:Jororn' 10
10
'Blae'⧾-a' 'yli-eh bo 'dhu-nyor-a' 'dlan
1:Yee' :Yusu'-a kpa or-a' wlu 'dlu bo, or 'dae:, Dhih 'jeh, 'an zela a :gwluhuh', nyor :or se-a 'de 'blae'⧾-a' kpo-a' :kpaa' 'worn :yi-dih:, 'de :or 'ya-a kpo ya dih, 'de :or 'si-a 'de or 'di dih, :yee' nyor :dao', or-: 'ylii'-nyor: 'o. 2Jorwor: nyor :or :yi-dih:-a 'do :kpaa' 'worn, 'de :or pa-a, :yee' or-: or-a'a: 'blae'⧾-a' 'yli-eh bo 'dhu-nyor: 'o. 3:Yee' :kpaa'-a' 'yli-eh bo 'dhu-nyor :za 'o :kpaa' 'weh 'do or bo. 'De 'blae'⧾ 'worn en-' 'yli-eh bo 'dhu-nyor-a' wlu 'weh. Or 'da en-' 'nyne, 'de en zi 'o or klei', or 'si-dih-ih 'zorn. 4:Mor or 'si-dih: en-' klehkpeh 'zorn, :yee' or 'kpa 'de en ybei', 'de en zi 'o or klei', deh no-eh, en yubo: or-a' wlu 'weh. 5En :se 'o nyor 'plo klei' :zi i. Deh no-eh, en se or-a' wlu yubo:. :Yee' en mu :ple, en 'ye 'o or klei' 'wluh.
6'Dlan :daa, or-: :Yusu' po 'de, 'de on bo. Jorwor: on :se-or' dih 'worn.
:Yusu', or-: 'dhu 'blae'⧾-a' 'yli-eh bo 'dhu-nyor: 'jeh nor-'
7:Yee' :Yusu' :wlu-' :neheh' 'de on bo, or 'dae:, Dhih 'jeh, 'an zela a :gwluhuh', 'mor 'dhu :kpaa' :or :ne-a 'o 'blae'⧾ worn 'i-'. 8Nyor⧾-a' klehkpeh, :on yi-a 'on ybei' :zai', on no 'ylii'-nyor:⧾ 'tene' :kpeen:. Jorwor: 'blae'⧾ :se-uh' :dou'⧾ bo :to. 9'Mor no :kpaa'. :Mor nyor-beh-nyor-beh :yi-dih: 'on-', 'de or 'ye pa, :yee' or mu 'puh-:. Or mu :pa, 'de or 'ye 'zorn 'si, :yee' or mu dii-deh 'ye-:. 10'Ylii'-nyor yi-: 'de 'klein', or 'ye 'yli, or 'ye nyor⧾ 'dba, 'de or 'ye deh⧾ 'kor-dih:. Jorwor: 'on yi-: 'de, 'de 'an-a: 'blae'⧾ 'ye 'kmo :ne, 'de 'kmo an mu-a-' :ne, on 'ye 'mona-' dih 'yi-dih:.
11'Mor no 'blae'⧾-a' 'yli-eh bo 'dhu-nyor: 'jeh nor. :Yee' 'blae'⧾-a' 'yli-eh bo 'dhu-nyor: 'jeh nor-a 'worn-dih-eh ken dih 'weh, or 'ye or-a' :febeh' 'kwla :za, or 'ye 'meh, 'do or-a'a: 'blae'⧾-a' dhih bo. 12Nyor an za-a geli', :or 'ye-a' 'blae'⧾ 'yli-eh bo 'dhu, or :se 'blae'⧾-a' 'yli-eh bo 'dhu-nyor:, :or :korn-a 'blae'⧾. :Yee' eh-a' dhih, :mor or 'ye ji, eh :taa 'de yi, :yee' or sie 'blae'⧾ 'weh, or ple, or mu-'. :Yee' ji-a 'kpa 'de 'blae'⧾ 'nyne-' 'weh, 'de en gboba-' dih. 13'Yu :dao', or ple-', deh no-eh, an za-or geli', or 'ye 'o 'blae'⧾ bo dih pobo:. Eh-: :korn dhih, or se en-' ti :korn. 14'Mor no 'blae'⧾-a' 'yli-eh bo 'dhu-nyor: 'jeh nor. 'On yubo: 'an-a: 'blae'⧾ 'weh. 'De en yubo: 'on 'weh :ke. 15'Ka-: 'On-ba no 'an yubo-eh, 'de 'on no or-a' yubo-eh :ke. :Yee' 'on 'worn-dih-eh ken dih 'weh, 'on 'ye 'an :febeh' 'kwla :za, 'on 'ye 'meh, 'do 'an-a: 'blae'⧾-a' dhih bo. 16'On 'ble 'blae'⧾ :nee', me-: se 'noror 'blae'⧾-a' kpo :daa 'di :ne. 'On :korn 'on 'ye-ih' 'de :ya :gbor :gbor :ke. En mu 'an wlu :dou'⧾ bo :to :ke, 'de en-' klehkpeh 'ye deh :due' no, en 'ye 'yli-eh bo 'dhu-nyor :due' 'ble.
