GÉNESIS 12
12
Tumpa oiparavo Abram
1Ërei yandeYa jei yepe Abram pe: “Ekua kuae ndeɨvɨ güi jare nerëtara reta ipɨte güi, jare nderu jo güi; ɨvɨ che amombeuta ndevea kotɨ.#Hch 7.2-3; Heb 11.8. 2Ndegüi ayapota tëtaguasu tuicha yae vae, jare cheporerekuata nderé, jare ambotuicha yaeta nderee opaete ɨvɨ rupi, jare cheporerekuata jeta vae reta re ndereko pegua. 3Cheporerekuata iporerekua nderé vae reta re, ërei ayepopeyuta oyepopeyu nderé vae reta re; nderupi opaete ɨvɨ pegua reta#Hch 3.25; Gl 3.8. oyekouta.”
4Jare Abram oë ojo jókuae tëta Harán güi, yandeYa jei chupe rami, jare jiɨ Lot ojo vi jupíe; Abram setenta y cinco año ma güɨnoi yave oë tëta Harán güi. 5Abram güɨraja jembireko Sarai jare jiɨ Lot, jare opaete imbaembae, jare vi opaete jembiokuai reta Harán pe oguagüe. Oë reta yogüɨraja vaerä ɨvɨ Canaán jee vae kotɨ. Jare opa yogüɨraja oväe Canaán pe. 6Abram ojo ma oväe ɨvɨ Canaán pe yave, ojo More pe, tëta Siquem jee vae pe; jare kuimbae cananeo reta oimeño mai yogüɨreko jókuae ɨvɨ pe. 7YandeYa oyekuaa Abram pe, jare jei chupe: “Neñemuña reta pe#Hch 7.5; Gl 3.16. ameeta kuae ɨvɨ.”
Jayave Abram omopüa mɨmba oyeyuka oyeapɨ jese vae yandeYa peguarä, jókuae jae oyekuaa chupea pe. 8Joko güi ojo oñemoëta vaerä metei kaa pe, Bet-el güi kuaraɨ oëa kotɨ, jare joko pe omopüa jo guakapi pegua; güɨnoi Bet-el kuaraɨ oikea kotɨ jare tëta Hai jee vae kuaraɨ oëa kotɨ; joko pe omopüa mɨmba oyeyuka oyeapɨ jese vae yandeYa peguarä, jare oyerure yandeYa jee re. 9Jare Abram oë joko güi, jare ojo mbegüe mbegüe pe Neguev kotɨ.
Abram Egipto pe
10Jayave rupi oime karuai jókuae ɨvɨ pe, jare Abram ojo Egipto kotɨ oiko vaerä joko pe, echa karuai ikaviä yae jókuae ɨvɨ pe. 11Oväe ma ojo Egipto pe yave Abram jei jembireko Sarai pe: “Mase, aikuaa ko nde nepöra yae; 12jare Egiptoɨgua reta ndereecha yave jei retata: ‘Kuae kuña jae ko jókuae kuimbae jembireko.’ Cheyuka retata jare ndeve ngaraa mbae oyapo reta. 13Jáeramo, aja kavi vaerä ndereko pegua, rereta kuri chupe reta nde ko jae chereindɨ vae,#Gn 20.2; 26.7. jökorai aikove vaerä ndereko pegua.”
14Jare Abram ou oväe Egipto pe yave, Egiptoɨgua reta oecha jókuae kuña maepöra yae. 15Mburuvicha reta Faraón ndive oparavɨkɨ vae, oecha reta vi, jare omboete reta jae jóvai; jare güɨraja reta Sarai, Faraón jo pe.
16Kuae kuña maepöra jeko pegua, Faraón ipɨakavi Abram pe, omee chupe jeta vecha, guaka, mburika kuimbae jare mburika kuña, tembiokuai kuimbae jare tembiokuai kuña jare camello reta. 17Ërei yandeYa oiporarauka Faraón pe jare jo pegua reta pe, yavaetegüe mbaesusere rupi, Sarai, Abram jembireko jeko pegua. 18Jayave Faraón oenɨiuka Abram jare jei chupe: “¿Mbae pa ko kuae reyapo che ndive vae? ¿Maera pa ko remombeu kaviä cheve jae ko nderembireko vae? 19¿Maera pa rere: ‘Chereindɨ ko’; remoëgua cheve chepuere vaerä areko cherembirekorä? Ërei añave ko oï nderembireko. ¡Eipɨɨ jare eraja!” 20Jayave Faraón oyókuai jembiokuai reta, güɨnoe vaerä Abram Egipto güi, jembireko ndive jare opaete mbaembae güɨnoi vae ndive.
Поточний вибір:
GÉNESIS 12: GUABD
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Biblia DC Guaraní Bolivia © Bolivian Bible Society, 2001.