Joni 5
5
Sa lako ki Jerusalemi ko Jisu, a sa vakabula e dua na tamata sa tauvi-mate, 1-9. O ira na kai Jutia era sa vakacacani Jisu, ka via vakamatei koya, 10-16. Sa vakatakila vei ira ko Jisu ni ka talai koya mai ko na Kalou, 17-39. Sa vunauci ira talega ni ra sa bese ni vakadinata na nona vosa, 40-47.
1NI sa oti na veika o qo sa dua na nodra solevu na kai Jutia; a sa lako cake ki Jerusalemi ko Jisu. 2Ia ka sa tu mai Jerusalemi e dua nai silisili e voleka ki na matamata-ni-koro ni sipi, a yacana e na vosa vaka-Iperiu ko Pecesita, a sa lima na kena vale. 3Sa le vuqa era tauvi-mate sa davo kina, o ira na mataboko, na lokiloki, na wamalai, era sa wawa me vakayavalati mada na wai. 4Ni sa lako sobu mai e dua na agilose e na gauna e so ki nai silisili, ka vakayavalata na wai: ia ko koya sa sobu kina eliu ni sa vakayavalati na wai, sa bula mai na mate kecega sa tauvi koya.
5A sa toka maikina e dua na tamata, sa mate tu ka yabaki tolusagavulu ka mani walu. 6Ni sa raici koya ko Jisu ni sa davo, ka kila ni sa dede, sa kaya vua, O sa via bula, se segai? 7Sa kaya vua ko koya sa tauvi-mate, Sa sega, saka, e dua na noqu tamata me kauti au ki nai silisili, ni sa vakayavalati na wai; ia niʼu sa lako tikoga, sa liu sobu vei au e dua tani. 8Sa kaya vua ko Jisu, Tu cake, taura cake na nomui mocemoce, ka lako. 9A sa bula vinaka vakasauri mai na tamata, ka taura cake na nonai mocemoce, ka lako: ia na siga ko ya na siga ni vakacecegu.
10O koya o qo era sa kaya kina na kai Jutia vei koya sa vakabulai, A siga ni vakacecegu o qo: sa sega ni tara vei iko mo colata nai mocemoce. 11Sa kaya vei ira ko koya, O koya sa vakabulai au, sa kaya vei au ko koya, Taura cake na nomui mocemoce, ka lako. 12A ra sa qai tarogi koya, O cei na tamata sa kaya vei iko, Taura cake na nomui mocemoce, ka lako? 13Ia ko koya sa vakabulai, sa sega ni kila se ko cei ko koya; ni sa lako lo yani ko Jisu, ni sa lewe vuqa e na tikina ko ya.
14Ni sa oti na veika o qo sa kunei koya ko Jisu e na vale ni soro, ka kaya vua, Raica, o sa qai bula vinaka; kakua ni valavala ca tale, de yaco mai vei iko e dua na ka e ca vakalevu cake. 15Sa lako tani na tamata, a sa tukuna vei ira na kai Jutia ni sai Jisu sa vakabulai koya.
16Ia e na vuku ni ka o qo sa vakacacani Jisu kina ko ira na kai Jutia, ka gadreva me ra vakamatei koya, ni sa kitaka ko koya na veika o qo e na siga ni vakacecegu.
17A sa kaya vei ira ko Jisu, Sa cakacaka tikoga ko Tamaqu, koi au talega, au sa cakacaka. 18E na vuku ni ka o qo era sa gadreva vakalevu kina na kai Jutia me ra vakamatea, ni sa sega ni vakacacana walega ko koya na siga ni vakacecegu, ia ka sa kaya talega ni sa Tamana na Kalou, a sa vakatauvatani koya kina kei na Kalou.
19Sa qai vosa ko Jisu, ka kaya vei ira, E dina, e dina, au sa kaya vei kemudou, E sega ni rawai a vakai koya ga e dua na ka na Luvena, ia na ka ga sa raica ni sa kitaka ko Tamana; ia na veika sa kitaka ko koya, sa kitaka o qo na Luvena talega. 20Ni sa lomana na Luvena ko Tamana, a sa vakatakila vua na ka kecega sa kitaka ko koya; ia ena vakaraitaka vua na cakacaka e so sa uasivi cake e na veika o qo, mo dou kurabui kina. 21Me vaka sa vakaturi ira cake na mate ko Tamana, ka vakabula, sa vakabula vakakina ko na Luvena me vaka na nona veitalia. 22Ni sa sega ni lewa e dua na tamata ko Tamana, ia ka sa lesia na Luvena me ia na lewa kecega; 23me ra vakarokorokotaka na Luvena na tamata kecega, me vaka era sa vakarokorokotaki Tamana. O koya sa sega ni vakarokorokotaka na Luvena, sa sega ni vakarokorokotaki Tamana sa talai koya mai.
