Yaku 1
1
Shvwé kà
1Gvray nv̀ng Kàngpè Yesu Kristu dvzømshú ǿngà pè Yaku ngàí nàshin yv̀ngshà we tiqcé vní dvgø̀ng sv̀ng pàmvrà wvnge. #1Pt. 1:1; Dzr. 15:23
Dvløtlv́m nàhǿ:mò ke zitnøt røtshì rà we
2Vnvm vchvngrìé, nàmaq nø dvløtlv́m mvme pv̀n nàhǿmnø̀ng dvgvp, dvbùlv́m wa dèdutnø̀ng. #Rom. 5:3-5; 1Pt. 1:6 3Pàwá wani nàmaq kv́mnøt sv̀ng vløt lù:ngí nø, tønzánnøt dvbung lú:ngò we sv̀ng èshánø̀nge. #1Pt. 1:7 4Nàmaq nø kapv̀n taq gø shvràlv́m màvl nø̀ kø̀mgøm tétǿng lúnlv́m dvpvt, dvløtra lòng sv̀ng lv̀ngdø̀m høq ètønshìnø̀ng.
5Nàmaq dvhø̀ taq zitnøt mvluq we tiqgǿgǿ vl nìnø, Gvray kaq laq røtshì. Wekvt àng sv̀ng zí daqòe. Kadø íe wani Gvray nø màngvnshaq shvngbe sv̀ng lv̀ngshònø:tní zi daq Pè íe. #Ksh. 2:3-6 6Ínìgø Àng kaq røtshì gǿ nø màdvtiqshìshaq kv́mnø:tní røt ràe. Kadø íe wani dvtiqshì vsv̀ng nø, nv̀mbø̀:ngí kukaq yakaq dvce:rò we nvmukdvra tìma dø vshv́me. #Mak. 11:24 7Wegǿ nø Kàngpè yv́ngkèní kapà tiqpv̀n lúnlv́m gø laq màlǿmshì. 8Yadø í gǿ nø vnínøt nø:tnò nø̀, à:ngí wàò we í dv́ngte taq mvdøng we vsv̀ng#1:8 Mø̀íni, “nøt mvdøng vsv̀ng” íe.
Pø̀ sv̀ng vlǿmshì mvdaq we
9Dvshà we vnvm vchvng tiqgǿ nø Gvrayí shvring daqò ke laq dvbù. #Yak. 2:5 10Mvgàm gǿ gø Gvrayí cip daqò ke laq dvbù, pàwá wani àng nø nv̀mpu dø vmø̀lvme. #1Pt. 1:24 11Nv̀m svr nø̀ vkatshì weí shøncvprì shúngvme. Àngwvt gø vshù nø̀ vnvp mv̀rshv̀m gø vmø̀lvme. Wedø tiqdvchá, mvgàm gǿ gø àng bv̀nlìrì washì la:ngí ni vmø̀lvme. #Esa. 40:6,7
Dvløt ra lòng sv̀ng tønshì rà we
12Dvløt ra lòng sv̀ng tøn jòr gǿ nø ìshøt vle. Pàwá wani dvløt lòng sv̀ng tøn jòrvm kvtnø, Kàngpèí Àng kaq shóngshì rì sv̀ng dv́naò we gø̀nshaq vmo à:ngí lúnlv́m íe. #2Tm. 4:8; 1Pt. 5:4; 1Kr. 9:25; Dtn. 2:10
13Kagǿ gø dvløt we vhǿ:mò dvgvp, “Gvrayí ngà sv̀ng dèløtne,” laq mvwa. Pàwá wani mvgvm màshvla weí Gvray kaq dvløt mvlúnshì. Vrá, Gvrayí gø kagǿ sv̀ng gø màdvløt. 14Vsv̀ng tiqgǿ nø vdè mapnøt sv̀ng cv̀n bǿò kvt, dvløtlv́m lòng vhǿ:mò we íe. #Rom. 7:7-10 15Wervtnø̀ mapnøt zv́ngshìvm kvtnø, mvrà shøq daqòe. Mvrà gòngvm kvtnø shì lòng shøq daqòe.
