लुका 24
24
ॱलार सो़न्पो श्याङवा
(मेथा २८:१-१०; मारकु १६:१-११; योहान्ना २०:१-१०)
1धी़न्डागी ङीमा धाङपोगोला ॱङारोक ॱनाम शारा-शीरीला, होदे केमीक्याई डाढीक झ्येजा ढीशाङक्या खेरती, खुङक्या धी़ठोदु सोवालाक। 2धेनी खुङक्याई धी़ठोला काप्ती श्याकश्या फोङगीङगो, ॱहाला रीरी श्याकश्या थोवालाक। 3हीना नाङदु जुली घाङला, खुङक्याई चोवो येशुगी कुफुङगो ॱमाङेबालाक। 4धेनी होदेला खुङक्या गो थोम्दी धेदी घाङला, हो़क ग्याप्कीन घो़ घो़न्गा, मी ॱङी खुङक्याचारु ज्यावालाक। 5धेनी खुङक्या जीक्ती साला घुक झ्येरी धेबालाक। धेनी होदे मी ॱङीउगी खुङक्याला ॱनेवालाक, “खेक्या स्यीम्बुगी खोकला सो़न्पोगोला घीझ्येरी चालाले? 6खोङबा ॱलार सो़न्पो श्येङसारती दुरु मेतालाक। गालीलदु हो़ती घाङला, खोङबागी खेक्याला सुङगीनगो ढेन्सो़ झ्यी, 7‘मी-भु धीक्चेनक्याई लागाला ची ग्याप्ती, ग्याङस्यीङला टोङगीलाक धेनी श्याक्मो सुम्बागोला ॱलार सो़न्पो श्याङगीलाक।’”
8धेनी खुङक्याई खोङबागी सुङसा लाबगो ढेन सो़वालाक। 9धेनी खुङक्या धी़ठोने लोक्ती, दे लाब घीरी ङेने च्युक च्यीक धाङ श्येम्मा घीरीला स्येपालाक। 10होदे केमीक्या मीरीयाम माक्दालीनी धेनी योआन्ना धाङ याकोबगी आमा मीरीयाम लाक। धेनी खुङक्याईमुला हो़गीन केमी श्येम्माक्यागीयाः, दे लाबक्या कुछापक्याला स्येपालाक। 11हीना कुछापक्याई दे लाब क्षोमेगीन लाब साम्दी, खुङक्याला यीच्चे माझ्येवालाक। 12हीना पेटो लारी धी़ठोदु भाङ तारी सोवालाक। धेनी नाङदु घुक झ्येरी ती घाङला, फुङबुला टीटा रेगो च्यीगा थोवालाक। घी झ्युजागो थोरी खो ॱहाङसारी, होदेने लोक्ती सोवालाक।
येशु ईम्माउसगी लाम्गाला
(मारकु १६:१२-१३)
13होदे ङीमाला ङेनेक्याने मी ॱङी येरुसालेमने, छुची ॱङीचो़ थाक्रीङाला हो़गीन ईम्माउस ॱनागीन युला डी़ हो़तालाक। 14खुङ ॱङीउ होदुरु घी झ्युजाक्याई कोरला, लाब ताङी हो़तालाक। 15खुङ ॱङीउ लाब तारी ढो़ झ्यीदी घाङला, येशुराङ खुङक्याचारु फेप्ती खुङक्यामुला फेप्पालाक। 16खुङक्याई ॱमीकगी येशुला ङो स्येयेने डीप हो़तालाक।
17धेनी येशुगी खुङक्याला सुवालाक, “खे ॱङीउ घीन्गी कोरला लाब तारी डोवाले?” खुङ ॱङीउ सेम क्योरी, टोङ झ्येरी धेपालाक।
18होदे ॱङीउने कीलेउपास ॱनागीनगी़ खोङबाला ॱनेवालाक, “येरुसालेमदु फेप्ती, होदुरु धीक्जाङ घी झ्युङगीनगी कोरला स्येये मेन्गीन, खेराङ च्यीगा ले?”
