Joni 6
6
Sa vakani ira na tamata e le lima na udolu ko Jisu, 1-15. Sa lako voli e na dela ni wai ko Jisu, 16-21. O ira na tamata era muri koya ki Kaperinaumi. A sa vunauci ira ko Jisu me ra gumatua e na ka vakayalo, 22-58. E so vei ira ma nona tisaipeli era sa vosakudrukudru, 59-65. Sa tukuna ko Petero ni sa Luve ni Kalou ko Jisu; a sa tukuna ko Jisu ni sa dua vei iratou sa tamata ca, 66-71.
1NI sa oti na veika o qo, sa lako-kosova ko Jisu na wai mai Kalili, mai Tiperia.
2A sa lewe vuqa sara era sa muri koya, ni ra raica na veika-mana sa kitaka ko koya vei ira sa tauvi-mate. 3A sa cabeta ko Jisu na ulu-ni-vanua, a sa tiko sobu maikina kei iratou na nona tisaipeli. 4A sa voleka na solevu ni lako-sivia era sa dauia na kai Jutia. 5Ni sa qai ta cake na matana ko Jisu, ka raica ni ra sa lewe vuqa sara sa lako mai vua, sa kaya vei Filipo, Edatou na volia maivei na madrai, me ra kania ko ira o qo? ( 6A sa kaya na ka o qo me vakatovolei koya: ni sa kila ko koya na ka sa nakita me kitaka.) 7Sa kaya vua ko Filipo, Ena sega ni rauti ira na madrai sa voli e na tola e tolusagavulu, me ra tauyadua vakalailai ga. 8E dua vei iratou na nona tisaipeli, ko Adriu, a taci i Saimoni Petero, sa kaya vei koya, 9Sa tiko eke e dua na gonetagane sa tu vua e lima nai buli madrai parile, kei na ika lalai e rua: ia ka yaga vakacava o qo vei ira na lewe vuqa vakaoqo?
10A sa kaya ko Jisu, Vosa vei ira na tamata me ra tiko sobu. Ia ka levu na co e na yasana ko ya. A ra sa tiko sobu na tamata, era sa lewe lima beka na udolu. 11A sa taura na veibuli madrai ko Jisu, ka vatonaka, ka vota vei iratou na tisaipeli, ia ko iratou na tisaipeli vei ira sa tiko sobu; ka vaka talega kina na ika me rauti ira. 12Ia ni ra sa mamau, sa kaya ko koya vei iratou na nona tisaipeli, Soqona vata na tikina lalai sa vo, me kakua ni yali e dua na ka. 13Eratou sa qai soqona vata, ka vakasinaita nai su e tinikarua e na tikina lalai ni buli madrai parile e lima, sa vo vei ira sa kana.
14Ia ni ra sa raica na caka-mana sa kitaka ko Jisu, ko ira na tamata, era sa kaya, Sai koya dina o qo na parofita ko ya e dodonu me lako mai ki vuravura. 15Ia ni sa kila ko Jisu ni ra sa nakita me lako mai ka tauri koya vakaukauwa me ra bulia me tui, sa lako duadua tale yani ki na ulu-ni-vanua.
16Ia ni sa qai yakavi mai, sa lako sobu ko iratou na nona tisaipeli ki na matasawa, 17ka vodoka na waqa, ka lako-kosova na wai kivaka ki Kaperinaumi. A sa qai butobuto mai na vanua, a sa sega ni yaco vei iratou ko Jisu. 18A sa vakabiau na wai e na vuku ni cagi levu sa liwa. 19Ia ni ratou sa voce yani e tolu na maili ka vakacaca, eratou sa raici Jisu ni sa lako voli e na dela ni wai, ka torova na waqa: a ratou sa rere. 20A sa kaya vei iratou ko koya, Oi au o qo; kakua ni rere. 21Eratou sa qai vinakata me vodo ki na waqa ko koya: a sa qai udu vakasauri na waqa ki na vanua eratou sa lako kina.
