 'on 'dor-' :dee', jorwor: 'an 'ye-: dih :naa.
26'De on 'da, Deh or :no-dih: :on :eh? :Kaa or no :an-a' 'yli-a' 'yi kan-dih-eh :eh?
27:Yeh on dhele-or dih, :yee' or 'dae:, 'On zela: a :gwluhuh' 'weh see. 'De a :se-' 'an wlu :dou'⧾ bo :to. :Eh :korn dhih, a 'bhorn a 'ye-eh' 'worn :neheh' :eh? A 'bhorn a 'ye or-a' bo :na-nyor⧾ no :ke :e?
28:Yeh or 'da :ao', :yee' on 'wor-dih-or 'dlu dih, on 'da, :Mor :mloror', :mor 'yu :dao', or-a' bo :na-nyor: 'o. Jorwor: :a :mor :mloror', :a :mor :Mose'-a' bo :na-nyor:⧾ 'o. 29:A yubo-eh', Nyorsoa :wlu-' 'de :Mose' bo. Jorwor: 'yu :yor :daa :mloror', :dha or 'wluh-a, :a se 'o yubo: :sloror'.
30'De or 'da, Deh :daa, eh no nyor⧾-a' :porluh:⧾ 'ma-dih-deh:. A se :dha or 'wluh-a yubo:, jorwor: or kan-dih: 'an 'yli-: 'i. 31:A yubo-eh', :ka Nyorsoa-a' :to-a deh⧾-zon:⧾ :no-nyor⧾ :dou'⧾ bo. 'De :a yubo-eh', nyor⧾ :an za or-a' :weheh', 'de :an no-a or-a' 'ton :korn-deh, mo-: or :to :dou'⧾ bo. 32:Eh 'wluh-a 'de 'bluhba-a' glu 'dhu 'da, nyor 'see-eh 'worn :zai', :eh :mor nyor :or 'wluh-dih:-a 'dor-a', nyor 'ye or-a' 'yli 'i kan-dih:. 33:Mor 'yu :dao', or :se 'de Nyorsoa bo 'wluh :dee', or se 'beh-dih: or 'ye deh no.
34:Yeh or 'da :ao', :yee' on :wlu-' 'de or bo, on 'dae:, :Mor :or 'wluh-dih:-a 'de deh⧾-zon⧾ 'nyne-', :mor 'o :or torne :a deh :e? :Yee' on po-or-: 'zorn, on za-or 'de an-a' 'di :gweh-dih-sla 'di 'weh.
Nyor⧾ :an 'da-dih-a an-a' 'jeh dih 'yee'-nyor⧾
35:Yee' :Yusu' 'worn-ih' :ka on po-or 'zorn. :Yeh or 'ye-or, :yee' or dhele-or-: dih, or 'da, :On po 'yu an 'da-dih-a Nyor-kpalu-a' 'yu, or-a' dhih dhih 'jeh-' 'weh :e?
36'De 'yu :dao', or 'da, Nyor :klaba', zela: 'on :gwluhuh', or-a' 'nyne :eh? 'De 'on 'ye or-a' dhih dhih 'jeh-' po.
37'De :Yusu' 'da, :On 'ye-or' :weh. Nyor :or wlu-a 'de :on bo, or-: 'o.
38:Yeh :Yusu' 'da :ao', :yee' or 'da, :Gwlor :baa', 'on po :an-a' dhih-' dhih 'jeh. :Yee' or 'jli-: dih 'do or 'zorn, or za-or :weheh'.
39'De :Yusu' 'da, 'On yi dha yao 'zorn, 'de zabe 'ye :zi-eh:. 'De nyor⧾ :on 'dor-a, on 'ye dih 'ye. 'De nyor⧾ :an 'ye-a dih, on 'ye 'dor.
40:Yee' :Falasi'i-nyor:⧾ :noo' :on :ne-a 'o or bo, on 'worn deh or :za-a-' 'weh. :Yeh on 'worn-ih'-a, :yee' on dhele-or-: dih, on 'dae:, :An 'bhorn :on 'ye :a :gwluhuh' zela: :eh :mor :a 'dor-' :ke :e?
41'De :Yusu' 'da, :Mor eh 'dhu, a 'dor, :yee' deh⧾-zon⧾-a' zabe :se-' a :kpon i :dee'. Jorwor: :ka a no-a, a 'ye-: dih, :yee' deh⧾-zon⧾-a' zabe kpon a 'weh.
موجودہ انتخاب:
:Jororn' 9: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