19खोङबागी, “घीन्गी कोरला?” सुरी ढीवा जेपालाक।
धेनी खुङ ॱङीउगी ॱनेवालाक, “नाजारेतगी येशुगी कोरला। खोङबा को़न्क्षोक धाङ मी घीरीगी दोङदु छीक धाङ क्षाक्लेला नी़थु क्षेन्बो हो़गीन, ॱङो़नस्येखेन च्यीक लाक। 20धेनी हीकी क्षो़पो़न क्षेक्या धाङ पो़न्पोक्याई, खोङबाला सेयेगी ठीम कारी ग्याङस्यीङला टोङबालाक। 21हीना ईस्राएलला थारपा ॱनाङगीनगो खोङबाराङ लाक ॱनेरी, हीकी ॱरेवा झ्येवी। धेनी दे च्यीगा मेन्दा, दे घीरी झ्युरी धा श्याक्मो सुम डी़। 22दे ॱमेछेदा, हीकी भोमोक्याने रीङगागी हेला ॱहालेरु च्युक्जुङ। खुङक्या धीरीङ ॱङारोक ॱङात्ती धी़ठोदु सोदुक, 23हीना खोङबागी कुफुङगो होदुरु ॱमाङेदुक। खुङक्याला नाम्खे भाङछेनक्याई, खोङबा कुसो़न्पो श्याङदुक सुङगीन थोङनाङला थोरी, लोक्ती होरी हेक्याला ॱनेजुङ। 24धेनी हीकीमुला हो़गीनक्याने रीङगा धी़ठोदु लाजुङ। धेनी भोमोक्याई ॱनागीन च्योक्रे थोदुक हीना खोङबाला माज्यादुक।”
25धेनी खोङबागी खुङ ङीउला सुवालाक, “ॱलेन्पो ख्ये, ॱङो़नस्येखेनक्याई सुङगीन घीरीला, धेपा मीझ्यीगीन घीन्गी सेम ॱलेन्दा ले! 26मास्यीकागी दे घीरी दुक्पु ङ्याङ घो़री, खोरी शीजेदु फेप घो़गु माले?” 27धेनी मोशे धाङ ॱङो़नस्येखेन घीरीने गो चुक्ती, सुङराप घीरी नाङने, खोङबागी कोरला सुङगीन घीरीगी दो़न्दाक, खुङक्याला खोङबागी टो जेपालाक।
28धा खुङ ॱङीउ डुगीन युगो भोलोक्तु ॱलेप्ती, येशु खुङ ॱङीउने ॱहाला फेप्ये झ्येवालाक। 29हीना खुङ ॱङीउगी येशुला उजुक झ्येरी श्यी़वालाक, “हीकीमुला श्युक्रो ॱनाङ घीझ्येरी ॱनाना ङीमा फेप्ती ॱरो रुक्कु झ्यीदी।”
धेनी खोङबा खुङ ॱङीउमुला श्युक्येला नाङदु फेप्पालाक। 30धेनी खोङबा खुङ ङीउमुला श्येलाकला श्युई घाङला, खोङबागी ग्याङगा च्यीक क्षाकला ॱनुम्दी झ्यीलाप जेपालाक धेनी च्याक्ती खुङ ॱङीउला ॱनाङवालाक। 31धेनी खुङ ॱङीउगी ॱमीक बेवालाक धेनी खोङबाला ङोस्येवालाक। धेनी खोङबा खुङ ॱङीउगी दोङने येरी फेप्पालाक।
32खुङ ॱङीउगी च्यीकगी च्यीकला ॱनेवालाक, “खोङबा होरीमुला लाम्गाला कामो़न सुङी घाङला धेनी होराङला को़न्क्षोकगी सुङलागी दो़न्दाक्या टोली घाङला, होरी सेम नाङदु मे भारकीन च्योक्रे ढोवा माझ्युवाले?”
