:Jororn' 7
7
:Yusu'-: 'dekorn: or-a' dei'-boi'-:
1:Yeh deh⧾ :daa, en no :ao', :yee' :Yusu'-a na :Galali'i-bluhba ken dih. Or :tehn-dih: :Judi'a-bluhba bo dih, deh no-eh, :Jueh'-nyor⧾-a' nyor⧾ :na-dih-nyor:⧾ :on :ne-a 'de, an 'bhorn :ka on 'ye-a' no, 'de on 'ye-or' 'dba. 2:Yee' :yeh :Jueh'-nyor⧾-a' :Ylehih'-gor-a' ti-a 'koan'-dih-a 'o dih, 3:yee' :Yusu'-a' dei'-nyor⧾-kpalu⧾ :wlu-' 'de or bo, on 'dae:, :On :korn :on 'ye dha :dha :daa 'wluh, :on 'ye 'de :Judi'a-bluhba ken mu, 'de :an-a'a: bo :na-nyor:⧾ :on :ne-a 'de, on 'ye deh⧾ :kolu'⧾ :an no-a 'ye. 4Deh no-eh, nyor :or 'bhorn-a nyor⧾ 'ye-or yubo:, :yee' or-a' no :koan 'de 'zile: ka 'di. :Ka :an no-a deh⧾ :daa, :yee' :to-dih: :an-a' 'jeh 'bluhba 'i. 5Deh :korn-a dhih or-a' dei'-boi' :za-a deh :daa-' 'de or bo, eh-: 'dhu, an-a' 'jeh :sloror', on :se-' or-a' dhih dhih 'jeh-' po.
6Eh-: no-eh, 'de or :wlu 'de on bo, or 'dae:, Ti 'jeh :en :korn-a 'de 'on bo, en 'see 'o nyni, 'on 'ye :Judi'a-bluhba ken mu. Jorwor: a :mor :mloror', ti-a' klehkpeh, en :nmor-: 'yi 'do a bo. 7'De 'kmo se 'beh-dih: on 'ye a-' 'nyeh. Jorwor: on 'nyeh 'on-' 'weh, deh no-eh, deh⧾ an no-a, en no deh⧾-zon:⧾. Me-: :korn dhih 'an za-a-', 8a :mor 'ye ybei' mu 'do gor :dao'. 'On :se-or' :mu i kele'a:. Deh no-eh, ti 'jeh :en :korn-a 'de 'on bo, 'on 'ye-a' 'de mu, en 'see 'o nyni. 9:Yeh or 'da :ao', :yee' or :sie: 'de :Galali'i-bluhba ken 'weh.
:Yusu' mu :Ylehih'-gor-'
10Jorwor: :yeh or-a' dei'-boi' mu-a gor :dao', :yee' or zi 'o on klei' 'weh :ke. Or :se 'i :nyeh, or :se 'o mu. Jorwor: or mu-' 'de 'zile: ka 'di. 11:Yee' :Jueh'-nyor⧾-a' nyor⧾ :na-dih-nyor:⧾ :on :ne-a 'o 'do gor :dao', an 'bhorn-dih-or 'yli-eh dih, 'de an dhele or-a' dhih dih, on 'da, Dha nyor-kpalu: :dao', or :ne :eh?
12:Yee' :gwlor-nyor:⧾ :dhulu', :on :ne-a 'o 'do gor :dao', an pa 'slan⧾ 'de an-a' 'jeh 'klu-', 'do :Yusu'-a' dhih bo. :Noo' 'da, Or-: nyor 'jeh :nor 'o. 'De :noo' 'da, A 'gbeh-'. Or :se nyor 'jeh :nor. Nyor⧾ dih :bo-dih-nyor: 'o. 13Jorwor: deh⧾-a' klehkpeh an no-a, nyor :or 'ye-a' 'i :nyeh, 'de :or 'ye-a' :wlu, or se :ne. Deh no-eh, an ple :Jueh'-nyor⧾-a' nyor⧾ :na-dih-nyor⧾ 'weh.
