Yaku 2
2
Vsv̀ng mv̀rshv̀m màrvwìnglv́m
1Vnvm vchvngrìé, ngø̀r dvgùng vl we nøngmaq Kàngpè Yesu Kristu sv̀ng kv́m we tvrà taq cà:nì rì nø, vsv̀ng mv̀rshv̀m rvwíng mvdaq. 2Shé wur dvchøp gweshì nø̀ zørzør wa we bèlaq gwashì we vsv̀ng tiqgǿ nàmaq noqngø̀m lìpong taq gòng ra nø̀, vrá, nǿmtuqtuq belaq gwashì we dvshácha vsv̀ng tiqgǿ gø la gòng ra nìnø, 3nàmaqí nø zørzør wa we belaq gwashì gǿ sv̀ng yv́ng ètv̀mv́mnø̀ng nø̀, “Yayv́ng rúngrà shvlá taq èrung,” èvlnø̀nge. Íwe, dvshácha gǿ sv̀ng nø, “Nà nø kuyv́ng èrip,” mø̀íni, “Ngà hí námrà shvnvng èrung,” èv̀lnø̀nge. 4Yadø èwànø̀ng lòng nø nàmaq dvhø̀ taq mv̀rshv̀m rèwìngnø̀ng nø̀, mvgvm we kàrvtshú èwáshìnø̀ng we mø̀í má?
5Shóngshø̀ng we vnvm vchvngrìé, ètá dánø̀ng. Rvgaq tø̀m taq dvshácha rì nø, kv́mnøt dang taq mvgàm ílv́m nv̀ng, Àng sv̀ng shóngshìrì kaq dv́naò we móngdàn zaqshøp vpvtlv́m rvt, Gvrayí àngmaq sv̀ng rvcà:ngò we mø̀í má? #1Kr. 1:26 6Íwe, nàmaqí nø dvshácha rì sv̀ng dvgùng shèyǿm bǿshà. Mvgàmré rìí nø nàmaq sv̀ng shènvlnø̀ng nø̀, dvrá róng sv̀ng èshv̀lnø̀ng we mø̀í má? 7Nøngmaqò Kàngpè í we Kristu Àng ring we bø̀ng sv̀ng shvyǿm mvtá:nòrì gø àngmaq ni mø̀í má?
8Shànshér Kàru taq, “Nà vdè sv̀ng èshóngshì dø, nà tiqdv́ng vsv̀ng kaq shóngshì ràe,” wa we Gvray dvrá sv̀ng nàmaqí cv́n dègømnø̀ng kvt kèní nø, nàmaqí vdu dø èwànø̀ng we íe. #Lew. 19:18 9Íwe nàmaqí vsv̀ng mv̀rshv̀m rèwìngnø̀ng kvt kèní nø, mvrà èwànø̀ng we í nø̀, nàmaq nø dvrá catshú èínø̀ng we sv̀ng dvráí dvta:nòe. #Drd. 1:17 10Kagǿ í nìgø dvrá shvngbe sv̀ng cà:nò we taq dvrá tiqciq wa la vléò nìgø, wegǿí nø dvrá shvngbe sv̀ng vléò we ívme. #Mat. 5:19 11Kadø íe wani, “Mèdèchapnì,” wa shø̀n gǿ nø, “Vsv̀ng mèshvtni,” wa nø̀ gø shø̀ne. Nà nø vsv̀ng mèdechap nìgø, vsv̀ng èshvt kvt kèní nø, dvrá catshú ni èíá:mì. #Bng. 20:13,14; Drd. 5:17-18 12Wervt shvlángshaq í dvzv́r we dvrá lù:ngí kàngélv́m vhǿm rà we vsv̀ngrì dø, kà shø̀n we nv̀ng vjàng laqyà taq ècúnshìnø̀ng. #Yak. 1:25 13Pàwá wani mvrézanøt màvl vsv̀ng nø, kàngéò yv́ng gø mvrézalv́m màvl. Mvrézanøt vl vsv̀ng nø, Gvrayí kàngé lú:ngò we taq, mvréza we lúnlv́m íe.#Mat. 5:7; 25:45-46
