Juan 3
3
1Cꞌo cꞌa jun achi Nicodemo rubiꞌ, arjaꞌ fariseo in chakajaꞌ arjaꞌ jun chique ja kꞌetol tak tzij quixin ja tinamit Israel. 2Xuban cꞌa jutij xekaji ja Nicodemo ruqꞌuin ja Jesús chakꞌaꞌ in xumaj tzij ruqꞌuin, quewaꞌ xbij tre riꞌ:
—Rabí, ajoj kotak chi atat at jun tijonel attakonto rmal ja Dios como anin wotak chi majun winak xticowin ta xtuban ta ja nimak tak milagro ja ramajon rbanic atat ja wi mta ja Dios ruqꞌuin, neꞌ tre. 3Ja cꞌa Jesús xbij tre:
—Ni katzij wiꞌ ja xtinbij chawe riꞌ, ja winak rjawaxic chique chi neꞌalax chic jutij nowi maqueꞌalax chic jutij jariꞌ ni matichꞌobtaj wiꞌ cumal nak rbanic ja natoc chipan ja gobierno xin Dios, neꞌ tre.
4—Pro ¿nak moda jun achi riꞌj chic in nalax chic jutij? ¿La cꞌo cꞌa moda ariꞌ nqꞌuejeꞌ chic jutij pa gracia in nalax chic jutij? neꞌe ja Nicodemo tre. 5Ja cꞌa Jesús xbij chic tre:
—Ni katzij wiꞌ ja xtinbij chawe riꞌ, rjawaxic chi natalax tre yaꞌ in tre ja rEspíritu nowi ma queriꞌ ta naban jariꞌ macatcowini natoc chipan ja gobierno xin Dios. 6Ja cꞌaslemal ja yatajnak chique ja winak cumal ja quitataꞌ queteꞌ jariꞌ xa ni junan wiꞌ ruqꞌuin ja caniꞌ quixin ja quitataꞌ queteꞌ. Ja cꞌa cꞌaslemal ja nyataj chawe rmal ja rEspíritu Santo jariꞌ ni junan wiꞌ ruqꞌuin ja caniꞌ rcꞌaslemal ja rEspíritu Santo. 7Maxta junwiꞌ tacꞌwaxaj ja xinbij chawe chi rjawaxic chi natalax chic jutij. 8Caniꞌ tre ikꞌ caniꞌ tre xcomel xa bar ta triꞌ nbe wiꞌ nsamaji in nacꞌwaxaj ja nuban pro ma awotak ta bar penak wiꞌ in nixtacꞌa bar nbe wiꞌ chakajaꞌ. Queriꞌ cꞌa chique canojel ja winak ja neꞌalax rmal ja rEspíritu Santo como nsamaji ja rEspíritu Santo in rmal arjaꞌ tok neꞌalax chic jutij, neꞌe ja Jesús tre.
9—Pro ¿nak cꞌa ja kas mero rbanic ja ramajon rbixic chwe? neꞌ chic jutij ja Nicodemo. 10Ja cꞌa Jesús xbij chic tre:
—At maestro waꞌan quixin ja tinamit Israel ja rtinamit Dios pro takaꞌan matichꞌobtaj amwal ja nbij chawe. 11Pro ajoj bien kotak nak rbanic ja kamajon rbixic, bien katzꞌaton ja kamajon rkꞌalasaxic chewach pro ja rixix xa matenimaj ja nkabij chewe. 12Anin nmajon rchꞌobic jeꞌe chawach ja nbantaji waweꞌ chwachꞌulew pro wi matanimaj pior cꞌa ja tok xtinchꞌob chic jeꞌe chawach ja nbantaji chilaꞌ chicaj ¿nak moda cꞌariꞌ xtanimaj chakajaꞌ? 13Ni majun nak ta ekajnak ta chilaꞌ chicaj rtzꞌaton ta nak rbanic ja chilaꞌ chicaj, xa jun ja tzꞌatyon nak rbanic, arjaꞌ ja Ralcꞌwalaxel ja kajto chilaꞌ chicaj ja xoc alaxic cuqꞌuin ja winak, arjaꞌ ja cꞌo pa ranma ja Tatixel chilaꞌ chicaj. 14Caniꞌ xuban ja Moisés ojer chipan ja chakijlaj ulew, arjaꞌ cꞌo jun rachbal cumatz xjotbaꞌ chwach jun cheꞌ in xetotaji ja winak rmal in queriꞌ cꞌa xtiban na tre ja Ralcꞌwalaxel ja xoc alaxic cuqꞌuin ja winak, arjaꞌ njotbax na chwach jun cheꞌ. 15Queriꞌ nba̱n na tre utzcꞌa chi canojelal ja winak ja xtiyukeꞌ quecꞌuꞌx ruqꞌuin ejeꞌeꞌ maquetakel chipan ja rpokonal, nyataj jun utzlaj cꞌaslemal chique pro jun cꞌaslemal ja ni mta wiꞌ qꞌuisic trij.