17Deh :korn-a dhih 'On-ba :ybeh-a 'on, eh-: 'dhu, 'on 'worn-dih-eh ken dih 'weh, 'on 'ye 'an :febeh' 'kwla :za, 'on 'ye 'meh, 'de 'on 'ye-eh' 'ye :dele' ka. 18Nyor :se-eh' 'on 'kwa :za i. Jorwor: 'an 'jeh 'yor-eh: 'worn-dih-eh ken dih, 'on 'ye-eh' 'kwla :za, 'on 'ye 'meh. 'On 'ble 'kpih, 'on 'ye-eh' 'kwla :za, 'de 'on 'ble 'kpih, 'on 'ye-eh' 'ye :dele' ka. 'Ka :wor 'On-ba no 'an :gwluhuh' zela-eh, 'on 'ye no.
19:Yeh or :za-a deh :daa-', :yee' :Jueh'-nyor⧾-a' nyor⧾ :na-dih-nyor⧾ :gble-eh:-' 'weh :neheh', 'de on 'nyne-'. 20An-a' :dha :dhulu' 'da, 'Kwla 'ye-dih-deh: :ne 'o or 'de, eh-: no-dih-or sena. :Yee' :eh :korn dhih, a to or-a' wlu :dou'⧾ bo :eh?
21Jorwor: :noo' 'da, Nyor 'kwla 'ye-dih-deh⧾ :ne-a 'o 'de, or-a' no :ao' :wlu-a'. 'Kwla 'ye-dih-deh 'beh-dih: eh 'ye nyor-a' 'yli 'i kan-dih: :e?
:Jueh'-nyor⧾ :se-' :Yusu'-a' dhih ken dih 'worn-dih:
22Ti on :za-a Nyorsoa-a' 'sla 'kwla, 'de Nyorsoa bo, 'de :Julu'slehn, me-: :korn gor-a' ti nyni 'o. 'Do ti :dao' 'di, :yee' eh no :chehbe'-a' ti. 23:Yee' :Yusu'-a na-' 'do Nyorsoa-a' 'sla-a' 'for :noror', :on 'dhu-dih-a :Salomor'-a' 'zorn :forn-dih-da-nyne. 24:Yeh or :ne-a 'de, :yee' :Jueh'-nyor⧾ po-or 'de :kuo 'di, 'de an dhele-or dih, on 'dae:, :Bleheh :eh, :an mu 'de :a 'di dih :florn-dih: :eh? :Mor :on 'dhu Nyorsoa-a' 'taan'-yu-', :yee' zela: :a :gwluhuh' deh 'jeh neh.
25:Yeh on 'da :ao', :yee' or 'da, 'On zela: a :gwluhuh' 'weh. Jorwor: a :se 'on dhih 'jeh-' po. Deh⧾ :kolu'⧾ 'an no-a, 'de 'On-ba-a' 'nyne 'di, me-: zela: 'an dhih ken dih, nyor 'on 'dhu-eh:-'. 26Jorwor: a :se 'on dhih 'jeh-' po. Deh no-eh, a :se 'an-a: 'blae'⧾. 27'An-a: 'blae'⧾ 'worn 'an wlu 'weh. 'De mor :ke, 'on yubo-ih', 'de en zi 'o 'on klei' 'weh. 28'De 'on 'nyi-ih 'kmo :sie: :febeh'. 'Do eh-a' dha, en :se-' gbe :zie: i, :ka ti-a mu-a 'dlu-' :tehn. 'De nyor se 'beh-dih: or 'ye-ih 'de 'on 'kwa :za. 29'On-ba: :or 'nyi-ih-a 'on, or 'beh-: 'i, or :zi 'o nyor⧾-a' klehkpeh-'. Nyor se 'beh-dih: or 'ye-ih 'de 'On-ba 'kwa :za. 30'On-ba-: 'dekorn: 'mor-: :a no deh :due'.