14:Yee' :yeh gor-a na-dih-a 'o gwea, :yee' :Yusu' mu 'o Nyorsoa-a' 'sla ybei', 'de or 'kpa 'o nyor⧾-a' deh :torne: 'da. 15:Yee' eh :florn-dih: :Jueh'-nyor⧾-a' nyor⧾ :na-dih-nyor⧾-: worn, on 'da, :Kaa 'yu :daa, :or se-a :zuku'-' mu, or no deh⧾ :daa, en-' yubo-eh deh :dao' :eh?
16:Yeh on 'da :ao', :yee' :Yusu' 'dae:, Deh⧾ 'an torne-a nyor⧾, en :se 'an 'jeh-a' nyor⧾ deh :torne-eh:. Jorwor: en 'wluh 'de Nyorsoa :or dbo-a 'on bo. 17Nyor :or 'bhorn-a :or 'ye-a' Nyorsoa-a' 'ton :korn-deh no, :yee' or mu-eh yubo:, :eh beh deh⧾ 'an torne-a nyor⧾, en 'wluh 'de Nyorsoa bo-: :eh beh 'an 'jeh-a' 'kpih bo-:. 18Nyor :or wlu-dih-a 'de or-a' 'jeh-a' 'kpih 'di, :yee' nyor :dao', or 'bhorn dhih-a' 'i 'beh-a' 'do or-a' 'jeh bo. Jorwor: nyor :yor 'bhorn-a dhih-a' 'i 'beh-a' 'do nyor :or dbo-or bo, :yee' nyor :dao', or za-' dhih-a' 'yor-eh:. Or-a' 'tmo sih. 19Eh :se :Mose' :se-' a Nyorsoa-a' 'tele' :daa 'nyi :e? Jorwor: eh se nyor :korn :or 'ye-a' 'o 'tele' :daa dih dhe 'de a 'klu-'. :Yee' :eh :korn dhih, 'de a vorn, a 'ye 'on 'dba :eh?
20:Yeh or 'da :ao', :yee' nyor⧾ :dhulu' :dao', on 'dae:, :On 'ble 'kwla 'ye-dih-deh: 'do :on 'de. Nyor :yoror :or vorn, or 'ye :on 'dba :eh?
21'De or 'da, 'On no deh :kolu' :due', 'de a-a' klehkpeh, a :florn worn. 22Keen' :mloror' :bhlororn' 'meheh'-tele' a 'ble-a, eh :se 'de :Mose' bo 'wluh. Eh 'wluh 'de a :bai'-a' :bai' bo. Jorwor: :ka :Mose' 'nyi-a a 'tele', a 'ye-a' nyor⧾-kpalu⧾-nynuu :bhlororn' 'dba, eh-: :korn dhih, a 'dba nyor⧾-kpalu⧾-nynuu :bhlororn', 'do Nyorsoa-a' :gwlee-we-eh 'di. 23:Mor a :taa nyor-kpalu-yu :bhlororn' 'dba, 'do Nyorsoa-a' :gwlee-we-eh 'di, :Mose'-a' 'tele' :ne-' :wa dhih, :yee' :eh :korn dhih, 'de a 'kpa-dih 'on 'chehn-', deh 'on 'puh-dih:-a 'gba-glao', 'do Nyorsoa-a' :gwlee-we-eh 'di :eh? 24:Yee' a-a' :zi-' nyor⧾-a' zabe, :ka a no-a an-a' ya pobo-eh. Jorwor: a zi nyor⧾-a' zabe, 'de 'yi 'sleh ka 'di.
:Yusu' no Nyorsoa-a' 'taan'-yu: :e?
25:Yeh eh no :ao', :yee' nyor⧾ :noo', :on 'ti-a :Julu'slehn, :yee' on 'kpa 'o eh-a' dih dhele: 'da 'weh, on 'dae:, Eh :se 'yu an vorn-a, on 'ye-a' 'dba, eh :se or :mor, or se dih :dhe :e? 26Or-: :nyna 'o :gwlor :gwea dih, or-: wlu. 'De on :se-' deh-beh :za 'de or bo. :A-a' nyor⧾ :na-dih-nyor⧾ 'worn-dih-eh ken 'weh 'jeh ka, :eh :mor 'yu :daa, or 'dhu-a Nyorsoa-a' 'taan'-yu-' :e? 27Jorwor: :dha 'yu :daa, or 'wluh-a, :a yubo: 'o 'weh. :Mor Nyorsoa-a' 'taan'-yu 'yle, :dha or mu-a 'wluh-:, nyor :se 'o yubo: i.