24E dina, e dina, au sa kaya vei kemudou, O koya sa rogoca na noqu vosa, ka vakabauti koya sa talai au mai, sa rawata na bula tawa mudu, ena sega talega ni cudruvi; ia ka sa lako tani mai na mate ki na bula. 25E dina, e dina, au sa kaya vei kemudou, Sa lako mai na gauna, a sa yaco edaidai, me ra na rogoca na domo ni Luve ni Kalou ko ira na mate: ia ko ira sa rogoca era na bula. 26Me vaka sa bula vakai koya ga ko Tamana; sa solia talega vua na Luvena me bula vakai koya ga: 27a sa lesi koya talega me ia na lewa, e na vuku ni sa Luve ni tamata. 28Dou kakua ni kurabui e na ka o qo: ni sa lako mai na gauna era na rogoca kina na domona ko ira kecega e nai bulubulu, 29a ra na lako maikina; o ira sai valavala vinaka, era na tu cake tale me ra bula; ia ko ira sai valavala ca, era na tu cake tale me ra cudruvi.
30Au sa sega ni kitaka rawa e dua na ka vakai au ga: au sa lewa me vaka na ka kaʼu sa rogoca: a sa dodonu na noqu lewa; niʼu sa sega ni muria na noqu veitalia, a veitalia i Tamaqu ga o koya sa talai au mai. 31Kevaka sai au sa tukuni au, sa sega ni dina na noqui tukutuku. 32Sa dua tani sa tukuni au, ia kaʼu sa kila ni sa dina nai tukutuku sa tukuni au kina ko koya. 33Dou a talaki vei Joni, a sa tukuna na ka dina ko koya. 34Ia ka sa sega ni yaga vei au me ra tukuni au na tamata: ia kaʼu sa kaya ga na veika o qo, mo dou bula kina. 35Ko koya o qori na rarama sa caudre tu ka cila mai; ia dou a vinakata vakadede vakalailai ga mo dou reki e na kena rarama.
36Ia nai tukutuku kaʼu sa tukuni kina sa levu, ka lailai na nona ko Joni: a cakacaka sa solia mai vei au ko Tamaqu meʼu vakaotia, a cakacaka o qo kaʼu sa kitaka tiko, sa tukuni au, ni sa talai au mai ko Tamaqu. 37Ia ko Tamaqu, o koya sa talai au mai, sa dautukuni au. Dou a sega ni rogoca na domona e na dua na siga, se raica na nonai tovo. 38A sa sega ni tiko e na lomamudou na nona vosa; ni dou sa sega ni vakabauti koya sa tala mai ko koya.
39Dou sa vakasaqaqara e nai Vola; ni dou sa nanuma dou sa rawata kina na bula tawa mudu: ia ko ira o qo sa tukuni au.
40Ia dou sa bese ni lako mai vei au, mo dou rawata kina na bula. 41Sa sega ni yaga vei au me ra vakarokorokotaki au ko ira na tamata. 42Ia kaʼu sa kilai kemudou, ni sa sega ni tiko e na lomamudou na loloma vua na Kalou. 43Au sa lako mai e na yaca i Tamaqu, ia dou sa sega ni vakabauti au: kevaka sa lako mai e dua tani e na yacana walega, dou na vakabauti koya. 44Dou sa vakabauta rawa vakaevei, ni dou sa veivakarokorokotaki tiko vakai kemudou, ka sega ni gadreva na vakarokoroko sa lako mai vua na Kalou duaduaga? 45Dou kakua ni nanuma niʼu na beitaki kemudou vei Tamaqu; sa dua sa beitaki kemudou tiko, ko Mosese, o koya dou sa vakararavi kina. 46Kevaka dou a vakabauti Mosese, dou na vakabauti au: ni sa volai au ko koya.
47Ia kevaka dou sa sega ni vakadinata na nonai vola, dou na vakadinata vakaevei na noqu vosa?
Поточний вибір:
Joni 5: FIJ1864
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
First full Bible in the Fijian language © British and Foreign Bible Society, 1864.