31:Yeh :Jueh'-nyor⧾-a' nyor⧾ :na-dih-nyor⧾ 'worn-a deh :daa, :yee' on 'duo: sobu'⧾ 'weh :neheh', on 'ye-or dih :tba-dih:, on 'ye-or' 'dba. 32:Yeh on no :ao', :yee' :Yusu' :wlu-' 'de on bo, or 'dae:, 'On :to-dih: a deh⧾ :kolu'⧾ :doru', 'On-ba zela:-a 'on :gwluhuh', 'on 'ye-a' no. :Yee' deh⧾ :daa 'on no-a, en-' :yihih :eh, :en :nyni 'yi dih, 'de a 'bhorn a 'ye 'on sobu'⧾ dih :tba-dih:, 'on 'ye 'meh :eh?
33'De on 'da, Eh :se deh⧾ 'jeh :on no-a en-' dhih, :a :se-' :on sobu'⧾ dih :tba-dih-eh 'bhorn. Jorwor: deh no-eh, :mor :or 'dhu-a :gwlor-nyor-' 'klein', :mor 'o :or 'duo: :an-a' 'jeh-', :or 'ye Nyorsoa no. :Yee' :an 'kor-dih Nyorsoa-a' 'nyne 'weh.
34'De :Yusu' 'da, Eh :se-' 'chle-eh:, 'de :Mose'-a' 'tele'-chlee-deh 'di, :eh :mor Nyorsoa 'da, A :mor nyorsoa⧾ :oo' :e?
35:A yubo-eh', :ka deh Nyorsoa-a' 'chlee-deh :za-a-', eh 'dhu-a dhih-a' 'yor-eh-' :ka ti-a mu-a 'dlu :tehn. :Mor eh 'dhu, Nyorsoa 'da-dih: nyor⧾ or :wlu-a 'de bo, nyorsoa⧾, 36:yee' :eh :korn dhih, :mor 'on 'da, 'Mor Nyorsoa-a' 'Yu :oo', 'de a 'da, 'an 'kor-dih or-a' 'nyne 'weh 'da :eh? 'Mor-: 'o, or tba :jii-eh, 'de or dbo 'on 'noror yao 'zorn. 37:Mor eh 'dhu, 'on se 'On-ba-a' :koan no, :yee' a-a' :po-' 'on dhih 'jeh-'. 38Jorwor: :mor eh 'dhu, 'on no 'On-ba-a' :koan, keen' :mloror' a :se-' 'on dhih 'jeh-' po, jorwor: deh⧾ :kolu'⧾ :dao' 'on no-a, me-: a 'ye dhih 'jeh-' po, 'de a 'ye-eh' yubo: deh 'jeh, :ka 'On-ba :ne-a 'on-', 'de 'on ne-or' :ke.
39:Yeh or 'da :ao', :yee' an vorn-', on 'ye-or' kpon :neheh'. Jorwor: or 'dhan 'de on 'kwa-: dih.
40'De or mu 'de 'Jorle-ni-a' 'yluh-a' 'kwla 'wluh-dih: 'da de :neheh', 'do :dha :Jororn' po-dih-a nyor⧾ 'ni 'dlu :dee'. 'Do :wor or :ne, 41'de nyor⧾ :dhulu' yi 'de or bo, on :wlu 'de an-a' 'jeh 'nyne-', on 'dae:, Keen' :mloror' :Jororn' :se-' nyor⧾ 'yi :to-dih-deh 'i :to-dih:, jorwor: deh⧾-a' klehkpeh or :za-a-' 'do nyor-kpalu: :daa 'bhun, en no dhih-a' 'yor-eh:. 42:Yee' nyor⧾ :dhulu' po :Yusu'-a' dhih dhih 'jeh-' 'do :dha 'o.
موجودہ انتخاب:
:Jororn' 10: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