Kv́mnøt nv̀ng bv̀nlì
14Vnvm vchvngrìé, vsv̀ng tiqgǿ nø, kv́mnøt vle, wa nìgø wà lú:ngò we bv̀nlì màvl nìnø, pà vjú vl má? Wedø í we kv́mnø:tní àng sv̀ng chutchv́ng lú:nòe má? #Mat. 7:21 15Vnvm vchvng tiqpè, mø̀íni tiqmè nø gwálv́m nv̀ng v́mlv́m gø màdá dvgvp, 16nàmaq dvhø̀ kèní tiqgǿí àng sv̀ng, “Pàmvrà èlovm. Leq lø̀m, leq nàgà,” èvlnø̀ng nø̀, àng góng dvpvt rà rì nø màzíshaq shèlonø̀ng nìnø, pà vjú vl má? #1Yh. 3:17-18 17Welòng dø tiqdvchá, bv̀nlì màbá we kv́mnøt nø vshíshaq íe.
18Íwe vsv̀ng tiqgǿ nø, “Nà nø kv́mnøt èvle. Ngà nø wv̀ngò bv̀nlì vle,” wa ra nìnø, èwàò bv̀nlì màdá nà kv́mnøt lòng dètanà. Wekvt ngàí gø wv̀ngò bv̀nlì kèní, ngà kv́mnøt lòng dvtanvtnø̀ng. #Gal. 5:6 19Gvray nø tiqpè wa í we sv̀ng nà èkv́me. Shvla lé! Cángrì gø wedøni kv́m nø̀ nipnip vdv̀ne. #Mak. 5:7 20Àngdálé, bv̀nlì màbá we kv́mnøt nø vshí íe, wa lòng nà shá mèyǿ má? 21Nøngmaq vkop vkàng Abraham nø, àngcè Isak sv̀ng núngrà taq shvrú:ngò rvt, à:ngí wà bǿà bv̀nlì taqkèní døngman we dvdut lún yà:ngà we mø̀í má? #Nnp. 22:9-12 22Àngò kv́mnøt nø bv̀nlì nv̀ng tiqdø vzø̀m nø̀, bv̀nlì taqkèní wa àng kv́mnøt kø̀mgøm lòng dvtanò we nàí èsháòe. #Heb. 11:17 23Shànshér Kàru taq, “Abraham nø Gvray kaq kv́m rvtnø̀, àng sv̀ng døngman we dvdutna yà:ngà,” wa kà vhømá:mì nø̀ Abraham sv̀ng “Gvray rv̀mnvng” wa tǿ yà:ngà. #Nnp. 15:6; 2Dg. 20:7; Esa. 41:8; Rom. 4:3 24Wervtnø̀, vsv̀ng nø kv́mnøt kèní wa mø̀í dø, wà lú:ngò bv̀nlì taqkèní døngman we dvdut lú:nò lòng èshánø̀nge. #Yoh. 8:39 25Welòng dø tiqdvchá, góngnvm mè Rahapmí gø dvjv́mshúrì sv̀ng vtoò nø̀, dvgá tiqchitchit shvlo bǿà dvgvp, wà bǿà bv̀nlì taqkèní døngman we dvdut lún bǿà we mø̀í má? #Ysh. 2:1-21; 6:17; Heb. 11:31 26Pvlàcè màvl we shagóng nø vshíshaq í dø tiqdvchá, wà lú:ngò we bv̀nlì màbá we kv́mnøt gø vshíshaq íe.#Yak. 2:17
Поточний вибір:
Yaku 2: GSM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024, Rvcv́ngcè Kàru Gomidi Kristu Shvngø̀mré. All Rights Reserved.