16Shóngshø̀ng we vnvm vchvngrìé, dvdvm mènàléshìnø̀ng ni. 17Shvla we nv̀ng kø̀mgøm we gønpaq í dv́ngte nø muqlàng taqlap kèní í nø̀, muqlàng gálòng má:nò Pè Vpè Gvrayí zi daq we íe. Àng taq nø vshøtnvm we bàngzì dø vshøt vlíng we màvl. #1Yh. 1:5; Mat. 7:11 18Nøngmaq nø Àng dvmv́nrì taqkèní ring vtvng tiqpv̀n ílv́m dvpvt, Àng vdè nøt cà:nò nø̀, dìnglòng mòngkàí nøngmaq sv̀ng ègv̀l bǿshà.#Yoh. 1:13; 1Pt. 1:23
Kà ta nø̀ cv̀n vsv̀ng wáshì rà we
19Shóngshø̀ng we vnvm vchvngrìé, yaciq kaq shá rae. Kagǿ gø tálv́m yv́ng vpán nø̀, shø̀nlv́m nv̀ng shv̀mná rílv́m yv́ng laq vtǿn. #Shú. 7:9 20Pàwá wani vsv̀ngò shv̀mná rí lù:ngí nø Gvrayò døngman lòng màdvbung lú:ngò. #Eps. 4:26 21Wervtnø̀ nǿmtuqtuq laqyàrì nv̀ng mvgv́m nøt shvngbe chut ègurnø̀ng. Dòngnøt sv̀ng chutchv́ng ngu:tnò we, nàmaq nøt mvsø̀n vdòng vkvtshaq mòngkà sv̀ng kønnø:tní nàtonø̀ng. #Kol. 3:8; 1Pt. 2:1 22Mòngkà cv̀n vsv̀ng èwáshìnø̀ng. Mòngkà sv̀ng tá wa táò weí vdè kaq yúmshì vsv̀ng mèwáshìnø̀ng ni. #Mat. 7:26; Rom. 2:13 23Kadø íe wani mòngkà sv̀ng tá wa táò nø̀ mvcà:nò gǿ nø jv̀mna taq vdè mv̀rshv̀m yv́ngshì we vsv̀ng dø vshv́me. 24Wegǿ nø àng mv́r sv̀ng jv̀mna taq yv́ngshì dá:ngí divm we, tv́n tiqlvng nø àng mv̀rshv̀m kadø í we sv̀ng ce vnáshì bøe. 25Ínìgø, nøngmaq sv̀ng shèlàng daqshà we, kø̀mgøm we dvrá sv̀ng tøptøp wa gù:nò gǿ nø, táò dá:ngí vná bǿò vsv̀ng mø̀í. Cà:nò vsv̀ng íe. Wegǿ nø à:ngí wàò rì taq ìshøt lú:nòe. #Yak. 2:12; Rom. 8:2; Yoh. 13:17
26Kagǿ í nìgø, vdè nø noqngø̀m tvrà taq nøt lø̀me, wa dvdvmshì dá:ngí, àng pvlè sv̀ng mvøpshì gǿ nø àng vdè yúmshì we íe. Wegǿ noqngø̀m tvrà nø vshø̀ng íe. #Shz. 34:13 27Nøngmaq Vpè Gvrayí vtoò we mv́ngshèr nø̀ cip màvl we noqngø̀m tvrà nø, dvshácha we dvrvtcèrì nv̀ng memàrì sv̀ng yv́ngaò nø̀, àng vdè gø rvgaq tø̀m mvmv́ng mvshèrrì màvcaq dø rvdashì lòng íe.
Поточний вибір:
Yaku 1: GSM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024, Rvcv́ngcè Kàru Gomidi Kristu Shvngø̀mré. All Rights Reserved.