:Jororn' 8
8
1Jorwor: :Yusu' mu 'de 'Orle-tluh ken. 2:Yee' zorn bo-mlai', or mu 'o Nyorsoa-a' 'sla ybei' de. :Yee' :gwlor-nyor⧾-a' klehkpeh yi 'o or bo, 'de or :dhe dih, or torne-uh deh. 3'De nyor⧾ 'tele' :torne-nyor⧾-: 'dekorn: :Falasi'i-nyor⧾-: on :ya 'de or bo, 'nynor :or 'si-a 'o 'nyne :zaan' :no 'da, 'de on kpon-a. :Yee' on no-eh', 'de or :nyna dih 'do an-a' klehkpeh ybei'. 4'De on :wlu 'de :Yusu' bo, on 'dae:, Nyor⧾ deh :torne-nyor:, 'nynor :daa, or 'si 'o 'nyne :zaan' :no 'da, 'de :a kpon-or. 5:Mose'-a' 'tele' za-eh' 'weh 'de or-a' 'chlee-deh 'di, :eh :mor 'nynor :or no-a deh :ne :ao', :yee' :a :tba-dih-or sobu'⧾ dih, :a 'ye-or' 'dba. :Yee' :kaa :on 'da :ke :eh? 6Deh :korn-a dhih, 'de an dhele-a deh :daa dih, pluh :oo', an gba. An 'bhorn :ka on 'ye-a' no, 'de on 'ye-or' dhih :kpon-dih:. Jorwor: :Yusu' 'jli-: dih 'do 'bluhbor, 'de or no or-a' :jii-eh, or 'chle 'o 'bluhbor dih.
7:Yeh on dhele-or dih :dhelee:, :yee' or kpa 'dlu yai', or :nyna dih, or 'dae:, Nyor :or 'see-a deh-zon no :zai', 'de a 'klu-', :yee' nyor :dao', or-: 'ye :zai'-nyor no, :or 'ye-or sobu' tba. 8:Yeh or 'da :ao', :yee' or 'jli-: dih :neheh', 'de or 'chle 'bluhbor dih. 9:Yee' nyor :yor :or 'worn-a deh :Yusu' :za-a-', :yee' or mu-', on 'slo-eh: :due' :due', on 'wluh 'o. :Yuh 'beh-a 'i, mo-: no :zai', :on mu. Eh-: on 'ble :blee:, 'de :Yusu' :due' :sie: 'o. :Yee' 'nynor :nyna dih 'do or ybei' 'gboror:. 10'De :Yusu' kpa 'dlu yai', or :nyna dih, or dhele-or dih, or 'dae:, 'Nynor, dha nyor⧾ :on :ya-a: 'de :on, on :ne :eh? Nyor :se-' :an-a' zabe 'i chehn :e?
11'De 'nynor 'da, Nyor :klaba'. Nyor-beh-nyor-beh :se-' 'an zabe 'i chehn.
'De :Yusu' 'dae: 'de or bo, 'On :se-' :an-a' zabe 'i :chehn i :ke. 'Kpa 'o, :on 'ye mu. Jorwor: :an-a' :no-' deh-zon :neheh' o.]
:Yusu' no zorn-pli: 'do nyor⧾ :on :ne-a 'noror 'bluhba ken bo
12:Yee' :Yusu' :wlu-' 'de :Falasi'i-nyor⧾ bo :dele' ka, or 'dae:, 'Mor 'dhu 'bluhba-a' zorn-pli-'. Nyor :or mu-a 'o 'on klei' :zi, or :se-' :kule-' :na i. Jorwor: or mu zorn-pli: :en 'nyi-a nyor⧾ 'kmo :sie: :febeh' 'ble-:.
13:Yeh or 'da :ao', :yee' :Falasi'i-nyor⧾ :wlu-' 'de or bo, on 'dae:, :An zela :an-a' 'jeh-a' dhih ken dih. Deh⧾ :an zela-a ken dih, 'do :an-a' 'jeh 'bhun, en se deh-' 'dhu-eh:.