33धा खुङ ॱङीउ होदे घाङलाराङ लारी, येरुसालेमला लोक्पालाक धेनी कुछाप च्युक च्यीक धाङ खुङक्यामुला जोम्गीनक्याला थुक्ती 34ॱनेवालाक, “चोवो धेन्पाराङ ॱलार सो़न्पो श्येङदुक धेनी सीमोनलाः ज्यावालाक।” 35धेनी लाम्गाला झ्युजा लाबक्या धाङ ग्याङगा च्याक्ती ॱनाङी घाङला, खुङ ॱङीउगी येशुला ङोस्येगीन लाब घीरी श्येम्माक्याला स्येपालाक।
येशु ङेनेक्याचारु
(मेथा २८:१६-२०; मारकु १६:१४-१८; योहान्ना २०:१९-२३; जेपा १:४-८)
36धा खुङक्या दे लाबक्या ताङी घाङला, येशु खोङबाराङ खुङक्याई घुङदु फेया जेदी सुवालाक, “खेक्याला श्यीदे हुङास्योक।” 37हीना दोङडे च्यीक थोवा हीन्ढु साम्दी, खुङक्या थोम्दी जीक्पालाक।
38धेनी खोङबागी खुङक्याला सुवालाक, “खेक्या घीझ्येरी जीक्याले? धेनी खेक्या घीझ्येरी सेमला दोक्पा झ्यीदाले? 39ङी लाक्पा धाङ काङबाला तो़, ङाराङ हीन। खेरी लागागी ङाला जुरी तो़। घीझ्येरी ॱनाना दोङडेगी स्या धाङ रीगोक मेयोङालाक हीना ङाला हो़गीनगो थोङालाक।”
40देरे सुङसारती खोङबागी, खुङक्याला खोरी क्षाक धाङ श्याप तो़न जेपालाक। 41धेनी खुङक्या ङ्यामो घेरी यीच्चे माझ्येवा ॱहाङसागीनगो शीक्ती, खोङबागी खुङक्याला सुवालाक, “खेक्याला दुरु शाये रे हो़ते?” 42खुङक्याई खोङबाला ङ्या ॱङो़ङा दुबु च्यीक पुवालाक। 43धेनी खोङबागी होदे लेन्दी, खुङक्याई दोङदुराङ श्येपालाक।
44धेनी खोङबागी खुङक्याला सुवालाक, “खेक्यामुला हो़ती घाङला, ङी ॱनेना लाबक्या देराङ लाक। मोशेगी ढीक्टा क्षो़ठीम धाङ ॱङो़नस्येखेनक्याई धेप धाङ सुङगुरला, ङी कोरला ढीक्टा लाब घीरी डुप घो़गीलाक।”
45धेनी को़न्क्षोकगी कागो ॱहाघोरास्योक ॱनेरी, येशुगी खुङक्याई स्येराप सावा जेपालाक।
46खोङबागी खुङक्याला सुवालाक, “देरे ढीक हो़तालाक, मास्यीकागी दुक्पु ङ्याङ घो़गीलाक धेनी श्याक्मो सुम्बागोला छीवाने सो़न्पो श्याङगीलाक। 47धेनी येरुसालेमने गो चुक्ती, मीरीक घीरीला खोङबागी छेनने धीक्पागी ग्यो़पा धाङ घोयाङगी कोरला क्षो़ स्येघो़गीलाक। 48दे लाबक्याई पाङपो खेक्या लाक। 49तो़, ङा ङी यापगी धाम्चा जेजागो, खेक्याचारु झाङयेहीन हीना तो़ने वाङगो खेक्याई खाला माभाप्कीन थुक्पे, खेक्या दे ग्याजारु राङ धो़क।”
येशु नाम्खे श्यीङखामला फेप्पा
(मारकु १६:१९-२०; जेपा १:९-११)
50होदे स्याम्ने येशुगी खुङक्याला बेथानी थुक्पे ठीया जेदी, राङगी क्षाक ताक्ती खुङक्याला झ्यीलाप ॱनावालाक। 51खोङबागी खुङक्याला झ्यीलाप ॱनाङी घाङला, खोङबा खुङक्याने खा डारी नाम्खा स्योकला ठीया जेपालाक। 52धेनी खुङक्याई खोङबाला क्षाक छारी ॱमीच्यीकी ङ्यामो घेरी, येरुसालेमला लोक्पालाक। 53धेनी खुङक्या च्योई क्षो़खाङदु, को़न्क्षोकला तो़टा पुरी धेदालाक।
Поточний вибір:
लुका 24: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