16Ja Dios congana nerajoꞌ canojelal ja winak rmalcꞌariꞌ tok xutakto waweꞌ chwachꞌulew ja Ralcꞌwal, xarariꞌ jun. Queriꞌ xuban utzcꞌa chi canojelal ja winak ja xtiyukeꞌ quecꞌuꞌx ruqꞌuin ejeꞌeꞌ maquetakel chipan ja rpokonal, nyataj na chique jun utzlaj cꞌaslemal ja ni mta wiꞌ qꞌuisic trij. 17Queriꞌ nbij como ja Dios tok xutakto ja Ralcꞌwal waweꞌ chwachꞌulew ma rmal ta chi xquerutakel ta ja winak chipan ja rpokonal. Pro jariꞌ xutakto utzcꞌa chi rmal ja Ralcꞌwal nquewil na ja totajem xin Dios canojelal. 18Canojelal ja winak ja nyukeꞌ quecꞌuꞌx ruqꞌuin ja Ralcꞌwal Dios ejeꞌeꞌ mchita kꞌetoj tzij xin Dios chiquij pro ja cꞌa matiyukeꞌ quecꞌuꞌx ruqꞌuin ejeꞌeꞌ kꞌeton chic tzij chiquij rmal ja Dios chi neta̱kel chipan ja rpokonal. Como matiyukeꞌ quecꞌuꞌx ruqꞌuin ja Ralcꞌwal Dios chewiꞌ tok nba̱n queriꞌ chique. 19Como ejeꞌeꞌ mta quigana ruqꞌuin ja luz ja penak chilaꞌ chicaj ja nsakirsan quebey chiquewach xa chewiꞌ tok kꞌeton chic tzij chiquij. Como ja Ralcꞌwal Dios arjaꞌ caniꞌ jun luz peti waweꞌ chwachꞌulew pro ja winak más na xel quecꞌuꞌx trij ja kꞌekumal. Queriꞌ queban como xa itzelal ja quimajon rbanic. 20Ja wi amajon rbanic ja ritzelal jariꞌ xa itzel natzꞌat ja luz, ni majun agana xcatekaj ta ja bar cꞌo wiꞌ ja luz. Queriꞌ naban utzcꞌa chi matotakixi ja ritzelal ja ramajon rbanic. 21Pro ja cꞌa wi amajon rbanic ja rutzil xin Dios jariꞌ matapokonaj natekaji ja bar cꞌo wiꞌ ja luz. Matapokonaj como cꞌol agana chi natquetzꞌat ja winak chi ja Dios ucꞌayon awxin chi rbanic nojel ja nattajini naban.
* * * * * * * * * *
22Cꞌacꞌariꞌ ja Jesús xerachbilajel ja rdiscípulo xebe chipan jun lugar ja cꞌo pa rcuenta Judea. Ja cꞌa tok xekaji, triꞌ qꞌuejeꞌ wiꞌ in ecꞌoli winak neruban bautizar. 23In queriꞌ nuban ja Juan chakajaꞌ, arjaꞌ ntajini neruban bautizar ja winak chipan ja lugar rbinaꞌan Enón ja cꞌo chinakaj Salim como ja triꞌ sobre yaꞌ. Triꞌ xeꞌekaj wiꞌ ja winak in xeba̱n bautizar. 24Majaꞌn ticoj pa cheꞌ triꞌ ja Juan rmal ja rey Herodes.