22E na sabogibogi, o ira na lewe vuqa era sa tu e na tai kadua ni wai, ni ra sa raica ni sa sega maikea e dua tani na velovelo, a ya ga ka vodoka ko iratou na nona tisaipeli, a sa sega ni vodo vata ki na velovelo kei iratou na nona tisaipeli ko Jisu, ia ko iratou na nona tisaipeli eratou a soko yani vakai iratou ga; ( 23ia ka sa lako mai e so tani na velovelo mai Tiperia, sa voleka ki na yasana era a kana madrai kina, ni sa vatonaka oti na Turaga:) 24ni ra sa raica na lewe vuqa ni sa sega ni tiko maikea ko Jisu, sei iratou na nona tisaipeli, sa vodo ko ira talega ki waqa, ka lako yani ki Kaperinaumi, me vakasaqarai Jisu.
25Ia ni ra sa kunei koya mai tai kadua ni wai, era sa kaya vua, Vakavuvuli, o sa lako mai kike ninaica? 26Sa vosa vei ira ko Jisu, ka kaya, E dina, e dina, au sa kaya vei kemudou, Dou sa sega ni vakasaqarai au e na vuku ni dou sa raica na veika-mana, a ya ni dou a kania na veibuli madrai, ka mamau. 27Dou kakua ni oca me kemudou na kakana sa oti rawa, ia me kemudou ga na kakana sa tu ki na bula tawa mudu, a ya ena solia vei kemudou na Luve ni tamata: ni sai koya sa vakadinadinataka ko na Kalou ko Tamana.
28Era sa qai kaya vua, A cava me keitou cakava, me keitou kitaka kina na cakacaka sa vinaka vua na Kalou? 29Sa vosa ko Jisu, ka kaya vei ira, Sai koya o qo na cakacaka sa vinaka vua na Kalou, mo dou vakabauti koya sa tala mai ko koya.
30Era sa qai kaya vua, A cava nai vakadinadina ko sa cakava, me keitou raica ka vakabauti iko? a cava ko sa kitaka? 31a noda qase era a kania na mana e na veikau; me vaka sa volai, Sa solia vei ira ko koya na madrai mai lomalagi me ra kania.
32Sa qai kaya vei ira ko Jisu, E dina, e dina, au sa kaya vei kemudou, Sa sega ni ko Mosese sa solia vei kemudou na madrai ko ya mai lomalagi; a ya ga ko Tamaqu sa solia vei kemudou na madrai dina mai lomalagi. 33Ni sai koya o qo na madrai mai na Kalou, ko koya sa lako sobu mai lomalagi, a sa solia na bula vei ira na kai vuravura. 34Era sa qai kaya vua, Turaga, solia tikoga mai vei keimami na madrai o qo.
35A sa kaya vei ira ko Jisu, Oi au na madrai ni bula: o koya sa lako mai vei au, ena sega ni viakana; ia ko koya sa vakabauti au, ena sega ni viagunu tale. 36Ia kaʼu a kaya vei kemudou, Dou a raici au, ia dou a sega ni vakabauta. 37O ira kecega sa solia mai vei au ko Tamaqu, era na lako mai vei au: ia ko koya ena lako mai vei au, au na sega sara ni biuta tani. 38Niʼu sa sega ni lako sobu mai lomalagi meʼu kitaka na lomaqu, a ya ga na loma i koya sa talai au mai. 39Ia sai koya o qo na loma i Tamaqu sa talai au mai, meʼu kakua ni vakayalia e dua vei ira sa solia mai vei au ko koya, ka meʼu vakatura cake tale e na siga maimuri. 40Ia sai koya o qo na loma i koya sa talai au mai, me ra rawata yadua na bula tawa mudu ko ira sa raica na Luvena, ka vakabauti koya; ia kaʼu na vakaturi koya cake e na siga maimuri.
41Sa qai vosakudrukudrutaki koya ko ira na kai Jutia, e na vuku ni sa kaya, Oi au na madrai sa lako sobu mai lomalagi. 42A ra sa kaya, Sa sega li ni ko Jisu ko koya o qo, a luve i Josefa, a tamana kei na tinana eda kila? sa qai kaya vakacava mai ko koya, Au sa lako sobu mai lomalagi?
43O koya o qo sa vosa kina ko Jisu, ka kaya vei ira, Dou kakua ni vosakudrukudru. 44E sega ni lako rawa mai vei au e dua na tamata, kevaka sa sega ni yarataki koya ko Tamaqu sa talai au mai: ia kaʼu na vakaturi koya cake e na siga maimuri. 45Sa vola na parofita e so, Ena vakavulici ira kecega na Kalou. A ra sa lako mai kina vei au ko ira yadua era sa rogoci Tamaqu, ka sa vakavulici. 46Ia ka sega ni raici Tamaqu e dua na tamata; o koya duaduaga sa lako mai na Kalou, sa raici Tamaqu ko koya.
