GÉNESIS 13
13
Abram jare Lot osɨrɨ oyougüi
1Abram oë Egipto güi, jare ojo ye ɨvɨ Neguev jee vae kotɨ jembireko ndive jare opaete imbaembae ndive. Jare jiɨ Lot vi ojo jupíe. 2Abram oikokatu yae ko, güɨnoi jeta oro, korepoti jare jeta mɨmba reta. 3Jare Neguev güi ojo mbegüe mbegüe pe oväe ye tëta Bet-el jee vae kotɨ, jare joko güi ojo tenonde yave jo guakapi pegua güɨrekosea pe, tëta Bet-el jare Hai jee vae ipäu pe, 4echa joko pe tenonde yave omopüa mɨmba oyeyuka oyeapɨ jese vae yandeYa peguarä; joko pe Abram oyerure ye yandeYa pe.
5Lot oikokatu yae vi itutɨ Abram rami; güɨnoi vi jeta vecha, guaka reta jare jeta jembiokuai. 6Ɨvɨ ñogüɨnoi pɨpe vae oupitɨä ma yogüɨreko päve vaerä meteia peño. 7Jare Abram jɨmba iyangarekoa reta oñoraro reteiño ma Lot jɨmba iyangarekoa reta ndive. Jayave rupi, kuimbae cananeo reta jare ferezeo reta yogüɨreko vi jókuae ɨvɨ pe. 8Jayave Abram jei Lot pe körai: “Ñañoëtara ko yande, mbaetɨ ikavi ñañoraro vaerä oyoupii aeño, mbaetɨ vi ikavi oñoraro vaerä yanderembiokuai reta. 9¿Mbaetɨ pa ɨvɨ tuicha? Añave, ikavi reiparavo kia pe reiko vaerä; eiko tee chegüi, nde reo yave ndeasu kotɨ, che taja ndeakatu kotɨ. Ërei nde reo yave ndeakatu kotɨ, jayave che taja ndeasu kotɨ.”
10Lot omae yave oecha ɨvɨpe kavi ɨ̈aka Jordán jee vae iyɨ́vɨri, kuae ɨvɨ kavi ɨ katu, yandeYa oyapo arakae kó#Gn 2.10. vae rami. Egipto pegua ɨvɨ rami. Kuae ɨvɨ kavi ojoi oya tëta raɨ Zoar re katu. YandeYa ndei opa omboai mbove tëta Sodoma jare Gomorra. 11Jayave Lot oiparavo iyeupe opaete kuae ɨvɨpe kavi ɨ̈aka Jordán iyɨ́vɨri rupigua. Jökorai Lot osɨrɨ itutɨ Abram güi, jare oyakavo kuaraɨ oëa kotɨ. 12Abram opɨta ɨvɨ Canaán pe, ërei Lot oñemoëta ɨvɨpe kavi pe tëta reta ñogüɨnoi vae rupi, jökorai ojoi oya tëta Sodoma re. 13Ërei jókuae Sodoma pegua kuimbae reta jeko kaviä yae ete jare iyoa yae reta yandeYa kotɨ.
14Jare Lot ojo güire, yandeYa jei Abram pe: “Emopüa neäka emae kuaraɨ oëa kotɨ jare kuaraɨ oikea kotɨ, jare emae ɨvɨtuguasu#13.14 Ɨvɨtuguasu jae ko Norte. kotɨ jare arayevɨ#13.14 Arayevɨ jae ko Sur. kotɨ; 15echa opaete kuae ɨvɨ remae reï jese vae ameeta ndeve jare neñemuña reta peguarä#Hch 7.5; Gl 3.16. jekuae avei pegua. 16Jare che jeta yaeta amoñemuña neñemuña reta, ɨvɨkúi jeta yae rami, mbaetɨta kia ipuere oipapa. 17¡Añave, epüa jare ekua emae kuae ɨvɨ ipukugüe re jare ipɨguasugüe re, echa ameeta ko ndeve!”
18Jayave Abram oyupavo jare opa oekɨ güɨraja jo guakapi pegua, jare ou oñemoëta, kuimbae Mamre jee vae oikoa kotɨ, tëta Hebrón iyɨpɨ kotɨ. Joko pe omopüa mɨmba oyeyuka oyeapɨ jese vae yandeYa peguarä.
Поточний вибір:
GÉNESIS 13: GUABD
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Biblia DC Guaraní Bolivia © Bolivian Bible Society, 2001.