14'De or 'da, :Mor 'an 'jeh zela: 'an 'jeh-a' dhih ken dih, :yee' dhih 'an za-a-', en no dhih 'jeh :ne. Deh no-eh, 'on yubo: :dha 'on 'wluh-a 'weh, 'de mor 'on yubo: :dha 'an mu-a 'weh. Jorwor: a :mor :mloror', :dha 'on 'wluh-a, 'de mor :dha 'an mu-a, a se eh-a' :toror' 'ble. 15A zi nyor⧾-a' zabe: 'de :gwlor-nyor: ka 'di. Jorwor: 'an-a' 'worn, 'an-a' zi nyor-a' zabe. 16Jorwor: :mor 'on zi nyor-a' zabe, :yee' 'an zabe: :zi-eh 'sleh-: 'i. Deh no-eh, 'on se :due' :ne. 'On-ba: :or dbo-a 'on, or-: :ne 'o 'on bo. 17Eh 'chle-eh:-' 'de a-a' 'jeh 'yor-eh-a'a: 'tele' 'di, :mor nyor⧾ 'sororn' zela: deh :due' ken dih, :yee' deh :dao', eh no dhih 'jeh. 18'On no nyor :or zela-a 'an 'jeh-a' dhih ken dih. :Yee' 'On-ba: :or dbo-a 'on, or-: zela 'an dhih ken dih :ke.
19:Yeh or 'da :ao', :yee' on 'da, Dha :on :Baa'-a' 'jeh :ne :eh?
'De or 'da, A se 'on yubo:. 'De mor a se 'On-ba yubo: :ke. :Mor eh 'dhu, a yubo: 'on :dee', :yee' a mu 'On-ba yubo: :ke.
20:Yee' ti :Yusu'-a torne-a nyor⧾ deh, 'do Nyorsoa-a' 'sla ybei', :or 'koan'-dih:-a 'o, :dha an :za-dih:-a 'wlii dih, 'do :wor or :za-dih: deh⧾ :daa-'. Jorwor: nyor :se-or' kpon, deh no-eh, ti on :korn on 'ye-or' :kpon-dih:, en se 'o nyni.
:Yusu' 'wluh 'de Nyorsoa 'bli yai'
21:Yee' :Yusu' :wlu-' 'de nyor⧾ :dao' bo :dele' ka, or 'dae:, 'An mu dha :mu. :Yee' a mu 'on 'kwla⧾-' dih 'bhorn-:, jorwor: a mu 'de a-a' deh⧾-zon⧾ 'di 'meh-dih:. :Dha 'an mu-a, a se 'o-a' mu-a' 'beh-dih:.
22Deh or :za-a-', eh-: no-eh, 'de :Jueh'-nyor⧾-a' nyor⧾ :na-dih-nyor⧾ dhele-eh dih, on 'dae:, Or mu or-a' 'jeh 'dba-: :e? Eh-: :korn dhih 'de or za deh :daa-', :eh :mor, :Dha 'an mu-a, a se 'beh-dih:, a 'ye 'o yi :e?
23:Yee' or kpa or-a' wlu 'dlu bo, or 'dae:, A 'wluh dha yao 'zorn, 'de 'on 'wluh 'de yai'. A no 'kmo bo-nyor:⧾ 'de 'on :se 'kmo bo-nyor:. 24'On zela: a :gwluhuh' 'weh see, :ka a mu-a 'de a-a' deh⧾-zon⧾ 'di 'meh-dih:. :Mor eh 'dhu, a se-eh dhih 'jeh-' po nyor 'on no-a, 'on 'dhu-eh:-',#8.24 Deh :daa :Yusu'-a :za-a-', eh :bleh-dih: 'i :ka or 'dhu-a 'kmo :ne-Nyorsoa-'. :yee' a mu 'de a-a' deh⧾-zon⧾ 'di 'meh-dih: deh 'jeh.
25'De on 'da, Nyor :on 'dhu-eh:-' :eh?
'De or 'da, :Eh 'wluh-a 'de eh-a' glu 'dhu 'da, deh 'on :za-a-', eh-: 'o. 26'On 'ble deh⧾ :dhulu', 'on 'ye 'o a 'bhun :za-dih:, 'do a-a' zabe: :zi 'da. Jorwor: 'On-ba: :or dbo-a 'on, or no :gwlii' :dhe-nyor:, 'de deh 'on 'worn-a 'de or 'worn, eh-: 'an zela 'bluhba :gwluhuh'.
27:Yeh or :za-a deh :daa-', :yee' on se-eh-' dih 'worn, :ka eh 'dhu-a or :Baa' dhih-' or za-a-'. 28'Do eh-a' dha, or 'dae: 'de on bo, Ti a mu-a 'yu an 'da-dih-a Nyor-kpalu-a' 'yu yai' :to, 'do tu 'i, :yee' a mu-eh yubo: nyor 'on no-a, 'on 'dhu-eh:-', 'de :ka 'an-a' no-a deh 'de 'an 'jeh-a' 'kpih 'di, jorwor: deh⧾ 'On-ba :torne:-a 'on, me-: 'an za-'. 29'De nyor :or dbo-a 'on, or :ne 'o 'on bo 'weh. Or :se-' 'on buh 'de :za i, deh no-eh, deh⧾ :en 'pehn-dih-a or-a' :porluh dih, me-: 'an no 'do ti-a' klehkpeh bo.