28:Yeh eh no :ao', :yee' :Yusu'-a torne nyor⧾ deh, 'do Nyorsoa-a' 'sla ybei' 'gboror:, or 'wor, or 'da, Keen', a yubo: 'on 'weh. 'De a yubo: :dha 'on 'wluh-a 'weh. 'On se dha yao 'zorn :ne, 'de 'an 'jeh-a' 'kpih 'di. Nyor :or dbo-a 'on, or za-' dhih-a' 'yor-eh:. Jorwor: a se-or yubo: deh 'jeh neh. 29Jorwor: 'mor :mloror', 'on yubo-or' deh 'jeh neh. Deh no-eh, 'on 'wluh 'de or bo, 'de or dbo 'on.
30:Yeh on 'worn-a deh :daa, :yee' an 'bhorn :ka on 'ye-a' no, 'de on 'ye-or' kpon. Jorwor: nyor :se-or' son 'bhun po. Deh no-eh, ti on :korn on 'ye-or' :kpon-dih:, en se 'o nyni 'gboror:. 31:Yee' :gwlor-nyor:⧾ :doru', :on :ne-a 'de nyor⧾ :dao' 'klu-', on po or-a' dhih dhih 'jeh-' 'do mor, on 'da, :Mor eh 'dhu, Nyorsoa-a' 'taan'-yu 'yle, or 'beh-dih: or 'ye deh⧾ :kolu'⧾ :doru' no, or 'ye 'o 'yu :daa :zi :e?
On dbo nyor⧾ on 'ye :Yusu' kpon
32:Yee' :Falasi'i-nyor⧾ 'worn 'slan⧾ an pa-', 'do or 'bhun 'weh. :Yee' Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor:⧾ :dao'-: on dbo Nyorsoa-a' 'sla-a' :poli'si 'weh, on 'ye-or' kpon. 33:Yee' :Yusu'-a kpa or-a' wlu 'dlu bo, or 'dae:, 'An mu dha a bo :ne 'do ti-kpor-bei 'di kele'a:, 'de jorwor: 'on 'ye 'de nyor :or dbo-a 'on bo deka mu. 34A mu 'on 'kwla⧾-' dih 'bhorn-:. Jorwor: a :se 'on 'ye-: i. 'De mor :dha 'an mu-a :mu, a se 'de-a' mu-a' 'beh-dih:.
35:Yeh or :za-a deh :daa-', :yee' :Jueh'-nyor⧾-a' nyor⧾ :na-dih-nyor⧾ :wlu-' 'de an-a' 'jeh 'nyne-', on 'da, Dha 'yu :daa, or mu :mu, 'de :a :se-or' 'ye-: i :eh? Or mu 'de :a-a'a: nyor⧾ :on 'ti-a 'de 'Glii-nyor⧾ 'nyne-', 'de or 'ye 'Glii-nyor⧾ deh :torne: :e? 36:Mor or 'da, A mu 'on 'kwla⧾-' dih 'bhorn-:, jorwor: a :se 'on 'ye-: i, 'de mor :dha 'an mu-a :ne, a se 'de-a' yi-a' 'beh-dih:, :mor or 'da :ao', :yee' deh eh :bleh-dih: 'i :eh?
'Ni :eh 'nyi-a nyor⧾ 'kmo :sie: :febeh'
37:Yee' gor :dao', or-a' 'bor-dih: 'o-we-eh: :eh no-a 'we-eh: :klaba', 'do :wor :Yusu' :sorn-', 'de or :nyna dih, 'do :gwlor :gwea, or 'wor, or 'dae:, :Mor 'ni 'na-ton :taa nyor no, :yee' or yi 'noror 'on bo, or 'ye 'na. 38:Ka Nyorsoa-a' 'chlee-deh no-a eh-a' :za-a', eh no-a, Nyor :or po-a 'an dhih dhih 'jeh-', 'do or :porluh ken, 'do :wor 'ni :eh 'nyi-a nyor⧾ 'kmo :sie: :febeh', eh mu 'wluh-:. 39Deh :Yusu'-a za-a-', Nyorsoa-a' :Zulu-a' dhih :oo', :on nyor⧾ :an mu-a or-a' dhih dhih 'jeh-' :po, an mu-a 'ye-:. Ti or za-a deh :daa-', :yee' Nyorsoa 'see or-a' :Zulu nyor 'nyi. Deh no-eh, Nyorsoa 'see :Yusu' dhih-a' 'i 'beh-a' 'nyi kele'a:.