25Ja discípulo rxin ja Juan ejeꞌeꞌ quemaj tzij cuqꞌuin juleꞌ chic aj Israel in cꞌoli quechꞌaꞌ chibil tak quiꞌ tre ja bautismo. 26Ja cꞌa discípulo rxin ja Juan xebe ruqꞌuin in quewaꞌ xequibij tre riꞌ:
—Rabí, pakasariꞌ ja rachi ja xaban bautizar chajuparaj binelyaꞌ Jordán ja xayaꞌ rbixic chi arjaꞌ ja Toꞌonel ja takonto rmal ja Dios, camic arjaꞌ ntajini neruban bautizar ja winak in canojel ja winak nebe ruqꞌuin, xecheꞌ tre. 27Pro ja Juan xbij chique:
—Ja ranin ninquicoti chi netajini nebe ja winak ruqꞌuin ja Jesús. Ja samaj nkaban chikajujunal chilaꞌ chicaj penak wiꞌ. 28Ixix bien xecꞌwaxaj ja tok xinbij chique ja winak chi ma anin ta ja rin Cristo xarwariꞌ intakonto chi nyaꞌ rbixic ja Cristo chi npi na. 29Ja Jesús yatal trij chi nebe ja winak ruqꞌuin chi ncachbilaj. Caniꞌ tre jun alaꞌ tok ncꞌuleꞌe yatal trij chi ja rxjayil nrachbilaj. No anin xa in caniꞌ ramigo jun alaꞌ tok ncꞌuleꞌe. Pro ja ramigo paꞌloc pa rxquin ja ralaꞌ ja ncꞌuleꞌe in rmajon rcꞌaxaxic ja nbij in congana nquicoti chi rcꞌaxaxic. Queriꞌ cꞌa chwe anin camic chakajaꞌ ninquicoti, nojnak ja quicotemal pa wanma. 30Ja rjawaxic camic chi ni xtimajtajel wiꞌ ryaꞌic rukꞌij ja Jesús chijutij cumal ja winak, ja cꞌa chwe anin rjawaxic chi xtiban chwe caniꞌ ma incꞌo ta chwach ja Jesús.
31Ja Ralcꞌwalaxel ja penak chilaꞌ chicaj xa ruyon arjaꞌ ja más nim rukꞌij chiquewach canojelal. Pro ja rajoj ja rok winak ma katzꞌaton ta nak rbanic ja chilaꞌ chicaj, xa ok rxin ja rwachꞌulew, xa jariꞌ nkatzijoj ja kotakin waweꞌ chwachꞌulew. Pro ja penak chilaꞌ chicaj xa ni ruyon wiꞌ arjaꞌ ja más nim rukꞌij chiquewach canojelal. 32Ja rtzꞌaton in ja rcꞌaxan chilaꞌ chicaj jariꞌ rmajon rbixic pro ja winak xa matiquinimaj ja nbij. 33Ja cꞌa nenimani ja nbij quewaꞌ nquibij riꞌ: —Ja Dios ni katzij wiꞌ nojelal ja nbij, necheꞌe. 34Dios takyonto rxin ja Ralcꞌwalaxel in como ruqꞌuin ja Dios penak wiꞌ chewiꞌ tok tzij xin Dios ja nbij. Queriꞌ nuban como ja Dios nutakto ja rEspíritu Santo ruqꞌuin in ni nojnak wiꞌ ja rEspíritu Santo pa ranma, majutij ja maquita ucꞌan rmal. 35Ja Ralcꞌwalaxel janila najoꞌx rmal ja Tatixel in ni majun nak ta ja maquita jachon pa rukꞌaꞌ rmal. 36Ja wi nyukeꞌ acꞌuꞌx ruqꞌuin ja Ralcꞌwalaxel jariꞌ awcꞌan chic ja utzlaj cꞌaslemal ja ni mta wiꞌ qꞌuisic trij. Pro ja wi matanimaj ja Ralcꞌwalaxel jariꞌ ni matawil wiꞌ ja utzlaj cꞌaslemal in ni cꞌo wiꞌ ryewal ja Dios chawij.
Поточний вибір:
Juan 3: tzjW
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2010, Wycliffe Bible Translators, Inc. All rights reserved.