30:Yee' :ka or wlu-a, 'ka-: :gwlor-nyor:⧾ :doru'-a po or-a' dhih dhih 'jeh-'.
:Or 'dhu 'ge-yu-' :eh?
31:Yee' :Yusu' :wlu-' 'de :Jueh'-nyor⧾-a' :yuh :on po-or dhih 'jeh-' bo, or 'dae:, :Mor eh 'dhu, a kpon 'an nyor⧾ deh :torne-eh: :daa dih, :yee' a :mor 'an-a: bo :na-nyor:⧾ 'o 'jeh ka. 32:Yee' a mu dhih-a' 'yor-eh yubo:, 'de dhih-a' 'yor-eh: :dao', me-: mu-eh :no, a 'ye 'de deh⧾-zon⧾-a' 'gegeye 'zorn 'wluh, 'de a 'ye dih 'tali-eh:.
33:Yeh or 'da :ao', :yee' on :wlu-' 'de or bo, on 'dae:, :A :mor 'Eble'hehn 'di-a' 'nynuu: 'o. 'De mor :a 'see nyor-a' 'ge-yu no :zai'. :Yee' :kaa eh no 'de :on 'da, :a mu dih 'tali-eh :eh?
34'De :Yusu' 'da, Dhih 'jeh, 'an zela a :gwluhuh', nyor-beh-nyor-beh: :or no-a deh⧾-zon⧾, :yee' or no 'ge-yu: 'do deh⧾-zon:⧾ or no-a bo. 35'De mor 'ge-yu se 'for 'ble 'do neh 'i, jorwor: nyor-kpalu: :or 'wluh-a 'o 'cheh-dlu: :dao' 'i, or-a'a: 'yu 'ble 'for, :ka ti-a mu-a 'dlu-' :tehn. 36:Yee' 'do eh-a' dha, :mor Nyorsoa-a' 'Yu 'tali: a-a' deh⧾-zon⧾-a' dhih dih, :yee' a mu dih 'tali-eh: deh 'jeh. 37'On yubo-eh', :ka a 'dhu-a 'Eble'hehn 'di-a' 'nynuu-'. Jorwor: a vorn-' :chio'lo:, a 'ye 'on 'dba. Deh no-eh, 'an wlu se :dhe-da :korn 'de a 'di. 38Deh 'on 'ye-a 'do 'On-ba ybei', eh-: 'an zela a :gwluhuh'. 'De deh⧾ a 'worn-a 'de a :baa' 'worn, me-: a no.
39'De on 'da, 'Eble'hehn:, or-: no :a :baa'.
'De or 'dae:, :Mor a 'dhu 'Eble'hehn 'di-a' 'nynuu-' :dee', :yee' a mu deh⧾ or no-a :no. 40:Ka eh no-a :ne-a' :naa, 'mor :or zela:-a a dhih-a' 'yor-eh: 'on 'worn-a 'de Nyorsoa 'worn :gwluhuh', 'mor-: 'o, a 'ble-dih-eh 'dlu 'di dih, a 'ye 'dba :naa. 'Eble'hehn :se-' deh no, eh se :ao' :ne. 41Deh⧾ a :baa' no-a, me-: 'o, a no.
'De on 'da, :A :se 'zorn-nynuu:. :Baa' :due' :a 'ble-a, or-: 'dhu Nyorsoa :due' 'klein'.
42'De or 'da, :Mor eh 'dhu, Nyorsoa 'dhu a :Baa' :dee', :yee' a mu 'on-' :ybeh. Deh no-eh, 'on 'wluh 'de Nyorsoa bo, 'de 'on :ne :daa. 'On :se 'de yi, 'de 'an 'jeh-a' 'kpih 'di, jorwor: or-: dbo 'on. 43:Eh :korn dhih, 'de deh⧾ 'an za-a-', a-a' 'worn-ih' dih :eh? Eh :se :ka a se-a en-' 'yi :nyna-eh 'beh-dih: :e? 44A :korn 'de a :baa' :or 'dhu-a 'ku-' bo, 'de a 'bhorn a 'ye a :baa'-a' 'ton :korn-deh no. Or no :nyor⧾ 'dba-nyor: :eh 'wluh-a 'de eh-a' glu 'dhu 'da, 'de or :se-' dhih-a' 'yor-eh dih kpon. Deh no-eh, dhih-a' 'yor-eh se 'de or 'di :ne. :Mor or 'tmo sih, :yee' or 'bli-deh: 'o, or no. Deh no-eh, or no sih 'tmo-nyor:, 'de or no sih 'tmo-nyor⧾-a' klehkpeh :baa'. 45Jorwor: 'mor :or za-a dhih-a' 'yor-eh-', a :se-' 'on dhih 'jeh-' po. 46A-a' nyor 'beh-dih: or 'ye-eh' ken dih zela: :eh :mor deh⧾-zon⧾-a' zabe kpon 'on :weh :e? :Yee' :mor eh 'dhu, 'on :taa dhih-a' 'yor-eh-' za, :yee' :eh :korn dhih, 'de a-a' po 'on dhih 'jeh-' :eh? 47Nyor :or :korn-a 'de Nyorsoa bo, or to deh⧾ Nyorsoa za-a-' :dou'⧾ bo 'weh. Deh :korn-a dhih a-a' :to-a deh⧾ Nyorsoa za-a-' :dou'⧾ bo, eh-: 'dhu, a se 'de or bo :korn.