:Jueh'-nyor⧾ :gble-eh:-' 'weh 'de on 'nyne-' :Yusu'-a' dhih
40:Yeh on 'worn-a deh⧾ :daa, :yee' nyor⧾ :noo' :noo' 'da, Keen' 'jeh, 'yu :daa, or-: Nyorsoa-a' wele-eh: :po-nyor: :or :korn :or 'ye-a' 'de yi :oo'.
41:Yee' nyor⧾ :noo' 'da, Or-: Nyorsoa-a' 'taan'-yu: 'o.
:Yee' nyor⧾ :noo' dhele-eh-: dih :ke, on 'da, :Kaa Nyorsoa-a' 'taan'-yu-a mu :Galali'i-bluhba ken-a' 'wluh-a' :no :eh? 42Eh :se-' 'chle-eh: 'de Nyorsoa-a' 'chlee-deh 'di, :ka Nyorsoa-a' 'taan'-yu-a mu-a 'de 'Keen :Debe' 'di-a'a: 'cheh 'klu-' 'wluh-: :e, 'dekorn: :gwlor :Debe' 'ti-a 'di, an 'da-dih-a 'Behble'hehn :e? 43:Yee' nyor⧾ :dao', on :gble-eh:-' 'weh, :Yusu'-a' dhih. 44Nyor⧾ :noo'-a 'bhorn on 'ye-or' kpon. Jorwor: nyor :se-or' son 'bhun po.
:Jueh'-nyor⧾-a' nyor⧾ :na-dih-nyor⧾ :se-' :Yusu'-a' dhih dhih 'jeh-' po
45:Yeh eh no :ao', :yee' Nyorsoa-a' 'sla-a' :poli'si mu-: de, 'de Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: bo, 'de on dhele-uh dih, on 'dae:, :Eh :korn dhih, a :se-or' 'de :ya :eh?
46'De :poli'si 'dae:, :Ka 'yu :daa, or no-a :wlu-a', nyor se :ao' :wlu-a' no :zai'.
47'De :Falasi'i-nyor⧾ 'da, A 'bhorn a 'ye :a :gwluhuh' zela: :eh :mor 'yu :dao', or :bo-dih: a dih :ke :e? 48A 'ye :a-a'a: 'bluhba-a' nyor⧾ :na-dih-nyor⧾-: :eh beh :Falasi'i-nyor⧾-: an-a' nyor :due' po or-a' dhih dhih 'jeh-' :e? 49Jorwor: nyor⧾ :dhulu' :dao', :on po-a or-a' dhih dhih 'jeh-', 'de :on se-a :Mose'-a' 'tele' yubo:, Nyorsoa po-uh 'chlo bo 'weh.
50:Yee' 'Nekodi'ma: :or mu-a 'de :Yusu' bo :zai', 'de :or no-a an-a' nyor :due', or-: dhele-uh dih, or 'dae:, 51:A-a'a: 'tele'-a chehn nyor-a' zabe 'i :e, :mor eh 'dhu, :a se or-a' wlu 'worn :zai', 'de mor :a se deh or no-a yubo: :e?
52:Yeh or 'da :ao', :yee' on dhele-or-: dih, on 'da, :On 'wluh :Galali'i-bluhba ken :ke :e? Pobo: 'de Nyorsoa-a' 'chlee-deh 'di. :An mu-eh 'ye-:, :ka Nyorsoa-a' wele-eh: :po-nyor se-a :korn or 'ye-a' :Galali'i-bluhba ken 'wluh.
'Nynor on :kpon-dih:-a 'nyne :zaan' :no 'da
[ 53:Yeh on no :ao', :yee' nyor⧾-a' klehkpeh, on mu on 'bli deh⧾-' dih.
موجودہ انتخاب:
:Jororn' 7: TCHKR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