47E dina, e dina, au sa kaya vei kemudou, O koya sa vakabauti au sa rawata na bula tawa mudu. 48Oi au na madrai ko ya ni bula. 49Sa kania na mana mai na veikau ko ira na nomudou qase, a ra sa mate ga. 50Sai koya o qo na madrai, sa lako sobu mai lomalagi, me ra kania na tamata, ka sega ni mate. 51Oi au na madrai bula sa lako sobu mai lomalagi; kevaka sa dua e kania na madrai o qo, ena bula tawa mudu: ia na madrai kaʼu na solia sa lewequ, a ya kaʼu na solia me bula kina ko ira na kai vuravura.
52Era sa qai veileti vakai ira na kai Jutia, ka kaya, Sa solia rawa vakaevei na tamata o qo na lewena me da kania?
53Sa qai kaya vei ira ko Jisu, E dina, e dina, au sa kaya vei kemudou, Kevaka dou sa sega ni kania na lewe ni Luve ni tamata, ka gunuva na nona dra, sa sega vei kemudou na bula. 540 koya sa kania na lewequ, ka gunuva na noqu dra, sa rawata na bula tawa mudu; ia kaʼu na vakaturi koya cake e na siga maimuri. 55Ni sa kakana dina na lewequ, a sa ka-ni-gunu dina na noqu dra. 56O koya sa kania na lewequ, ka gunuva na noqu dra, sa tu vei au, koi au talega vei koya. 57Me vaka sa bula tiko ko Tamaqu sa talai au mai, au sa bula talega e na vuku i Tamaqu; sa vaka talega kina ko koya sa kani au, ena bula e na vukuqu. 58Sai koya o qo na madrai sa lako sobu mai lomalagi: sa sega ni tautauvata kei na mana sa kania ko ira na nomudou qase, a ra sa mate ga: o koya sa kania na madrai o qo, ena bula tawa mudu.
59Sa vosataka na veika o qo ko koya e na vale ni lotu, ni sa vakatavuvuli tiko mai Kaperinaumi.
60Era lewe vuqa vei ira na nona tisaipeli ni ra rogoca, era sa kaya, A vosa dredre o qo: o cei sa rogoca rawa? 61Ia ni sa kila ko Jisu e na lomana, ni ra sa vosakudrukudru na nona tisaipeli e na vuku ni ka o qori, sa kaya vei ira, Sa vakatarabetaki kemudou na ka o qo, ne? 62Ia dou na raica beka na Luve ni tamata ni sa lako cake ki na tikina ka tiko kina eliu. 63Na kena vakayalo sa solia na bula: na kena vakalewena sa sega ni yaga: a vosa kaʼu sa vosataka vei kemudou sa vakayalo, a sa vu-ni-bula. 64Ia sa so vei kemudou sa sega ni vakabauta. Ni sa kilai ira mai nai vakatekivu ko Jisu era sa sega ni vakabauti koya, kei koya ena soli koya yani. 65A sa kaya, O koya o qo kaʼu a kaya kina vei kemudou, Sa sega e dua na tamata sa lako rawa mai vei au, kevaka sa sega ni solia vua ko Tamaqu.
66Mai na siga ko ya e le vuqa vei ira na nona tisaipeli era sa suka tani, a ra sa sega tale ni lako vata kaya. 67Sa qai kaya ko Jisu vei iratou na tinikarua, Dou sa via lako tani beka koi kemudou talega? 68Sa qai kaya vua ko Saimoni Petero, Turaga, keitou na lako vei cei? sa tu ga vei iko na vosa ni bula tawa mudu: 69ia keitou sa vakabauta ka kila, ni sai Karisito ko iko, na Luve ni Kalou bula. 70Sa kaya vei iratou ko Jisu, Au a sega li ni digitaki kemudou na lewe tinikarua, ia ka sa dua vei kemudou sa nonai to na tevoro? 71Sa vosataki Juta Isikarioti, na luve i Saimoni, ni sai koya o qo ena soli koya yani, a sa dua vei iratou na tinikarua ko koya.
Поточний вибір:
Joni 6: FIJ1864
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
First full Bible in the Fijian language © British and Foreign Bible Society, 1864.