:Yusu'-: 'dekorn: 'Eble'hehn-:
48:Yeh :Yusu' 'da :ao', :yee' :Jueh'-nyor:⧾ :dao', on :wlu-' 'de or bo, on 'dae:, Deh :a za-a-', :a no-a, :Mor Sehmeh'la-yu: 'o, 'de :on 'ble 'kwla 'ye-dih-deh 'do :on 'de, eh :se dhih 'jeh :e?
49'De :Yusu' 'da, 'On se 'kwla 'ye-dih-deh 'ble 'do 'on 'de. 'De mor 'an 'dhu 'o 'On-ba 'weh. Jorwor: a po 'on yaa'e. 50'On :se-' dhih-a' 'i 'beh-a' 'bhorn, 'do 'an 'jeh bo. Jorwor: nyor, or-: :ne 'o, or-: 'bhorn-eh 'kwla⧾-' dih, 'do 'on bo, 'de mor, or-: 'dhu zabe: :zi-nyor-'. 51Dhih 'jeh, 'an zela a :gwluhuh', nyor-beh-nyor-beh: :or dhe-a 'o 'an wlu dih, or :se-' 'meh-: i, :ka ti-a mu-a 'dlu-' :tehn.
52:Yeh or :za-a deh :daa-', :yee' on 'dae:, Jorwor: :a yubo-eh' :naa, :ka :on 'ble-a 'kwla 'ye-dih-deh 'do :on 'de. 'Eble'hehn 'meh-', 'de mor Nyorsoa-a' wele-eh: :po-nyor⧾ 'meh-' :ke. Jorwor: :mor :mloror', :on 'da, :mor nyor dhe 'o :an-a' wlu dih, or :se-' 'meh-: i, :ka ti-a mu-a 'dlu-' :tehn. 53:On 'beh-: 'i, :on :zi 'o :a :bai'-a' :baa' 'Eble'hehn-' :e? 'Eble'hehn-a' 'jeh :dao', or 'meh-'. 'De mor Nyorsoa-a' wele-eh: :po-nyor⧾ 'meh-' :ke. Nyor :an 'da-dih :an-a' 'jeh ke :eh?
54'De or 'da, :Mor eh 'dhu, 'on 'nyi 'an 'jeh dhih-a' 'i 'beh-a' :dee', :yee' 'an dhih-a' 'i 'beh-a' :dao', or se deh-' 'dhu-eh:. 'On-ba: a no-a :or 'dhu a-a' Nyorsoa-', or-: 'beh-dih 'an dhih 'i. 55Keen' :mloror', a se-or yubo: deh 'jeh, jorwor: 'mor :mloror', 'on yubo-or'. :Mor 'on 'da, 'on se-or yubo:, :yee' 'an mu sih 'tmo-nyor-' 'dhu-eh:, :ka a :ne-a. Jorwor: 'on yubo-or' deh 'jeh, 'de 'on dhe 'o or-a' wlu-: dih. 56:A :bai'-a' :baa' 'Eble'hehn no 'mona: or 'ye ti 'an mu-a 'de :ya 'ye. :Yeh or 'ye-dih-ih-a ybei', :yee' or-a' :porluh 'pehn-: dih.
57:Yeh or 'da :ao', :yee' on 'da, :Mor :or 'see-a zon⧾-a' :kwlaa :mm' no, :mor 'ye 'Eble'hehn :e?
58'De or 'da, Dhih 'jeh, 'an zela a :gwluhuh', :yeh 'Eble'hehn 'ye-a' 'wluh, :yee' 'on :ne-'.
59:Yeh on 'worn-a deh :daa, :yee' on 'duo: sobu'⧾-' 'weh, on 'ye-or dih :tba-dih:, on 'ye-or' 'dba. Jorwor: or 'zile: or-a' 'jeh 'weh, 'de or 'wluh 'o Nyorsoa-a' 'sla ybei', 'de or mu.
موجودہ انتخاب:
:Jororn' 8: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
